路線：小瀝源 ➡️ 水泉澳 ➡️ 慈沙古道 ➡️ 沙田坳道 ➡️ 慈沙古道 ➡️ 水泉澳 ➡️ 小瀝源
想輕鬆上吓山體驗一下越野跑嘅樂趣？呢條路線就最啱你！
全程8km，由小瀝源/沙田圍出發，經水泉澳同慈沙古道，大約35分鐘就到沙田坳道～作為一條新手都行得嘅古道，當然 #輕輕鬆鬆鄧梓峰。
上到沙田坳就梗係去恒益士多買返支薑汁豆漿同豆腐花～食完行返原路落或者經沙田坳道落去黃大仙都得。
👍🏻 交通方便（港鐵到沙田圍站起點，終點可以揀去黃大仙/沙田）
👍🏻 路程短，一家大細都啱 😂
👎 景色唔算特別靚
👎 慈沙古道之前都有段較長嘅斜路
詳細路線圖參考👇👇
https://connect.garmin.com/modern/course/158636007
DareToRun 嘅一般選手 Chris 之後都會繼續介紹其他跑山或者郊遊路線㗎，Stay Tuned！
CRAFT出品跑鞋的其中一個方向，是以Hybrid（混用）為定位，即是路跑及輕山跑兩種著用，如Ultra 3及Nordlite Ultra等等。今次的Xplor同樣走這個路線，但驚喜的是，在跑感及咬地功能上都帶來很好表現，可以這樣說，Xplor是我迄今穿過最好跑的CRAFT兩用跑鞋。
Xplor的其中一個賣點，其外底橡膠及膠粒設定是與單車輪胎品牌Vittoria共同研發。來自意大利的Vittoria擅於生產公路單車、越野單車及砂石單車（Gravel Bike）輪胎，由於砂石單車定位與混用型跑鞋相似，既能走於公路，也要奔馳於草地或碎石地等自然路況，CRAFT就是看中此點，於是Xplor的外底就此而生。
在Xplor的外底上，我們除看到雙方logo之外，也能明顯見到其形態與單車輪胎確實十分相似，中間與外圍膠釘的分佈亦有顯著分別。
據官資所述：「外圍靈感來自Terreno Mix輪胎，鞋紋深的箭頭增強向前動力和耐用度；內圍魚鱗形鞋紋靈感來自Terreno Dry輪胎，確保在濕滑路況仍能提供出色抓地力。」至於表現如何，下文將補充。
另一Xplor的驚喜位，是中底的回彈性及穩定性。
雖然今次Xplor中底依然沿用品牌的Px foam，但在配方上應作出了調整，初著easy run時明顯能感受其回彈性增強了，中底橫幅也很足夠，配合鞋身的較闊設定，令跑時每步著地都絕對平穩，尤其是於雨天或濕地訓練時，外、中底的配合，令跑者很有信心落腳。
筆者首次開鞋Xplor，就盡得「天時地利」- 落雨濕地。
原定是著用來作60mins easy run，去到跑馬地時遇上雨天，心諗「乜咁啱！」由於Xplor的鞋型偏闊，對於筆者正常腳掌闊度的用家來說，兩邊會有點鬆動，但一經索緊鞋帶或穿厚一點襪，都可解決；相對地，如果你是屬於闊腳掌型跑手，Xplor就更適合。
當然Xplor較闊腳掌型態的設定，是造就其更為穩定的因素。
開鞋當日就算是微雨或停雨後濕地，Xplor落地每步都有很足夠的著地面積及穩定性，如果你的跑姿是「前中掌落地型」，那就更加萬無一失；其二是Vittoria外底提供的優勢，直接一點形容，就像是穿著單車輪胎在跑，每步都很啜地，跑時更會發出「唧唧」聲（尤其濕地跑），你已可想像到表現是有幾咬地了！
Xplor沒有加置碳板或纖維板，前後差6mm（32.5mm/38.5mm）；前掌鞋型呈適中上翹，帶來一定程度的推進力，很適合用作easy run或tempo訓練，筆者著用過數次來作easy run（由於近期off season課表沒tempo，都是以speed train為主），亦有愈跑愈順的感覺。
試完路，就上山。
筆者已報名21k「香港五峰」，早前與隊友試路時亦著用Xplor，以測試其山跑力及咬地性能。「香港五峰」21k屬於「地形變化多端的混合路線」，由大潭郊野公園燒烤區二號場起步，途經大風坳、畢拿山、小馬山、金督馳馬徑、渣甸山、紫羅蘭山等等，有上落山梯、有爆林、有石澗、有砂石平路等等，應有盡有，可試盡一對跑山鞋的性能。
首先是Vittoria外底的發揮，無論是落梯、砂石上落斜坡、澗間石頭，其咬地力都屬無庸置疑，很踏實的對應每一步著地；除了我自己感受到，我隊友在後面目睹我上落不同地形事後都說：「你對鞋好咬地！」鞋面是一件式工程網布，著用時能保持舒適透氣；試路當日「忽然」遇上30+度高溫（1884年有記錄以來的最高溫3月日子），亦感受到Xplor於跑山時提供到的乾爽。
至於砂石平地的表現，則延續著路跑的平穩跑感。
石屎地引水道不在話下，金督馳馬徑的砂石平路也能令跑者可以盡情發揮，保有速度及砂石地上的回彈性之餘，亦兼顧穩定性，針對香港山賽某些會較多平路跑段的特色來說，Xplor是很適合用以訓練及出賽（唯獨是到迄今都未有試到落雨或霧濕時其上山表現）。
總結：Xplor今次帶來很好的混用鞋體驗，無論於路跑及山跑都有很平均而偏上的表現，同時亦兼具了自身的個性（如Vittoria外底、中底Px foam泡棉那近似Pebax的回彈配方）。對於筆者既會路跑又會上山走走的混合型跑者來說，Hybrid跑鞋確實是有所需求，CRAFT Xplor今次的表現我會以7.7/10來評分，就來期望下對出品可以達至9/10吧！
玩咗幾年山，今次係第一次飛出香港玩山賽，為咗慳假所以選擇星期五飛星期六賽星期日走。 對上一次自己一個人飛係去台灣揾JB環台，今次飛泰國又係揾JB比賽，諗起都sweet sweet @kinkinyu！
首先要多謝阿閃批准我報比賽 @laukathyy；第二要多謝阿閃米豬（仔仔）過去三個月逢星期六俾我上山玩 @babe_austin_tam，第三再多謝阿閃米豬俾我自己飛去玩賽！
今次比賽原來諗住10個鐘內完，但係JB話唔夠時間去揼骨，所以改咗計劃9個鐘內完成，望住8個半鐘做，心諗最快做到8個鐘就心足。
頭6k平路諗住跟JB跑5分半pace，但現實係殘酷嘅，跑到1k隻錶一響發現4分半立即拉慢自己，之後JB喺我前面慢慢消失。
跑到5k半開始上山，就慢慢調整自己上山嘅速度回一回氣。不知不覺行行下見到前面有幾張枱有幾個大水樽先發現到咗CP1，望一望錶俾預期快咗成個鐘，見自己身體無乜問題出現，入滿水繼續用返呢個速度行。
啱啱上山就撞到山人Tommy @tommihui 喺附近，大家一路吹水一路上山，原本諗住有排上點知上咗一陣以後斜路狂落，大家一路跑一路傾好快就上到CP2。
第二個CP係大站，有好多補給同食物，經過之前嘅教訓操練無食開嘅食物盡量唔好試，所以簡簡單單入滿水去完廁所繼續上路！
跑咗1k多啲就開始上山，上咗一陣就跟返Tommy背影繼續行程。跑多幾k竟然撞到una師姐，跟住佢一路跑入泰國市集。原來以為市集係CP3點知只係經過啫，經過啲舖頭見到大象褲有少少心動想買條著，雖然已經有一條！
穿過市集見到條好似大帽山嘅斜路，即刻有種想追白波嘅感覺，上多2k幾3k終於去到最後一個CP，旅程好快完結啦。
一如既往入滿水走人，因為最後13k大多數係斜路，無懸念一路跑，中間有上有落以為大會講嘅上300米完，點知落到第一條馬路竟然要再上多個山，心情百感交集用盡所有力氣爬上山，見到隻錶話仲有2k到終點，即刻狂奔衝落山。
再次見到平路同時見到Finish sign，知道就快衝線啦，第一時間FaceTime屋企隻「寵物」（老婆） 一路傾一路衝線！
衝線後第一時間衝去揾JB，連完成牌完成Tee都無拎俾人叫停 ；好驚JB掉低我自己返酒店去揼骨呀 ！
好開心可以無傷無痛完賽仲要拎到好好嘅成績，最重要係一班一齊去玩，期待下次會多啲monkey一齊出國玩 ！
Race Time: 6:52:35
Overall: 73rd
Cat Rank: 9th
CrazyMonkey金句：當你踏上起跑線是一個成就，順利完成已經是一個勝利，能夠做到好成績是一個bonus！
多謝強仔 @ee_chyah 推介我一齊玩呢個賽，一班人一齊玩好開心。雖然而家少咗好多monkey上山，不過我相信你哋好快就會返嚟㗎啦！
今年好多越野跑大賽都以正常姿態回歸，當中當然包括年度山賽盛事之一 – The North Face 100 香港越野跑挑戰賽 2023（TNF 100），而且在整體觀感及賽事設計上，都帶來新鮮感。
筆者早幾年都參加過TNF 100賽事，包括50k及100k。誠然，這是個不易克戰的山賽，攀升度高，也夾雜不少技術性路段，但山賽的吸引之處，正正就是這些！
而今年筆者參加的是新增16k賽事（因為自己一星期後有台北半馬）。現在的越野賽段設計，都有相繼加入短程賽（20k左右）的趨勢，一來可吸引更多山跑新手參與，二來相信於政府批出路段時亦較容易。
但短途山賽並不代表「易玩」！它仍然有其另一種難度。以今次TNF 16k為例，就是筆者於短時間內跑得最多，強度也高的一個山賽。短途山賽換句話說，就是以速度為先，一般於50k/100k的分配體力、留前鬥後等概念都不管用，槍聲一嗚，就是要跑、跑同跑！
由起步一刻，相信筆者與大部分參賽者都會視它為一個16k路跑賽去處理。平路時當然要跑，就算上山、上梯時，都是連行帶跑的急步殺上；我看到全程幾乎都在自己前後的各跑者，都不見有一刻鬆懈，一時你在前，下段我越前，其實十分刺激！最後筆者以sub2完成，全場12，成績都算OK吧！
說回賽事配套安排。
由於遇上選舉期，今年TNF 100的賽事場地移師到美督明珠（釣魚場），包括起終點、 頒獎禮及今屆首設的TNF Base Camp。論場地布置，今次很有嘉年華氣氛，由甫一進場，到沿途的打卡位及旗幟排列，都很有儀式感，也呈現出歡樂的比賽氣氛。
以筆者參與的16k早上時段來說，跑手間的競賽感可能沒50k/100k那麼強，賽前大家都很輕鬆拍照、熱烈交談。
至於今次首度增設的TNF Base Camp，座落於起點過橋後的另一端。提供打卡位及精選美食，讓跑手賽後可以chill一下、補充體力，作賽後檢討又或是互鬥口術亦可，而不是趕著搭巴士離開。
除了「有得食，仲有得摞」，大家也可以參與DIY絲印環保袋工作坊，自己印一個TNF tote bag帶回家，冇獎都有個袋！
總括，筆者很享受今次參與TNF 100/16的經驗（因為對自己而言不是一個好有壓力的賽事，只作為一節長課訓練）。
相信各跑手每次都會抱有不同期望去參賽，有的為爭獎，有的是博盡，有的是想初嘗山賽滋味，有的是想一覽香港山景之美…縱然今屆在賽道上去到最後關頭才能確定，惹來小聲音，但TNF 100作為香港越野跑界其中一個重要的賽事，筆者當然希望下年能夠繼續參與。
1. 跑步年資？為什麼開始跑步？
2018年開始跑步，因為當時想試玩一個障礙賽。
2. 有沒有跟跑會或教練跑？選擇原因？
我而家跟緊Hill & Heal，教練係怪獸。之前一直都係自己操山，完全冇概念原來越野跑要跑得好，都係要練好路跑，跟住有朋友係跟緊怪獸，叫我可以一齊試下。路跑嘅課堂會有運動場衝圈，有時又會hill repeat，呢啲強度係我自己平時push唔到，所以就決定跟怪獸，直到而家。
3. 日常練習地點或路線？原因？
操山我通常都會練麥徑，一來方便，二來需要練嘅路況都足夠。
4. 最喜歡的跑步用品品牌？最喜歡一對跑鞋？
近來最喜歡著Hoka Mafate Speed 4，對鞋好俾到安全感我，令我跑嘅時候好有信心！
5. 未來比賽目標是什麼？
暫時都係以代表香港，出戰世錦賽為目標。
6. 最想到外國哪裏跑馬拉松或者越野跑比賽？你會揀邊比賽？
最想去冰島跑馬拉松。本身自己好鍾意冰島呢個國家，不過我暫時都唔會參加馬拉松，所以呢個目標暫時都定得遠啲，到時會係想以一個輕鬆嘅心情去參加。
7. 有沒試過有跑步傷患？如何處理？
Shin splints。行都痛，所以一定要停止晒所有跑步，之後積極去物理治療、針灸、拉筋按摩。
8. 喜歡跑山還是路跑？路跑跟山跑有什麼不同感受？
喜歡跑山多啲，鍾意有上山落山嘅轉換，同埋跑山可以令我放鬆心情，欣賞上到山頂嘅景色。相反路跑嘅時候，我會好專心要控制好節奏同心率。
9. 跑山有沒有遇到奇怪或者靈異事件？
幸好暫時都沒有，之後都唔希望有（驚）！
10. 有沒有因為跑步而放棄了其他運動？
其實都算有，以前我都鍾意玩wakeboard，近期鍾意玩wakesurf，但係而家驚整親受傷，所以都放棄咗，唔玩住。
11. 你同時作為一個健身教練，有什麼意見給予跑手去增強自己，覺得哪一個部分的訓練最易被忽略？
無論係路跑定越野跑手，我都會建議大家要做重量訓練，除咗大家都知道要訓練核心同下半身肌肉之外，都唔可以忽略上半身嘅鍛鍊。
最後一題，有什麼社交媒體可以找到你？
IG: peipei11_11
Craft 前幾年就出咗幾對路跑 + 山跑嘅兩用鞋， 當中包括 CTM Ultra Carbon、CTM Ultra 3 等等。而今年出咗對 Nordlite Ultra，同以往自家嘅跑鞋都好唔同， 直頭成對鞋款都改晒。
鞋面嘅網布比起 Ultra 3 更加軟身同透氣，比較似用咗布料而唔喺網布，比起以前嘅款式著落更加舒服。鞋舌位用膠做主料，內側加上網布，減少鞋舌同腳背磨擦；前掌位置加闊咗，俾前掌同腳趾有更加多嘅空間，對於闊掌嘅朋友係一個福音（可能Craft想開拓埋亞洲市場！？）
以往 Craft 嘅中底就用咗UD Foam（即係以前嘅EVA膠），相對比較硬身（需要接近 100 公里去 run in 對鞋）。今次嘅 Nordlite Ultra 就改用 CR Foam，就咁踩落去個吓已經覺得有啲淋，大大縮短咗 run in 嘅時間。加上用咗 Ortholite 鞋墊，大大增加彈性之外，更加透氣、防臭、防霉同吸汗。
今次鞋底嘅膠釘（lug）形狀比以前大，款式唔同咗，中底連接位置設有細孔，每次跑步落地個吓中底都會有一定嘅空間俾佢減壓。
喺乾爽嘅地下有唔錯嘅抓地性，但係濕滑嘅路上面可能就要小心啲，有機會跣。如果係短途山賽、炎熱乾爽嘅地面，甚至拎嚟 easy run、long jog，我會好建議著呢款鞋。但如果落雨天、濕嘅地面，或者對自己肌力好有信心嘅朋友，可以一試。
1. Marcus你的跑步年資？及為什麼開始跑步？
4年，當初聽到中學老師問有冇人想加入田徑隊，自己當時冇玩任何運動，聽到好似幾有趣，就好快咁舉咗手，成為全班唯一舉手嘅人，亦慢慢加入咗田徑隊。
2. 有沒有跟跑會或教練跑？選擇原因？
有，Heartbeat，當時係主要跑 800m，但發覺自己身型比較瘦，覺得長跑應該較有利，而且當時 Heartbeat 嘅運動員當紅，自己亦好想跑得快、破紀錄，就喺 IG 搵咗陳嘉威教練。
3. 最深刻的一場賽事？原因？
啱啱 7 月嘅 Gold Coast Half Marathon，打破咗 U20 半馬青年紀錄。做到呢兩年多嘅目標，呢個紀錄亦都肯定咗自己疫情至今嘅堅持同努力，都算彌補咗自己冇得跑學界嘅遺憾。
4. 日常跑步路線? 最喜歡的練跑運動場地（原因？）
西九文化區嘅海傍，我屋企跑去西九大約 3 公里，跑到嗰邊又望住個海，對於慢跑、長課都非常寧靜同放鬆。運動場就深水埗運動場，因為會見到教練，佢會喺度教班。
5. 最喜歡的跑步用品品牌？ 最喜歡一對跑鞋？
Nike，練習鐘意 Pegasus 同 Zoomfly；比賽就 Alphafly。
6. 有沒有跑步傷患？如何處理？
有呀，由今年年頭一月嘅腳外側 stress fracture，之後到三月腳趾發炎，再到 6 月半月板勞損。今年都過得好唔容易，去到 7 月 Gold Coast 前都傷緊，當自己愈想做好嘅時候，反而可能會令心態緊張，恢復得差，操勞過度引致受傷；所以練習真係應該適可而止，consistent 最重要，同教練制定好練習計劃，有時太攰要識得休息。
7. 現時跑步目標是什麼？
現時呢兩三個月都希望注重練習，喺年尾 11-12月，希望可以打破 10,000m，10km U20 紀錄，亦都想再推快自己半馬紀錄。
8. 未來會否挑戰全馬？如果會，會選擇哪個作為初馬?
會，相信全馬同其他項目唔同，係另一個世界，自己好想體驗。初馬嘅地點就想係渣打馬拉松，喺香港比賽特別大歸屬感，沿途聽到廣東話打氣會特別有動力。
9 於 COROS SPARK 你會參加 10KM 路跑賽段， 有沒有比賽 tips 可提供予參加者？路段上有哪些要注意事項？
路段好多上落斜，較易出乳酸，比賽時跑嘅 pacing 應該要控制一下，唔好一開始有力就狂衝，先穩定，再喺後程落斜嘅適當時候加快。訓練上多加斜路同加速跑，亦可以係長課時候加插跑山。
10. 10KM 比賽一般練習應該專注哪方面？會如何應用 Coros 手錶去配合練習？
10km 最重要係速耐，3-4 個月準備。每次嘅訓練都唔應該大辛苦，強度亦應控制於 70-80% full effort（以Coros手錶data作監控）。練習量亦應循序漸進。
11. 有什麼社交媒體可以找到你？
IG: ho_marcussssss
*照片由受訪者提供
1. 跑步年資？當年為什麼開始跑步？
22 年，當年因為無聊跟咗啲朋友去田徑場練習，跑下跑下又覺得好玩，咁就玩咗 20 幾年啦！
2. 你參加過不少比賽，哪一場印象最深刻？原因？
應該係 2012 香港馬拉松半馬，嗰年贏冠軍。其實喺西隧嘅時候被 Kiprotich Thomas 大概甩咗 200 米，最後竟然係中環追番，我自己都估唔到。
3. 日常跑步路線? 最喜歡的練跑場地（原因？）
大欖郊野公園、西貢北潭涌，因為冇乜人，同埋嗰度風景比較靚。
4. 最喜歡的跑步用品品牌？ 最喜歡一對跑鞋？
Nike Alphafly。
5. 你現時作為港隊教練及半馬代表，你自己怎看這個身份？作為香港代表，又有沒有什麼使命感？
都係咁囉，冇乜特別嘅感覺，都係想大家一齊練習一齊進步。
6. 現時跑步目標是什麼？未來將會參加什麼比賽？
都係跑馬拉松，希望去到亞運。今年去唔到，有少少失望，不過盡力去追求啦，嚟緊可能玩下三鐵或者山賽定向等。
7. 作為教練，你怎看香港的長跑發展？
其實香港嘅運動員都係進步緊，同埋我覺得佢哋俾我哋以前練習嘅方法更加全面，希望將來香港有機會出到個世界級嘅運動員。
8. 於 COROS SPARK 你會參加 10KM 及 50KM 山路賽，今次會怎樣準備山賽部分？
山賽我之前都有玩，不過怕受傷，所以費事影響路賽表現，而家都開始想跑下越野跑，會多訓練腿部嘅肌肉力量，為越野賽做好準備。
9. 賽前又會怎樣作部署？體力應該怎分配？
其實我都冇乜經驗，所以應該都係跟住其他跑手跑。
10. 同時，你有什麼比賽 tips 可提供俾參加者？路段上又有冇需要注意事項？
我覺得 10 月天氣可能都仲係好熱，所以跑手應該量力而為，避免中暑。
11 這類連續式比賽應該怎樣練習？ 應該集中訓練路跑還是山跑？
其實今次嘅 50K 路段難度唔算太高，而且比較多石屎路，所以我都係照返平常練習方法咁去訓練。
12 訓練上，你會如何應用 COROS 手錶去配合練習？
我會利用 COROS 心率來控制自己訓練嘅強度，最重要係避免自己 overtrain。
13. 有什麼社交媒體可以找到你？
IG: gikaman_
1. 跑步年資？為什麼開始跑步？
Raymond：應該七八年左右，以前係因為打拳要練體能同減磅，先一星期跑一次，直到疫情冇得打比賽，冇咩寄託，之後就跑多咗步，慢慢就愛上咗。
Marquise：未到半年。跑步原因 40%係另一半鍾意跑步，佢會成日鼓勵我郁多啲跑多啲；60%係自己想練下意志，學跑步，令跑山路跑技術上有更多進步。
2. 有沒有跟跑會或教練跑？選擇原因？
M：朋友介紹下，今年五月開始join咗Trailblazer，因為喺比賽其間發現，喺路跑嘅路段比其他跑手弱，所以想針對訓練下路跑同埋改進下跑姿，減少受傷機會。
3. 日常練習地點或路線？原因？
R：平時如果星期日上山，我比較鍾意操單M或雙M！
第一：起點終點一樣，又可以泊車喺東涌，可以帶少好多嘢。
第二：我住青衣去東涌算近，交通方便，可以慳好多時間。
第三：大嶼山夏天涼過西貢好多。
4. 最喜歡的跑步用品品牌？最喜歡一對跑鞋？
R：Mountain Martial Arts（MMA），因為每個款都限款，好少會撞款；鞋我就比較鍾意Salomon S/Lab Pulsar SG，因為夠包腳。
M：無咩特別，邊件抵著就著咩，成身都著唔同牌子。跑鞋就最鍾意 ASICS Novablast 3，包腳穩定性高，日常襯到衫，對我呢啲新手嚟講咩 program 都駕馭得到。
5. 跑步對人生有沒有幫助/改變？
R：跑步令我生活規律咗好多，時間管理好咗！同埋明白有句好老土嘅野：沒有奇蹟，只有累積！
M：一個人可以跑得快，一班人可以跑得更遠。平時自己跑都無乜意志撐落去，但有人陪就唔同，死都死埋佢🤣！
6. 有沒有跑步傷患？如何處理？
R：好好彩除咗幾年前試過ITBS外冇咩受傷，嗰陣處理方法係停跑、按摩同休息。
M：2021年頭做過半月板微創手術，不過就唔係因跑步而傷，而係因為放自己一年假，喺香港同我家狗狗四處露營，以前掛住返工無運動，一下子負荷太大肌力不足而受傷。處理方法就係做完手術後露住營休腳，轉咗玩Freedive做水療，療好傷就上返山。
7. 未來跑步或比賽目標是什麼？
R：希望今年唔好受傷，HK100順順利利做個滿意嘅成積，之後專心練多啲路跑，馬拉松可以Sub3。
M：養成跑步習慣，學好跑步減低受傷機會。2023年尾嘅馬拉松可以Sub4；2023年嘅HK100 THE HALF係行住去完成，無點跑過。希望2024年可以跑住完成。
8. 想到外國比賽嗎？會選擇到哪處比賽？
R：最想去旅行順便hea玩CCC睇風景，因為如果認真去比賽，之後就唔會有力去玩。
9. 跑步途中會想什麼？
M：觀察自己嘅跑姿、體感、強度、當下嘅感覺。
10. 路跑跟山跑有什麼不同感受？
M：路跑比較悶，如果路線不變通常啲風景一樣，但山跑就算路線一樣，但落咗場雨已經可以變化好大，望到遙遠嘅山脈風景，好多時都會覺得好幸福。雖然住喺石屎森林入面，但一上到山居高臨下嘅城市風景係香港另一種美，同埋可以見到好多小動物小昆蟲同花草樹木。
11. 最深刻的一場賽事？原因？
R：上年HK100，因為去到尾段上緊針山嗰陣突然肚痛，之後十幾公里又痾又嘔搞到血糖太低，要坐係路邊休息，差啲要撤。
M：2023年頭HK100，原本諗住可以去開大食會。點知自己熱到只係食到橙同罐頭水果…🫠
12. 你們都有一起跑步、一齊練習？怎樣互相扶持？會否於假期時間都去了練習？
R：我地正常星期一、三、日都會一齊跑，不過喺同一個地點但各有各練🤣！
女朋友本身惰性大啲，所以平時假期一定我起身先，然後再叫佢起身，同埋跑完步要買定雪榚俾佢食😂。年尾冬天要練長課時，假期通常都係我自己一個操，女朋友就會專登早啲起身煮早餐俾我食，然後送我出門口。你哋再問我冇得跑步㗎喇…我哋只係假期上山拍拖啫。
M：有時佢去操山我就抽時間Freediving、做下副業、喺屋企陪下狗狗龜龜，做下家務整下蛋糕煲下湯水等男人返屋企🤭。
13. 有沒有試過一齊比賽？
R+M：啱啱3球野比賽嘅兩場：柏架山/大帽山。
14. 於 9/9 舉行的3球野系列賽第3球 – 畢架山站，有什麼 tips 可建議參賽者？又有什麼要注意？賽前可以針對哪方面提升自己？
R：一開頭就要爬升300幾米，記住唔好去咁盡，可以去到引水道先快少少，如果未試過路嘅，記住留力上畢架山，仲有呢條路較多technical嘅路段，著返山鞋安全啲。
M：練多啲長命斜，感受用咩配速最適合自己。
15. 有什麼社交媒體可以找到你？
Marquise:
FB: Marquise Li
IG: Marquiselpy
Raymond:
FB: Wai Ming Ng
IG: wai_ming_ng
*照片由受訪者提供
1. 兩位跑步年資？為什麼開始跑步？
Cherry: 2014 年開始起跑，因為想減肥所以跑步。
Joseph：跑步年資有二十多年。2000 年我去了台北讀大學，一個人身在異鄉，很陌生、很孤單，我開始用跑步「消磨」課餘時間。當時跑步除了「消磨」時間，也「消磨」脂肪；母校國立政治大學四面環山，因此便養成慢跑和行山習慣。
2. 開始跑步時有沒有跟跑會或教練跑？選擇原因？
C: 沒有跟跑會，純粹自己落街跑，沒有系統地訓練。
J : 沒有跟教練或跑會，也因為這樣，我走了很多冤枉路，如果當年一跑步就跟教練，我可以減省好多好多時間，走少好多錯誤的路。
2005 年第一場比賽是渣打全馬。當時回港後，恰好遇上渣馬開始報名，於是踏上了全馬旅途。初出茅廬跑全馬的我，沒有跟教練，也沒有任何馬拉松知識，只掛著一個「勇」字，跑了一半路程已耗盡所有體力，最後非常吃力地以 4 小時 40 分左右完賽。
3. 日常練習地點或路線？原因？
C：日常練習沒有特定路線，練長課會由屋企跑去蓮姐度，約 21k 。原因：又有山又有路。
J : 沒有特定路線，不受地域所限。
4. 最喜歡的跑步用品品牌？最喜歡一對跑鞋
C：ASICS Magic Speed 3。
J : 直到 23 年 8 月 31 日，我是 Team Salomon 成員，仍然會著 Salomon 參加越野比賽。
5. 有沒有跑步傷患？如何處理？
C: 有，膝頭內側痛，要多拉筋及強化周邊肌肉。
J : 一寸傷一寸強，傷患與進步只係一線之間。
6. 知道 Joseph 已完成了六大馬，未來有什麼目標？ 路跑尚有什麼目標想達到？
J：要完成六大馬，話難唔難，話易唔易，我當初訂目標是六大馬全 sub 3，去年倫敦馬是我第六隻六大馬，2 小時 46分 完成，六大馬平均時間是 2 小時 57 分。但我有些馬拉松失手，未能 sub 3，這些我會再補考的，
我已經跑了好多場馬拉松，好多場都能 sub 3，甚至 sub 250，但我仍想 PB，自己係有一個時間目標想衝破，受限於工作太忙，工作、家庭、戰神越野跑會，山賽… 分配上令我未能專心為馬拉松下多些心血。跑完 UTMB，下半年或者會放多些時間練馬！
7. Cherry 入選了 Team ASICS，又成為過 Garmin pacer，覺得自己跑步跟作為 pacer 跑步的分別是什麼？
C：有分別㗎！自己跑步可以竭盡所能，挑戰自己極限；作為 pacer 要做準確及穩定配速，引領跟隨自己的 runner 在目標時間內完成，責任較大，但相對滿足感亦增加。
8. 2 個都有一起跑步，會一齊練習？怎樣互相扶持？會否於假期時間都去了練習？又有否試過一齊比賽？
C：我地有一齊喺運動場跑步的（當 Joseph 慢跑時） ，因為我哋配速不一樣，運動場就一定會遇見對方，可給予對方鼓勵。而我哋假期或去旅行時都會跑步，亦有試過一齊比賽，例如渣打馬拉松及HK100。
J : 我和老婆經常一起比賽，例如倫敦馬、台北馬、東京馬、UTMB、UTMF…. 很多很多。
9. Joseph 開立了自己的跑班，自己跑步跟教跑步有什麼分別？
J：去年成立了「戰神越野」跑會，我開心有一班好好的學生一齊訓練，他們除了很 nice，實力也很強，而且很團結。加上太太 Cherry、我的 sub 3 好兄弟綸 Sir、豪 Sir 一齊協助，還有贊助商及好友幫忙，跑會才能成功運作。自己跑步及教跑步分別是：一個人可以跑好快，一班人可以跑好遠！
10. 兩位各自最深刻的一場賽事？原因？
C：2023 年日本的 UTMF KAI 69k。跑到 12k 舊患出現 ，打後痛住 57k 跑回終點，途中一直堅持著，有喊過又嬲自己點解會痛？最後落斜行也痛…. 但我知道我先生在終點等我、所以我一定堅持跑回終點，最後以14:57 完成，沒有 PB，但贏咗自己。
J : 最深刻一定是 4 徑…麥徑是我最熟悉的山徑，頭 50k 因太輕鬆太興奮，跑快了，到獅子亭半程 50km 才花了 5hrs 50mins 。這樣下去是 11 小時完 100k 的配速！故在後 50k 修正及拖慢，最後 13:21 完成，與目標 13.5hrs 相若。
抗眼瞓能力極差的我，預期第二條徑衛奕信徑會比麥徑慢一點，起步時下著大雨，體感溫度寒冷，這段訂 14.5hrs 完成。凌晨 4、5 點不敵睡魔呼喚，在城門水塘敗下陣來，跌跌撞撞地入了結界，幾經掙扎終於趁日出時分逃出生天，繼續前進。跑到飛鵝山時，開始感受到左腳腳腕有痛楚，沒有處理就繼續跑向藍田。痛楚慢慢加劇，在往太古地鐵站列車內脫了鞋，才發現腳腕紅腫了。用身上的頭巾包著腳腕，勉強跑畢衛徑 2、1 段（後來才知道在超長途山賽鞋帶不能綁得太緊，否則腳脹後會撞鞋頭或鞋舌引起腫脹及腫痛）。
還有兩條徑，不是還有兩段。港島徑 50k 及鳳凰徑70k，這是一個 120k 的距離，傷痛著繼續跑除了超現實，還有超痛苦，但我不想放棄。最後港島徑用了 7 小時 40 分跑到山頂及再 jog 3.5km 落中環 6 號碼頭。在中環碼頭等 30 多分鐘船的期間，我看到一眾好友都來了，那一刻很感動，熱淚盈眶。
到達梅窩，終於展開最後一條徑了。腳腕已好腫好痛，極度痛苦、痛楚；也極度眼瞓，但我不可以放棄，再慢也要完成。我內心只有一句 “ I must finish”。接下來的鳳凰徑，大澳至伯公坳這 20k 應該算是我生平走過最痛苦最煎熬的路段，腳腕傷患令我產生疼痛感。傷痛令我一次過消磨了所有時間，60 小時內完成也不清楚能否做到。下午 3 時尾終走畢鳳凰山，在伯公坳我聽到很多打氣聲、加油聲。
「人生總要為自己歡呼一次！」這一句說話及現場的加油聲，突然刺穿了我的心房，將早已熄滅的戰火重燃起來，大東山往南山返梅窩最後 9k 越野路，我忍著強痛再次跑起來了，豁了出去地直奔，只花了 1 小時 10 分便到梅窩市區，迎面望著綠色郵筒及等了良久的 Cherry和眾多好友、攝影師，這段捱了 16 小時，終於「捱」返梅窩…
有人說跑完一場 42.195km 的馬拉松可以體驗人生；我跑畢 298km 的超級越野馬拉松也感受不了人生，但感受了友情。
11. 知道兩位都想有小朋友，期望未來與兒子/女兒一起跑步嗎？
C：期待玩親子組！
J : 絕對會。
12. 於 9/9 舉行的3球野系列賽第3球 – 畢架山站，有什麼 tips 可建議參賽者？又有什麼要注意？賽前可以針對哪方面提升自己？
J : 第3球畢架山，路況技巧性高，比賽時要多加注意，不要受傷。
13. 有什麼社交媒體可以找到你？
Joseph:
FB: Joseph Yeung
IG: YCshero
Cherry:
FB: cherrycherry cheng
IG: running_cherrycherry
FB: 戰神越野Mars Trailrunning
IG: mars_trailrunning _hk
*照片由受訪者提供
路線：蝴蝶灣體育館 ➡️ 湖山路 ➡️ 幻愛橋 ➡️ 屯門碼頭 ➡️ 蝴蝶灣公園 ➡️ 浩船街 ➡️ 浩福街 ➡️ 浩逸街 ➡️ 浩和街（屯赤隧道口）
大西北友想有靚景睇之餘又輕輕咁jog下？呢條路線絕對係一個大好選擇！
由蝴蝶灣體育館計，去到屯赤入口大約要6K，而來回跑（相信大部份人都會🫠）就around 12K。慢慢咁跑得夠LSD里數之餘又有靚景睇。
而屯赤個海邊位更加可以睇到日落同埋對面機場飛機升降，絕對係一條可跑性高嘅路線。跑完太熱想浸下水順便當cross training？回程個時經過蝴蝶灣沙灘就可以落埋海游個水都仲得！
👍🏻 交通方便（輕鐵 / 任何巴士到屯碼 / 湖山路）
👍🏻 補給位極多（沿途飲品機多）
👍🏻 打卡位多（浩和街大草地、幻愛橋）
👍🏻 擺嘢換衫方便，起點有體育館，中途亦都經蝴蝶灣沙灘，方便鎖嘢
👎 少遮陰位
👎 退出點唔方便（浩和街無公共交通出屯門市中心，如果跑到嗰度唔想跑，番去就會麻煩少少）
注意事項：
🔴 過咗蝴蝶灣公園段嗰1k路會經過一排工廠 / 車廠區，要跑少少馬路，建議跟番上面條路線（浩船街 ➡️ 浩福街 ➡️ 浩逸街）咁繞過工廠區出番浩逸街。
DareToRun 嘅一般選手 Chris 會繼續介紹其他跑山或者郊遊路線㗎，Stay Tuned！
Ruby
1. 跑步年資？為什麼開始跑步？
四年左右。
大約讀完書出嚟做嘢就開始跑步。一開始唔習慣返工經常坐，覺得需要多啲運動去平衡生活。跑步可以自已選擇跑快定慢，幾時想跑就跑，係非常好嘅運動，所以逐漸愛上。
2. 有沒有跟跑會或教練跑？選擇原因？
而家主要跟Blue Monday Running Club（Action Panda）跑，因為同我工作地點好近，收工過去好方便。
而且呢度又可以認識新朋友，二嚟教練團隊每次都有安排唔同嘅訓練內容/路線，都幾好玩。
3. 喜歡跑山還是路跑？
路跑。
4. 路跑跟山跑有什麼不同感受？
路跑比較城市化，喺熟悉嘅環境下跑步都係一種減壓。
而山跑，我覺得可以親親大自然，我都很享受，係另外一種體驗。
5. 最喜歡的跑步用品品牌？最喜歡一對跑鞋？
我最常穿着嘅跑步牌子係Nike；最鍾意應該係Nike Zoom Fly系列。
6. 日常跑步路線? 最喜歡的練跑運動場地（原因?）…
因為跟Blue Monday Running Club嘅關係，我通常會喺觀塘海濱跑步，有時跑去啟德郵輪碼頭，吹住海風嘅感覺好舒服！
第二個地方我會選擇深水埗運動場，因為居住地點鄰近，好喜歡一個人喺運動場放空自在咁跑。
7. 有沒有試過跑步傷患？如何處理？
幸運地暫時都沒有。每次訓練完我都會拉筋或者用按摩槍放鬆肌肉。
8. 最深刻的一場賽事？原因？
我嘅比賽經驗唔多，但係我期待下年渣打馬拉松10公里賽事，我希望可以跑出50分鐘內成績。
9. 除了跑步，有沒有做交叉訓練？（例如舉重/游泳/瑜伽）對跑步有沒有幫助？
都有嘅。除咗跑步，我都有上過瑜伽班或體適能練習，因為我覺得做核心肌肉群訓練對我跑步絕對有幫助。
10. 現時跑步目標是什麼？
我一直希望可以突破自己，慢慢進步。長遠跑步目標都係希望可以挑戰更遠嘅距離。
11. 於12/8舉行的3球野系列賽第2球 – 大帽山站，有什麼 tips 可建議參賽者？又有什麼要注意？
大家加油！天氣熱，飲多啲水！
Jacky
1. 知你快將跑芝加哥馬拉松，有什麼目標？會否想繼續挑戰六大馬？
首要係PB ，最希望做到Sub 3，所以我而家都積極備戰中。
挑戰六大馬拉松一直係我心願，但最近抽唔中倫敦馬拉松，希望抽中下年東京馬拉松啦，哈哈！
2. 除了跑步，你亦有玩兩鐵及跑山，對平時路跑有沒有幫助？
絕對有幫助。因為我當兩項鐵人同越野跑係交叉訓練。
兩者都屬於帶氧運動，相對單一跑步練習，可以使用唔同嘅肌肉，減低受傷風險。
3. 現在工作都與跑步有關，會接觸到很多品牌及裝備，有沒有特別推介或選購建議？
近排我嘅最愛跑鞋係New Balance Fresh Foam X More v4（絕對唔係廣告，雖然Action Panda真係有得賣，笑） ，着上腳嘅感覺非常柔軟、緩震力十足，好適合我輕鬆跑或者長課嗰陣使用。
4. 於12/8舉行的3球野系列賽第2球 – 大帽山站，有什麼 tips 可建議參賽者？又有什麼要注意？
因為八月都係比較炎熱，我建議參加者要適量嘅補水，帶定幾粒鹽糖，避免中暑。
路段上，前段會大量上斜，大家要適當地分配體力。
*相片由受訪者提供
由Sports Event Planner主辦、專業運動手錶品牌COROS冠名贊助之「COROS SPARK 100」賽事，將於9月30日至10月3日舉行，今次賽事破天荒融合山賽及路跑元素，讓參賽者在同一個比賽挑戰兩種賽事，成為「SPARKER」。
首屆3月舉行的COROS 100獲得眾多精英跑手破天荒參賽，來到第二屆，即使山賽賽道設計仍沿用麥理浩徑及衛奕信徑路段，但賽事秉承主辦大會的創新精神，加入不少新元素，例如新增路跑10公里及半馬拉松，日程上更刻意橫跨4日，令一眾賽手可挑戰「一山一路」，即參加一項路跑及一項山賽，即使參與最短的10公里路跑加50公里山賽，賽手都會被冠以「SPARKER」名銜。
前香港馬拉松紀錄保持者紀嘉文將挑戰10公里路跑及50公里越野跑，他說：「我一直喜歡行山，也有興趣參與山賽，但100公里賽事對我來說太長了，今次有50公里賽，所以想嘗試一下。」
對於初次嘗試「一山一路」連賽，他認為自己往常多在平路練習及比賽，所以要多學習跑爛泥路、碎石路及落山等技巧；他又笑言：「我見不少前輩在山賽可以玩好多年，我都去到差不多年紀了，所以也想參加多一點山賽。」
阿紀又鼓勵平時只參與路跑的跑友可嘗試參加山賽，因為有較大新鮮感，也有助練習路跑。本地新晉跑手鄭文皓亦會參加10公里路跑，爭取佳績，他透露今次是第一次跑萬宜水庫這路段，認為當中有一條長斜路，很富挑戰性。
另外賽事還有眾多本地精英跑手參加，例如廖科樂（阿樂）、Lena、Alex及Peipei等，幾位都會同時參加山賽與路跑，以力爭完成一山一路成為 「SPARKER」，其中阿樂便表示：「平時好難得有路跑及山賽的連賽，今次COROS SPARK 100增設路跑賽事，我平時好少跑路跑，所以都想挑戰一下，期望做到PB（個人最佳時間）。」他補充，連賽最大挑戰是身體的恢復，所以他會爭取時間休息，以及吃多點東西，補充體力。
賽事充滿挑戰性，大會亦邀得「Hill & Heal」教練及學員一同支援參賽者，教練之一的「傑sir」表示：「我們會在鶴藪支援，我們之前也參加過比賽，所以很清楚每個跑手需要什麼，例如最快那位跑手來到，我們會選擇合適的補充品，令他可以更快完成；而最後來到的跑友，見到還有支援，也會安心很多，不會輕言放棄。」
另一位教練「怪獸」提到，參賽者在第一個支援站補給時，不一定要選擇Power gel這類補給品，吃一個新鮮的水果來轉換心情，同樣重要。
今次賽事還加入了慈善元素，慈善機構「極地同行」主席Steve Lo邀得「旅遊達人」洪永城及13歲、患有運動感覺神經病變的Alex，一齊參加慈善輪椅10公里賽事。
「極地同行」負責人Steve Lo說：「我們今次會聯同10位傷健人士，當中有盲人、截肢或自閉症患者，一齊化身小朋友（Alex）的雙腳，輔助他一齊完成賽事。」
今次賽事的受惠機構是「財商教育慈善基金會」。他們希望透過教育，幫助小朋友確立理財意識，創辦人兼主席Everest說：「希望小朋友將來在獲得足夠經濟支持下，追尋自己的夢想，所以我們的理念跟今次大賽的口號 “Dare to dream. Find your fire” 非常吻合。」
其機構的「追夢大使」俊橋sir為籌集善款，更會組隊參加50公里越野跑。
值得一提的是，今次賽事連紀念品製作也一絲不苟，大會找來本地創作品牌thegoodlabel製作了一隻450ml單層鈦杯，只要參加COROS SPARK 100 – 50公里或100公里賽事便可獲得，thegoodlabel負責人Tony說：「我們希望做到又實用，又有收藏價值，所以花了不少心思去設計這隻杯。」
最後，COROS SPARK 100主辦單位Sports Event Planner賽事總監麥凱玲總結：「每次去舉辦一場賽事，我們的團隊、義工們、合作單位，以至各參賽者的準備及成果，都是不容易，所以今年的口號 “Dare to dream. Find your fire”，不單止是為跑手去構思，更是所有參與其中的每位朋友的共同心聲。」
賽事報名日期由即日起，詳情可以參閱賽事網頁：www.sephk.com/coros100/index.php
