訪問出街之日，屈景朗已身在倫敦，先適應當地嘅時差、溫度、水土…準備出戰佢世界6大馬嘅最後戰場 – 2022倫敦馬拉松（賽事日期2/10）。
由2015年征戰初馬開始（成績3:11），就好似打機一樣，佢KO一個個世界6大馬，而且愈跑愈順。2019年更一口氣完成晒3隻美國馬拉松 – 波士頓、芝加哥、紐約。紐約馬拉松更以2:29:49完成，今次參賽倫馬以作為6大馬壓軸篇，對佢當然意義重大。
臨起行之前，Insports Hub就同佢暢談點樣準備倫馬之餘，亦傾到呢幾年香港嘅跑步賽事、環境氣氛低迷，作為跑手，佢又係如何面對同走到而今？
IH: 首先恭喜你喺前兩日嘅XTE MidSummer Races仲夏越野賽中奪得冠軍！睇嚟你正狀態大勇，可先分享一下，近期喺訓練上係點樣準備今次嘅倫敦馬拉松嗎？
KL: 多謝先！針對番今次嘅倫馬，訓練其實喺7月中已經開始。因為倫敦嘅賽道屬比較平坦，所以我嘅均速同耐力嘅訓練上今次準備得較多。
喺頭10個星期時，未有太大加量，都係以速度嘅訓練課為主，做一啲interval，例如1K同5K嘅間歇跑；去到中階段時就開始加量，調整至加返多啲嘅tempo run，目的係提高番耐力同抗乳酸嘅能力。
去到比賽前嘅3星期左右，就會進入加量期，即將個距離推到去極致，例如之前一星期係跑180K，就會加到去200K或者以上。
IH: 睇番呢兩個月嘅天氣，其實好多時都異常地熱，有冇影響到你嘅訓練？同點作出調節？
KL: 真係，呢兩個月香港嘅天氣真係異常地熱，好多時做啲周末長課嘅時候，都會出現撞牆、爆偈嘅情況，甚至試過要中斷添！咁對策上就一定要作出調節，於是後期我就集中喺凌晨或者夜晚嘅時候先去做訓練，避開個太陽！
IH: 今次預備倫馬嘅訓練programe同你之前5大馬嘅有冇特別唔同？
KL: 其實都大同小異嘅，但因為今次係6大嘅最後一戰，所以都想做到最好；目標上當然想追求番PB（personal best），即比上次紐馬更快嘅時間，但仍然係盡力而為啦！又唔想俾太大壓力自己。
IH: 講番先前嘅5大馬賽事，有冇邊個係令你印象最深刻？
KL: 最先諗起就係2019年嘅紐約馬拉松啦，當日嘅賽道同天氣俾我嘅感覺係好舒適嘅，溫度、乾濕度都好適合長跑，所以令我做到一個理想嘅時間，所以對我嚟講都係別具意義嘅。
IH: 咁又有冇邊次比賽係你會覺好艱辛？又或者成績未如理想？
KL: 咁一定會有。艱辛嘅路段我會覺得係波士頓馬拉松，因為佢嘅賽道唔太寬闊，一起步已經係個大嘅落斜，沿途嘅上落坡都好多，去到最後仲要有一個大幅度嘅攀升，先進入直路返終點，呢次賽道對於我嚟講都算係極具挑戰性。但好彩嗰次都做到我心目中嘅時間，仲係seasonal best。
至於未如理想嘅就係「最好跑」嘅柏林馬，因為嗰段時間工作繁忙，訓練唔太足夠，記得去到15k hamstring已經「抽晒筋」！最後係要捱埋個27k，嗰次係感覺跑得最漫長嘅一次馬拉松。
IH: 有時跑手去到外國作賽，通常都會跟下嗰邊嘅coach或跑班適應一下，你今次去到倫敦有冇咁嘅準備？
KL: 因應疫情嘅航班安排，我會早一個星期就會到嗰邊，但美中不足係今次跟唔到當地嘅跑團做training，唯有自己安排番啲長課或者tempo run去做最後嘅調整。
IH: 咁你完成咗倫馬就完成晒世界6大馬嘅目標，咁你跑完之後又有冇咩特別計畫？
KL: 而家暫時都唔會諗太多住，主要都係專心完成埋呢個6大最後先。作為香港嘅跑手，能夠完成到6大馬其實都好唔容易，金錢、時間、訓練都缺一不可，而且呢幾年加上疫情，更加得來不易。我等呢次倫馬都等咗3年，好慶幸喺疫情呢幾年，自己都可以完成到頭5馬。
如果真係有諗過嘅，或者會試下大型嘅山賽如UTMB、超馬賽事，雙向發展。
IH: 講下戰鞋先，你會用邊對鞋去出戰倫馬？點解揀佢？
KL: 會係New Balance嘅FuelCell RC Elite V2。因為佢暫時係NB最好嘅一對碳板鞋，「射程範圍」都幾全面，5k、10k、半馬、全馬都可以，佢無論前推力呀、中底對於公路路面嘅卸力度同回彈性，整體都提供到俾跑手慳力度同提速力，令跑完嘅表現可以有好好嘅臨場發揮。
至於平時訓練，我就用SuperComp Trainer（可以模擬番比賽時著用碳板鞋嘅感覺）、Fresh Foam X 1080v12（處理一啲tempo run同長課）同SuperComp Pacer（處理運動場嘅interval或者速度課）
IH: 最後想分享下，呢幾年香港嘅跑步氣氛都好低迷，有段時間甚至要戴口罩跑步，對於跑者嚟講，實在唔易過。你又有咩感覺同體會呢？
KL: 比起3年前，近期氣氛都叫做緩和咗，大家都適應咗個疫情，好多措施都開始有放寬。我嘅體會係，雖然呢幾年都真係唔容易，唔只跑步，其實好多方面都係，但只要堅持你自己想做嘅事，同時又唔好影響到人哋，保持日常生活及訓練，以達到自己嘅目標或者里程碑，對自己有交代就已經好足夠，都似跑步或者跑馬拉松嘅理念。
IH: 多謝你，希望你喺倫馬可以再度PB啦！
