On 除咗有今年熱議嘅 Cloudboom Stike LS 外，其他型號相繼推出更新。Cloudrunner 是品牌為大眾跑者設計作日常使用嘅款式，以穩定舒適為賣點。
Cloudrunner 2 最主要嘅更新係由原先 Zero Gravity Foam 升級至整個 Performance Running category 入面主要中底物料 Helion Superfoam，有更好嘅回彈同更強緩震。鞋後踭厚度 31mm，前後掌落差為 10mm，鞋身偏重，US10 重約 290g，跟平常以穩定作賣點嘅各鞋款差唔多 。
Cloudrunner 2 有以下值得留意：
- 鞋面對比一代，換上網布，更透氣同柔軟；鞋舌及鞋領位依舊保留厚身設計，為穩定鞋款提供包覆感，穿著會更舒適。
- 中底有明顯轉變，升級至 Helion Superfoam，後踭位置可以明顯見到有標註 Helion 字眼；追加 TPU 貼片增加支撐性及鎖穩腳踭，同時睇到緩震鞋嘅特色，鞋底較厚身。CloudTec 雲模塊又原本 7 個變做 8 個，代表緩震程度同樣升級。呢款鞋冇內嵌 Speedboard，似乎首次喺 CloudTec Phase 中底以外嘅鞋款發生；以往唔少跑者提出 On 跑鞋偏硬，主因係有 Speedboard，著上 Cloudrunner 2 後確實冇咗以往嘅硬繃繃
- Cloudrunner 係 On 入面嘅支撐鞋款，通過引導令腳掌著地作支撐，有別其他品牌係腳弓位置加硬身物料作支撐（可參考上右圖）；希望用一種較自然嘅方式幫助用家改善扁平足。
跑後感
作為以穩定為賣點嘅款式，筆者日常只會係 easy run 40-50min 同旅行時著（旅行時，我係完全唔會跑 program 😂），因為唔使多帶其他鞋款，加上闊鞋楦設計，旅行途中要不停行就好適合，即使行到下午腳腫都唔會覺得箍腳。由於今代沒有 Speedboard，整體感覺偏淋，感覺更傾向 Hoka Clifton，作為 easy run 或者慢慢開始接觸跑手會比較喜歡呢種感覺。直接講，同級別我自己就偏好 NB 1080v13 作為練習選擇，筆者之前一個短 trip 都帶上佢喺跑步機作 easy run。
總結
Cloudrunner 2 因為其闊鞋楦設計加上笨重嘅外觀，未必係 On 受歡迎嘅款式，女士因為著咗對腳掌唔顯瘦未必考慮，但好多亦穿著其一段時間後，發現其優點而讚口不絕。坊間呢類穩定支撐型鞋款大多數唔容易作出街穿搭，但對比第一代，Cloudrunner 2 喺配色同埋物料上升級咗，更加切合現今大家對出街/運動兩用嘅方向。再者扁平足算係一個普遍腳患，長遠跑步下或會影響膝頭甚至腰部問題，能夠搵到一款兼顧練習同日常穿著使用，對扁平足跑者算係多一個唔錯嘅選擇。
