TEAM ASICS跑步與人 Sunny Wong:幫到人滿足感更大

Interviewed by: Insports Hub編輯部  Photos by: albertykkuk

1. 你既是運動治療師,亦是跑手,你覺得兩個角色有什麼關連或互相幫助?

運動治療師可以利用自己專業嘅知識以及對肌肉嘅運用去預防受傷同進行強化,同時亦可以幫助身邊嘅跑手朋友,令到佢哋遠離傷患,再創PB!

2. 可否以運動治療師的身份,簡單講解一下可如何避免傷患?

跑手們受傷其中一啲原因,主要係肌力不足同唔懂得如何使用肌肉,而引致容易產生肌肉代償,過度使用肌肉而引致受傷。
慶幸嘅係,由於我喺讀書時期已經不斷學習如何使用唔同肌肉發力,所以練習起嚟就會更得心應手,比賽時如果遇到突發狀況,亦都可以轉換唔同肌肉代替。

相片由Sunny Wong提供。

3.  是什麼動機讓你成為港珠澳半馬這場比賽的ASICS Pacer

因為喺跑場征戰多年,覺得幫到人完成目標嘅滿足感更大,而我哋提供穩定嘅Pacing可以令佢哋跑得更舒服、更容易跑得好成績。最後穿過終點線嘅時候,得到佢哋嘅感謝同肯定,係最開心嘅事。

TEAM ASICS主教練Winter Sir(中)與部分TEAM ASICS成員。

4. 你是如何準備這場比賽的Pacer角色?

Pacer最重要就係穩定嘅配速,所以我哋訓練時會有一個特定嘅配速要求,例如:4分35秒每公里。
我哋訓練時就會要求唔望錶,靠用身體嘅感覺,努力維持435秒每公里去跑,時間耐咗,我哋身體自然記住咗435嘅感覺,所以好容易知道自己有冇跑快或跑慢。

5. 你在比賽中擔任Pacer時,有沒有任何難忘經驗?

最難忘嘅經驗就係上一次港珠澳半馬,因為路與路之間有一個好大嘅空隙,好多跑手都因為睇唔到而跌倒或者拗柴,我哋遇到呢個情況,就要即刻每一次臨跑到空隙前,都會提佢哋一齊跳起,結果大家就好似Mario一樣,成件事好搞笑!

(左)相片由Sunny Wong提供。

6. 另一半都跟你一起做運動,是否會有較少有拗撬?

係呀,主要都係享受兩人相處時光,放鬆心情,一齊感受汗水嘅揮灑,最主要大家都係想放空。

TEAM ASICS跑步與人 Ivy:Pacer要學會放低自己

Interviewed by: Insports Hub編輯部  Photos by: albertykkuk

1. 見你玩好多運動:健身、體操、滑雪,跟跑步有相關嗎?

我會叫自己做”Jack of all trades, master of none”。意思大致是咩都「識少少」,但無一樣精通。自己性格都是貪玩,樣樣都想試,啱玩就投入,玩到悶就找下一樣野玩。之前跑步是強身健體為主,近兩年機緣巧合下先開始練跑,叫做認真多少少。都幾享受每樣都玩下,起碼無得跑步的時候都可以找其他方法放電。

相片由Ivy提供。

2. 你跑過好多地方,都不是有名的六大馬之類,可以介紹一下嗎? 哪裡最深刻?

上年名古屋女子馬拉松是初馬,今年跑多一次名古屋;首爾馬,仲有剛剛的台北女子「香香半馬」。

其實大半都是形勢做成的,跑馬年資淺所以要用時間qualify 就無我份,又無抽獎運。基本上這些都是肯比報名費就可以參加的賽事。自己性格亦比較即興,通常比賽前幾個月先決定要跑,所以真係有咩可以報就報咩。

最深刻其實是今年首爾。因為連著名古屋所以抱住玩的心態跑,全程放仼打卡,同其他跑手傾計。有時候太專注做時間跑完好似發咗個夢一樣。今次首爾42k,每一公里都好實在。

部分TEAM ASICS成員。

3. 香港跑馬跟海外有什麼不同? 

最大分別都是心態方面,始終去到海外人生路不熟,又有機會語言不通,所以自然會提早計劃一下比賽之前同當日的安排。可能因為這樣,心態亦不自覺地認真了,心理凖備總好像比在香港比賽時充足。

4. 對於希望在半程馬拉松中達到目標時間的跑步者,你有什麼建議?

盡量放鬆心情去面對比賽。要做到目標時間很多時候都要靠天時地利人和多方面配合,做到目標時間當然好,但做不到又不代表之前付出過的努力全都白費。學會接受有很多因素都不受自己控制,自問有盡力嘗試過就可以了,不要被成績否定你的努力。

相片由Ivy提供。

5. 作為Pacer,你遇到過哪些挑戰,以及是如何克服它們?

我個人覺得最大挑戰更多的是比賽前訓練的一段時間。平日訓練比起比賽動力始終會低點,再加上自己在備賽期間受傷,有好幾個月都不太跑得到。心情有時都會難受,狀態唔好時候會想放棄,但又顧慮到如果身為Pacer 都跑唔晒program,會否影響到來參加跑班的人?

克服的話就是調整心態,明白Pacer都一樣會傷、會攰,平時會同人哋講傷咗要休息,要量力而為,唔好迫死自己。唔落場跑都可以喺場邊為大家打氣、影相,或者陪下其他一樣掙扎緊的跑手。Pacer除咗帶跑之外,都可以有好多其他的用途。

6. 輔助其他跑手跑步和為自己參加比賽有何不同?

做了Pacer,穿上寫著PacerTEAM ASICS在身上的時候,就是代表著品牌同大會,一舉一動別人都會看在眼內,所以更加要學會放低自己。雖然在比賽期間,可能會有緊張、興奮或攰的感受,但都會盡量控制好自己情緒,亦都會喺言行舉止上加倍謹慎,盡量唔好影響到其他跑手。

跑步與人:Pete

1) 跑步年資?為什麼開始跑步?
我會答 3 年。
因為踢開波關係,十幾年前無乜點練嘅情況下跟同事跑咗 2 次渣打半馬 Sub 21 次全馬 Sub 5,中間因為膝頭傷咗 / 𠱼喘問題停咗 8 年無乜點跑,直到疫情後呢 3 年先行番山跑番步,重新認識番跑步。

2) 有沒有跟跑會或教練跑?選擇原因?
上年開始有不定期跟 RMAC / 330 跑團玩唔同嘅 Program / 長課,不過主要都係自己跑 / 儲里數為主,因為想搵一個啱自己生活 / 作息嘅訓練方法。

3) 最深刻的一場賽事?原因?
2023 11 月福岡馬拉松,亦係第一隻海外馬。起初無概念填目標時間 Sub 4,因為對上一隻全馬已經係 10 年前,同埋香港夏天練跑好辛苦,但睇住自己狀態慢慢進步,亦都佩服自己擺咁多心機 / 時間去準備一場比賽。

4) 海外馬跟香港馬的分別?
大部分海外馬嘅起跑時間都唔會特別早,會感受到成個地區 / 一般民眾都非常支持呢項運動,賽道嘅設計唔會令到你跑得好孤單,大部分民眾會出哂嚟為你打氣,仲有不同嘅私補免費供應。

5) 日常跑步路線
住屯門,所以都係離不開屯門入元朗 / 屯赤 / 經青公去荃灣西。

6) 最喜歡的跑步用品品牌?最喜歡一對跑鞋
Asics Novablast 3。係一對由 Recovery Run 到 Tempo 都可以駕馭到嘅 Daily Trainer。 

7) 另一半有跑步嗎?對你跑步有意見嗎?
好少,不過有時都會陪佢慢跑 3-4km;因為秋 / 冬天跑步會有機會哮喘發作,所以會份外擔心。

8) 有沒有跑步傷患?如何處理?
福岡馬之後腳底出現筋膜問題,主要都係控制住訓練強度,做多少少拉筋,定時用按摩球 / 滾輪拉鬆肌肉,覺得恢復比訓練更重要。

9) 有沒有因為跑步而放棄了其他運動?
冇放棄咁誇張但真係踢少咗波。因踢波需要更多轉向 / 急停 / 加速嘅動作,對膝頭嘅負荷仲大,同埋長跑多咗,膝頭附近嘅肌肉反而增強咗,最近膝痛問題有所改善。

10) 有沒有跑步偶像?原因?
最接近嘅應該係大迫傑,跑姿真係好靚。

11) 現時跑步目標是什麼?
希望做好跑步經濟性。
自己一向心率唔算太低,想練好少少低心率,再慢慢練番多啲中長課 / 速耐,希望下一個全馬 30k 打後唔會咁易爆 / 跌速。

12) 除了跑步,有沒有做交叉訓練?(例如舉重/游泳/瑜伽)對跑步有沒有幫助?
自己係比較懶做 Gym,主要行下山、踢下波。今年希望會想做番多少少 Gym,加強番 Core Hip 嘅發力。

13) 最想到外國哪裏跑馬拉松?
哥本哈根馬拉松,希望 2025 / 26 年可以跑到。

TEAM ASICS跑步與人 Coach Winter:熱誠・感染・同理心

Interviewed by: Insports Hub編輯部  Photos by: albertykkuk

1. 恭喜你 Winter Sir(徐弘泰),剛剛在首爾馬拉松Sub3完賽。你是如何平衡跑手跟教練的身份?

坦白講絕對無平衡過!
其實由擔任教練後唔多唔小真係放棄咗跑手嘅身份,因為如果想挑戰返自己嘅PB成績,除非有好多時間(例如無正職),否則好多時會兩頭唔到岸(無論做跑手/教練都做唔好)。想好好照顧到每一位學生,其實唔只於課堂上嗰2-3小時嘅訓練。課堂外亦有好多唔同嘅訓練建議、心理輔導等等,所以花上嘅心力同時間亦都唔小。而現在呢一刻嘅我亦希望專注喺教練嘅工作上。

至於剛剛嘅首爾馬拉松Sub3真相其實係努力訓練8個星期 + 食老本同埋食老本同埋食老本所得出嘅結果 🤣🤣

相片:Winter Sir's IG

2. 教TEAM ASICS跟你教的一般跑班有什麼不同? (訓練上或心態上)

絕對有唔同,TEAM ASICS係經過跑步能力上嘅篩選。TEAM ASICS成立嘅目標係希望組成一班跑步能力高,同時有能力幫助他人嘅團隊(例如擔任Pacer,或喺訓練中擔任助教及協助帶領活動)。

因此訓練上再唔係由基礎訓練開始,TEAM ASICS除咗有更進階嘅跑步訓練,亦有學習擔任教練嘅訓練(例如表達方式、說話技巧及安全管理等等)。另外亦需要進行配速員訓練,為ASICS協辦嘅比賽出力。

Winter Sir與部分TEAM ASICS成員。

3. 對TEAM ASICS有什麼特別期望?

(1)保持對跑步嘅熱誠,繼續挑戰自己;
(2)用跑步嘅熱誠感染及協助更多人去跑步;
3)學識同理心去幫助唔同階段嘅跑手,因為每個人嘅能力唔同、家庭背景唔同等等,唔應該只有一套訓練模式,所以鼓勵或指導他人時應該多思考,而唔係淨係有「我做到你都做到嘅諗法」。

4. 看到ASICS跟你一直保持友好關係,可否講一下ASICS對你的支持?你又會想帶給 ASICS什麼樣的幫助?

ASICS係我由青少年開始接觸嘅品牌,而ASICS亦係跑界佔有一個好重要嘅席位。所以我一直都好自豪自己係ASICS嘅一份子。

我會以教練身份一同舉辦以下嘅活動:長跑訓練、街跑活動、組成PACER TEAM及TEAM ASICS等等。喺呢個合作過程中,除咗以教練嘅經驗教授外,我亦好多時會以跑手嘅身份及經驗為各活動提供意見,務求令整件事情更貼地,令更加多參與者受惠,及認識ASICS呢個品牌。

最後我好感恩喺過去同ASICS合作長達7年嘅日子入面,ASICS Marketing嘅同事一直好願意聆聽我嘅意見,一齊做好每件事,呢個亦係我能夠一直同ASICS保持友好關係嘅原因。

馬拉松與人:Sunny 大阪馬拉松

濕凍天氣與意外頻生,由放棄一戰變得無比堅決既一隻馬

猶記得收到大阪馬中籤,係金澤前往新大阪的 JR 列車,手頭上已報首爾馬嘅我,仍在三心兩意,到底係用那一個作為做時間既比賽,無論自己既能力同時間分配,都未有好好規劃,但同日在各大群組都收到大量朋友中籤嘅消息,所以策略上立刻 book 了大阪馬起店附近的酒店,而最初嘅諗法係大阪馬作為首爾馬嘅最後長課。

回顧整個金澤馬嘅備戰過程,我逃避了大部分的長課,主要因為香港夏天天氣太熱,自己亦沒有好好規劃訓練,無論身心都不夠堅強;實力不足加上基礎不穩,所以金澤馬跑得不好(雖然有很多人恭喜 PB,但客觀嘅事實就係跑得唔好)。

失敗迎來了醒覺,所以金澤馬之後,大部分時間都用來紮實有氧既根基(大量嘅 easy run 同長課),而這套訓練亦令我狀態亦一直冒升,台北同渣馬兩隻半馬,在無練過任何速度課既情況下,單憑提升了的體能都以 PB完成,由本身大阪馬只係作為首爾馬嘅最後長課,慢慢對阪馬有了可以嘗試做時間既遐想。

回到賽前兩日,剛到大阪,因為氣壓緣故,亦可能因為體內炎症發作,左腳腳跟變得腫脹不堪,這件事我並沒有向太多人講過,除了我十分信任的一個跑步群組,以及星期六早上遇見我瘸腿兀腳的兩位香港跑手,在此先感謝 Kristy ( @ytsirkgn ) 的強力消炎藥以及 Dicky ( @yim_dicky ) 的安慰。

告別兩位之後,我便回酒店努力消炎,在藥妝買了的藥用浴鹽,全日總共浸了 3 次,每次 40 分鐘,我唔知道到底功效有幾多,但至少心靈上知道自己做足了應做的,便心安理得。

吃了消炎藥後,有返大約 6-7 成嘅活動能力,所以我下午同晚上都分別約了朋友食飯,而每次一到比較空曠的地方(例如月台),都會嘗試 jogging 十多米,看看關節是否回復順暢。晚上 Brian ( @meepobrothers ) 為我帶來了在會場買的 tape 帶,加上在藥妝買了腳箍,鎮痛貼和止痛藥,我相信能夠上線既機會接近 9 成了。

去到比賽那天,相信大家都已經在各個途徑得知大會安排嘅惡劣,從混亂不堪嘅指示,到滿佈泥濘嘅場地,已經提早兩小時出門口嘅我到達會場後一直找不到相關嘅行李區,查詢職員時又被亂指了數次,導致慌張地來來回回地在會場兜圈,直至去到一個棒球場嘅地方碰見一位師兄,佢話佢都搵緊行李區可以一齊,但話口未完,我便發現我手上嘅一個用以袋gel既膠袋鈎爛,喺途中已經不知不覺間遺失全部gel,該跑手見我眼神空洞,亦即刻頭也不回離我而去。

那時候嘅我已經不知所措,到底回頭執 gel,還是先放行李,還是棄賽,係我最徬徨無助之際,突然聽見阿 Pi ( @hapiahpi ) 叫我,而同行嘅有 Suyi ( @suyi922_ ) , Angie ( @angiegie_cheung ) 和 Sharon ( @sharonng2012 ) ,佢哋二話不說總共給了我4包gel,我只想講佢哋並沒有任何義務給予我什麼,尤其佢哋都將要面對 42 公里嘅硬仗,今年嘅大阪馬又濕又凍,體感接近零度,如果要保障自己也是應該的。

告別她們之後,我便來到行李區的入閘位,由於該閘口位是唯一一個位置用來出入,所以出現了塞車嘅情況,閘裏和閘外的都係匆忙嘅人,在無數次嘅推撞中,有一名日本跑手趁亂一拳打了我心口一下,才剛回過神來的我被這樣襲擊已經來不切分析,所以下意識地還擊了一下,而在他準備再次出手之際,他身後的跑手們把他推走(可能因為大家都趕時間吧),我也慶幸免了一場衝突。

唔太順利進入了行李區後,很快便被泥漿浸濕了鞋和腳,但已經係遇到嘅不如意事入面最微小嘅一單,同時因為心急奔跑,我在這塊泥地整個人雙腳朝天跣低,所幸是並沒有扭傷和屈到,只是屁股有點痛。

離開行李區後,在往起跑區途中,我便一心在地上尋找有沒有人跌gel,結果俾我執到兩包均食剩一半的gel,一包金色寫住快速補充,另一包則是紅色大 amino,前者我先行袋住,後者我即時進食(為求生存,沒有考慮過任何衛生問題),而呢刻,我手頭上總共有4包半既gel,心裏紮實得多了。

千辛萬苦上了線,但已經成了該區最後一批出發的人群,無論塞車,還是之前遇上嘅大大小小意外,我經已完全打消了做時間嘅念頭,小心翼翼的跑了頭兩 K,分別只能開出 535 和 452,比我原定配速的總時間已經慢了接近兩分鐘。

前往大阪嘅旅程中,我一直想起教練 Jeff ( @jefflawong ) 同我講過比賽嘅完成時間可以分為四個等級,分別為合格、不合格、開心、唔開心;我心想怎樣也要跑一個合格時間,回應我之前嘅訓練,所以便決定低標sub330 完賽也好,姑且也叫 pb ,所以我便漸漸加速至 440-442 去追回時間。

10K 之後,我食了手頭上第一包gel,當下嘅感覺係少了一份保障,但同時我亦追過了 330 的pacer,由於感覺好唔紮實,所以我決定一路跑,一路 scan 地下有沒有跑手跌gel,但都一直搜尋不果。跑嘅過程入邊我開始思考最大機會出現嘅地方,會係水站前後幾百米,大多數跑手會喺呢段時間食 gel,亦都好有機會喺呢個時間跌咗,結果呢個方法令我成功執到 4 包唔同嘅 gel。

只要稍為細心,就可以好快 locate 到地上嘅扔棄物,係遠處見到疑似 gel 包裝嘅物體我都會望實頂部有沒有被搣開,而每次跑過目標物品嘅時候都有 1-2 秒做決定停唔停低,再回頭執拾。而我每次嘅執拾都感受到身邊嘅跑手用奇異嘅眼光望我。

於 15K 執到一包 MagOn,係 18K 同 25K 分別執到一包類似黑色神 gel 和一包白色 gel(被鏡頭有錄低😂)(後知兩包均為 SAURUS) ;25K 後一包大藍色 Amino(食完之後即刻有嘔既感覺),但係嘔出到嘴邊之際,我心想係 energy 來的,不要浪費,所以便生吞回去。

雖然天氣惡劣,不過其實濕凍也有一個好處,就係能夠保持心率偏低,令我可以維持到平均嘅輸出亦不致於體力透支,去到 35-36K ,分別遇到了同跑會的 Kenny 班長 ( @kennychan122 ) 和 Ted ( @tedrunnote ) ,佢哋鼓勵我加速,那時我睇錶知 5 分披應該大約 327-328 左右完成 (以賽前目標嚟講真正高不成低不就),所以無特別加速,安全完賽就算了,最後完成時間 3:27:00。

最後,我要感謝我兩位 Team ASICS 隊友,係我備戰呢一隻馬拉松嘅專屬 pacer,分別係陪伴我長課既坤仔 ( @louis_run ) 同 Tempo Run 既 Philip ( @philip.leung.7528 ),完了渣馬後少了好多跑手出現係運動場,無你哋兩個我係唔會有咁大嘅動力同進步🙏🏻🫶🏻

完賽後陸續收到很多恭喜 PB 的訊息,我感謝各方好友對我嘅關注,原來有人追蹤時間係咁窩心,但我內心其實係有些失落,因為這是不合格既時間。

今季賽事嘅旅程還未結束;首爾,故事待續。

跑步與人:Sharon

1. 跑步年資?為什麼開始跑步?
中小學時期, 曾經有 4-5 年是田徑校隊的成員,參加過幾年 D1 組的 100 米 / 200 米短跑賽。但過了加拿大留學之後,完全沒有再跑。真正開始接觸長跑是在 2021 年,玩 CrossFit 受傷後,加上疫情悶悶哋,俾朋友叫了出去一起練 Ironman 70.3。為了完成三鐵最後一個項目 – 跑半馬,才開始接觸長跑。

2022 年年尾參加了 Garmin City Run,機緣巧合之下又報考了 Garmin Pacer,之後正式開始跑步。算下來差不多有 3 年跑步經驗了。

2. 有沒有跟跑會或教練跑?選擇原因?
現在是 Garmin 的 Pacer ,會跟 Garmin 教練安排的 Regular Pacer Training 和 Garmin Run 賽前訓練。這些訓練都是針對我們 Pacer 的配速穩定性。由於工作時間不太穩定,一直都沒有參加跑會。一般都是自己一個人練。最近打算跑一場馬拉松,正考慮開始跟教練,跟一個更有系統和效率的訓練計劃。

3. 最喜歡的跑步用品品牌?最喜歡一對跑鞋
一直都是 On 跑鞋的忠實擁躉,一直都是穿著 On Cloudmonster 來跑步,平時也會穿 Cloudventure 去遠足,週末出街/旅行時也是默認穿 On Cloud。剛開始時由於 On 在香港還沒有正式代理,很難買到;但現在已普及,更多地方可以買到,也推出了很多不同款式,我自己也買了幾雙作為替換。目前 On Cloudmonster 2 和 Cloudrunner 是我最常穿的。

4. 日常跑步路線? 最喜歡的練跑運動場地 (原因?)
因為住在港島區,所以馬場是我最喜歡的練跑場地,不用擔心要避開人和車,還有一些上下坡,而且還有停車場和淋浴。如果和朋友一起練長距離,有時候會去馬鞍山跑到白石角/大埔再回頭,也很方便,不用像跑圈那樣悶。

5. 有沒有跑步傷患?如何處理?
遇到過很多跑步傷患!一開始跑時,CrossFit 留下來的腰傷還沒完全康復,加上經驗不足,導致跑姿不正確,造成了腳弓、腳踝和膝蓋的傷害。之後練習單車時不小心摔了一次車,導致下腰和盤骨錯位,使得整個腰胸椎的轉動幅度一直無法恢復。最近又遇到 Achilles 腱撕裂問題。

我每週都會堅持去看物理治療師,慢慢累積,有時間的話也會做更多的輔助訓練,家裡也準備了按摩槍、超聲波和熱敷墊等。對我來說,恢復訓練是訓練過程中最重要的一環。

6. 最深刻的一場賽事?原因?
2023 年 10 月的墾丁 Ironman 70.3。單車一直都是我的弱項,相比之下,游泳和跑步對我來說更簡單直接,所以我以為最後的半馬會很輕鬆,誰知單車環節有一些小意外,膝蓋受了傷,一下單車開始跑步時發現每一步彎曲膝蓋都很痛。再加上賽事的半馬路段有一半以上都是上坡,跑到第 15 公里時我差點就要放棄了。

幸好在路上遇到一位當地的 Garmin 教練,在馬路對面對我說:「再跑一公里就是下坡路了,加油撐住!」這句話給了我很大的鼓舞;儘管後來每一公里都是艱難地跑,但所有之前的訓練都在支撐著我,最終還是跑到了終點。比賽結束後,我只有一個想法:能夠參與運動真的太好了,一定要堅持下去!

7. 現時跑步目標是什麼?
希望在 2024 可以系統化地進行訓練,完成一次不需要走路的半馬山地賽事,跑兩場公路半馬,並取得理想成績。之後在 2025 再挑戰全馬,並再次參加 70.3 賽事!

8. 除了跑步,有沒有做交叉訓練?(例如舉重/游泳/瑜伽)對跑步有沒有幫助?
除了三鐵的游泳和單車訓練之外,會堅持進行力量訓練和拉伸。偶爾也會去做一兩次瑜伽。

力量訓練是必須的,這樣才能鍛煉跑步所需的肌肉,發揮應有作用。同時也很重要的是要做好活動度和穩定性訓練。不過一天只有 24 小時,永遠都做不夠!

9. 喜歡跑山還是路跑?
一直以來我都很害怕上山,主要是因為心率跟不上。過去一年有時候會跟 Garmin 的教練一起上山,雖然也不排斥,但我還是更喜歡路跑,因為對我來說更簡單一些。

10. 自己跑步跟作為品牌 pacer 跑步的分別是什麼?
自己跑步是為了追求成績,不斷進步和突破,希望得到大家的掌聲;作為 Pacer 就不一樣,首先需要進行更多的訓練,將自己的體能提升到超過所需要帶領的配速,這需要 Pacer 自己額外花時間負責任地自我訓練。

而在比賽中,Pacer 其實是不會有自己的成績,作為 Pacer 首先要學會放下自我,為了幫助其他跑者保持穩定配速,控制好自己的速度,同時還要注意路線安全、路面情況,為大家打氣,保持良好的氛圍,解答跑者的問題等等。

11. 跑步對人生有沒有幫助/改變?
跑步對我來說就像是一個可以獨處的時間,相當於我的冥想。每次跑步都帶著 Garmin 錶,都會有種放鬆和解壓的感覺。為了準時參加跑步訓練,我不得不更好地安排休息和工作時間,間接地讓我變得更有行動力,也更願意提早規劃每週行程。為了參加國外的賽事,我也會提早安排好其他旅行和公幹,減少時間上的衝突。總的來說,跑步讓我的生活變得更有規律,飲食也更加健康,這絕對改善了我的生活!

最後,有什麼社交媒體可以找到你?
IG: lsk_ron lsk_run

馬拉松與人:Ip C Fu 倫敦馬拉松

大會時間Gun Time: 2:35:16;晶片時間Chip Time: 2:35:10
又完成一隻六大馬拉松喇🎊!衷心感謝New Balance提供名額🫶🏻,但今次能夠完成真喺得來不易。

2023年12月21日確認咗名額,心諗有四個月時間練,實可以做個好成績。
可惜世事未必可以諗得咁完美,幾日後就證實咗胃潰瘍,而且照到個肺有粒嘢,但唔太大,定期mon住就得。

住咗三日院後就出院,除咗要食三個月藥仲要戒口,頭兩個月食親嘢都好唔舒服,跑步嘅時候就會突然間乸住痛,有時個胃仲會脹到個波咁,長課每次想試30K又跑唔到,嗰陣覺得要完成一隻全馬根本係天方夜譚嘅事。

直至去到三月中,除咗有時食完嘢會有啲唔舒服,跑步都好似唔覺有咩大問題,連比賽都全程無痛,感覺似係好返。

到咗四月頭,三個月嘅藥食哂,所以安排再照個胃同個肺,結果醫生話我個胃完全好返哂,連之前照到肺嗰粒嘢都無埋,終於都可以回復正常喇。

照完隔咗一日無啦啦又跑到37K,又唔太辛苦,之後個星期跑咗場10,000m又唔錯,咁要完成隻馬睇落似無乜問題,咁就照盡力去試下跑個好時間,要爆都唔緊要,我知唔會跌出240。

就係咁,頭半程用返隻10,000mpacing去跑,又真喺跑到,梗係啦,涼咁多又舒服咁多。

過咗半程開始跌喇,亦有抽筋感覺,去到30K都知道Sub230無望,而且右腳hamstring會不定時咁彈幾下,keep住4分頭pacing跑埋佢啦,235內可以完到賽嘅,點知去到41.5K終於大抽,唯有停喺度拉下,睇嚟要行返去㗎喇,但兩邊嘅觀眾見到即刻幫我打氣,我又繼續跑返,佢哋都好熱烈咁鼓掌,嗰陣我真係好感動😭。

就係咁,終於都成功完成咗場倫馬,大休一陣就會準備下之後嘅比賽。既然人無事,下半年要追返上半年嘅目標,咁後生,實做到嘅。
呢段日子好多朋友/跑友都好關心我,每次見到我都會問我個身體狀況,感謝您哋🫶🏻

跑步與人:Emily

1. 跑步年資?為什麼開始跑步?
長跑的跑齡大概 7 年。當初看到 Sportsoho 的跑班「油尖旺 x 青年跑」招生,想挑戰長跑而報名參加,中學時代的專項是短跑,只跑過 100 米和 200 米,訓練的里數也不多,都想嘗試短跑以外的距離。

2. 最深刻的一場賽事?原因?
「敢跑慈善籌款賽」最讓我難忘,我與男朋友 Wing 組隊參加,雖然我們跑步的速度相差一大截,但他儼如 pacer 一直帶著我跑,又提前跑到水站為我取下水杯。最後 400 米參賽者需與同伴撓手跑,我和 Wing 的動作不協調,跑得很滑稽。隨著不斷調整跑姿,很快就合拍地越過終點。每逢參加比賽,我們都各自為目標奮鬥,這是唯一一個比賽我們肩並肩完成,合力贏得一個獎座,別具意義。

3. 有沒有跟跑會或教練跑?選擇原因?
跑步教練是 Formula Run 的王容儲,他的教學理念與我相近,態度認真,又非常細心,因應每個學生的情況而編寫課表。

左圖credit: Simon Cheung

4. 最喜歡的跑步用品品牌? 最喜歡一對跑鞋,原因?
我沒有特別喜愛的運動品牌。不過 Nike Pegasus 系列是我認真練跑後首對購買的跑鞋,因此特別情有獨鍾。無論快跑或慢跑,穿上這雙鞋子的感覺很舒適。

5. 日常跑步路線或最喜歡的練跑運動場地(原因?)
我最喜歡在青公跑長課,紅綠燈的燈位不多,無垠天空與大海的景色百看不厭,跑完更可以去海灘玩呢!

6. 喜歡什麼時段跑步(晏跑/晚跑)?為什麼?
我喜歡晨跑,欣賞早上被太陽照耀的風景,每逢繁花盛放的季節,邊跑邊賞花,目不暇給,心情特別放鬆。

左圖credit: yiphenryphotography;右圖credit: Gary Lee

7. 跑步對人生有沒有幫助/改變?
跑步讓我更懂得分配時間。以前為了練習而推掉朋友的飯聚。直至認識到很多跑友,他們或許年紀比我大,生活又有多重身份,但沒有自訂界限,反而提前安排時間表,又利用清晨的時間跑步,晚上的空檔就留給家人和朋友,令我開始調整作息時間,平衡運動和社交的生活。

8. 有沒有因為跑步而放棄了其他運動?
沒有,只要調整好跑步訓練,仍然會有時間做其他運動。

Photo credit: Ah Lam

9. 有沒有跑步傷患?如何處理?
慶幸傷患未有找上我,但肌肉變得繃緊卻是傷患的警號,甚至影響比賽表現。我會用按摩球和 Foam Roller 放鬆肌肉,同時增加肌力訓練,避免受傷。

10. 現時跑步目標是什麼?會否考慮跑較長距離如半馬全馬?
現在的目標是 5000 米 20 分內,終極目標是跑全馬。我都想在不同距離的項目有新的嘗試,身邊的跑友亦不時分享跑馬的感想,令我很期待有天跑進這個未知的領域。

右圖credit: Ah Lam

11. 除了跑步,有沒有做交叉訓練(例如舉重/游泳/瑜伽)?對跑步有沒有幫助?
我會做體能強化肌肉,例如阻力帶訓練和舉啞鈴,訓練身體協調和改善跑步姿勢。

12. 見你也有參加田徑系列賽,田徑場比賽同路賽有什麼分別?喜歡參加哪類比賽?
田徑場的比賽需要留意賽事規則,例如比賽鞋的要求,而運動場一圈 400 米,配速容易計算, 賽道相對平坦,但風景單一。而路跑則需留意每公里的標示牌,時刻注意路況,景色相對多變化。兩者都很喜歡,但我比較喜歡路賽,看著風景,時間變得容易過,有時迎面看到認識的跑友更會互相打氣。

13. 最後一題,有什麼社交媒體可以找到你?
IG: emiririme

馬拉松與人:Jordan 波士頓馬拉松

賽前冇定目標時間,希望跟住體感,享受同突破。

比賽當日,我同B04:45起身,佢準備白飯,我整咖啡。06:10出門口去Boston Common嗰邊寄存行李,然後搭黃巴士去選手村,車程60分鐘。09:15開始離開選手村,移動去起點。

0:00開跑!頭段包含落斜,加上氣氛實在太好,盡量鬆住去,避免興奮用多咗力,第一次比賽沿途係咁同路邊嘅人俾個✋🏿。

5k時間19:07,10k 38:27。

17k多啲,終於到咗傳說中啲女學生排哂出嚟打氣加任攬任咀嘅Wellesley College scream tunnel,一直靠左跑嘅我都跑返去右邊睇吓佢哋咩料☺️

半程,1:21:20。

25k後,真正嘅考驗依家先開始,嚟緊大概13k都係連續嘅上落上落,包括要打大佬 – Heartbreak Hill。喺賽道加熱天氣下累積嘅負荷,後段就算落斜同平路,都已經令配速保持唔到4分內,只可以努力唔跌速太多🥵。

30-40k,avg pace 4:15。
衝線,2:49:25。

突破嘅唔係數字上,而係體驗。
波馬真係好正!

馬拉松與人:Jun 琵琶湖馬拉松

過往琵琶湖每日馬拉松與福崗及東京馬拉松是日本三大馬拉松賽,其中琵琶湖的限時更是嚴謹的2小時30分,是日本國內歷史最悠久的馬拉松賽,自1946年已開始舉辦。

但自從日本選拔馬拉松的MGC賽事出現以來,加上與東馬舉行時間相約,琵琶湖的注目度略有下降。自2023年起,賽事易名為琵琶湖馬拉松(不再由每日新聞社冠名),變為平民也可報名參加的賽事,限時為6小時。

此賽事沒有賽前Expo,號碼布是賽前2星期以郵寄寄出到日本各地。選手須經Runnet報名。

起點所在的大津京站,乘坐JR湖西線由京都站出發,只需兩個站10多分鐘的車程。大會在交通指南也清晰指出乘坐不同時段出發的JR/火車的到達時間。起步場地,皇子山競技場,分別有一個田徑場及棒球場。

日本人的細心有時候是達到恐怖級別的,因為他們佈置設備的動線已考慮到跑手的需要,為什麼這樣形容呢?

由在月台及出閘開始,沿路有義工在2度寒冷天氣下為選手指路前往會場及打氣。到達會場,在場地入口順序設有更衣大帳篷(內舖防水地布及有足夠桌子),在必經之路上,清晰看到行李寄存車的號碼(而行李車號也是在號碼布上印好,而不是另外要有一個行李號碼)。

完賽後有運動按摩服務免費提供。

分號碼放好行李後,進入諾大的棒球場,入口是水站(有水、運動飲料)。水站後看見棒球場被分為CDE出發的等候區,選手可在棒球場內空地跑步熱身。而大量流動廁所則設在棒球場邊緣,除了分男,女隊之外,還有一條是男(小)隊。除了在數量上有足夠的廁格讓跑手使用,更重要是,不需上小解的跑手等待長長的隊伍,而大隊排一條隊的做法,可以避免個別大解人士使用較長時間,引致同列人士等候時間比隔鄰列久的不公平問題。

再往前走,離開棒球場,進入田徑場外圍就是BAS區選手的等候區,同樣有流動廁所及熱身場區安排,也有三條大隊按需要使用流量廁格。我在起步時間50分鐘前到達,熱身前先上洗手間,基本不用排隊。

進入運動場,起步點在後約100米已圍封好預留給S區選手,A區選手則圍封預留了100米彎道跑道及外圍區域。B區的跑手則以打蛇餅形式使用整個足球場(像機場排隊航空公司櫃位check in)。

隔壁棒球場出發的CDE區跑手會在起步後跟蹤B區隊尾,進入田徑場起點出發。

一個有趣的觀察是,BAS區提早入場的安排在起步前15分鐘會停止,大會在最後2分鐘會報秒(真係逐秒)倒數,遲來的BAS區選手會被封在運動場閘外,要與CDE區選手一同跟在後面。

我在等候時剛剛對著閘口,看見關閘情況有點像那霸馬拉松一樣,是真的會有人最後衝閘的,當然那霸那個衝不到的後果慘一百萬倍。

比賽起步時間是早上8:20,我在比賽開始前30分鐘熱好身進入等候區,排在A區第5排。起步前A區選手也可前行匯合S區隊尾後,我距離起點仍有40米,可見早在前方的S區選手其實也不少。大會鳴槍計,大鐘與個人時間相差20秒左右。

頒獎台於頒獎典禮後普通市民也可上台拍照。

比賽路線大致是環湖的馬路,高低時有起伏,但都是短短、微斜或暗斜,每公里的高低差只有數米,可說非常平坦(對比香港馬拉松,龍和道隧道已比任何一條斜路長及斜)。在15-20公里處有兩個180度掉頭,有機會可迎面可看到前列選手,有朋友同跑的也有機會看見,可以聽到選手間打氣聲此起彼落。

26公里處賽道會經過終點會場烏丸半島的外圍,好處當然是在終點等跑手的朋友可以停在同一地方看到跑手多一次,選手聽到朋友打氣也有見到明顯提速的!28-42公里則是往復路段,能看見前後不同的選手,加上賽道旁的打氣民眾,時間感覺比較容易過。

當然,琵琶湖馬拉松路經的幾個區域(大津,草津,守山)也不是大區,而環湖的路段更不在市區中心,所以打氣的人流不能與大城市沿途都是打氣民眾的熱鬧情況相比。

大會正式路線及高度圖。

是日天氣算是不俗,起步時為2-3度,小有太陽因此非常寒冷,聽到不少日本選手不斷大叫「沙梅沙梅」(好凍),濕度52%則有利選手表現。部分路段比較大風,常常吹到流眼水,也吹到面部僵硬有點失去知覺。但在21公里後太陽出來高照,氣溫升到約7-9度,風勢也緩和不少,整體仍是合適發揮的。

我有幸在準備不算很充足的情況下,將塵封數年的個人記錄更新,算是十分滿足(本身愈慢,進步空間愈大😅),不過後半程不能維持配速的情況早在22公里便開始出現,看著手錶,每公里比目標慢5秒,到之後慢10秒,再後期慢了15秒,說實在是難熬的,但回想,又哪有馬拉松是容易的?

(左圖)賽後終點設有Expo,都是當地的食物及支持團體的攤位;(右圖)大會路線補給充足。

賽後大會在終點設有Expo,都是當地的食物(近江牛柳粒最受歡迎)及支持團體的攤位,也有手信購買,休息區及拍照區等。整個賽事只有馬拉松距離,名額7,000人,但比賽日的準備看得出不比香港容納70,000人的少。所以報名費15,000 Yen仍是物有所值的。大會沿路補給指引也十分清楚,遠遠已知道是水、運動飲料或是其他補給。

如果把著自助餐心態的跑手,勢必可大快朵頤。今次自己則為安全起見,只準備5包能量補充,沿途沒有享用大會的其他補給。賽後大會提供接駁車送選手到車站,但足足坐了25分鐘車,有位坐都感到腳麻,大概可說是賽會選址上比較不親民的地方。

(右圖)琵琶湖另一著名遊覽點 - 水中鳥居⛩️ 白鬚神社 (跑道不經)。

整體而言,在大城市附近的馬拉松,路況合適PB的賽事,琵琶湖不會令你失望。但要體驗更豐富的(如Expo、打氣氣氛、地點方便),琵琶湖可能未必是首選。

後記:比賽同日有名古屋女子及靜岡馬拉松(私心恭喜林穎璋在靜岡做出好成績,踏上2:19台 ),喜見不少跑友也做出理想成績。