華哥不專業鞋評 Asics Novablast 3

以往Asics 嘅慢跑或訓練鞋都係比較厚同笨重(仲要相對貴,但襟著)見稱,所以一直都好少機會買一對嚟練習用(除咗 10 年前嘅 Gel Feather Fine 之外,當時係賣 $850)。10年後竟然會有吸引到我留意嘅鞋 – Asics Novablast 3,因為感覺上係一對輕得嚟又快嘅鞋,而價錢又只係賣 $890,今時今日有一對鞋唔過4位數係十分難得。

佢嘅定位係俾正常及高足弓跑友做恢復或長課訓練,中底外觀設計靈感嚟自日本摺紙藝術,以幾何結構去勾畫圖案。中底就轉用FF Blast+,希望可以令到對鞋更輕、反應更快。

鞋舌改用咗M型款令到腳背更貼合,而高腳背嘅朋友會更加適應、改善咗鞋舌兩邊貼合度,增加穩定性減少郁動。鞋面材質用咗至少 75% 循環再生材質製成。

鞋底改用咗 AHAR 耐磨大底,比以前品牌嘅外底有同樣重量加抓地性之外,耐磨比以前高一倍。

慢跑落腳個陣,對鞋嘅腳掌係會有小小頂住,有幫助推你向前嘅感覺,而外側係會有小小頂高咗。跑超過40分鐘都唔會感受到傳統 Asics 嘅鞋感,唔會因為太重唔想跑。另外拎去快跑,衝斜路又唔似舊時訓練鞋咁反應好慢好唔去,Novablast 3 仲會不斷幫你俾力向前。

但係鞋面同鞋踭位係有啲厚,對於大汗人或落雨天著跑時,應該就會好吸水,變到好重。而鞋底無乜鞋紋,都會有啲考慮對鞋蝕咗之後會唔會好跣?

今季Asics 好有誠意,更新咗好多嘢之餘,色又大膽,但價錢超值咗!完全感受到佢好希望俾大家有全新嘅感覺、新嘅體驗。總括而言,外國俾佢 “Shoe of the Year” 嘅評價,係當之無愧。

Asics Novablast 3 平均給力 穩定發揮

無可否認,而家個跑鞋trend係屬於碳板跑鞋嘅!幾乎所有新鞋焦點都盡在碳板技術上,咁係咪新出跑鞋中,冇碳板嘅唔好?新近ASICSNovablast 3就提供咗個正面答案。

幾乎10個有9個跑步教練,都會提議大家碳板鞋係唔應該成日著,所以冇碳鞋仍然係大家好需要嘅日常訓練鞋,尤其喺跑步訓練當中,長距長時間嘅easy run亦係好重要一環,你總唔能夠又著對碳板去跑5pace easy run吧!

Novablast系列一直都以容易run in、易適應,且舒適度高企為賣點,嚟到第3代,更採用全腳掌 FF BLAST PLUS 中底物料,令致更彈更輕,官方資料係比上一代輕22g,數字非常吸引,前後差保持喺8mm,前後踭高度都提升多1mm,加入彈力氣墊大底,外底以彈床為設計靈感。

鞋面面料採用環保針織網布,好透氣輕身,亦巧妙咁以織花技術織出ASICS招牌鞋身「虎爪」,令graphic帶有速度感覺,幾有型嘅;倒V鞋舌令長時間跑著都唔會移位,亦增加咗細氣孔設計,透氣唔會跑到濕晒腳背。

鞋舌同鞋身相連,以防跑到移位,從內亦可見鞋身物料透薄。

中底物料升級至 FF BLAST PLUS,更延伸至全腳掌全幅採用,無論屬前中後掌落地跑手,都保證提供到緩震及回彈力;其取靈感自日式「摺紙」嘅中底紋理,靚之餘,我估都有分散震力及推進作用。

後踭位置亦夠晒穩定性,內藏Heel Counter,外面4塊穩定膠片之外,加上起角而略向後斜嘅飛翼式後踭中底,共同提供極強支撐度,但前掌落地跑手未必感受得到。鞋領位有足夠包覆泡棉,一放入腳已感到極舒適同包腳。

其實全對鞋嘅中底形態,都有略略向外斜伸嘅設計,無形中係令到成鞋鞋嘅穩定性加強,落地嗰下唔會搖嚟搖去,尤其對於重量形跑手嚟講,應該係俾到更大著地安全感。

睇晒以上設定,你大可定性到Novablast 3係對以舒適回彈及穩定性為主調嘅跑鞋,但同時佢又有偷輕及擁有8mm前後差,所以喺推進力方面,亦交到功課。筆者就用佢跑咗幾次4k-2x5k嘅模擬10k配速課表,再嚟10k TTTime Trial)同100minseasy run練習。

跑感方面,Novablast 3一跑已感受到其高回彈性,途中對鞋好似會不斷提醒緊你,記得要彈下彈下跑!筆者於10k跑時控速於430左右,跑得相當穩定平均,因為對鞋唔會俾太大壓力同推力你;至於喺100mins easy run時,就將配速維持於505左右,跑咗近20k,仍未見出現好攰或腳軟情況,證明無論於包腳度、回彈及穩定3方面,Novablast 3都表現出達標成績。

縱觀各方面嘅功能設置同細節,Novablast 3用於easy runtempo run訓練又或是recovery run時著用,都非常適合,可令跑者處於一個非常平均地發揮嘅狀態,至於用於10K或更長比賽,就要睇下跑者當時心態係積極進取定係保守發揮喇!