FAST-R NITRO Elite 係一對全馬比賽用嘅跑鞋，外觀設計好大膽，運用咗多數只會喺籃球鞋上出現嘅前後掌分離式中底；外露 PWRPLATE 碳纖板，希望減輕鞋身重量之餘，亦提高靈活度。
前掌以 NITRO ELITE 為中底，入面加入氮氣，希望提供又輕又彈嘅感覺。後掌就用返 EVA 膠作為穩定之用。鞋面係半透明嘅膠面，增加透氣同散水能力。
而為咗強化鞋面，外內兩側都加入咗 PWRTAPE。鞋套係一種好有彈性嘅編織襪套（只喺腳套最上面，冇喺前後再延伸），簡單啲講，佢個襪套設計只喺圍繞住腳眼位置，唔會成對鞋都用襪套設計，相對容易穿著。
唔好以為易著咗就會好易甩出嚟，佢後踭位就好貼合對腳，甚至會覺得佢收窄咗（個人覺得冇唔舒服嘅感覺，可能會有朋友仔會覺得小頂嘅）；加埋上面襪套設計，其實係比較難除落嚟（易著唔代表易除）。而鞋底利用 PUMAGRIP LIGHT 提供耐磨同抓地性。
第一吓著落去會覺得好實在，唔似其他品牌咁搖晃，可惜鞋感係偏硬嘅。如果你拎嚟慢跑會感覺到有嘢頂住（因為觸地時間長），而喺快跑嗰陣，頂住嘅感覺唔會太明顯，反而似係想頂返你向前跑，增加推動性；加埋腳踭位收窄咗，會建議著過腳眼嘅襪去跑，會舒服啲。
我諗著開薄底鞋或者釘鞋嘅朋友會好鍾意佢，但跑開路跑嘅可能就因為佢太硬而未必鍾意。可以先試半馬以下嘅比賽去感受對鞋，習慣咗之後就可以試吓全馬。
