24 10 月
INTERVIEW

跑步與人：Pei Pei

1. 跑步年資？為什麼開始跑步？
2018年開始跑步，因為當時想試玩一個障礙賽。

2. 有沒有跟跑會或教練跑？選擇原因？
我而家跟緊Hill & Heal，教練係怪獸。之前一直都係自己操山，完全冇概念原來越野跑要跑得好，都係要練好路跑，跟住有朋友係跟緊怪獸，叫我可以一齊試下。路跑嘅課堂會有運動場衝圈，有時又會hill repeat，呢啲強度係我自己平時push唔到，所以就決定跟怪獸，直到而家。

3. 日常練習地點或路線？原因？
操山我通常都會練麥徑，一來方便，二來需要練嘅路況都足夠。

4. 最喜歡的跑步用品品牌？最喜歡一對跑鞋？
近來最喜歡著Hoka Mafate Speed 4，對鞋好俾到安全感我，令我跑嘅時候好有信心！

5. 未來比賽目標是什麼？
暫時都係以代表香港，出戰世錦賽為目標。

6. 最想到外國哪裏跑馬拉松或者越野跑比賽？你會揀邊比賽？
最想去冰島跑馬拉松。本身自己好鍾意冰島呢個國家，不過我暫時都唔會參加馬拉松，所以呢個目標暫時都定得遠啲，到時會係想以一個輕鬆嘅心情去參加。

7. 有沒試過有跑步傷患？如何處理？
Shin splints。行都痛，所以一定要停止晒所有跑步，之後積極去物理治療、針灸、拉筋按摩。

8. 喜歡跑山還是路跑？路跑跟山跑有什麼不同感受？
喜歡跑山多啲，鍾意有上山落山嘅轉換，同埋跑山可以令我放鬆心情，欣賞上到山頂嘅景色。相反路跑嘅時候，我會好專心要控制好節奏同心率。

9. 跑山有沒有遇到奇怪或者靈異事件？
幸好暫時都沒有，之後都唔希望有（驚）！

10. 有沒有因為跑步而放棄了其他運動？
其實都算有，以前我都鍾意玩wakeboard，近期鍾意玩wakesurf，但係而家驚整親受傷，所以都放棄咗，唔玩住。

11. 你同時作為一個健身教練，有什麼意見給予跑手去增強自己，覺得哪一個部分的訓練最易被忽略？
無論係路跑定越野跑手，我都會建議大家要做重量訓練，除咗大家都知道要訓練核心同下半身肌肉之外，都唔可以忽略上半身嘅鍛鍊。

最後一題，有什麼社交媒體可以找到你？
IG: peipei11_11

04 10 月
REPORT

華哥不專業鞋評 Craft Nordlite Ultra

Craft 前幾年就出咗幾對路跑 + 山跑嘅兩用鞋， 當中包括 CTM Ultra Carbon、CTM Ultra 3 等等。而今年出咗對 Nordlite Ultra，同以往自家嘅跑鞋都好唔同， 直頭成對鞋款都改晒。

鞋面嘅網布比起 Ultra 3 更加軟身同透氣，比較似用咗布料而唔喺網布，比起以前嘅款式著落更加舒服。鞋舌位用膠做主料，內側加上網布，減少鞋舌同腳背磨擦；前掌位置加闊咗，俾前掌同腳趾有更加多嘅空間，對於闊掌嘅朋友係一個福音（可能Craft想開拓埋亞洲市場！？）

以往 Craft 嘅中底就用咗UD Foam（即係以前嘅EVA膠），相對比較硬身（需要接近 100 公里去 run in 對鞋）。今次嘅 Nordlite Ultra 就改用 CR Foam，就咁踩落去個吓已經覺得有啲淋，大大縮短咗 run in 嘅時間。加上用咗 Ortholite 鞋墊，大大增加彈性之外，更加透氣、防臭、防霉同吸汗。

今次鞋底嘅膠釘（lug）形狀比以前大，款式唔同咗，中底連接位置設有細孔，每次跑步落地個吓中底都會有一定嘅空間俾佢減壓。

喺乾爽嘅地下有唔錯嘅抓地性，但係濕滑嘅路上面可能就要小心啲，有機會跣。如果係短途山賽、炎熱乾爽嘅地面，甚至拎嚟 easy run、long jog，我會好建議著呢款鞋。但如果落雨天、濕嘅地面，或者對自己肌力好有信心嘅朋友，可以一試。

13 9 月
INTERVIEW

跑步與人（COROS SPARK篇）- 鄭文皓

1. Marcus你的跑步年資？及為什麼開始跑步？
4年，當初聽到中學老師問有冇人想加入田徑隊，自己當時冇玩任何運動，聽到好似幾有趣，就好快咁舉咗手，成為全班唯一舉手嘅人，亦慢慢加入咗田徑隊。

2. 有沒有跟跑會或教練跑？選擇原因？
有，Heartbeat，當時係主要跑 800m，但發覺自己身型比較瘦，覺得長跑應該較有利，而且當時 Heartbeat 嘅運動員當紅，自己亦好想跑得快、破紀錄，就喺 IG 搵咗陳嘉威教練。

3. 最深刻的一場賽事？原因？
啱啱 7 月嘅 Gold Coast Half Marathon，打破咗 U20 半馬青年紀錄。做到呢兩年多嘅目標，呢個紀錄亦都肯定咗自己疫情至今嘅堅持同努力，都算彌補咗自己冇得跑學界嘅遺憾。

4. 日常跑步路線? 最喜歡的練跑運動場地（原因？）
西九文化區嘅海傍，我屋企跑去西九大約 3 公里，跑到嗰邊又望住個海，對於慢跑、長課都非常寧靜同放鬆。運動場就深水埗運動場，因為會見到教練，佢會喺度教班。

5. 最喜歡的跑步用品品牌？ 最喜歡一對跑鞋？
Nike，練習鐘意 Pegasus 同 Zoomfly；比賽就 Alphafly。

6. 有沒有跑步傷患？如何處理？
有呀，由今年年頭一月嘅腳外側 stress fracture，之後到三月腳趾發炎，再到 6 月半月板勞損。今年都過得好唔容易，去到 7 月 Gold Coast 前都傷緊，當自己愈想做好嘅時候，反而可能會令心態緊張，恢復得差，操勞過度引致受傷；所以練習真係應該適可而止，consistent 最重要，同教練制定好練習計劃，有時太攰要識得休息。

7. 現時跑步目標是什麼？
現時呢兩三個月都希望注重練習，喺年尾 11-12月，希望可以打破 10,000m，10km U20 紀錄，亦都想再推快自己半馬紀錄。

8. 未來會否挑戰全馬？如果會，會選擇哪個作為初馬?
會，相信全馬同其他項目唔同，係另一個世界，自己好想體驗。初馬嘅地點就想係渣打馬拉松，喺香港比賽特別大歸屬感，沿途聽到廣東話打氣會特別有動力。

9 於 COROS SPARK 你會參加 10KM 路跑賽段， 有沒有比賽 tips 可提供予參加者？路段上有哪些要注意事項？
路段好多上落斜，較易出乳酸，比賽時跑嘅 pacing 應該要控制一下，唔好一開始有力就狂衝，先穩定，再喺後程落斜嘅適當時候加快。訓練上多加斜路同加速跑，亦可以係長課時候加插跑山。

10. 10KM 比賽一般練習應該專注哪方面？會如何應用 Coros 手錶去配合練習？
10km 最重要係速耐，3-4 個月準備。每次嘅訓練都唔應該大辛苦，強度亦應控制於 70-80% full effort（以Coros手錶data作監控）。練習量亦應循序漸進。

11. 有什麼社交媒體可以找到你？
IG: ho_marcussssss

*照片由受訪者提供

11 9 月
INTERVIEW

跑步與人（COROS SPARK篇）- 紀嘉文

1. 跑步年資？當年為什麼開始跑步？
22 年，當年因為無聊跟咗啲朋友去田徑場練習，跑下跑下又覺得好玩，咁就玩咗 20 幾年啦！

2. 你參加過不少比賽，哪一場印象最深刻？原因？
應該係 2012 香港馬拉松半馬，嗰年贏冠軍。其實喺西隧嘅時候被 Kiprotich Thomas 大概甩咗 200 米，最後竟然係中環追番，我自己都估唔到。

3. 日常跑步路線? 最喜歡的練跑場地（原因？）
大欖郊野公園、西貢北潭涌，因為冇乜人，同埋嗰度風景比較靚。

4. 最喜歡的跑步用品品牌？ 最喜歡一對跑鞋？
Nike Alphafly。 

5. 你現時作為港隊教練及半馬代表，你自己怎看這個身份？作為香港代表，又有沒有什麼使命感？
都係咁囉，冇乜特別嘅感覺，都係想大家一齊練習一齊進步。

6. 現時跑步目標是什麼？未來將會參加什麼比賽？
都係跑馬拉松，希望去到亞運。今年去唔到，有少少失望，不過盡力去追求啦，嚟緊可能玩下三鐵或者山賽定向等。

7. 作為教練，你怎看香港的長跑發展？
其實香港嘅運動員都係進步緊，同埋我覺得佢哋俾我哋以前練習嘅方法更加全面，希望將來香港有機會出到個世界級嘅運動員。

8. 於 COROS SPARK 你會參加 10KM 及 50KM 山路賽，今次會怎樣準備山賽部分？
山賽我之前都有玩，不過怕受傷，所以費事影響路賽表現，而家都開始想跑下越野跑，會多訓練腿部嘅肌肉力量，為越野賽做好準備。

9. 賽前又會怎樣作部署？體力應該怎分配？
其實我都冇乜經驗，所以應該都係跟住其他跑手跑。

10. 同時，你有什麼比賽 tips 可提供俾參加者？路段上又有冇需要注意事項？
我覺得 10 月天氣可能都仲係好熱，所以跑手應該量力而為，避免中暑。

11 這類連續式比賽應該怎樣練習？ 應該集中訓練路跑還是山跑？
其實今次嘅 50K 路段難度唔算太高，而且比較多石屎路，所以我都係照返平常練習方法咁去訓練。

12 訓練上，你會如何應用 COROS 手錶去配合練習？
我會利用 COROS 心率來控制自己訓練嘅強度，最重要係避免自己 overtrain。

13. 有什麼社交媒體可以找到你？
IG: gikaman_

07 9 月
INTERVIEW

3球野與人：Marquise & Raymond

1. 跑步年資？為什麼開始跑步？
Raymond：應該七八年左右，以前係因為打拳要練體能同減磅，先一星期跑一次，直到疫情冇得打比賽，冇咩寄託，之後就跑多咗步，慢慢就愛上咗。
Marquise：未到半年。跑步原因 40%係另一半鍾意跑步，佢會成日鼓勵我郁多啲跑多啲；60%係自己想練下意志，學跑步，令跑山路跑技術上有更多進步。

2. 有沒有跟跑會或教練跑？選擇原因？
M：朋友介紹下，今年五月開始join咗Trailblazer，因為喺比賽其間發現，喺路跑嘅路段比其他跑手弱，所以想針對訓練下路跑同埋改進下跑姿，減少受傷機會。

3. 日常練習地點或路線？原因？
R：平時如果星期日上山，我比較鍾意操單M或雙M！
第一：起點終點一樣，又可以泊車喺東涌，可以帶少好多嘢。
第二：我住青衣去東涌算近，交通方便，可以慳好多時間。
第三：大嶼山夏天涼過西貢好多。

4. 最喜歡的跑步用品品牌？最喜歡一對跑鞋？
R：Mountain Martial Arts（MMA），因為每個款都限款，好少會撞款；鞋我就比較鍾意Salomon S/Lab Pulsar SG，因為夠包腳。
M：無咩特別，邊件抵著就著咩，成身都著唔同牌子。跑鞋就最鍾意 ASICS Novablast 3，包腳穩定性高，日常襯到衫，對我呢啲新手嚟講咩 program 都駕馭得到。

5. 跑步對人生有沒有幫助/改變？
R：跑步令我生活規律咗好多，時間管理好咗！同埋明白有句好老土嘅野：沒有奇蹟，只有累積！
M：一個人可以跑得快，一班人可以跑得更遠。平時自己跑都無乜意志撐落去，但有人陪就唔同，死都死埋佢🤣！

6. 有沒有跑步傷患？如何處理？
R：好好彩除咗幾年前試過ITBS外冇咩受傷，嗰陣處理方法係停跑、按摩同休息。
M：2021年頭做過半月板微創手術，不過就唔係因跑步而傷，而係因為放自己一年假，喺香港同我家狗狗四處露營，以前掛住返工無運動，一下子負荷太大肌力不足而受傷。處理方法就係做完手術後露住營休腳，轉咗玩Freedive做水療，療好傷就上返山。

7. 未來跑步或比賽目標是什麼？
R：希望今年唔好受傷，HK100順順利利做個滿意嘅成積，之後專心練多啲路跑，馬拉松可以Sub3。
M：養成跑步習慣，學好跑步減低受傷機會。2023年尾嘅馬拉松可以Sub4；2023年嘅HK100 THE HALF係行住去完成，無點跑過。希望2024年可以跑住完成。

8. 想到外國比賽嗎？會選擇到哪處比賽？
R：最想去旅行順便hea玩CCC睇風景，因為如果認真去比賽，之後就唔會有力去玩。

9. 跑步途中會想什麼？
M：觀察自己嘅跑姿、體感、強度、當下嘅感覺。

10. 路跑跟山跑有什麼不同感受？
M：路跑比較悶，如果路線不變通常啲風景一樣，但山跑就算路線一樣，但落咗場雨已經可以變化好大，望到遙遠嘅山脈風景，好多時都會覺得好幸福。雖然住喺石屎森林入面，但一上到山居高臨下嘅城市風景係香港另一種美，同埋可以見到好多小動物小昆蟲同花草樹木。

11. 最深刻的一場賽事？原因？
R：上年HK100，因為去到尾段上緊針山嗰陣突然肚痛，之後十幾公里又痾又嘔搞到血糖太低，要坐係路邊休息，差啲要撤。
M：2023年頭HK100，原本諗住可以去開大食會。點知自己熱到只係食到橙同罐頭水果…🫠

12. 你們都有一起跑步、一齊練習？怎樣互相扶持？會否於假期時間都去了練習？
R：我地正常星期一、三、日都會一齊跑，不過喺同一個地點但各有各練🤣！
女朋友本身惰性大啲，所以平時假期一定我起身先，然後再叫佢起身，同埋跑完步要買定雪榚俾佢食😂。年尾冬天要練長課時，假期通常都係我自己一個操，女朋友就會專登早啲起身煮早餐俾我食，然後送我出門口。你哋再問我冇得跑步㗎喇…我哋只係假期上山拍拖啫。
M：有時佢去操山我就抽時間Freediving、做下副業、喺屋企陪下狗狗龜龜，做下家務整下蛋糕煲下湯水等男人返屋企🤭。

13. 有沒有試過一齊比賽？
R+M：啱啱3球野比賽嘅兩場：柏架山/大帽山。

14. 於 9/9 舉行的3球野系列賽第3球 – 畢架山站，有什麼 tips 可建議參賽者？又有什麼要注意？賽前可以針對哪方面提升自己？
R：一開頭就要爬升300幾米，記住唔好去咁盡，可以去到引水道先快少少，如果未試過路嘅，記住留力上畢架山，仲有呢條路較多technical嘅路段，著返山鞋安全啲。
M：練多啲長命斜，感受用咩配速最適合自己。

15. 有什麼社交媒體可以找到你？
Marquise:
FB: Marquise Li
IG: Marquiselpy

Raymond:
FB: Wai Ming Ng
IG: wai_ming_ng

*照片由受訪者提供

05 9 月
INTERVIEW

3球野與人：Cherry & Joseph

1. 兩位跑步年資？為什麼開始跑步？
Cherry: 2014 年開始起跑，因為想減肥所以跑步。
Joseph：跑步年資有二十多年。2000 年我去了台北讀大學，一個人身在異鄉，很陌生、很孤單，我開始用跑步「消磨」課餘時間。當時跑步除了「消磨」時間，也「消磨」脂肪；母校國立政治大學四面環山，因此便養成慢跑和行山習慣。

2. 開始跑步時有沒有跟跑會或教練跑？選擇原因？
C: 沒有跟跑會，純粹自己落街跑，沒有系統地訓練。
J : 沒有跟教練或跑會，也因為這樣，我走了很多冤枉路，如果當年一跑步就跟教練，我可以減省好多好多時間，走少好多錯誤的路。
2005 年第一場比賽是渣打全馬。當時回港後，恰好遇上渣馬開始報名，於是踏上了全馬旅途。初出茅廬跑全馬的我，沒有跟教練，也沒有任何馬拉松知識，只掛著一個「勇」字，跑了一半路程已耗盡所有體力，最後非常吃力地以 4 小時 40 分左右完賽。

3. 日常練習地點或路線？原因？
C：日常練習沒有特定路線，練長課會由屋企跑去蓮姐度，約 21k 。原因：又有山又有路。
J : 沒有特定路線，不受地域所限。

4. 最喜歡的跑步用品品牌？最喜歡一對跑鞋
C：ASICS Magic Speed 3。
J : 直到 23 年 8 月 31 日，我是 Team Salomon 成員，仍然會著 Salomon 參加越野比賽。

5. 有沒有跑步傷患？如何處理？
C: 有，膝頭內側痛，要多拉筋及強化周邊肌肉。
J : 一寸傷一寸強，傷患與進步只係一線之間。

6. 知道 Joseph 已完成了六大馬，未來有什麼目標？ 路跑尚有什麼目標想達到？
J：要完成六大馬，話難唔難，話易唔易，我當初訂目標是六大馬全 sub 3，去年倫敦馬是我第六隻六大馬，2 小時 46分 完成，六大馬平均時間是 2 小時 57 分。但我有些馬拉松失手，未能 sub 3，這些我會再補考的，
我已經跑了好多場馬拉松，好多場都能 sub 3，甚至 sub 250，但我仍想 PB，自己係有一個時間目標想衝破，受限於工作太忙，工作、家庭、戰神越野跑會，山賽… 分配上令我未能專心為馬拉松下多些心血。跑完 UTMB，下半年或者會放多些時間練馬！

7. Cherry 入選了 Team ASICS，又成為過 Garmin pacer，覺得自己跑步跟作為 pacer 跑步的分別是什麼？
C：有分別㗎！自己跑步可以竭盡所能，挑戰自己極限；作為 pacer 要做準確及穩定配速，引領跟隨自己的 runner 在目標時間內完成，責任較大，但相對滿足感亦增加。

8.  2 個都有一起跑步，會一齊練習？怎樣互相扶持？會否於假期時間都去了練習？又有否試過一齊比賽？
C：我地有一齊喺運動場跑步的（當 Joseph 慢跑時） ，因為我哋配速不一樣，運動場就一定會遇見對方，可給予對方鼓勵。而我哋假期或去旅行時都會跑步，亦有試過一齊比賽，例如渣打馬拉松及HK100。
J : 我和老婆經常一起比賽，例如倫敦馬、台北馬、東京馬、UTMB、UTMF…. 很多很多。

9. Joseph 開立了自己的跑班，自己跑步跟教跑步有什麼分別？
J：去年成立了「戰神越野」跑會，我開心有一班好好的學生一齊訓練，他們除了很 nice，實力也很強，而且很團結。加上太太 Cherry、我的 sub 3 好兄弟綸 Sir、豪 Sir 一齊協助，還有贊助商及好友幫忙，跑會才能成功運作。自己跑步及教跑步分別是：一個人可以跑好快，一班人可以跑好遠！

10. 兩位各自最深刻的一場賽事？原因？
C：2023 年日本的 UTMF KAI 69k。跑到 12k 舊患出現 ，打後痛住 57k 跑回終點，途中一直堅持著，有喊過又嬲自己點解會痛？最後落斜行也痛…. 但我知道我先生在終點等我、所以我一定堅持跑回終點，最後以14:57 完成，沒有 PB，但贏咗自己。

J : 最深刻一定是 4 徑…麥徑是我最熟悉的山徑，頭 50k 因太輕鬆太興奮，跑快了，到獅子亭半程 50km 才花了 5hrs 50mins 。這樣下去是 11 小時完 100k 的配速！故在後 50k 修正及拖慢，最後 13:21 完成，與目標 13.5hrs 相若。

抗眼瞓能力極差的我，預期第二條徑衛奕信徑會比麥徑慢一點，起步時下著大雨，體感溫度寒冷，這段訂 14.5hrs 完成。凌晨 4、5 點不敵睡魔呼喚，在城門水塘敗下陣來，跌跌撞撞地入了結界，幾經掙扎終於趁日出時分逃出生天，繼續前進。跑到飛鵝山時，開始感受到左腳腳腕有痛楚，沒有處理就繼續跑向藍田。痛楚慢慢加劇，在往太古地鐵站列車內脫了鞋，才發現腳腕紅腫了。用身上的頭巾包著腳腕，勉強跑畢衛徑 2、1 段（後來才知道在超長途山賽鞋帶不能綁得太緊，否則腳脹後會撞鞋頭或鞋舌引起腫脹及腫痛）。

還有兩條徑，不是還有兩段。港島徑 50k 及鳳凰徑70k，這是一個 120k 的距離，傷痛著繼續跑除了超現實，還有超痛苦，但我不想放棄。最後港島徑用了 7 小時 40 分跑到山頂及再 jog 3.5km 落中環 6 號碼頭。在中環碼頭等 30 多分鐘船的期間，我看到一眾好友都來了，那一刻很感動，熱淚盈眶。

到達梅窩，終於展開最後一條徑了。腳腕已好腫好痛，極度痛苦、痛楚；也極度眼瞓，但我不可以放棄，再慢也要完成。我內心只有一句 “ I must finish”。接下來的鳳凰徑，大澳至伯公坳這 20k 應該算是我生平走過最痛苦最煎熬的路段，腳腕傷患令我產生疼痛感。傷痛令我一次過消磨了所有時間，60 小時內完成也不清楚能否做到。下午 3 時尾終走畢鳳凰山，在伯公坳我聽到很多打氣聲、加油聲。

「人生總要為自己歡呼一次！」這一句說話及現場的加油聲，突然刺穿了我的心房，將早已熄滅的戰火重燃起來，大東山往南山返梅窩最後 9k 越野路，我忍著強痛再次跑起來了，豁了出去地直奔，只花了 1 小時 10 分便到梅窩市區，迎面望著綠色郵筒及等了良久的 Cherry和眾多好友、攝影師，這段捱了 16 小時，終於「捱」返梅窩…

有人說跑完一場 42.195km 的馬拉松可以體驗人生；我跑畢 298km 的超級越野馬拉松也感受不了人生，但感受了友情。

11. 知道兩位都想有小朋友，期望未來與兒子/女兒一起跑步嗎？
C：期待玩親子組！
J : 絕對會。

12. 於 9/9 舉行的3球野系列賽第3球 – 畢架山站，有什麼 tips 可建議參賽者？又有什麼要注意？賽前可以針對哪方面提升自己？
J : 第3球畢架山，路況技巧性高，比賽時要多加注意，不要受傷。

13. 有什麼社交媒體可以找到你？
Joseph:
FB: Joseph Yeung
IG: YCshero

Cherry:
FB: cherrycherry cheng
IG: running_cherrycherry

FB: 戰神越野Mars Trailrunning
IG: mars_trailrunning _hk

*照片由受訪者提供

08 8 月
INTERVIEW

3球野與人：Ruby & Jacky

Ruby
1. 跑步年資？為什麼開始跑步？
四年左右。
大約讀完書出嚟做嘢就開始跑步。一開始唔習慣返工經常坐，覺得需要多啲運動去平衡生活。跑步可以自已選擇跑快定慢，幾時想跑就跑，係非常好嘅運動，所以逐漸愛上。

2. 有沒有跟跑會或教練跑？選擇原因？
而家主要跟Blue Monday Running Club（Action Panda）跑，因為同我工作地點好近，收工過去好方便。
而且呢度又可以認識新朋友，二嚟教練團隊每次都有安排唔同嘅訓練內容/路線，都幾好玩。

3. 喜歡跑山還是路跑？
路跑。

4. 路跑跟山跑有什麼不同感受？
路跑比較城市化，喺熟悉嘅環境下跑步都係一種減壓。
而山跑，我覺得可以親親大自然，我都很享受，係另外一種體驗。

5. 最喜歡的跑步用品品牌？最喜歡一對跑鞋？
我最常穿着嘅跑步牌子係Nike；最鍾意應該係Nike Zoom Fly系列。

6. 日常跑步路線? 最喜歡的練跑運動場地（原因?）…
因為跟Blue Monday Running Club嘅關係，我通常會喺觀塘海濱跑步，有時跑去啟德郵輪碼頭，吹住海風嘅感覺好舒服！
第二個地方我會選擇深水埗運動場，因為居住地點鄰近，好喜歡一個人喺運動場放空自在咁跑。

7. 有沒有試過跑步傷患？如何處理？
幸運地暫時都沒有。每次訓練完我都會拉筋或者用按摩槍放鬆肌肉。

8. 最深刻的一場賽事？原因？
我嘅比賽經驗唔多，但係我期待下年渣打馬拉松10公里賽事，我希望可以跑出50分鐘內成績。

9. 除了跑步，有沒有做交叉訓練？（例如舉重/游泳/瑜伽）對跑步有沒有幫助？
都有嘅。除咗跑步，我都有上過瑜伽班或體適能練習，因為我覺得做核心肌肉群訓練對我跑步絕對有幫助。

10. 現時跑步目標是什麼？
我一直希望可以突破自己，慢慢進步。長遠跑步目標都係希望可以挑戰更遠嘅距離。

11. 於12/8舉行的3球野系列賽第2球 – 大帽山站，有什麼 tips 可建議參賽者？又有什麼要注意？
大家加油！天氣熱，飲多啲水！

Jacky
1. 知你快將跑芝加哥馬拉松，有什麼目標？會否想繼續挑戰六大馬？
首要係PB ，最希望做到Sub 3，所以我而家都積極備戰中。
挑戰六大馬拉松一直係我心願，但最近抽唔中倫敦馬拉松，希望抽中下年東京馬拉松啦，哈哈！

2. 除了跑步，你亦有玩兩鐵及跑山，對平時路跑有沒有幫助？
絕對有幫助。因為我當兩項鐵人同越野跑係交叉訓練。
兩者都屬於帶氧運動，相對單一跑步練習，可以使用唔同嘅肌肉，減低受傷風險。

3. 現在工作都與跑步有關，會接觸到很多品牌及裝備，有沒有特別推介或選購建議？
近排我嘅最愛跑鞋係New Balance Fresh Foam X More v4（絕對唔係廣告，雖然Action Panda真係有得賣，笑） ，着上腳嘅感覺非常柔軟、緩震力十足，好適合我輕鬆跑或者長課嗰陣使用。

4. 於12/8舉行的3球野系列賽第2球 – 大帽山站，有什麼 tips 可建議參賽者？又有什麼要注意？
因為八月都係比較炎熱，我建議參加者要適量嘅補水，帶定幾粒鹽糖，避免中暑。
路段上，前段會大量上斜，大家要適當地分配體力。

*相片由受訪者提供

03 8 月
MAGAZINE

COROS SPARK 100 山賽 X 路跑 紀嘉文初戰「一山一路」

由Sports Event Planner主辦、專業運動手錶品牌COROS冠名贊助之「COROS SPARK 100」賽事，將於9月30日至10月3日舉行，今次賽事破天荒融合山賽及路跑元素，讓參賽者在同一個比賽挑戰兩種賽事，成為「SPARKER」。

紀嘉文笑言：「我都去到差不多年紀了，所以也想未來參加多一點山賽！」

首屆3月舉行的COROS 100獲得眾多精英跑手破天荒參賽，來到第二屆，即使山賽賽道設計仍沿用麥理浩徑及衛奕信徑路段，但賽事秉承主辦大會的創新精神，加入不少新元素，例如新增路跑10公里及半馬拉松，日程上更刻意橫跨4日，令一眾賽手可挑戰「一山一路」，即參加一項路跑及一項山賽，即使參與最短的10公里路跑加50公里山賽，賽手都會被冠以「SPARKER」名銜。

前香港馬拉松紀錄保持者紀嘉文將挑戰10公里路跑及50公里越野跑，他說：「我一直喜歡行山，也有興趣參與山賽，但100公里賽事對我來說太長了，今次有50公里賽，所以想嘗試一下。」

對於初次嘗試「一山一路」連賽，他認為自己往常多在平路練習及比賽，所以要多學習跑爛泥路、碎石路及落山等技巧；他又笑言：「我見不少前輩在山賽可以玩好多年，我都去到差不多年紀了，所以也想參加多一點山賽。」

左起：鄭文皓、陸卓廷、黃浩聰

阿紀又鼓勵平時只參與路跑的跑友可嘗試參加山賽，因為有較大新鮮感，也有助練習路跑。本地新晉跑手鄭文皓亦會參加10公里路跑，爭取佳績，他透露今次是第一次跑萬宜水庫這路段，認為當中有一條長斜路，很富挑戰性。

左起：羅楚健、馬木幾、劉志豪
左起：廖科樂、Pei Pei Wong
左起：Ken Lui、DaDa Wong

另外賽事還有眾多本地精英跑手參加，例如廖科樂（阿樂）、Lena、Alex及Peipei等，幾位都會同時參加山賽與路跑，以力爭完成一山一路成為 「SPARKER」，其中阿樂便表示：「平時好難得有路跑及山賽的連賽，今次COROS SPARK 100增設路跑賽事，我平時好少跑路跑，所以都想挑戰一下，期望做到PB（個人最佳時間）。」他補充，連賽最大挑戰是身體的恢復，所以他會爭取時間休息，以及吃多點東西，補充體力。

Hill & Heal，左起：怪獸、傑sir、Eddie

賽事充滿挑戰性，大會亦邀得「Hill & Heal」教練及學員一同支援參賽者，教練之一的「傑sir」表示：「我們會在鶴藪支援，我們之前也參加過比賽，所以很清楚每個跑手需要什麼，例如最快那位跑手來到，我們會選擇合適的補充品，令他可以更快完成；而最後來到的跑友，見到還有支援，也會安心很多，不會輕言放棄。」

另一位教練「怪獸」提到，參賽者在第一個支援站補給時，不一定要選擇Power gel這類補給品，吃一個新鮮的水果來轉換心情，同樣重要。

左起：極地同行Steve Lo、Alex、Toby

今次賽事還加入了慈善元素，慈善機構「極地同行」主席Steve Lo邀得「旅遊達人」洪永城及13歲、患有運動感覺神經病變的Alex，一齊參加慈善輪椅10公里賽事。

「極地同行」負責人Steve Lo說：「我們今次會聯同10位傷健人士，當中有盲人、截肢或自閉症患者，一齊化身小朋友（Alex）的雙腳，輔助他一齊完成賽事。」

財商教育慈善基金會，左起：俊橋sir、Liz、Everest

今次賽事的受惠機構是「財商教育慈善基金會」。他們希望透過教育，幫助小朋友確立理財意識，創辦人兼主席Everest說：「希望小朋友將來在獲得足夠經濟支持下，追尋自己的夢想，所以我們的理念跟今次大賽的口號 “Dare to dream. Find your fire” 非常吻合。」

其機構的「追夢大使」俊橋sir為籌集善款，更會組隊參加50公里越野跑。

左起：賽事總監Nicole、Tony@thegoodlabel

值得一提的是，今次賽事連紀念品製作也一絲不苟，大會找來本地創作品牌thegoodlabel製作了一隻450ml單層鈦杯，只要參加COROS SPARK 100 – 50公里或100公里賽事便可獲得，thegoodlabel負責人Tony說：「我們希望做到又實用，又有收藏價值，所以花了不少心思去設計這隻杯。」

左起：Lena Mama、Nugo

最後，COROS SPARK 100主辦單位Sports Event Planner賽事總監麥凱玲總結：「每次去舉辦一場賽事，我們的團隊、義工們、合作單位，以至各參賽者的準備及成果，都是不容易，所以今年的口號 “Dare to dream. Find your fire”，不單止是為跑手去構思，更是所有參與其中的每位朋友的共同心聲。」

賽事報名日期由即日起，詳情可以參閱賽事網頁：www.sephk.com/coros100/index.php

30 7 月
INTERVIEW

3球野與人：Harmony

1. 跑步年資？為什麼開始跑步？
10 年。喺中四為咗玩定向而開始跑步，直到上年接觸越野跑，開始 explore 香港周圍跑，就更鍾意跑步！

2. 有沒有因為跑步而放棄了其他運動？
小學時期曾經跟過泳隊訓練，中學亦有幸成為游泳校隊隊員，但係中四之後因為安排唔到跑定向同操水嘅時間，最終放棄咗游水。

3. 最喜歡的跑步用品品牌？最喜歡一對跑鞋？
冇特別鍾意嘅跑步用品品牌，因為覺得喺唔同嘅路況、時間距離都有唔同嘅裝備。

4. 有沒有跟跑會或教練跑？選擇原因？
The Peak Hunter，上年有幸得到黃浩聰教練邀請加入提升班一齊訓練，覺得 TPH 嘅訓練 program 幾多元化。

5. 日常跑步路線？
扎山道，3km 全上斜去到觀景台，可以練毅力/power walk，一覽眾山小，感覺所有努力都值得💪🏻， 而且存放行李 friendly，方便放工去。

6. 知道你有玩野外定向，對跑步跑山有沒有幫助？
有，野外定向靠速度取勝，需要短時間衝刺；而且經過嘅山路多數較崎嶇，會對於要應付 technical 嘅山賽時更得心應手。

7. 將會參加有什麼比賽？目標是什麼？
3球野，咁熱天，目標係唔好爆😂！同埋年尾「定向 Annual Champ」要攞 Champ！

8. 比較外國、香港比賽有什麼不同？較喜歡在哪裏比賽？
外國嘅山路路況比較複雜，上落斜幅多變化，香港主要都係行山徑。最鐘意係瑞士比賽，因為周圍都係一幅畫咁，仲有無盡嘅水站補給！

9. 喜歡跑山還是路跑？
跑山，可以見到更多風景，加上可以轉換唔同肌肉跑，隻腳無咁攰🤓。

10. 有沒有跑步偶像？原因？
敏怡，因為覺得佢係時間管理大師，作為醫生要返 shift 都可以安排到時間訓練，令自己唔應該有藉口偷懶！

11. 跑完步最想吃什麼？
打邊爐放題，唔駛諗食咩！

12. 於12/8舉行的3球野系列賽第2球 – 大帽山站，有什麼 tips 可建議參賽者？又有什麼要注意？
路線最後要川龍上蓮姐，要留返少少心理準備上山，唔好落山時衝得太興奮；上到大帽山會好曬，戴頂帽遮陰減低中暑頭暈機會。

13. 最後一題，有什麼社交媒體可以找到你？
IG: haharmonyxd

24 7 月
INTERVIEW

3球野與人：Jason Kwok

1. 跑步年資？為什麼開始跑步
約14年。中學時期陸運會的 3,000 米賽事分甲、乙及丙三組，並設有獎勵機制，當參賽者被領頭者超越一圈後就會取消資格，「生還者」完成 7.5 圈後可獲完成證書一張。
幸運地有一年無被超越，並獲得「完成證書」。翌年以 12 分鐘內完成並獲獎（那時候覺得 4 分披完成 3,000 米已很厲害了）。及後慢慢嘗試較有效的訓練方法，也開始參加 10 公里至半馬比賽，近年開始接觸全馬。

2. 最喜歡的跑步用品品牌？最喜歡一對跑鞋？
個人最喜歡的跑步用品品牌是 Adidas。最喜歡的一對跑鞋是 Adizero Pro 3，過去數場比賽也是穿它突破個人最佳成績。

3. 最深刻的一場賽事？原因？
在香港馬拉松三小時內完成全馬的跑手，在終點拱門前合照。
作為一名本地跑手，也希望本地賽事可以跑出目標成績，成為其中一員。幸運 2021 年香港馬拉松天公造美，有助跑出 sub3，和一眾高手來個大合照。

4. 最喜歡的練跑運動場地？原因？
跑馬地馬場外圈。每圈距離較運動場長（約 1.4 公里），練習長途沒那麼悶；亦可以訓練較穩定的圈速，提升配速感；場內設施齊備，空間充足，適合大小跑團自成一角。

5. 跑步對人生有沒有幫助/改變？
跑步讓我認識了很多朋友，在活動/比賽時遇上也會打招呼。當然很多時未必在同一場合練習，但也會在 Strava 上看到大家都在努力變強。
也許自己的經歷也會不知不覺的為別人帶來正面影響，期待大家一起進步，在終點遇到更強的自己。

6. 除了跑步，有沒有做交叉訓練？（例如舉重/游泳/瑜伽）對跑步有沒有幫助？
目前沒有做交叉訓練。

7. 有沒有跑步傷患？如何處理？
向來訓練都偏向輕鬆強度，也未曾於練習嘗試跑出那些超越自身能力許多的速度，按步就班，亦有做好按摩保養及肌力訓練。故肌腱負荷應該也不高，直至現在未有跑步傷患，成績也按年進步。

8. 喜歡什麼時段跑步（晏跑/晚跑）？為什麼？
最喜歡清晨時間跑步，街上不多人，對訓練的影響較少，亦可享受獨處；跑完步剛好日出，回家整頓一下，食個早餐就上班，人都精神點；直至晚上教班後就回家休息。休息時間多了，對身體復原也有幫助。
清晨跑步最辛苦還是早起那幾分鐘，起到身就可以了！

9. 喜歡跑山還是路跑？有什麼不同感受？

跑山和路跑對我來說都是一種挑戰個人極限的形式，當然箇中體驗截然不同。
每項運動都有其吸引之處，自己也頗享受為全馬訓練投放的時間或方式，「反正都會進步的，就輕鬆點」；而長距離越野跑大多都要面對十多小時的活動時間，狀態會因應持續時間或強度而有不同反應，學會面對不同環境而調整也是一種能力。如果未準備好，那就好好的準備吧。
透過跑步（不管是跑山還是路跑）可以讓我多一個角度看到一個城市的美麗；不同的天氣、不同的跑伴，每次都會帶來不同體驗。

10. 現時跑步目標是什麼？
目前全馬最佳個人成績是 2 小時 52 分 28 秒，短期目標是希望全馬成績能突破 2 小時 48 分。而在未來能力和訓練時間可投入更多的基礎上，也希望可以挑戰一下 12 小時耐力跑或是 100 英里越野跑賽事。

11. 你剛剛入選了 Adidas Speed Squad，你覺得和自己平時跑步練習有何分別？
以往較習慣獨個練習，Speed Squad 則逢週三都會在運動場和一眾隊友跑強度課，跑著跟著時間就過了。
教練團隊很積極為成員提供指導，隊中也不乏經驗跑手，可向他們請教一二，期待透過團隊的力量讓大家走得更遠。

12. 承上題，你都是一個跑步教練，其他教練的方式對你有什麼啟發？對自己作為教練又有哪些幫助？

也許會有跑友在概念上覺得要進步，就必然要經歷「極端痛苦」，跑著近乎超越能力極限的課表。
採用「死操爛操」的土炮方法，要麼課表「食唔晒跳船」，要麼跑完好辛苦攤軟地上。表現都用在練習上，成績自然不如理想，也很容易受傷，長久下來訓練效率必然不高。
愈來愈多教練開始使用更合理的方法提供訓練，而學生在適量的負荷下，進步可期；而自己也是採用同類方法為學生提供鋪排，相信也是帶領學生朝正確的方向進發，令學生長跑長有。

13. 於12/8舉行的3球野系列賽第2球 – 大帽山站，有什麼 tips 可建議參賽者？又有什麼要注意？

大帽山站在比例上較少平路，作賽時也要調節一下策略。
賽道一開始是在扶輪公園營地停車場起步，沿麥理浩徑往大帽山「波頂」前進，約 4.5 公里的路程攀升近 440 米。
如要節省體力，可於持續攀升路段 Powerwalk，在一些斜度較高路段效果不會比跑步慢。
經過「波頂」後會沿路折返，並於閘口轉向施樂園方向。謹記在跑過大帽山瀑布後旁邊有樓梯小路，不要沿石屎路直落施樂園；在施樂園後的路段路面較為不平，要小心著地位置，避免拗柴。當落到響石墳場，需在避雨亭轉落對面的樓梯。然後一直沿大路前進就可以。

這段在 7.4 公里內下降近 600 米，要注意體力分配，因仍需在川龍後經扶輪公園自然教育徑（1.3 公里及攀升 160 米）返回停車場衝線。

14. 最後一題，有什麼社交媒體可以找到你？
IG: jason_kfl