PUMA嘅跑鞋挾住NITRO Foam泡棉中底技術（後來更發展出更高級別嘅Elite NITRO Foam），放到針對唔同跑手需要嘅型號上，近期確實做出成績及注目度，而且質素愈嚟愈好，好似新近呢對PUMA Deviate NITRO 2，雖然都屬碳板鞋設定，但就走親民路線，令跑者跑得相當愉快輕鬆！
先睇啲spec.：前腳掌 30mm / 後踭連鞋墊 38mm、重9.2oz（男裝）；中底第一層Elite NITRO Foam泡棉、第二層NITRO Foam泡棉、中間設入碳纖板PWRPLATE、外底PUMAGRIP。唔屬於極厚底設定，亦唔係採用大幅嘅向上Rocket幾何彎度設定，成對鞋望落絕對唔大殺氣，著落跑過之後，就更加感受到其friendly。
由於試鞋時已感覺到Deviate NITRO 2係對容易適應嘅跑鞋，所以就唔作太多事先run-in。第一日RunKid著佢去參加個私房小fun run；第2日就跑個20K tempo run。總體都測試過其速度及長距（包括舒適度及推力）表現。
小fun-run每人要跑3 x 1k左右，九龍仔公園石屎地（非運動場），3次嘅pacing大約3:55，喺冇乜run-in及warm-up情況下，筆者都好快可以適應到對鞋，由於本身輕身，所以喺任性提速方面冇大問題，主要構成前掌中底嘅Elite NITRO Foam亦俾到好好反應嘅回彈；雖然當日唔係雨天濕地，但喺需求速度之下，PUMAGRIP外底都俾到安全感同抓地力。
可能今次PUMA Deviate NITRO 2比上代加闊咗鞋楦，以RunKid非闊腳掌跑者嚟講，佢亦然係true to size嘅，但內籠就冇上代甚至筆者都擁有嘅Liberate NITRO咁包腳貼服。順帶一提，雖然第一個測試係以速度為主題，但RunKid都唔建議用碳板鞋去練短速嘅，只作反應及包腳感嘅測試。
連接第2日，筆者喺同一個地方上咗「賊船」（係跑友都明咩係賊船啦），跑咗20K tempo run，配速由4:50去到4:20。喺長距及長時間測試之下，可發現PUMA Deviate NITRO 2最大優點係「可控性」，尤如一隻你可以自身技術駕馭嘅戰機，唔會推到你失晒預算，有幾多跑幾多。
長距使用下，Elite NITRO Foam發揮出非常好嘅緩震及回彈；叉型全掌碳板PWRPLATE亦提供不絕推進力，就算筆者跑到後段時都已力竭咁濟，但都可借助PWRPLATE嘅推進力，力撐維持到4:30內至埋尾，都算係有驚喜。
至於PUMA Deviate NITRO 2嘅其他細節如工程網布透氣度、輕盈感（輔以PWRTAPE膠膜增加防撕裂）；PUMAGRIP外底及鞋舌與內籠相連，以防移位等等，都係俾到跑者信心嘅功能位。
總結：PUMA Deviate NITRO 2唔係殺氣騰騰嘅碳板鞋，相反，平易近人，唔會令跑者跑到失晒預算，快到自己都負荷唔到；可作為穿著碳板超級鞋出戰比賽嘅前準備訓練鞋，亦適合用以10K比賽。對於新接觸碳板鞋嘅跑者，亦係相當好跑嘅入門鞋。
