自從PUMA研發出Nitro Foam氮氣中底技術後，所推出嘅跑鞋愈嚟愈有睇頭，就以Deviate Nitro同Deviate Nitro Elite為例，喺跑圈愈嚟愈多跑手留意。既然有咁出色嘅中底技術，當然會將佢加入到越野跑鞋中。
其實呢對Fast-Trac唔係第一對置入Nitro Foam嘅trail-running鞋（2021年時已有Voyage Nitro），但今次嘅Fast-Trac Nitro無論喺外觀、速度對應以及減磅上，都做得更為極致。
先睇睇Fast-Trac Nitro嘅重點結構：
鞋身 – 採用Rip-Stop（防撕裂）網眼物料，無縫處理，輕身之餘具備拉緊度，造就適當嘅包腳維度；透氣、反光，確保山間夜跑仍能有被視度。
中底 – Nitro Foam提供極致靈敏度及緩衝效能，同時保持鞋身輕巧；底層ProFoamLite技術保持耐用、輕巧及提供保護性。
外底 – 以耐磨橡膠合成物料而成嘅PumaGrip ATR，可控制任何地況，專為山路及不同地型而生。
當著上Fast-Trac Nitro第一個感覺係：輕。
因為基本同著上一對輕身路跑鞋冇大分別，資料重量約為205g左右（US9），對比起Voyage Nitro嘅300g，肯定係大躍進。
而事實上，Fast-Trac Nitro於越野跑嘅表現，亦都係以山間平路跑最為出色（如獅子亭往畢架山中間段或大老山段麥徑），一來輕身，二來借取自Nitro Foam嘅靈敏反應及吸震，三來佢係一般正常跑鞋嘅前後差設定，如果閣下係擁有一定經驗嘅路跑者，借助Fast-Trac Nitro嘅功能，喺山野平路路段會跑得相當暢快。
Fast-Trac Nitro嘅保護性不算太強勁，但基本上嘅都有提供，如heel counter照顧後跟嘅穩定性、前掌兩邊嘅防撞保護膜、鞋舌同鞋身內裡連為一體，防止腳部走位等等。
但正如剛才所講，Fast-Trac Nitro係較為著重靈敏度嘅山跑鞋，所以都幾講求跑者本身自己嘅山跑技術。例如中掌兩邊嘅Nitro Foam只有少部分延伸至鞋身，加上Nitro Foam本身唔係好剛性嘅中底物料，所以於不平地況奔跑或過石位時，有時會出現「浪浪哋」情況，但好彩對鞋本身好包腳，同有埋PumaGrip ATR強抓地力外底嘅補足，只要你嗰時唔係發緊夢，好快就可以修正返。
總結：Fast-Trac Nitro係定位予較有經驗及著重敏捷感嘅越野跑者，較適合著用於平時山跑訓練，以提升靈敏力，又或於短中途（30K以下）/山路兩食（最常見嘅引水道）嘅越野賽中，會帶來更佳成績。
