以下為真實情景，話說筆者帶同最新嘅ASICS Superblast 2 Paris到九龍仔運動場外圍影相，影到一半特約攝影師（即係同行跑友啦）話：「乜你今日對鞋咁彈嘅咩？張張相都係影到離晒地飛起晒嘅！」之後睇番相，又真係張張都「堅離地」、飛起晒！筆者先猛然醒覺，對Superblast 2真係彈力超爽，甫著地就令跑手輕鬆拉起腳，變相地觸地時間縮短，形成影到雙腳掂地嘅相唔多。
筆者並未著過Superblast第一代，但就以第二代嚟評價，實在係對非常好彈性而舒適的supertrainer，如同好多ASICS或其他品牌嘅近年出品跑鞋一樣，根本唔需要時間run-in，甚至乎唔使經過easy run嘅階段，即著即跑有速度要求嘅課表都冇大問題。
Superblast 2前掌高37mm，後跟高45mm（8mm drop），中底用咗ASICS跑鞋系列中最頂級嘅FF TURBO PLUS同FF BLAST PLUS ECO兩種物料組合（前者喺ASICS最top跑鞋Metaspeed系列中亦有採用），可見品牌對於Superblast 2定位及質素嘅著重。
Superblast 2首推嘅配色，一上市已經係為呼應巴黎奧運而特設嘅Paris色，灰藍鞋面色撞落日feel嘅中底，有對比感之餘，亦好有lifestyle氣質。鞋面嘅針織網布用料具彈性、透氣、輕巧，亦喺唔同受力及需要保護位置採用唔同織法，例如鞋面前端網孔較大，以打造透氣嘅環境；貼近中底位置嘅就密度較高，做為穩定協作及加強包覆。
鞋舌及鞋領仍舊保護性十足，前者腳背兩邊位置加配軟墊，並加有品牌slogan布帶：「SOUND MIND, SOUND BODY」，同中底採用同一漸變色調，非常搶眼醒目；後者屬ASICS一貫嘅「竉壞跑者式」厚厚包覆軟墊，一著入去已感到華麗嘅環抱感，相信跑LSD或over 60mins嘅easy run都唔會減低佢嘅舒適度。
今次嘅焦點：中底用上兩種皇牌物料 – FF TURBO PLUS同FF BLAST PLUS ECO組成，前者主責上層嘅能量回彈及承托；後者於下層主責緩震及震力過濾，整體嘅協作非常完整。外觀上亦延續ASICS一貫嘅日式美學，類似日本繪畫中海浪畫法嘅流線形態，照樣喺中底後部出現，美感嘅展現性非常統一。
收到鞋第二日，Runkid已急不及待落場試鞋（地點：跑馬地）。當日慢jog熱身時已感受到中底強而彈嘅表現，每一步都平穩而舒適著地，隨後充沛嘅FF TURBO PLUS回彈力亦會令雙腳好自然地拉起，中間嘅過度初著初跑已引領得非常順暢；加上鞋頭嘅上翹角度，雖然Superblast 2冇內置尼龍板，但仍有適中嘅前推助力，最大原因係與中底強而有力嘅回彈相輔相成。雖然只係熱身jogging，但首著感覺已非常良好。
既然感覺良好，就嘗試「直落」進入當日課表 – 1200M interval。啱啱已透過熱身體驗其joggin嘅回彈，相信Superblast 2要應合easy run嘅要求，都絕冇問題，但作為擁有咁厚中底嘅Supertrainer，提速嘅表現又會係點？
Runkid 1200M課表配速為4:00/k。試跑過後，呢個pacing無疑於Superblast 2嘅表現係有啲吃力，中底嘅華麗回彈喺4:00嘅速度下會顯得有啲過沉，加上鞋重約為250g，頭兩、三隻都仍能保持澎湃嘅拉腳意識，但隨後就確實有啲回落。
之後再試Superblast 2嚟跑6隻1K@4:35 + 約30mins easy run課表，呢次就完全感受到佢嘅回彈同流暢能量作業。
喺呢個配速之下，中底由觸地時間到提供回彈，再到幫助跑者自然地拉起雙腳，可以極之流暢咁完成一組組跑步動作，而且可以跑到所要求嘅量之餘，仍能保持pull腳動力及彈性。比起under 4:00 pacing，當要駕馭如4:30 – 5:30嘅配速練習、LSD或easy run，甚至係一般速度嘅10k、半馬賽事，Superblast 2都能夠派上用場。今次ASICS為Superblast 2作出咗非常versatile嘅定位，如想入手一對「一鞋走天涯」嘅練/賽鞋，絕對係個好好嘅選擇。
