author-avatar

About 占米

一個樣樣事情只認識少少的 marketer,但因為跑步,結識了很多好朋友、好伙伴。

第一身看亞洲歷史悠久的PB聖地 首爾馬拉松

韓國首爾馬拉松是亞洲第一個馬拉松,由 1931 年開始,僅次於美國波士頓馬拉松,是世界上第二個最有歷史的馬拉松;更榮獲全球十大認證之最高水準馬拉松大賽,與波士頓、雅典一同被選為世界田徑文化遺產,筆者今次以參加者身份去體驗: 

1. 報名及遞交成績

香港跑者主要都在 World’s Marathons 網站報名,先到先得,報名過程順利,成功報名後會收到一個 order reference 供之後領取跑手包之用。奇怪的是報名時尚未找到正式賽道資料,官網資訊亦以韓文為主,沒有註明,當然大家可以找 2023 的作參考。

報名確認後,大會本來要求 12 月 17 前上 Runarchive.com upload 成績作分組之用,但一直沒有 email 通知,直至 1 月 26 日才收到 email 要在 30 日之前 upload。

分組時間按上報成績劃分。

2. 賽前 Expo

Expo 在戶外舉行,只有賽前 1 天,地點在終點蠶室綜合運動場園區位置,當地的跑手包以郵遞方式寄到手上,海外選手則需自行到 Expo 領取。 進入場館內經確認後,有一個手寫牌去領取,非常簡潔的包裝,內含兩件跑手 Tee,寄存物品袋及 aminoVital 贊助補給。

早上 adidas 在 Expo 也有舉辦 shakeout run 活動,根據參加者所講,出席可獲得一件 Seoul adidas runner tee 及一條大毛巾,但筆者酒店距離有點遠,只在景福宮外圍繞一圈作 easy run 完成最後一課練習。

進場館前,看到義工正努力準備完成包。
進入場館內經確認後,有一個手寫牌去領取,非常簡潔的包裝。

馬拉松主要贊助 adidas 於 Expo 佔地非常大, 除了兩層的 adidas lounge 外,還有近期推出的 Supernova Rise 吹氣擺設,場地另一側有一個挑戰,於限時內鬥跑得多,第一名可贏得 adizero Adios Pro 3 特別版.。

其他港人熟悉的贊助商如 aminoVITAL,Oatside 及 Shokz 亦有於現場擺放 booth。

adidas Lounge。
Supernova Rise 吹氣擺設。
供跑手簽名及拍照的打卡牆。
圖片來源:跑手提供

3. 比賽當日

比賽當天早上曾經下微雨,但起步前已經停雨,氣溫約 8-10 度左右,乾爽,是好適合挑戰 PB 的好天氣。

賽道為白金級別,起點於光化門廣場,途中上落幅度不大,彎道少,算是一條平坦的路線,中途會跑過首爾的地標包括光李舜臣雕像,南大門,清溪川公園等著名景點,最後跨越漢江至終點蠶室綜合運動場(東門),以往是在運動場內衝線,今年改到園區外的馬路,筆者略感可惜。

每約 5k 均設有水站,有寶礦力及濕水海棉提供,半程亦有 aminoVITAL 提供 aminoShot Power gel。

最後有幾樣要「吐糟」,雖不是大問題,但影響了體驗: 

  1. 起點位置流動廁所極少,筆者只留意前方有 2 格,其他放在較後位置,但根據大會數字,有多達 38,000 人參加(註:港珠澳半馬起點都有 12 格) ,幸好朋友找到附近商廈有開放給跑手使用。
  2. 沿途封了不少路,警察有在道路上維持秩序,讓有需要民居橫過,但途中有兩次被橫過的行人阻擋,稍稍打亂節奏,朋友亦見到有婆婆推車撞到其他人。
  3. 水站用上膠水杯,先不評論環保因素,跑手們拿上手後,不能按扁喝水,亦容易濺到手上。
  4. 完賽後需要走上差不多 300-400m 領取完成牌、補級品之類,途中大會沒有派發毛巾或其他保暖用品,雖知當天氣溫只有約 10 度,幸好陽光普照加上完賽後的腎上腺素飆升,跑者還可帶著疲乏身軀慢慢步行至領回物資保暖,否則很容易染病;如遇上壞天氣,期望大會有其他準備。

起點附近有大量酒店選擇,今次入住了 Shilla Stay GWH,是大部分跑友選擇,到起點只需約 5 分鐘路程,筆者 0630 先到下面寄行李,回酒店作最後準備才慢跑熱身到起點上線,可減少在起點吹風時間,保持身軀溫暖。

利申,筆者不熟悉韓國,比賽當天的早餐選擇了便利店飯團,是 3XL 的分量,但比較油膩,選飯卷或麵包可能更好;再者賽前加碳找不到比較清淡的食物,辣湯及燒肉則隨處可見。

完賽後可輸入 bib 時間作背景拍照留念。圖片來源:Seoul Marathon 官方 IG

最後,筆者認同台灣跑者視首爾馬為「最速賽道,最雷主辦」的原因,作為白金標,參加者帶著更高期望值看待比賽各環節,主辦方在細節上仍有進步空間。海外馬未必單純做 PB,跑手希望作為旅遊一部分,通過雙腿感受當地跑步文化及氛圍。

JBL Soundgear Sense 掛耳式運動耳機的入耳享受

筆者報咗名參加首爾馬拉松,長課動輒 30k 上落,時間超過 150 分鐘,音樂自然成為練習嘅好伙伴(利申:筆者只會係 easy run 或者練長課先聽歌,平時練習就比較少)

而跑步使用嘅耳機,會考慮以下因素:

1. 不輕易掉落
跑步期間或會遇上路段起伏之類,如果跑跑下跌咗就要停低執番,或會打亂節奏。

2. 不完全消音
30k 或以上多數會係吐公練習,有機會跑落單車徑,所以需要接收到外間聲音,以保障安全。

3. 不會影響戴眼鏡
作為眼鏡人士,戴上跑 2-3 小時,如果設計不舒適,除了影響練習,仲會令耳仔周圍受罪。

今次正好收到 JBL 安排嘅 Soundgear Sense,平時用開嘅 in ear 款式有時喺 easy run 時都會跑跑下鬆脫,考慮到長課要補給又要專心跟上配速,掛耳式設計正好解決輕易掉落嘅問題。呢款耳機係品牌第一款不入耳真無線耳機,仲獲得 Red Dot Award 2023 獎項。

據品牌提供嘅資料,Soundgear Sense 採用 16.2mm 大口徑嘅動圈單元,配搭 OpenSound 技術,提供自然嘅聲音體驗,幾乎唔會漏音。聲壓會透過聲波傳向耳仔,同時降低聲音散播;即係你享受自己嘅 playlist 時,唔會影響到旁人。

筆者多次返工途中喺地鐵上依然可以清楚聽到音樂,因為大部分 Open Ear 喺地鐵行車途中都會受風聲影響,好難聽到音樂。另外 Soundgear Sense 喺差滿電後,無線方式使用可以長達 6 小時,如果用 USB-C 充電,快速差 15 分鐘已經可以用多 4 小時;絕對適合大家長課使用。

文章開頭有提過,筆者係戴眼鏡人士,戴起 Soundgear Sense 上嚟都舒服,耳掛冇壓住耳背嘅感覺。筆者試過戴住跑步,完全冇因為戴眼鏡出現鬆脫或者滑落嘅問題;跟機其實有送一個頸環,可以將耳機掛上去,就可以有更好固定感。

喺 My JBL Headphones App 可以 set equalizer 同自訂觸控功能。

總結:JBL Soundgear Sense 係一款好啱跑步用嘅耳機,輕身、唔易揈甩、IP54 防塵防濺等級 (適合運動時使用,使用後可以直接清洗機身);當一個人長課嘅時候,聆聽自己喜愛嘅音樂可以分散注意力,放鬆心情,減低沉悶長課嘅負面感覺,或可令自己找到長課嘅一點甜。

P.S. 有一個情況筆者冇試過,就係通話,耳機內置 4 個咪,理論上係街都可以清晰通話,唔會好似潛咗水咁。

小品牌、大夢想 淺談小眾運動品牌(2)

上次講 apparel,今次就講下另外一樣可能係大家課金最多嘅產品:補給。三個牌子已經喺今年有香港代理引入,幾間 running specialty 已經出售中。

(圖片:Naak.com)

Näak

今年 UTMB 有一個品牌 Näak 成為 official nutrition partner,對比香港常見嘅能量食品,呢個品牌都幾新。特意睇下佢有咩產品,有 bar、waffle、drink mix 同 recovery protein 等,最意外就係一個產品叫 puree 嘅果蓉,對玩長途越野賽嘅朋友可能幾有新鮮感,起碼唔使成日食 bar 同 gel 咁悶掛 (戴番個頭盔先,筆者冇玩長途越野賽)

(圖片:Naak.com)

Näak 係加拿大品牌,係英文 Nutrition for Adventurous Athletes who run Kilometers 咁解,兩位創辦人 Minh 同 Will 本身係加拿大三鐵代表,2 位之後亦轉玩長途越野賽,非常了解補級嘅重要性,佢哋希望用可持續再生原料生產出有效嘅能量食品,幫助玩長途賽嘅運動員或參加者。

現階段 Näak 贊助好多頂級長途越野賽選手,包括長期留係香港嘅匈牙利藉跑手 Eszter Csillag;同時品牌亦稱產品適合大部分素食跑者。

(圖片:Naak.com及代理提供)

講番 waffle,自從 Honey Stinger 之後,香港好似冇同類型產品喺市場出現,呢啲產品對香港人嚟講可能係比賽食物,但有朋友指外國人會用 energy food 當小食。

筆者試過 waffle 同 drink mix ,呢兩樣都係今次 TransLantau 提供嘅補級,未知大家有咩意見?我個人覺得 waffle 好味,maple syrup 係 4 款之中最好食,而我只係試過練跑前食。

Drink mix 就少少難搞,倒咗落個 flask 再加水會好啲,筆者試過有水再加,就一直溶唔切,搞到成手粉同時又口感一般。

(圖片:Precision Fuel & Hydration)

Precision Fuel & Hydration

呢度簡稱佢做 Precision,2011 Andy Blow 係英國創辦,佢畢業於 Sport and Exercise Science,年青時仲經常喺短途三項鐵人賽事企櫈仔。但每次轉玩長途賽事就會有抽筋或者其他缺水問題,包括低血鈉症(英語:Hyponatremia),所以佢決定正視呢個問題,經過幾年唔同測試去計算自己補鈉同埋體液嘅方法去保持表現。過程中,佢得到心臟科醫生 Dr. Raj Jutley 幫助,通過一個專利 sweat testing 去檢查身體得到準確數據,及計算補級方法。

現時最近香港可以做呢個測試地方有中國北京、泰國曼谷及新加坡等。

佢仲有近年興起嘅能量軟糖、電解餅及鹽丸等產品,整個品牌都係圍繞耐力運動消耗建立,大家絕對可以一試。

另外,網站都有提供方程式計算你比賽需要吸收幾多水份、carbs、sodium 補級等,外國都有好多評測將佢同神 gel Maurten 比較;Precision carbs 含量比較高,一包有成 30g,但係就缺少鈉,需要配合佢哋自己嘅 electrolytes 去補充呢方面。

筆者之前睇咗 Action Panda 介紹,就買咗啲嚟試下,係金澤馬拉松就係以 PF30 同 PF30 caffeine 為補給,兩者分別同神 gel 設定一樣,分別只係有冇 caffeine,口味唔會太甜,易入口,上力係我嘅感覺,途中我都因應流汗、鈉質流失,有額外準備 2 包壽司郞嘅鹽直接啪。

Saurus 

日本除咗大家耳熟能詳嘅 aminovital 外,amino saurus 係今年新到香港,由 airfly 太陽眼鏡公司一併代理,同樣以 BCAA 產品作為主打。

品牌係由日本知名三鐵運動員嵜本晃次 Koji Sakimoto 自我研發,將運動員所需放落產品度,非常適合運動員。除了跑步食用 gel,品牌將產品分為 3 大類:Performnace、Recovery 同 Body Make,證明係向專業發展,保證運動員多方面補給使用。

長友佑都及牧野英明。

saurus 有兩位比較著名嘅品牌代言人,分別係長友佑都同牧野英明:前者唔使多介紹,前日本足球國腳亦係創辦人之一;後者係著名跑步 KOL,喺 Beams 開發事業部(business development)工作,主要負責運動跑步相關。

同 Maurten 一樣,01 白色 gel 係有咖啡因,芒果味,02 黑色 gel 就含 BCAA,檸檬味;兩款口味都有約 25g carbs 同 0.6g 鹽份,官方建議長途比賽前半段應該先食用 01,係清晨作提神用;同時咖啡因可以促進身體消耗能量,加速脂肪燃燒; 後期食用 02 就可以緩解肌肉酸痛。

(右圖:saurus official IG)

2022 年 2 月,品牌更加同 asics 合辦日本站嘅 Meta Time Trials ,呢個係 asics 為 Metaspeed 做嘅全球推廣活動。

而創辦人 Sakimoto San 今年 2 月曾經喺 On 日本總部作補級分享,分享比賽前後如何準備及恢復; 近年亦有參加神戶馬拉松 EXPO,可見品牌已經係日本滲入不同跑步環節。

(圖:saurus official IG 及嵜本晃次 IG)

Naak 官方網站:https://www.naak.com/

Precision Fuel & Hydration 官方網站:https://www.precisionhydration.com/

Saurus 官方網站:https://shop.saurusjapan.com/

On Squad Race團速賽 – Running as a Team Sport

”Running as a Team Sport” Squad Race 這個活動的原意,除了中國,日本也在 11 月中旬於北海道一個棒球場內舉辦了這比賽。這次是 On 的標誌性比賽,邀請了全國一齊參加,希望通過 Squad Race 讓大眾了解 On 的跑步 DNA

全國區決賽定於 12 2 日選址在上海 BMW 體驗中心舉辦,先從虛擬跑開始,參加者在 5 個地區:北京、上海、成都、深圳和廣州進行 5K 虛擬跑初賽。

初賽每一隊的參加者(10-30 人組成)各需要完成 5K,每區總分最高的前兩隊將直接進入決賽,分數以 3 個因素決定:隊中 5K 的平均時間、每人平均里數及隊中女性參加者數量,隊員因此可以不停的跑 5K PB 及儲里數。

圖片來源:跑野

最後勝出的隊伍需要從隊內挑選 10 名跑手去上海參加決賽,隊內必須要帶上 3 名女生。決賽是一個 5 x 1K 的接力賽,冠亞季軍由 12 隊爭奪,頭一輪先分開 2 組(每組各 6 隊)進行,這輪的跑手在隊伍晉級後也不能參加第二輪,所以每一隊要小心選擇第一輪的跑手以保持競爭力。

經過激烈的比賽後,最終由上海 129 訓練營奪冠(時間只需 14:19:85),頭三甲隊伍會得到 On 精選產品作為獎品。

這次是 On 在疫情後的首個大型活動,為提升現場氣氛,賽前有教練帶領熱身,現場同時設立了Therabody 放鬆區、咖啡供應,最後還有 Live Band 演出,務求令參加者好好享受比賽過程。

當然不少得產品體驗區,現場提供了 FW23 推出的 Cloudstratus 3 Cloudflow 4 On 簽約運動員碾者阿提及苗浩除了在總決賽開始前進行了一次有趣的表演賽,為比賽預熱外,其後更設有分享會,跟參加者分享練習及比賽點滴。

跑步看似是個人運動,今次 Squad Race 卻希望締造一個「命運共同體」的體驗。每一位跑手的分數不只自己,也影響其他隊友,團隊間不分性別,互相推動鼓勵,一起刷新 PB,回應 ”Running as a Team Sport”,當然跑友之間口術固然少不了。

On 作為新興品牌,能夠於 2 個月內舉辦一個全國性活動絕不容易,希望各參賽者盡興而歸,同時藉着活動讓大眾更了解 On 是一個以「跑」為目標的品牌。未來希望活動可以擴大讓更多跑團參與,或者有其他品牌舉辦接力比賽,讓香港市民跑友感受一下團賽的魔力。

義工於賽前練習拉衝線帶,證明非一般人可以做!
跑手包有號碼布夾、1 本 Squad Race Passport、1 本比賽規則、矽膠手帶及彩煙。

小品牌、大夢想 淺談小眾運動品牌(1)

除了大品牌外,唔少品牌喺近 2-3 年嘅香港路跑市場掘起,好似 On、Hoka、Saucony 等等,但係大部分都係生產鞋為主導,個別品牌如 Tracksmith 亦一早就通過網路進軍香港,日本自然有更多選擇,例如 MMA、ELDORESO、Stamp 等等。

今次筆者先㨂咗幾個衣服品牌同大家分享。個世界仲有好多選擇,大家可以多留意、發掘更多及分享。

SOAR Running

英國品牌,2015 年出世,創辦人 Tim Soar 都係一位設計師同跑手。 背心重量只有 44g (M),再加上 100% 回收物料生產,配合現時以環保為核心嘅大趨勢發展,品牌短時間已經成功進入英國跑者眼球,亦係今年 4 月倫敦馬拉松設立 pop up,等跑手感受一下 SOAR 文化。

品牌喺 2021 年左右由代理引入香港,1-2 年通過曝光,火速成為跑衫新貴。好多人一開始見到價錢就放低,但更多用家喺入手後,對其輕薄同速乾功能性非常讚嘆,更大讚係 vest 界天花板,相信唔少路跑及山賽都見其踪影。

(左圖)筆者都啱啱入手一件 Soar 香港特別版。

近期 SOAR 亦推出香港特別版,特意找來 Sammy So、Lok、Peipei 同青山之王做 ambassador 介紹;無獨有偶,幾位都喜歡越野跑,Lok 同 Peipei 仲啱啱喺 TransLantau 攞到優異成績,但篇幅有限,呢度唔詳述背心嘅優點。

筆者反而留意其短褲設計嘅特點,大部份路跑短褲都冇特別為袋 gel 設計,一來 race shorts 以輕為主導,二來高手唔使袋咁多 gel 喺身,所以對於袋嘅使用未必有太多考慮。

好多人就係咁而選擇著越野跑短褲作長跑,SOAR 就好貼心喺短褲前端加上橡筋圈,等跑者可以輕易攞 gel,另外褲後面大袋亦係以橡筋作開口,係一個好細心嘅設計,唔會擔心跑緊時跌嘢同時又可以輕易抽出。

SAYSKY

丹麥品牌,2013 年面世,SAYSKY 係由 “Look up in the sky and be a star” 而嚟,品牌希望大家可以勇於挑戰自己、追逐夢想。北歐品牌特色就係 Minimal 嘅設計,同時主張環保。由 SS24 起,品牌將有超過 75% 產品係用 Responsible Manner 生產,即係產品有 40% 以上採用可回收、可再生、可生物降解同埋有機物料生產。

SAYSKY: www.saysky.com

(圖片來源:SAYSKY 官網)

圖片可見,設計極簡潔係北歐特色(大家鐘意 IKEA 嘅原因),加上當地四季天氣分明,所以會提供唔同 layer 及款式於秋冬季著用,手襪亦有多款選擇應付寒冬,但相信香港人只集中留意背心、短褲。

筆者曾於 2021 年渣打半馬穿上 SAYSKY 背心跑褲完成,感覺於半馬非常適用;褲已有內膽,及後腰位置有兩邊袋,足夠放 2 包 gel 完成賽事。

品牌已經喺日本進駐 SteP。相中 3 位正是大阪梅田店員,筆者 11 月初去購物時都係由佢哋協助。(圖片來源 IG@stepsportsosaka)
香港亦有 Harbour Runners 聯乘款式(圖片來源 IG@harbourrunners)。

Janji

美國品牌,2012 年誕生,”Janji” 係印尼語,promise 承諾咁解,但佢做咩承諾呢?品牌希望通過跑步讓大眾可以接觸淨水(又係環保公司),所以每張訂單嘅 2% 收益都會用番嚟支持為品牌每個季度系列提供靈感嘅國家淨水項目。

其 logo 就係由一個地球嘅正弦地圖投影演變出嚟,象徵著世界係相互聯繫。

SS22 同印尼爪哇 Greeneration 合作,FW22 同智利 Fundación Amulén 至 SS23 同 GWP-C 合作為加勒比海國家出一分力。可見品牌用心為各地出力,網站則以 collection 作區分。

如 SS23 Carribean 風格偏向樹木,海洋色系。
FW22 智利則傾向 earth tone。
跑步背心、短褲等採用一款叫 AFO(AirFlatOut)嘅彈性物料生產,以快乾、排汗及回收布料為賣點。

SAYSKY 同 Janji 暫時香港未有代理引入,始終運動品牌競爭非常之大,就如專注瑜珈嘅 lululemon 都有開發跑步系列。

希望大家除咗大品牌外,細品牌亦有好多可取之處,值得大家留意及支持。

Janji: www.runjanji.com

On Cloudstratus 3 雙層緩震 長課好物!

Cloudstratus 一直係 ON 品牌入面以緩震作為賣點嘅跑鞋,因為佢係用咗雙層 CloudTec 打造嘅款式,由 2017 推出第一代至今第三代,係 ON 其中一個深受跑者喜愛嘅練習鞋款。 

ON 一直嘅大眾形象未必係同跑步相關,品牌創辦人 Olivier 係前三鐵世界冠軍,佢希望可以研發一對與別不同嘅跑鞋,所以 ON 本身係一個有跑步 DNA 嘅品牌。費達拿於 2019 年注資入股令更多人留意 ON,品牌 2021 年喺美國上市,The Roger 系列就成為咗費達拿獨有嘅 Line,開展咗網球產品嘅發展。

今次 Cloudstratus 3 除咗保留以往嘅優點,亦有以幾點值得留意:

1. 鞋身面料採用咗 100% 可再生物料編織,全對鞋用咗 23% 再生物料打造,比上一代提升 3%。鞋內腳踭位置、鞋口及腳背(即鞋脷)幾個部份都有加厚棉,令著用感覺更舒適。

 

2. 中底用咗標誌性雙層 Cloudtec,物料係 HelionTM Superfoam(已經應用喺 ON 大部分跑鞋上),有顯著緩震效果同時保持到回彈嘅腳感。如果以 cushioning 作為賣點,對比 Cloudmonster 嘅推進,Cloudstratus 3 顯得更加平穩。

3. 中底繼續嵌有 Speedboard 膠板,保持一定推動力,今代開始外底已經封閉咗,鞋底係睇唔到 Speedboard,估計係防止攝石仔。另外,大部分著地位置有橡膠大底,一嚟可以增強抓地力,二嚟可以令對鞋更耐用。

筆者已經著用佢跑超過 60km,包括一課 140 分鐘 LSD、一課 120 分鐘 Easy + Steady,速度由 6:00/km 提升至 5:00/km 亦完全冇問題,唔會因為其出色緩震而影響腳感。稍闊嘅鞋楦係長課後期,雙腳充血發脹時,亦唔會過緊。作為長課鞋款,US8.5 重量亦只係 290g,舒適同時保留輕盈嘅腳感。 

總結:Cloudstratus 3 鞋款定位以出色緩震力作為賣點,對追求速度嘅跑者比較適合作長距離及輕鬆跑之用;一般身型較重嘅朋友可直接考慮比賽著用。就我個人認為,Cloudstratus 3 非常適合用喺半馬 / 全馬長課訓練,即使課表內容或有提速,雙層 CloudTec 嘅緩震加上 Speedboard 提供推動力互相配合,係賽前準備嘅練習好拍檔。

Asics GEL-NIMBUS 25 恢復跑神器 舒適度極高

GEL-NIMBUS 一直係 Asics 以出色緩震作賣點嘅跑鞋系列,今次 GEL-NIMBUS 25 更被譽為「品牌至今為止為舒適跑鞋」,特意喺 2022 年㡳於世界各地派發白色版本俾 influencers 開箱,去除產品原有定位,直接讓跑者感受同評測,同時引起各界跑友好奇心,齊齊估下係咩新型號。

大眾以往對緩震類別跑鞋會有 2 個主要想法:比較笨重同埋外形普通,但隨住近年 maximal shoes 普及,舒適感加上多種顏色搭配,開始好多人作為 Lifestyle 或旅跑著用。今次 GEL-NIMBUS 25 一改大家以往嘅印象,並推出多個配色,絕對有一款適合貪靚跑友,最緊要係襯色嘛!

GEL-NIMBUS 25 有以下值得留意重點:

  • 鞋身係極具彈性嘅針織物料,唔單止柔軟,亦好透氣。彈性物料更一直伸延到後跟位置,配合拉環設計,方便穿著。鞋內腳踭部分有加厚棉,舒適同時加強穩定性。
  • 中底用咗 FF BLAST PLUS ECO 環保材料,使用超過 20% 可再生原料,配合現時追求環保嘅方向;後踭部位加入咗全新 Pure Gel,比起前一代更柔軟更輕,造就「Asics 至今為止為舒適嘅跑鞋」。
  • 鞋底喺經常觸地部分用咗全新 AHAR 增加耐磨及耐用性,根據 Asics 所講,對比以往耐用性增加2倍。由於近日天氣乾爽,未有機會係濕滑地面測試,唔知 AHAR 係雨天情況下有幾防跣。

筆者喺渣馬後收到鞋,雖然今次唔係跑全馬,但完成半馬後都想選用較舒適嘅鞋款 recovery。著上 GEL-NIMBUS 25 第一個感覺係:「好舒服!」隨即試走一課 30 mins recovery run,透氣貼合嘅鞋面加上舒適、輕盈嘅腳感(US9 重量 10.3oz,不足 300g),跑嘅時候可以減輕腳部負擔,亦唔太焗腳。試跑了超過 60 公里,主要都係用作 easy ,亦試過 90 分鐘走「5 分披」,每一課都感受到呢對鞋緩震能力非常出色。

總結:由於 GEL-NIMBUS 25 定位以舒適度作為賣點,對追求速度嘅跑者較適合作輕鬆跑及回復跑之用;一般跑者或者身重嘅朋友,則可當作長課鞋使用,甚至乎比賽著用,其優秀緩震讓用家能更加享受跑步。
就我個人認為喺半馬 / 全馬比賽後,雙腳疲勞尚未回復之時,呢對 GEL-NIMBUS 25 嘅柔軟、緩衝特性,正好作為賽事後嘅恢復跑嘅好配搭。

跑步與人(名馬篇):Bebi、Candy & Cookie

上星期一眾 Zero Running Club 女生已經完成東京馬拉松,Gloria(3:51:08)及 Cynthia(4:36:31)各以 PB 成績完成;晴子(3:57)則以 sub4 完賽。
今個星期日,Zero Running Club 亦有 3 位女生出發到名古屋。因為一個只為女子而設的馬拉松,每一年吸引不少香港女生專誠到訪,不單是為了挑戰自己,最重要當然還有特設待遇及紀念品!

左起:Candy、Cookie、Bebi。

1. 為什麼大家會開始跑步?
Cookie 是當年見到劉心悠穿上 adidas 跑衫宣傳渣打馬拉松,覺得運動女生很吸引,便跟姊妹勾手指尾,約定一齊報渣馬(當年挑戰 10 公里)。Candy 一開始是因為想改善失眠問題而開始跑步,但愈跑愈上癮,現在要跑步先安樂。
Bebi 曾經有段時間住小西灣藍灣半島,睡房的落地玻璃窗向下望便是運動場;每天見有人散步、有人慢跑,也有跑班成群結隊快跑,有老人家有小朋友。夏天烈陽下每天風雨不改亦有一位鋼條身型的伯伯帶著漁夫帽、赤膊自轉跑 1 小時。後來有一天,決定從睡房遙望轉為親歷在其中。第一次跑連續跑了10圈,大約25分鐘,朋友都說「快」,Bebi 也覺得幾容易,便開始跑步。

2. 為什麼跑全馬?
Cookie 開始跑步後加入了一些團跑,結識很多跑友,後來聽到跑友們都說海外馬氣氛很好、天氣很適合,於是就有了想法 – 甚麼時候放大假,就看看哪個地方剛好有馬拉松賽事,順便旅行遊覽,一舉兩得。
疫情期間,Candy 感到跑步的生涯好似暫停了一樣,現在見疫情減退,覺得要「做返啲嘢」,追回失去幾年的時間,因為未知將會遇到什麼大風浪,所以活在當下一息尚存,趁有能力就便盡力而為,突破一下放低了 3 年的全馬成績。
Bebi 開始跑步無耐,已經買了一隻 GPS 手錶,然後去巴黎旅行,每天繼續跑步,有試過沿着塞納河跑,也試過跑去凡爾賽宮。跑完看見 GPS 顯示的地圖和路線,很有成功感,所以便開始想跑全馬。讓路線更長,地圖面積更廣。

3. 以前有參加過其他海外馬嗎?
3 位都不是初哥,疫情前已有一定經驗,Candy 亦已經不止一次參加名古屋馬拉松;Bebi 更用雙腳走遍不同地方,自 2018 年渣馬完成初馬後,之後跑過拉脫維亞的 Riga Marathon、澳洲黃金海岸 Gold Coast Marathon 以及 2019 年日本金澤馬拉松。

4. 為什麼會揀名古屋馬拉松?
Cookie 於 2019年時分別抽中東京馬拉松及名古屋馬拉松,並計劃連馬,可是完成東馬後元氣大傷,最後選擇放棄名馬,隨後疫情爆發,今次趁旅遊放寛再次報名,彌補上次的缺賽。
Candy 認為全女班跑馬拉松好型,而且自己當年初馬都是名馬,想在剛步入不惑之年重拾跑步初心。
Bebi 則主要是想感受一下全女子的馬拉松,當然品牌項鍊也是吸引報名原因。

5. 有什麼特別針對性的訓練嗎?
Cookie 因自身瘦削,肌肉不夠,訓練時容易受傷,希望以不受傷地訓練,余顯華教練知道她們經常會亂練習,所以 program 上不會太辛苦。
Candy 之前試過受 ITB 傷困擾,知道自己不足之處,除了恆常跟教練 program 外,亦有多做慢跑及體能加強肌力。
Bebi 已經有差不多 2 年沒有投入訓練,現在只是重新起步,主要以慢跑為主,讓肌肉重新適應跑步的感覺。

6. 華教練有甚麼出賽提示?
Cookie:「聽自己身體感覺去跑,不要時快時慢,保持均速。」
Candy:「教練成日提醒我不要跑太快,enjoy 比賽,不要亂衝。」
Bebi:「教練提醒要強化肌肉力量和剛性,不能只著重柔軟度、活動幅度而忽略肌力訓練。」

Bebi - 前公務員,已經有不少海外馬經驗,今次名馬沒特別目標,給自己時間再次發掘跑步的樂趣。

7. 會不會一齊衝線? 定各有目標?
Cookie:「我們幾個女仔訓練水平都不太一樣,各人亦有各人的目標時間,只能說『終點見』」。
Candy:「每個人都有自己目標時間,所以未必一齊衝線,但我會在終點等她們  🥰。」
Bebi:「跑步是一班人也是自己一個人的旅程。今次名古屋女子馬拉松有好多朋友一齊參加,但到最後,各人也是自己跑自己的,我沒有要結伴跑步的習慣。不過衝過終點後,仍然會期待可以見到朋友等待我的 😆。」

Candy - 自認是一個貪玩的人,再次挑戰名古屋馬拉松,想重拾初心,目標 3:30 內完成。

8. 會穿什麼跑鞋?
Cookie:「adidas adizero pro 2 或 Nike Zoom Vaporfly 4%(但 4% 可能已經太耐沒著而變硬 🤣)!」
Candy:「Nike ZoomX Vaporfly Next% 2。」
Bebi:「未有決定,但會選擇功能性與外形並重的跑鞋。」

9. 名馬以品牌頸鏈及禮服男為賣點,有什麼期待?
Cookie:「今次完全忘記了有頸鏈同禮服男,3 年沒有去旅行,難得同一班跑步同學一齊去,一齊笑教練已經好期待 🤪!」
Candy:「禮服男名單中有一位香港人呂偉強先生,大家都是香港人講廣東話同聲同氣,會更有親切感,希望到時會遇到他。」
Bebi:「品牌項鍊是吸引報名的原因!」

10. 下一個比賽或海外馬目標是?為什麼?
Cookie:「NYC Marathon(如抽中),希望 BQ 達標。」
Candy:「11 月渣打半馬,在剛剛過去的渣馬也是參加半馬組別,但因天氣關係及準備名馬,所以發揮不太理想,所以想再挑戰多次西隧 🤣。」
Bebi:「名古屋後, 4 月會去倫敦馬拉松及 9 月柏林馬拉松。我的重點比賽會放在柏林馬,因為訓練一個馬拉松最好有 6 個月時間。現在距離 9 月剛好夠練習一個完整週期。」

余顯華教練在訪問最後一樣寄語 3 位學生:加油,好好享受成段旅程。
名古屋馬拉松是為全女生打造的賽事,參加者專享禮服男迎接衝線及品牌項鏈,預祝 3 位香港女跑手在好氣氛、好天氣下將會做出佳績。
隨著生活逐步回復正常,期許大家能繼續跑下去,永遠保持對跑步的熱情。

跑步與人(東馬篇):晴子、Gloria & Cynthia

疫情前,海外馬對大部分香港跑手來說是人生必備項目,直接用自己雙腿感受世界挑戰自我。日本作為馬拉松聖地,每年於不同城市有大大小小比賽,有為奧運名額而戰的 MGC,亦有以不同食物補給作特色的。
香港人闊別 3 年的東京馬拉松將於 3 月 5 日星期日舉行,相信不少香港跑手已準備就緒,盡情享受日本馬拉松的熱情及氣氛。
Zero Running Club 亦將有 3 位女生參加,3 位皆不是全馬初哥,問及有甚麼特別針對性訓練時?都不約而同指出專心跟隨華教練的訓練計劃練習。

由左至右,Cynthia、Gloria、晴子及余顯華教練。

1. 各人的跑步年資?
晴子已有 5 年跑齡,由跟朋友參加神戶馬拉松開始跑步。Gloria 則跑了 4 年,2019年一班朋友更一齊中籤參加名古屋女子馬拉松,去年更參加了倫敦馬拉松;Cynthia 由 2017 年已開始接觸跑步,但因家庭原因斷斷續續停了一段時間,現在重拾跑步樂趣。

2. 為什麼會跑馬拉松?
晴子想在旅行期間通過跑步,以一雙腿用特別的方式體驗每一個城市;Gloria 認為馬拉松非常有挑戰性,而且自己鐘意跑步,想挑戰更長距離。而 Cynthia 亦想以馬拉松挑戰自己,並有意想再次挑戰名古屋女子馬拉松。

3. 為何會跑東京馬拉松?
東京馬拉松本身已經不易中籤,這幾年更因為疫情,有很多 defer quota ,直至今年終於可以有海外選手參與。晴子是因為幸運抽中了,所以要把握這次機會;Gloria 及 Cynthia 兩位均希望可以完成「六大馬」,達成跑者夢寐以求的甜甜圈。

4. 期望成績如何?
3 位對自己都有一定目標,晴子將會嘗試以 3 小時 45 分完成, Gloria 則希望做到 sub4,Cynthia 則定下一個較保守的目標, 4 小時 30 分內完成。

晴子 - 跑步年資約 5 年,職業是一位音樂老師,已參加了 2 次馬拉松,分別為神戶及金澤。今次東馬目標時間為 3 小時 45 分內。

5. 以前有參加過其他日本馬拉松?
日本作為香港人的「鄉下」,不少跑者皆以日本作海外馬首選,因為氣氛、Expo、補給及賽後的 shopping 絕對精彩。3 位都已經不是第一次參加日本賽事,3 人曾參加的馬拉松:
晴子: 神戶、金澤 / Gloria: 名古屋、富士山 / Cynthia: 名古屋

6. 有什麼特別針對性的訓練嗎?
3 位不約而同都指出只跟從華教練的訓練,看來華教練已經為 3 位學生度身訂造了一套專屬的訓練。

7. 會穿著那款跑鞋挑戰今次馬拉松?
每人都有自己的精選鞋款,按自己需要喜好著用:
晴子 – adidas Adios 6 / Gloria – New Balance fuelcell RC elite v2 / Cynthia – Nike ZoomX Vaporfly Next%2

Gloria - 跑步年資約 4 年,是一位眼科醫生,已經參加了 3 次馬拉松,分別是名古屋、富士山及倫敦。今次東馬目標時間 4 小時內。

8. 東京好多時都會遇上落雨或天氣比較凍,會怎樣準備?
晴子表示會戴帽及穿上手袖,同時謹記余顯華訓示。Gloria 亦會穿上手袖、手套及帶上暖包。Cynthia 則會帶上便利雨衣,預備手袖、手套及戴帽,最重要是保暖及比賽前做足熱身。
(編按:預計東京當日天氣約 6-15 度,乾爽天陰無雨,屬有利跑手發揮)

Cynthia - 由 2017 年開始跑步,一名素人,曾參加名古屋女子馬拉松。今次東馬目標時間 4 小時 30 分內。

9. 下一個比賽或海外馬目標是?為什麼?
Gloria 會繼續向六大馬進發,9 月將與一班跑友一齊出發挑戰柏林馬拉松。Cynthia 將目標放在 11 月的香港渣打馬拉松,想以 4 小時 15 分目標挑戰這條魔鬼賽道。晴子暫時未有目標,會保持訓練迎接下一場。

10. 華教練有甚麼出賽提示:
晴子:跑得開心!
Gloria:盡力,均速。
Cynthia:注重休息,盡力便好了,Enjoy the game。 

余顯華教練在訪問最後寄語 3 位學生:加油,好好享受成段旅程。
馬拉松過程雖然長,由準備至比賽中間投放了不少時間,每一個過程均為下一個比賽打造更好的基礎。放下緊張,好好享受定必做出更好成績。
3 位女跑手已於香港訓練充足,準備就緒,大家是時間出發,重新感受疫情後的海外馬。

PUMA Fast-Trac Nitro 易上「腳」越野跑鞋

PUMA 近兩年重新進入跑者嘅眼球,先有 Molly Seidel 穿著於奥運全馬攞到第三,近日又有本地年輕跑手 Vincent 喺半馬比賽勝出,可見佢哋推出嘅跑鞋已經好有競爭力。PUMA 以 Nitro Foam 氮氣中底技術推出咗一系列跑鞋:有練習用嘅 Velocity NITRO 2,或者競賽用嘅 Deviate NITRO ELITE,但係我今次介紹嘅係用同一中底技術推出嘅越野跑鞋 Fast-Trac Nitro。

第一對 PUMA 用同樣中底技術推出嘅 trail running 鞋款,其實係 2021 嘅 Voyage Nitro,但今次 Fast-Trac Nitro 明顯係要話俾大家知,佢係攞嚟跑,因為喺外觀、反應同重量上都做得幾出色。

Fast-Trac Nitro 有以下功能點值得留意:
・鞋身採用 Ripstop 網眼鞋面,會較輕身,鞋舌同鞋領都夠厚同貼腳,跑起上嚟冇咁易甩踭。鞋頭有防護橡膠塗層,踢到石仔冇咁痛;鞋踭仲有橡筋方便著鞋。
・中底係全掌 Nitro Foam,輕得嚟唔會影響反應,又提供足夠緩衝。外面就用 ProFoam Lite 包裹保護,提供輕量同舒適腳感,同時保護番腳掌及避震。
・外底用咗 PumaGrip ATR 呢種耐磨橡膠合成物料製造,專為山路同不同地形而設,可以話係一個全能型設計。廠方增加顆粒數量同時縮短間距,用密集排列增加同地面接觸面積,提升防跣效果。

襯住好天,簡單走一轉 16K 大嶼山試鞋。有山路有平路,順便睇埋芒草。
首先著上之後感覺好輕,資料顯示佢只係 205g 左右(US9),前後掌差係 8mm,同路跑鞋差唔多。基本上對一般路跑人嚟講會跑得幾爽,而係 Light trail 嘅路段上面更加感受到 Nitro Foam 嘅反應同緩震, 加上對鞋包腳,配合 PumaGrip ATR 嘅出色抓地力,即使踩中碎石,只要即時修正就唔怕會拗到。

總結:以我一個業餘路跑人學跑山嚟講,Fast-Trac Nitro 比較適合中短途(30K 或以下)、山路平路結合嘅越野跑比賽穿著,因為佢輕巧靈敏,對追求敏捷度嘅經驗跑者,只要加上佢哋嘅越野跑技術,絕對有助爭取理想成績。