路線：梅窩 ➡️ 南山營地鳳凰徑入口 ➡️ 雙東坳 ➡️ 大東山 ➡️ 伯公坳 ➡️ 牛塘山 ➡️ 鳳凰山頂 ➡️ 斬柴坳 ➡️ 心經簡林➡️ 昂坪市集
單睇M呢個字，你會聯想到乜？
單M就係用嚟形容呢條路線嘅高度圖。單M呢條路線正正係會上香港第二同第三高嘅兩座山 – 鳳凰山（934米）同大東山（869米）。而兩座山之間會先落番伯公坳呢個低點（332米），之後先上番900幾米嘅鳳頂，所以高度圖就形成一個M字。
單M全長13k左右，總攀升大約1,400米。以郊遊步速大約5-6個鐘行完，跑山就一般3個鐘左右。單M除咗梅窩開頭個段係石屎馬路，其餘主要以山徑同石級為主。
如果同其他路徑比較，單M都可以算係對腳力同肌力嘅一大考驗。
短短13k有27EP（之後會出個post講解一下EP），可知單M攀升都幾急同斜度高。初段過咗南山營地先嚟做個小熱身，行3k攀升500米上到海拔600米嘅雙東坳，而落咗伯公坳之後，又要攀升600米上鳳頂，加埋啲幾大級嘅石級，對體能都係一大挑戰。
個人認為單M除咗練腳力之外，亦都係練落山嘅膽量。
要留意番鳳凰山同大東山嘅落山石級都比較高同大級。新手除咗要就住慢慢落，仲要留意唔好係落雨/潮濕嗰時行單M。不過雖則單M有一定難度，但打卡位同景色絕對係值回哂票價。
除咗10-12月有茫草睇之外。仲有大東山嘅爛頭營同跳板石；途中嘅景色可以係大東山俯視長沙沙灘，而上鳳頂途中亦都俯視到東涌同機場一帶。
景色：大東山跳板石/爛頭營/鳳凰山山頂（睇日出）
交通：
🟢 中環船入起點梅窩（留意船期）
🟢 東涌搭3M巴士入梅窩
🟢 終點昂坪搭23巴士落番東涌/或者可以搭「三碌拎」都得
**假若到昂坪唔想搭車落東涌，可以往東行法門古道番東涌，全段基本上只有落斜，幾好jog。
中途補給點：
基本上無，得終點嘅昂坪有士多
❗️❗️要留意番伯公坳個中途位係無水機同汽水機補給，所以熱天個時要帶足水。
退出點：
🔵 伯公坳（由大東山落番呢個位，但留意番伯公坳只係巴士嘅中途站，好多時假日經過嘅巴士都係滿座）
👉🏾 **替代路線：唔想山長水遠入梅窩起步，可以試加難版單M！東涌起步，經黃龍坑郊遊徑上番雙東拗，再駁番正常路線上大東山。
注意事項：
🔴 上鳳凰山個段路要3k攀升500幾米，兼且全段冇遮陰，要一定體能同意志力應付
🔴 全段路幾乎無遮陰，唔建議夏天烈陽神功嘅時段去
🔴 全段路無中途補給點，想一炮過完成就最好帶足補給同水
🔴 東涌上黃龍坑段路石級好高，短短2.3k上差唔多600米，揀替代路線前要好好衡量體力。
🔴 要留意昂坪架23號巴士係19:10前尾班車，唔想捱貴的士走就要儘量天黑前落到昂坪。
DareToRun 嘅一般選手 Chris 之後都會繼續介紹其他跑山或者郊遊路線㗎，Stay Tuned！
