馬拉松與人:Car Car

比賽相終於出爐😊日本馬連啲相都靚啲😂
10度有陽光下,著背心跑剛剛好!

雖然sub4唔到,不過都PB咗!Net time: 4:04:55

對上一次PB 4:08已經係2018年渣馬,仲好記得當時教練俾我下隻全馬目標405!但往後兩年轉戰山賽,係雙修情況下難以專心練跑,之後經歷3年無任何比賽嘅疫情,發覺人生需要一些衝激,於是2022年尾報咗愛丁堡馬,當時時間4:17:05

我仍然心有不甘,再報神戶馬,事隔5年終於達成PB🤣🤣🤣🤣

比賽當日天氣一流,溫度大概8-10度,大部份時間天晴,好適合跑全馬!

值得一讚係日本所有安排都相當好,好多細節位都好好!當我見到賽前有無限蕉同水提供,真係好感動🥹🥹🥹。好記得喺跑愛丁堡等上線時好凍,未開跑有餓感,跑緊見到民間支持者手上有唯一一隻蕉,正想拎嗰陣俾個鬼佬搶咗😭😭😭,嗰刻心知大鑊啦!

除此之外,佢哋流動廁所亦有分大小便,唔使只想小便嘅人等太耐!男廁係無門,起碼慳兩秒!仲集中排一條人龍,好有效率!

跑道全程可以同市民近距離接觸,仲有好多補給食物,可我無緣試🥲 

賽道嚟講算唔錯,係有啲位比較窄,比想像中多上斜,由於天氣好,加上心率控制ok,基本上頭30k唔辛苦,係33K開始感覺肌力唔夠所以跌速,跑咗6隻馬整體嚟講呢隻最唔辛苦,頭30K可以叫舒服😌,終於理解到低心率嘅訓練目的,雖然25K hamstring開始有感覺,但全程保住無抽筋,真係好感恩🥹

好記得臨尾37k上橋一落橋仲可以喪跑,希望追得一秒得一秒,今次完全無天使魔鬼角力,無想行嘅感覺,反而35後覺得手腳好似機械式咁要不停轉動;水站停低飲水都唔停太耐,手腳好想郁!我42K嘅心路歷程係將佢分開5K 5K咁叫自己跑85K😂,咁樣好快就完成30K

尾段只能講自己肌力唔夠,腳好想郁,但快唔到,最後200米先覺得點解咁耐都到未😆

臨近終點仲有大量輪椅standby好貼心!睇返35-402分鐘都算係咁!比著以前跌到失控🫠

今次歷時5個月訓練,正值香港盛夏,熱到我一度想放棄,效果又覺得唔理想好沮喪!不過落到場比我想像中好,仲唔辛苦!雖然未能Sub4,但成個過程感覺好好!係另一種對全馬嘅正面體驗!👍🏿👍🏿

85%可控範圍,37K上完橋仲放膽去衝落斜而無抽筋算係奇蹟!理解到要跑成隻馬點樣控速控到尾唔會跌得誇張係一個技巧!第二就係點樣喺可控情況下再跑快啲,突然覺得全馬係好好玩嘅運動😃;休養期又開始心癢癢….犯賤🤣

日本係能提供全天候配套俾跑友去跑馬嘅地方(尤其亞洲人,香港人!):

1. 賽前有24小時營業嘅牛丼,令你賽前吸收足夠碳水,一碗熱飯熱湯對東方人應該係幾重要‼️(跑過外國賽就會明)

2. 唔同地方都有溫泉酒店,令你喺賽前賽後都可放鬆舒緩肌肉,保持輕鬆狀態。

3. 大會流動廁所充足,甚至會分開大小廁區,以免參賽者浪費時間排隊。

4. 賽前或比賽途中補給充足,無論你做時間定fun run,只要喺指定位置都有足夠嘅水/運動飲品/大會補給食物/民間自發補給食物,而且唔同地方有唔同特色土產,一定唔會餓親!

5. 大會沿途有足夠工作人員協助,市民亦全程近距離打氣加油!給予參賽者好大支持力量!

6. 終點附近開始有輪椅侍候俾有需要人士,衝過終點有完賽毛巾,方便隨即影相留念或保暖!

7. 完賽後補給充足,一隻半熟蛋、一碗簡單嘅麵豉湯都令跑手好感動🥹

8. 終點後有體育館俾參賽者沐浴更衣,唔使戶外吹風,而且指示清晰!

9. 比賽時限長達6-7個鐘,唔使趕收工!或者俾人鬧阻住過馬路!因為當地市民全程投入🫰🏿

日本跑馬真心無得彈,原因好簡單,因為係日本!唔知要考慮啲乜🤭 

法國巴黎跑步團隊提案 ON X DISTANCE CLOUDFLOW 4

來自瑞士蘇黎世的新世代跑鞋代表 ON 自 2010 年誕生以來,就決意藉著各種創新專利技術,為傳統跑鞋設計帶來嶄新進化,致力為全球跑步愛好者帶來顛覆性的輕盈步履感受。

打從聯同瑞士 ETH ZURICH 科研學院合作,攜手研發出名為 CloudTec® 的專利緩震技術開始,這個瑞士國寶級運動品牌不但迅速憑藉高回彈性、高穩定性、平均分散的緩衝效果,以及零重力足感等設計特點全面攻陷歐美市場,持續贏得全球專業跑手的高度評價。

而且適逢運動時尚元素近年主導流行領域, ON 更多次聯同高端時尚品牌 LOEWE 帶來專屬的聯名企劃,貼切回應時尚界的熱切需求。

近期這股源自瑞士的人氣風潮還進一步蔓延至法國巴黎,全因為有關方面破天荒攜手當地著名運動創意團隊 DISTANCE,正式於今季帶來雙方首枚 COLLABO 限量作品:ON x DISTANCE CLOUDFLOW 4。

DISTANCE 運動選物商店以透過跑步主題作為號召,於歐洲 RUNNING CULTURE 中扮演著一個無可取替的推動角色。而她之所以成功獲得各大品牌的高度信任,持續妥託販售最新跑鞋,除因其銷售版圖早已從巴黎中心地帶擴展到里昂,甚或非洲肯亞;而且這個創意主導的流行團隊向來擅長策動不同的話題企劃,成功一改大眾對跑步運動沉悶無趣的刻版印象。

當中最佳例子莫過於 2021 年適逢法國政府落實全新的城市車輛限速法例,所有駕駛者必須以不多於 30km/h 時速行駛於巴黎市內。而 DISTANCE 立即看準時機,聯同一眾跑手以超過規定的配速於馬路的 SPEED CAMERA 前馳騁,務求讓限速相機成功拍下跑手超速一刹那。

及後,所有違例「快相」更化為張貼於街頭巷尾之間的廣告海報,不但獲得高度注視,而且更在當地新聞報道中出現,令 DISTANCE 𣊬間聲名大噪,成為城中熱話。

至於在林林總總的跑步主題活動之外,近年 DISTANCE 亦同步於大大小小的聯名企劃中展現品牌獨有的美學設定。尤其是今回重點推介的 ON × DISTANCE CLOUDFLOW 4 特別企劃,將乘著今年暑假雙方首個 COLLABO 服飾系列所引動的人氣風潮,再次糅合雙方的美學因子,完美套用於跑鞋設計之上。

ON x DISTANCE  CLOUDFLOW 4 聯名機種,顧名思義正是通過 ON 剛於早前推岀的旗艦款式 CLOUDFLOW 4 作為創作主軸。

當中不但繼續採用超輕量編織鞋面結構,帶來極緻通爽透氣和貼合腳掌的舒適著用體驗,而且為進一步提升跑手步伐的快速轉換,更於中底内層加入湯匙狀的 NYLON SPEEDBOARD 夾板設定,配合雙層 CloudTec® 緩震技術與 Helion 超強泡棉所互相支援的頂級中底系統,為跑手們時刻提供顯著的回彈力、牽引力與支撐效能。

再加上鞋頭位置靈感源自物理距離公式 D=S×T 的 DISTANCE 線性品牌標記、專為是次企劃從新設計的專屬鞋墊配置、鞋舌上的 DISTANCE 粉紅色調字樣,還有右側 代表 SWISS ENGINEERING 的瑞士國旗細節,直令這枚橫跨 ZURICH 與 PARIS 的話題作品,誓必成為一眾跑步愛好者的入手焦點!

更多圖片發佈 Nike Alphafly 3

Nike Alphafly 3 官方發佈更多圖片,並確認明年1月4日開售。各 Nike 跑者密切留意。

Air Zoom 氣囊、ZoomX 泡棉、Flyplate碳板當然是保留了。而其餘更新包括:

-首次將前後掌泡棉底部連接。令過渡更平滑,以適應更多類型配速。
-全新輕質 Fast Shot 外底,提升抓地力。

-更寬的全掌碳板,以提升穩定性。
-有史以來最多的女性參與測試,新鞋楦、新鞋墊,提升低足弓支撐性。

-全新 Atomknit 3.0 鞋面,提升中足支撐。
-重新設計的繫帶系統,通過將鞋眼固定件集成到 Atomknit 鞋面,為腳面帶來更柔軟的貼合感。

馬拉松與人:Daniel 下関海響馬拉松

唔係出口術, 今次目標同 PB 差好遠,因為無論賽事季節(喺香港8-10月練馬🥵)、天氣(預報廿幾度、晴)、賽道(多斜)、賽前訓練都唔理想。

只求頭半程 5 分pace、之後仲有力就加快少少、跑番次 negative split

賽道有橋有隧道,喺海邊如果逆風同曬都大鑊

一萬人嘅中小型賽事,對呢個中型城市嚟講,都係件盛事;今屆更重新招待海外跑手;我就係 13 個外國跑手之一

Expo 嘅規模相當細,但都好期待完走後飲碗河豚湯 🐡

賽前我話目標 negative split,原來太輕視後半程嘅艱辛。

賽道先甜後苦:頭 17K 大致係平路,有関門海峽嘅美景;18-36K 有四大段上斜,大部份係沉悶嘅倉庫、隧道、公路。

17K 按計劃頗輕鬆地 5 分披,上落完第一大段斜,到 25K 都保持到平均 5 分,上第二段斜要稍為減速,到 28K 折返,反方向上剛才嗰斜,斜度相當高,撞正跑手三大敵人大斜、迎面烈陽、逆風 📈☀️🌬️,咁就出事!

如果頭半程跑呢段應該還好,但到接近「馬拉松而家至開始」嘅 30K 就好艱辛,一下子消耗咗大量體力同意志,再到 33K 上連續 3K 嘅長命斜就更 GG 了。最尾 6K 嘅落斜同平路,出酸繃緊嘅雙腿已無法回復正常速度。

而家明白先苦後甜(如果一定要有苦)有幾重要,同點解上星期嘅金澤馬係 PB 賽道。

不過都唔可以賴哂賽道同天氣,我見有啲跑手後半程都 keep 得幾好,始終係自己練得唔好,尤其係 9 月份種種原因令里數嚴重不足。正所謂「潮退後便知誰沒穿泳褲」,30K 後上斜便知誰沒練得夠。

簡單總結:第五隻馬,時間第二快,表現第二差。

今次旅跑好開心

跑步方面,雖然自己跑得唔好,但每次比賽都能累積經驗,總有得着,而老婆同阿女一齊跑 2K fun run,阿女中途辛苦到想放棄,最終都堅持到,仲達到賽前目標時間!畢竟當初揀呢隻冷門馬,係就阿女放假,而佢有 fun run 亦係原因之一。

旅遊方面,山口縣無乜外國遊客,好舒適。只係交通唔多方便,五日行程去到嘅地方有限,好多我想去嘅幕末史蹟都無得去,亦唔知幾時有機會再去。

馬拉松與人:MakChi 芝加哥馬拉松

六分之二 | 03:28:45 | sub330

芝馬嘅感覺好漫長。本應係發生在疫情之前,輾轉之間等到 2023。中間生活變化很大,情緒起伏都係。跑步訓練亦由一直慣常嘅,轉到新嘅模式同環境。

18 星期嘅賽前訓練,由阿希為我安排。由當初不太熟悉對方,經歷每星期 4 次嘅 training log 交流,彼此變得無所不談 – 嚴格來講,大部分時間只是我單方面放負,所以相比起一個教練,佢更似我心理醫生。感恩一直有阿希支持同陪伴,「相信自己、相信訓練」、 「要多謝一路以來努力訓練嘅自己」…通通成為咗我呢次完走芝馬嘅最強大力量。

一直以來,很多跑友都會問,目標係咩?我往往都答「無呀」,其實是認真的。我純粹想跑出一次比一次進步嘅馬拉松。不論喺時間上、心態上、造型上、危機處理上,我都想一次比一次進步。成日睇住時間跑好辛苦,都好無趣,我唔想咁。能夠證明自己嘅,唔應該只有跑步成績。

比賽日天氣比預期寒冷,但都算係一個理想天氣。經歷 18 週嘅訓練,我知道自己身體應該可以以 4:40-4:50 配速完走,前提係受傷位置冇咩大礙。喺 D 區等待開跑好漫長,都好 L 凍,賽前熱身基本上係零,只做到有限度嘅動態熱身。我哋見到 3:20 同 3:30 嘅 Pacing Team,就攝咗埋去,跑嘅時候希望可以用佢哋嚟做 benchmark。

接近開跑,除雨褸、除衫,就開始了。一開跑條路好大好闊,所有人都好 L 快,可能真係凍得太耐,又可能係 runner’s high 作祟。頭段我計劃先跑上 M pace,好讓身體盡快適應同變暖,而最重要係想避開跑得較慢嘅人群。由於芝加哥好多高樓大廈,GPS 變得異常不可靠,所以頭段只好依賴感覺去跑。每 km 發現快了,下 km 就調整,一轉眼就跑完 5km。

和柏馬比較,芝加哥頭段真係超有愛。人群同打氣聲從無間斷,有 rock band、有 hip hop、有 dancing team、有 marching band,有老有嫩,一句又一句 keep pushing you’re doing great marathoner,已經感覺勁窩心。

「終於追上你」,一轉頭係 Adam。一如以往嘅輕鬆樣,8km 左右佢追上我。平時佢跟偉龍班,所以嚴格嚟講今次係我哋第一次一齊跑。佢嘅 M pace 同我差唔多,大家一直 keep 住 4:40-4:50 嘅舒服狀態。同佢一齊跑,時間過得超快,佢好有趣,成日講野,同埋會搵我擋風 – 明明大隻過我,離譜。

不過都好彩有佢,提我食 gel,果個 check point 我真係幾乎 miss 咗(芝馬係計 mile 為主,但佢啲 mile 又唔係每 mile 都有指示,而 km 都係好間唔中先有,都幾混亂)。唔覺唔覺,我哋一齊跑過埋個半馬位。1:42 內,同我預想一樣,更重要係,我身體感覺依然良好。

到咗 23km 左右,突然變得好靜,Adam 已經脫隊。望望錶,仲喺 M pace range。接近 30km,一樣嘅狀態、一樣嘅心態。但有樣嘢覺得好困擾 – 攝影師呢?一直都見唔到,有見到嘅就掛住吹水無影,想點?我同阿希講過,我最大目標其實係嚟影靚相!好彩一陣過後,一個又一個咁出現,都算係咁,不如就 PB 咗個表情管理先。

35km 後,腳傷嘅感覺終於爆出嚟。其實真係好感恩,35km 都一直保持得好好,之後嘅就係意志力時間。37km-39km 係整場賽事中最靜路段,好少人、好無氣氛,如果頭段係嘉年華,呢段就係圖書館。

一條不見盡頭嘅大直路,一個又一個嘅上斜位,加上一個忍痛作抽筋嘅跑手,所有嘢都變得更加漫長。慶幸聽到 Daft Punk 嘅 One More Time,再提醒自己,捱埋去,好快就衝線。

今次最叻嘅係,負面想法從來無出現過。就算跌速都同自己講,無嘢架、放鬆啲、唔洗急,急就會亂,亂就會抽,抽就真係完。不過呢又唔好跌速太多,keep 住 5 分頭啦,5:10 啦,5:15 啦…相信自己、相信自己,諗吓諗吓又跑多 1km。

40km,食埋包 back-up Amino gel 就錶都唔睇咩都無諗捱落去 。一直諗,唔好俾我見到 330 Pacing Team 就得。尾段大直路,人群終於開始多番,但路牌更加亂同密,又 last mile 又 last 1km 又 800m 又 500m,喂之前又唔見你出得咁密?!去到直路盡頭,90 度彎角,我就知道真係快衝線了。

呢一刻,終於真係敢俾力去盡,抽就抽,遠遠見到 Finish,咬實牙關 9 衝過去!看看錶,總時間 3:28:45,弱弱的 PB 了。

坦白講,內心真係無咩十級興奮,7 級左右 maybe。我知道 100% 嘅自己其實係可以 achieve 到更好。不過,用返阿希語錄,「要接受唔完美嘅自己」、 「欣賞自己多啲」。

芝加哥,將來應該都無咩機會再去。很喜歡妳的 riverside、很喜歡妳的橋架,謝謝妳見證了我的小進步。
下一隻,應該是 NYC 吧?

馬拉松與人:Jade 金沢馬拉松

My first marathon
Gun time: 3:24:02:
Chip Time: 3:22:02
⌚️: 3:19:39(睇最後就知點解🤣

158日的訓練,1680km堆砌的神奇42.195km
由打算上馬時嘅目標 Sub4 到想 sub345再到加入 adidas SpeedSquad phase 1 練習後有信心目標 sub330

訓練中後期又好想挑戰下自己,偷偷將目標改 sub325賽前又衡量咗一下自己嘅能力好想試下sub320!(事實係自己能力真係未夠🤣🤣

初馬大成功,最多謝嘅係我「背後」嘅男人 @hin_mau,報埋名同我一齊練習、一齊去跑機票、交通、行程等等都幫我安排好等我安心工作同專心練習知道我嘅目標諗法由練習到比賽都由我自己闖,默默地支持我
(都有苦口婆心勸我唔好俾自己咁大壓力)

講返比賽
落到場真係腦裡面凈係記得個句:「唔好開快」,只記得頭半段唔攰係正常,同埋邊個位要補給加上有 @woodeewoodee @wong_tai_wai @kidult_halu 帶住走,信心大好多!佢哋提我埋水站,好彩學得快,經過頭3個水站嘅練習之後埋水站都唔緊張又拎到水,係辛苦幾位忍受我成日跑跑下就拎張紙巾出黎抹鼻涕,haha😂

話咁快就過完傳說中嘅最難頭 14K, 但都保持到均速去!到 21k!好認真地去感覺自己攰唔攰,ok!狀態都唔差,笑得出,回應到周邊打氣嘅人

保持均速,希望應該問題不大呀但跑跑下見到 @hin_mau 喺我後面係咩玩法?係中途去大?定係整親? 擔心了很久!!!!

全程好專注地跑,望下隻錶欣賞下風景靚,好多可愛小朋友熱情打氣有三段路,跑跑下聽到有人嗌:Jade 加油,唔知係邊位朋友仔, 謝謝你啊!!!!
跑跑下又有個係後面追住嗌:加油啊 adidas 加油!收到晒!🫡🫡
28k左右,突然覺得頂趾,同自己講唔緊要㗎,keep 住去,好快到終點了

再前小小…點解咁多上落斜㗎?點解要上橋㗎?Ok 搞得掂嘅…
終於到差唔多 35k 位置,上緊暗斜@hin_mau 喺後面追返我,終於可以放心了

走完呢段,突然感覺到髖緊咗一下,心想不妙隔一陣感覺到膝外側痛了無意外,係中咗 itbs,灰咗!

唯有不停同自己傾計, 又唔係無痛過,好驚咩?跑完飲啤酒啦
重新振作起來,只要體力同精神都還在,忍耐下、跛下跛下就到終點了
於是靠住意志盡量唔好跌太多速地跑
唔小心望到自己隻錶,40K@3:09:XX,開心嘅,即刻精神返小小
強撐落去勉強都可以 sub320

再前小小…點解大會牌係顯示 40k???

原來我 7 咗,掛住睇錶距離完全忽略左大會距離同時間因為自己蠢豬,又灰咗一下,真係又嬲又好笑
最後 3k,開始感受到真的攰了核心 hold 唔到了最後 2k 好似跑了 20k 咁耐。衝線永遠係最激動嘅

嗰下,原來過往練習嘅辛酸、後段嘅腳痛自己蠢豬事件嘅委屈係會全部一下爆發出嚟!未激動完就有個當地記者隊咗部機嚟話想訪問,好彩有 Hin 接住咗我,無俾人影低我喊包樣😭
最後…賺了自我挑戰嘅成功同喜悅賺了崩壞嘅 itbs;仲有兩隻腫三日嘅腳趾公 & 波子骨(已經好返)


繼續投入練習,下一場馬見!

馬拉松與人:Davis Garmin Run Asia Series – 2023 Thailand Half-Marathon

好耐無跑過半馬,好想將封塵7年嘅紀錄改寫,加上原訂下半年會去一次曼谷,所以便造就了這次曼谷半馬(當然要感謝 Garmin marketing 的安排)。

由於天氣炎熱,大會安排 4am 開跑,我們要 3am 到會場,和 Garmin Thailand Pacer Team 合照、熱身,便準備上線,我們被安排為 Elite runners,被帶到最前排和特邀選手一齊起步。一開始已提自己要保守點, 因天氣實在太熱,28-31 度, 熱和濕係我弱點,今日「開正我個開瓣」!

頭 5km 20:58,4:11 披, 感覺已經想跳船,但一早將目標設為 Top100(有枕頭), 同自己講試下慢少少, 之後 5km 22:12, 跳船嘅念頭不停在我腦海裡出現,係!好辛苦、好熱,散唔到熱, 試下跑慢啲,就係咁,不停在辛苦與小小辛苦之間遊來遊去。

每個水站都飲水加淋頭,好彩多水站仲要有冰水, 係冰 + 水!10-15km 連個 form 都開始散,不停同自己講,可以再慢啲,但個 form 一定唔可以散, 呢 5km 用咗 22:34。

剩下的 6km keep 住個 form 努力地不掉速,1:34 完成, 雖然不能以原訂目標完成, 但心跳平均 178,最高 200,這樣也不放棄,還能 PB,已算超額完成了。心沒有放棄,身體就會跟隨。

多謝各位, 無論 FBIGStravaGarmin connectAdidas running like過我嘅朋友, 你們每一個 like 對我來說都是一份鼓勵,是你們成就今天的我。

多謝 Garmin 兩位 marketing,不經不覺在這大家庭已兩年,希望將來一起經歷更多。每個人的天賦都不同, 但我相信只要不斷努力,總有一天會發光發亮,讓其他人看到你的存在,讓人生變得精彩

大會篇 – 點為之一個好嘅比賽?

Garmin Run Asia Series 2023 泰國站分別有 5km、10km 和半馬,雖然規模較小,報名人數不多,但很多 detail 都值得香港學習。 比賽的地方是一個奧林匹克場館,之前一天嘅 Expo 也在這裡。雖然並不大型,但由攞選手包、不同打卡位,到 21km 板上找自己名,各運動品牌的攤位和一些遊戲攤位都一絲不苟,最令人意外的是一個即影即有攤位,一張貼紙相上有三張相, 即影即有, scan QR code即時可在 google drive下載!

到比賽當天,零晨 2am 所有嘢已經準備就緒,這邊的 Garmin Pacer 亦準備好,不同的配速小隊亦綁好不同配速氣球。最勵害竟然有熱食,簡直係曼谷「夜繽紛」!

賽道沒有完全封路,所以動用了很多人手。影相位超多,由於天仍黑,大會安排得十分周到,當你見到前面有兩盞大射燈,即是說攝影師已在燈後埋伏了。水站亦很多,開始時每 2.5km 便有一個,之後更有運動飲品、香蕉和 gel。最窩心的是冰水,每杯水入面都有大量的冰,雖然 4am 開跑,但還是非常炎熱,這些水站的冰 + 水真的很重要!

跑完後基本完賽牌、完賽衫、水、蕉都沒什麼特別,但到出口位竟然又有熱食(燒賣皮雲吞、叉燒、燒肉、沙爹串燒等),仲有雪糕!比賽頭 1/2/3 有獎係基本,但 10km、半馬 Top 100 都有個枕頭, 呢個真係勁,勁開心皆大歡喜!

完賽後即時 scan 號碼布上的 QR code 便立刻知道自己的成績!厲害?未算, 完賽即日 FB 官網已有比賽相片連結 只需 upload 一張有你清晰頭像相片,人臉識別系統就即時把所有比賽相片送上!Package for all photo –  THB535 連手續費, 跑半馬都有 233 張相, 全馬咪過千!

最後恭喜隊友謙組別第一, Kanok 組別第三, 而我組別 12。 讓我們一起期待 12月31日 Garmin Run Asia Series 2023 香港站!

馬拉松與人:Fish 芝加哥馬拉松

「芝馬開門」呢個名喺我哋 2019 年抽中芝馬嘅時候就已經諗咗。結果呢一個實體賽由 2020 等到 2023 先可以跑。

無論年紀、體力都唔會再係 2020 嗰陣咁。有時會諗,當初想跑曬 6 大呢個夢仲會唔會實現到?唔知幾時先飛到?又要擔心可唔可以入到境?要跑到幾多歲先會完到?

有時都反問自己:係唔係咁鐘意跑步呀?一星期跑足 34 日,中間又去重訓(已經努力咗好多,但比其他同學都係懶嘅)。跑完仲有好多嘢做,家務、放狗、工作 etc…又要早瞓。我哋唔係職業運動員,但又要工作同跑步一齊其實好難,直頭時間管理大師上身先掂。

跑步其實係一個人,但又可以係一班人,途中有唔同嘅人一齊上同一架車。跑跑下有時好似 10 個救火的少年咁啲人落晒車,得自己一個。跑馬呢件事係可以好孤獨,可以好辛苦,但同時又會好熱血。謝謝自己嘅堅持。

好慶幸今次跑馬有一班隊友一齊訓練。
雖然大家有唔同嘅比賽,但都會就到一齊喺同一個 program 度。我哋經過咗黃雨、紅雨、黑雨、酷熱天氣警告,極端酷熱天氣告(除咗寒冷天氣警告),應該之後無論遇上咩天氣都難唔到我哋。無諗過跑嗰日香港都 9 號風球。

搵返柏林嗰陣我哋叫自己做「柏馬戲團」,但就無畫過任何嘢。今年嘅時間其實仲少,都總算係有限時間畫咗粒芝麻出嚟。芝麻代表我哋踏上紅地毯,跑進任意門通往下一個夢。因為呢道門等咗 1,095 日佢終於開。

第二粒星星 get!!!

跑前已經聽聞芝加哥係 windy city,但無諗過原來咁凍、咁大風。今次遲咗少少飛去適應環境,之前都有諗會唔會 jet lag 好嚴重,結果每日去到 2 點左右就開始眼瞓頭暈,去到差唔多晚飯時仲嚴重,要橕住唔可以瞓。喺比賽前一晚 5 點幾仲頂唔順喺梳化瞓咗 2 個鐘,起身頭暈頭痛,嗰一晚瞓覺仲標冷汗、頭痛。勁驚自己頂唔順會病。

起跑嗰朝凍到人到癲,除咗要等好耐 bag drop,唔好話熱身時間都無,就連廁所時間都無,已經要上線。唯有用 Henry 講嘅企鵝效應,企係人群中間保暖。

愈係接近起步時間就諗:「天啊~呢一日我等咗 3 年幾,終於企咗喺度,要實現夢想。」心底裡都會諗唔知做唔做到,因為經過 jet lag、長途機,身體都唔會係 100% 理想狀態。但我已經努力咗咁耐,要信自己做到。

一起步就除咗件五月天雨褸,之後就開始後悔,好 X 凍,個人起碼跑到 10k 先暖啲,但啲風一吹埋嚟就吹散晒儲低嘅熱。頭 2k 都有聽偉龍教練講要慢慢,之後望住隻錶見到自己個 pacing keep 咗一段時間 5‘28。心諗平時都無可能呢個 pacing 跑到咁長。唔通天氣真係咁大影響;心肺都唔覺攰。去到 25k 左右,對腳肌肉有啲啲反應,就拎咗包抽筋水喺手,未到 30k 前飲咗之後嘔咗一下勁大聲!我未飲過咁臭咁難飲嘅嘢

沿途一直都好好氣氛,有人打鼓、marching band,有啲 rock band 唱歌咁,但去到遠啲住宅區就無咩人打氣。中間有諗起 JohnnyHaysDick sir 一齊跑過 tempo 嘅時候,幻想你哋係一齊跑帶返啱個 pacing

跑出去市區有啲大橋,條橋有啲窿窿,一踩落去成個人咖啡杯都企唔穩咁,原來佢另一邊有紅地毯,但只係條橋嘅1/3因為條路係車路,最邊左右會斜向下,而中間有時都有啲坑渠蓋凹凸位,都好易成為作抽筋後嘅難關。一路跑嘅時候要注意。

成個比賽都係 mile 計為主,km 指示唔多,但就當自己跑緊馬場計法。跑多幾多個圈就會完咁。

30K 打後開始作抽筋,就知道自己無得再加速,唯有保持住唔好慢太多,心裡面係咁同自己咁講。21 miles 之後有個站左右兩邊有得噴止痛噴霧,有一刻想過入去,但跑去隔離線真係太遠,唯有向前跑。臨尾  23 miles 左右見到對面寫 24miles,再望向前面係有一條超大直路,心諗頂你,仲有幾耐先轉彎呀!?

直到去到 39k 突然唔得啦,小腿抽筋,一抽筋嗰下行埋咗一邊,想拉返鬆,但其實無可能,之後就諗起當年富士山馬拉松娘娘話抽筋都要跑,咁我就即刻出返去繼續跑。

跑跑下又真係無抽筋,之後開始見到啲人好興奮話仲有 1 mile, 咁我就嘗試加速,點知去到 400m 有個斜路!邊個諗出嚟㗎?內心喊出嚟?望住隻錶都就嚟 56 分,好似 55 分好睇啲,咁上完個斜無諗到就直衝過去。

停錶嗰下係 3:56,不過後來刻名 check 番大會時間係 3:55:55。嗰吓心裡面開心咗。跟住刻名嗰個人問我做咩咁多個 5 字。衝線嗰下好多嘢拎,有熊仔糖、啤酒、生果、donut,但全部都無謂口食,因為成肚 gel 又無加水食,頂住個胃。

謝謝所有有份同過我哋一齊跑長課訓練嘅朋友仔同教練。

因為 Covid 上年完全停咗訓練。數數手指都跑咗好幾個馬拉松,一次比一次認真訓練,用咗好多心機,經過上次德國馬拉松,明白到有時你準備得好好,但始終多變數,未必會如你所願。而今次終於喺凍加大風同無雨情況之下做到,實現咗一個少少嘅夢想,希望下次可以更快。最緊要係抽得中。

P.S: 喺上線前見到好多 50-5560-65 嘅女人,我希望係唔使去到呢個歲數,就可以 BQ😂

跑步與人:Joey

1. 跑步年資?為什麼開始跑步?
從接觸跑步起計,是 8 年;真正有系統訓練的話,是 3 年。中四開始跟學校田徑訓練,不過當時兼顧學業,同時準備中六 DSE,所以疏於練習。後來升上大學跟校隊訓練,當時卻又不想專注跑步,一直對練跑都不上心。直至投身社會大學,才開始真正堅持每星期練習。

2. 有沒有跟跑會或教練跑?選擇原因?
RMAC 文少杰教練。原本大學時期只依賴校隊訓練,year 4 時經校隊教練介紹,加入了文少成立的 WeMan。跟文少練習後,成績有所提升,期望之後可以繼續進步,一起努力!😆

3. 日常練習跑步地點或路線?原因?
跑 program(intervals、tempo etc..)的話會到運動場,jogging 的話喜歡跑街,例如馬鞍山海濱長廊、大埔吐露港、沙田城門河,可以放鬆心情看看風景。

4. 最喜歡的跑步用品品牌?最喜歡一對跑鞋
Adidas 為我提供了訓練及比賽所需的裝備,跑鞋 adios Pro 3 更是助我在各項路賽中有所發揮。

5. 有沒有跑步偶像?原因?
Sifan Hassan,短至 800m 長至馬拉松都有很好的成績。

6. 最深刻的一場賽事?原因?
2023 渣打馬拉松 10km,賽前幾天突然感染了 Covid-19,以為不能出賽了。當時很失落,因為努力準備了很久。白天上一整天班,下班練跑,回家還要溫習或寫畢業論文,然後第二天又重複著。稱不上很辛苦,但確實投放了不少心機準備這場比賽,最後跑不到的話,十分可惜。

幸好是第二次感染,身體復原得比想像中快,4 天便康復了,剛剛好在比賽前一天轉為陰性,身體感覺也十分良好,所以決定出賽。雖然康復,但始終令狀態大打折扣,也告訴自己盡力就好,不要太過博命。最終上場,竟僥倖獲得女子壯年組第三名、全場第五名(要哭了🥹)。一直付出的努力沒有白費,也很感激一路走來幫助過我的人。

7. 有沒有跑步傷患?如何處理?
很幸運,暫時未有傷患。

8. 除了跑步,有沒有做交叉訓練(例如舉重/游泳/瑜伽)?對跑步有沒有幫助?
每星期都有一課體能訓練,提升肌肉狀態;肌力好了,跑步表現也會有所提升。 偶爾也會做瑜珈,拉伸及放鬆一下身體。 

9. 有沒有因為跑步而放棄了其他運動?
跳舞是我另一項興趣,但近年全職上班、兼職讀碩士,工餘時間則專注練跑,可投放於跳舞的時間已經很少。

10. 見你一直都是跑中短途,未來會試挑戰長距離如半馬、全馬嗎?有沒有哪個比賽好想參加?
將於今年年底到台北跑我的初半馬,而全馬則暫時未有計劃,但應該會是 1-2 年後的事。

11. 未來有什麼比賽?現時跑步目標是什麼?
會跑些路賽及田徑賽,例如 RMAC 15km、台北半馬及田徑系列賽等等。跑步目標就是各項距離都希望有好成績!

12. 另一半有跑步嗎?對你跑步有意見嗎?有沒有到比賽現場支持你?
只要我想做的,他都十分支持。他以前是短跑運動員,所以更加明白練跑所需的時間和心力。雖然他現在已沒有練跑,但偶爾仍會陪我慢跑或練習。每次比賽他都會陪我一起去,給予我很多鼓勵及支持。

最後一題,有什麼社交媒體可以找到你?
個人IG: sumgirlwong
Team IG: wemanbyrmac 

*照片由受訪者提供

馬拉松與人:Norris 柏林馬拉松

今次柏林馬,好似發咗場夢咁。
由開始報名個刻,我已經知道呢條路係人稱「最速賽道」。即係呢條路好少上落、好少難轉嘅彎位,換句話講:做時間。由於自己嘅慢跑根基比較弱同跑量少,所以希望可以由基本做起,做好、做夠。

訓練 – 頭幾星期其實感覺幾好,強度調節得ok,有鬥志、有心法,Recovery都做得好好。目標係比SCM快大概10分鐘, a just right challenge。正因為我呢刻做唔到,訓練先有價值!

訓練中期 – 累積疲勞開始出現,再加上有一至兩星期睡眠質素極差,令本身已經要半勞動工作嘅我百上加斤。我嘅身體狀況承受唔到訓練。本身一課只係用Easy pace嘅長課我都只能夠勉強完成,訓練質素完全欠奉。

訓練後期 – 睡眠質素有改善,身體都回復得比早期好。但正值加量,里數要加、回復時間都要更長。可惜當我想提高強度嘅時候,香港天氣反常。我無機會用一個可觀嘅配速做一課30+公里長課。到最後,一課32k Fartlek要喺八號風球之後嘅晴天下勉強完成。

可能因為訓練時間太長,本身嘅雄心壯志已經燒到所剩無幾。加上自己嘅全職搞到我其實都無咩心機去理比賽嘅事。返工想瞓覺,放假都係想瞓覺…到上機前回想下過去20個星期嘅訓練,發現原來今次比賽嘅課題唔係時間,而係休息。上機前一晚都仲係休息得唔好,我要催眠自己:放鬆啲, 喺機瞓啦…

點知瞓瞓下,起身落機嘅時候成袋比賽衫Handcarry漏咗喺機!呢個打擊實在太大。我犯咗一個我想避免嘅錯誤,幸好仲有後備賽衫喺寄倉行李,所以不至於全盤損失。不過適應咗嘅衫/褲/Belt同賽鞋,兩對Incylene襪,兩副太陽眼鏡,拖鞋…

到埗後唯有即買即著,希望喺兩日間令到自己適應一對新鞋同新太陽眼鏡。雖然唔想使呢啲錢,不過呢一隻馬係我so far最投放心機資源嘅比賽,而我又好想test自己limit,所以都硬著頭皮,使啦

由於遺失行李一事太令我心神恍惚,好多嘢都唔記得。調節飲食期間可能因為緊張,屙左3日…不過點都好,比賽都係要嚟!雖然有好多唔順利嘅事,不過都嚟到呢一步,練咗幾多就幾多。天氣唔容許長課,我唯有focus on quality;機場staff搵唔到行李,後備gear都要用;瞓得唔好就飲咖啡條件limit咗我嘅能力、精神狀態同工具,我只可以用盡我嘅能力去發揮到最好。到呢刻時間成績真係其次,完成已經收貨

0-30K – 今次比賽嘅配速係比較進取,頭10K都同謙哥Darren拍住跑,一路感覺都幾好,當去到半馬位,我知我已經pb咗半馬,不過再keep咁高強度一定快爆,所以我叫謙哥跑先,我要配一配速先再加,其實一路都好多人,要同人爭位,又要踩藍線,又要計住時間,都幾難兼顧;不過腦裏邊不停徘徊嗰句Now or Never!呢幾日辛辛苦苦,排除萬難咁嚟到呢一步,我要好好咁execute呢件事,所以沿途我都只係好專心咁望住前面同感受速度。講真,未試過呢一個距離開呢一個強度,真係好似另一個世界、另一個遊戲。

30-35K – 沿途一路補給,強度都掌握得幾好,提住自己做補給,提住自己飲水。沿途一路陰天,心跳強度都唔算負荷太重,為免我自己水滾,我都跑入咗水簾兩次降溫,可惜到第35K我開始感到少少水滾,而今次個心跳落唔返去,心知係爆嘅跡象,不過點都好,我唔可以停。用咗幾公里嘅時間,終於接受到今次要做到目標係冇可能,但係放棄同接受現實係唔同

35-42K – 每一步跑都係痛苦、每一步都想行,因為我真係好耐冇試過爆。我嗰刻連Gel都無胃口食,我領會到有時啲嘢唔到你「撒賴」。 我不停提住自己:「放鬆,就算跌速都好,保持強度,唔好行。好好享受前35K無享受到嘅比賽氣氛、景物,同沿途嘅人。每一步嘅痛苦都係未來回味呢場比賽嘅一點甜。要好好珍惜每一刻嘅痛苦。」到最後,終於到達布蘭登堡門。我想加速,不過腹肌刺痛似尖叫,我真真正正體會到:無能為力…… 衝線後,有兩位工作人員扶住我,問我使唔使入Tent?我話:俾我企30秒,因為無論隻腳點郁都係會抽

衝線前一刻,我知道今次不合乎期望… 不過自己都處理好條件限制,調整好心情,所以衝線前都為自己自豪一下。好多人都話唔知點安慰我,不過真心,我都俾自己一個pass。除咗甩咗兩三隻腳甲外,呼吸心跳精神條件都無礙,休養後可以再次上馬…

種種事情發生,有人為、有天意,準備咁多,有意外,就唯有係種種條件容許下做選擇。每個人每日都係玩緊條件限制賽。不過分別在於:你有冇盡力去令你有更多嘅選擇?盡管有萬全準備,個天唔俾你跑,就一定有方法令你跑唔到,所以好多嘢只可以:盡人事,聽天命,一切隨緣…

我並唔係撒賴同推卸責任… 因為事實上我真係有責任去manage好自己嘅嘢… 如今只可以講一句:輸經驗,不過而家又係一個新嘅開始,知自己有邊度做得好,有邊度準備不足,我又可以重新再洗牌,希望下次食得出!

最後:
多謝教練s @ngaikang @platolook
多謝幾位師兄比賽照住小弟 @hothoo @dadicz
多謝「你哋幾個」兄弟s有馬無馬都一齊操
同埋各位對過我有期望嘅人