華哥不專業鞋評 Asics Novablast 3

Interviewed by: Insports Hub編輯部  Photos by: albertykkuk

1. 見你很喜歡「朝活」，可以講下如何養成這習慣？

日語中有一個詞叫做「朝活」，意思是指有效利用早晨起床後的一段時間從事各種活動。 

我未跑步之前，覺得早起身係一件好難嘅事。但每次見到人「朝活」跑，自己都都蠢蠢欲動，後來身邊有朋友都好想加入 「朝活」跑。 俗語有云「約咗人就會出現」，於是就約朋友一齊晨早「朝活」 跑。

一開始覺得好辛苦，但習慣之後，發現時間其實好用咗好多。朝早跑完步返工，無想像中甘辛苦，仲覺得時間多咗。另外，早起身嘅好處就係間中睇到好靚嘅日出，晨早陽光及清新空氣，只有「朝活」先體會到。所以不知不覺呢個習慣維持到而家。

2. 你也跟過其他跑班（NSF，吳師傅)，跟 ASICS 的 Winter Sir（徐弘泰）教的有什麼不同？ 

我初初學跑步係跟 NSF 跑班。所以加入咗ASICS 班後，其實好易適應訓練模式。因為 Winter 係師承 NSF 吳師傅嘅教法，兩者都係差不多嘅訓練內容。有衝圈、有長課、有tempo。 只係 ASICS 參加者每人嘅能力不同，而 Winter Sir 就會作出少少修改，希望人人都可以跟到練習。

3. 見到你的 IG 跑步相，應該家住南區，有沒有什麼特別喜愛的跑步路線？

我推薦由香港仔運動場跑去淺水灣。呢條路線來回8K，唔算好長。由香港仔運動場出發，又可以bag drop，如果朝早跑，分分鐘撞到名人。最重要條路線風景好靚，望到海洋公園吊車，另外當望住個海跑，又可以放空，所有煩腦都暫時放埋一邊。

4. 你是如何準備港珠澳賽事中的 Pacer 角色？

由競賽跑手變做 Pacer，心態上要作出調整，由不停要追時間變成要 keep 住穩定配速去幫人追時間，過程仲緊張過自己比賽，要每公里控制速度難度好高，唔可以太快或太慢，因為跟住我哋嘅跑手，對我哋完全信任。 加上港珠澳係一場田總嘅正式比賽，好多參賽者都會認真對待，以爭取個人最佳成績。 所以我哋都唔可以鬆懈。

港珠澳係第一年舉行，大家都未跑過條路，只係知上落波幅較大，全程冇遮冇掩，半馬即 21K 中長距離比賽，所以喺 Pacer  訓練上會針對耐力嘅練習，以我哋要帶領嘅配速嚟練，平時練 4K x 3  tempo ， 而長課就跑 15K 嘅配速練習。

5. 你在比賽中擔任 Pacer 時有沒有任何難忘的經驗？

記得比賽當日，有參賽者質疑我哋： 「係咪可以準時1:55 內返到終點？」因為佢哋見到我哋上斜好似比原定配速慢咗啲，驚我哋會跌速。但我哋好肯定同佢哋講，有上斜就會有落斜，落斜時自然就就會快番少少，拉上補下。叫佢哋放心，只要跟住配速，一定能夠準時返到終點。我哋工作除咗做配速之外，仲要穩定佢哋信心，等佢哋不必顧慮太多，集中精神比賽。

最後我哋都能夠成功返到終點，之後佢哋都好開心咁同我哋講「多謝」；見到佢哋滿足嘅笑容。比自己 PB 更加開心。

6. 對於希望在半程馬拉松中達到目標時間的跑者，有什麼建議？

對於希望喺半馬中達到目標時間嘅跑者，除咗有足夠練習之外，比賽前一日要多補水，比平時仲要食多少少碳水化合物。 比賽當日，建議頭段用平穩嘅配速，因為半馬拉松最辛苦嘅係 17K 後。

頭段要保持體力，後段覺得自己仲有力氣嘅話，就加快速度衝返終點，創造個人最佳成績。好榮幸成為 TEAM ASICS 一份子，擔任 Pacer 幫助別人之餘，亦令自己喺跑步上多咗一份使命感。

Interviewed by: Insports Hub編輯部  Photos by: albertykkuk

1. 你既是運動治療師，亦是跑手，你覺得兩個角色有什麼關連或互相幫助？

運動治療師可以利用自己專業嘅知識以及對肌肉嘅運用去預防受傷同進行強化，同時亦可以幫助身邊嘅跑手朋友，令到佢哋遠離傷患，再創PB！

2. 可否以運動治療師的身份，簡單講解一下可如何避免傷患？

跑手們受傷其中一啲原因，主要係肌力不足同唔懂得如何使用肌肉，而引致容易產生肌肉代償，過度使用肌肉而引致受傷。
慶幸嘅係，由於我喺讀書時期已經不斷學習如何使用唔同肌肉發力，所以練習起嚟就會更得心應手，比賽時如果遇到突發狀況，亦都可以轉換唔同肌肉代替。

3.  是什麼動機讓你成為港珠澳半馬這場比賽的ASICS Pacer？

因為喺跑場征戰多年，覺得幫到人完成目標嘅滿足感更大，而我哋提供穩定嘅Pacing可以令佢哋跑得更舒服、更容易跑得好成績。最後穿過終點線嘅時候，得到佢哋嘅感謝同肯定，係最開心嘅事。

4. 你是如何準備這場比賽的Pacer角色？

Pacer最重要就係穩定嘅配速，所以我哋訓練時會有一個特定嘅配速要求，例如：4分35秒每公里。
我哋訓練時就會要求唔望錶，靠用身體嘅感覺，努力維持4分35秒每公里去跑，時間耐咗，我哋身體自然記住咗435嘅感覺，所以好容易知道自己有冇跑快或跑慢。

5. 你在比賽中擔任Pacer時，有沒有任何難忘經驗？

最難忘嘅經驗就係上一次港珠澳半馬，因為路與路之間有一個好大嘅空隙，好多跑手都因為睇唔到而跌倒或者拗柴，我哋遇到呢個情況，就要即刻每一次臨跑到空隙前，都會提佢哋一齊跳起，結果大家就好似Mario一樣，成件事好搞笑！

6. 另一半都跟你一起做運動，是否會有較少有拗撬？

係呀，主要都係享受兩人相處時光，放鬆心情，一齊感受汗水嘅揮灑，最主要大家都係想放空。

Interviewed by: Insports Hub編輯部  Photos by: albertykkuk

1. 見你玩好多運動：健身、體操、滑雪，跟跑步有相關嗎？

我會叫自己做”Jack of all trades, master of none”。意思大致是咩都「識少少」，但無一樣精通。自己性格都是貪玩，樣樣都想試，啱玩就投入，玩到悶就找下一樣野玩。之前跑步是強身健體為主，近兩年機緣巧合下先開始練跑，叫做認真多少少。都幾享受每樣都玩下，起碼無得跑步的時候都可以找其他方法放電。

2. 你跑過好多地方，都不是有名的六大馬之類，可以介紹一下嗎？ 哪裡最深刻？

上年名古屋女子馬拉松是初馬，今年跑多一次名古屋；首爾馬，仲有剛剛的台北女子「香香半馬」。

其實大半都是形勢做成的，跑馬年資淺所以要用時間qualify 就無我份，又無抽獎運。基本上這些都是肯比報名費就可以參加的賽事。自己性格亦比較即興，通常比賽前幾個月先決定要跑，所以真係有咩可以報就報咩。

最深刻其實是今年首爾。因為連著名古屋所以抱住玩的心態跑，全程放仼打卡，同其他跑手傾計。有時候太專注做時間跑完好似發咗個夢一樣。今次首爾42k，每一公里都好實在。

3. 香港跑馬跟海外有什麼不同？ 

最大分別都是心態方面，始終去到海外人生路不熟，又有機會語言不通，所以自然會提早計劃一下比賽之前同當日的安排。可能因為這樣，心態亦不自覺地認真了，心理凖備總好像比在香港比賽時充足。

4. 對於希望在半程馬拉松中達到目標時間的跑步者，你有什麼建議？

盡量放鬆心情去面對比賽。要做到目標時間很多時候都要靠天時地利人和多方面配合，做到目標時間當然好，但做不到又不代表之前付出過的努力全都白費。學會接受有很多因素都不受自己控制，自問有盡力嘗試過就可以了，不要被成績否定你的努力。

5. 作為Pacer，你遇到過哪些挑戰，以及是如何克服它們？

我個人覺得最大挑戰更多的是比賽前訓練的一段時間。平日訓練比起比賽動力始終會低點，再加上自己在備賽期間受傷，有好幾個月都不太跑得到。心情有時都會難受，狀態唔好時候會想放棄，但又顧慮到如果身為Pacer 都跑唔晒program，會否影響到來參加跑班的人？

克服的話就是調整心態，明白Pacer都一樣會傷、會攰，平時會同人哋講傷咗要休息，要量力而為，唔好迫死自己。唔落場跑都可以喺場邊為大家打氣、影相，或者陪下其他一樣掙扎緊的跑手。Pacer除咗帶跑之外，都可以有好多其他的用途。

6. 輔助其他跑手跑步和為自己參加比賽有何不同？

做了Pacer，穿上寫著Pacer或TEAM ASICS在身上的時候，就是代表著品牌同大會，一舉一動別人都會看在眼內，所以更加要學會放低自己。雖然在比賽期間，可能會有緊張、興奮或攰的感受，但都會盡量控制好自己情緒，亦都會喺言行舉止上加倍謹慎，盡量唔好影響到其他跑手。

Interviewed by: Insports Hub編輯部  Photos by: albertykkuk

1. 恭喜你 Winter Sir（徐弘泰），剛剛在首爾馬拉松Sub3完賽。你是如何平衡跑手跟教練的身份？

坦白講絕對無平衡過！
其實由擔任教練後唔多唔小真係放棄咗跑手嘅身份，因為如果想挑戰返自己嘅PB成績，除非有好多時間（例如無正職），否則好多時會兩頭唔到岸（無論做跑手/教練都做唔好）。想好好照顧到每一位學生，其實唔只於課堂上嗰2-3小時嘅訓練。課堂外亦有好多唔同嘅訓練建議、心理輔導等等，所以花上嘅心力同時間亦都唔小。而現在呢一刻嘅我亦希望專注喺教練嘅工作上。

至於剛剛嘅首爾馬拉松Sub3真相其實係…努力訓練8個星期 + 食老本同埋食老本同埋食老本所得出嘅結果 🤣🤣！

2. 教TEAM ASICS跟你教的一般跑班有什麼不同？ （訓練上或心態上）

絕對有唔同，TEAM ASICS係經過跑步能力上嘅篩選。TEAM ASICS成立嘅目標係希望組成一班跑步能力高，同時有能力幫助他人嘅團隊（例如擔任Pacer，或喺訓練中擔任助教及協助帶領活動）。

因此訓練上再唔係由基礎訓練開始，TEAM ASICS除咗有更進階嘅跑步訓練，亦有學習擔任教練嘅訓練（例如表達方式、說話技巧及安全管理等等）。另外亦需要進行配速員訓練，為ASICS協辦嘅比賽出力。

3. 對TEAM ASICS有什麼特別期望？

（1）保持對跑步嘅熱誠，繼續挑戰自己；
（2）用跑步嘅熱誠感染及協助更多人去跑步；
（3）學識同理心去幫助唔同階段嘅跑手，因為每個人嘅能力唔同、家庭背景唔同等等，唔應該只有一套訓練模式，所以鼓勵或指導他人時應該多思考，而唔係淨係有「我做到你都做到嘅諗法」。

4. 看到ASICS跟你一直保持友好關係，可否講一下ASICS對你的支持？你又會想帶給 ASICS什麼樣的幫助？

ASICS係我由青少年開始接觸嘅品牌，而ASICS亦係跑界佔有一個好重要嘅席位。所以我一直都好自豪自己係ASICS嘅一份子。

我會以教練身份一同舉辦以下嘅活動：長跑訓練、街跑活動、組成PACER TEAM及TEAM ASICS等等。喺呢個合作過程中，除咗以教練嘅經驗教授外，我亦好多時會以跑手嘅身份及經驗為各活動提供意見，務求令整件事情更貼地，令更加多參與者受惠，及認識ASICS呢個品牌。

最後我好感恩喺過去同ASICS合作長達7年嘅日子入面，ASICS Marketing嘅同事一直好願意聆聽我嘅意見，一齊做好每件事，呢個亦係我能夠一直同ASICS保持友好關係嘅原因。