馬拉松與人：Joe Chung 首爾馬拉松

濕凍天氣與意外頻生，由放棄一戰變得無比堅決既一隻馬

猶記得收到大阪馬中籤，係金澤前往新大阪的 JR 列車，手頭上已報首爾馬嘅我，仍在三心兩意，到底係用那一個作為做時間既比賽，無論自己既能力同時間分配，都未有好好規劃，但同日在各大群組都收到大量朋友中籤嘅消息，所以策略上立刻 book 了大阪馬起店附近的酒店，而最初嘅諗法係大阪馬作為首爾馬嘅最後長課。

回顧整個金澤馬嘅備戰過程，我逃避了大部分的長課，主要因為香港夏天天氣太熱，自己亦沒有好好規劃訓練，無論身心都不夠堅強；實力不足加上基礎不穩，所以金澤馬跑得不好（雖然有很多人恭喜 PB，但客觀嘅事實就係跑得唔好）。

失敗迎來了醒覺，所以金澤馬之後，大部分時間都用來紮實有氧既根基（大量嘅 easy run 同長課），而這套訓練亦令我狀態亦一直冒升，台北同渣馬兩隻半馬，在無練過任何速度課既情況下，單憑提升了的體能都以 PB完成，由本身大阪馬只係作為首爾馬嘅最後長課，慢慢對阪馬有了可以嘗試做時間既遐想。

回到賽前兩日，剛到大阪，因為氣壓緣故，亦可能因為體內炎症發作，左腳腳跟變得腫脹不堪，這件事我並沒有向太多人講過，除了我十分信任的一個跑步群組，以及星期六早上遇見我瘸腿兀腳的兩位香港跑手，在此先感謝 Kristy ( @ytsirkgn ) 的強力消炎藥以及 Dicky ( @yim_dicky ) 的安慰。

告別兩位之後，我便回酒店努力消炎，在藥妝買了的藥用浴鹽，全日總共浸了 3 次，每次 40 分鐘，我唔知道到底功效有幾多，但至少心靈上知道自己做足了應做的，便心安理得。

吃了消炎藥後，有返大約 6-7 成嘅活動能力，所以我下午同晚上都分別約了朋友食飯，而每次一到比較空曠的地方（例如月台），都會嘗試 jogging 十多米，看看關節是否回復順暢。晚上 Brian ( @meepobrothers ) 為我帶來了在會場買的 tape 帶，加上在藥妝買了腳箍，鎮痛貼和止痛藥，我相信能夠上線既機會接近 9 成了。

去到比賽那天，相信大家都已經在各個途徑得知大會安排嘅惡劣，從混亂不堪嘅指示，到滿佈泥濘嘅場地，已經提早兩小時出門口嘅我到達會場後一直找不到相關嘅行李區，查詢職員時又被亂指了數次，導致慌張地來來回回地在會場兜圈，直至去到一個棒球場嘅地方碰見一位師兄，佢話佢都搵緊行李區可以一齊，但話口未完，我便發現我手上嘅一個用以袋gel既膠袋鈎爛，喺途中已經不知不覺間遺失全部gel，該跑手見我眼神空洞，亦即刻頭也不回離我而去。

那時候嘅我已經不知所措，到底回頭執 gel，還是先放行李，還是棄賽，係我最徬徨無助之際，突然聽見阿 Pi ( @hapiahpi ) 叫我，而同行嘅有 Suyi ( @suyi922_ ) , Angie ( @angiegie_cheung ) 和 Sharon ( @sharonng2012 ) ，佢哋二話不說總共給了我4包gel，我只想講佢哋並沒有任何義務給予我什麼，尤其佢哋都將要面對 42 公里嘅硬仗，今年嘅大阪馬又濕又凍，體感接近零度，如果要保障自己也是應該的。

告別她們之後，我便來到行李區的入閘位，由於該閘口位是唯一一個位置用來出入，所以出現了塞車嘅情況，閘裏和閘外的都係匆忙嘅人，在無數次嘅推撞中，有一名日本跑手趁亂一拳打了我心口一下，才剛回過神來的我被這樣襲擊已經來不切分析，所以下意識地還擊了一下，而在他準備再次出手之際，他身後的跑手們把他推走（可能因為大家都趕時間吧），我也慶幸免了一場衝突。

唔太順利進入了行李區後，很快便被泥漿浸濕了鞋和腳，但已經係遇到嘅不如意事入面最微小嘅一單，同時因為心急奔跑，我在這塊泥地整個人雙腳朝天跣低，所幸是並沒有扭傷和屈到，只是屁股有點痛。

離開行李區後，在往起跑區途中，我便一心在地上尋找有沒有人跌gel，結果俾我執到兩包均食剩一半的gel，一包金色寫住快速補充，另一包則是紅色大 amino，前者我先行袋住，後者我即時進食（為求生存，沒有考慮過任何衛生問題），而呢刻，我手頭上總共有4包半既gel，心裏紮實得多了。

千辛萬苦上了線，但已經成了該區最後一批出發的人群，無論塞車，還是之前遇上嘅大大小小意外，我經已完全打消了做時間嘅念頭，小心翼翼的跑了頭兩 K，分別只能開出 535 和 452，比我原定配速的總時間已經慢了接近兩分鐘。

前往大阪嘅旅程中，我一直想起教練 Jeff ( @jefflawong ) 同我講過比賽嘅完成時間可以分為四個等級，分別為合格、不合格、開心、唔開心；我心想怎樣也要跑一個合格時間，回應我之前嘅訓練，所以便決定低標sub330 完賽也好，姑且也叫 pb ，所以我便漸漸加速至 440-442 去追回時間。

10K 之後，我食了手頭上第一包gel，當下嘅感覺係少了一份保障，但同時我亦追過了 330 的pacer，由於感覺好唔紮實，所以我決定一路跑，一路 scan 地下有沒有跑手跌gel，但都一直搜尋不果。跑嘅過程入邊我開始思考最大機會出現嘅地方，會係水站前後幾百米，大多數跑手會喺呢段時間食 gel，亦都好有機會喺呢個時間跌咗，結果呢個方法令我成功執到 4 包唔同嘅 gel。

只要稍為細心，就可以好快 locate 到地上嘅扔棄物，係遠處見到疑似 gel 包裝嘅物體我都會望實頂部有沒有被搣開，而每次跑過目標物品嘅時候都有 1-2 秒做決定停唔停低，再回頭執拾。而我每次嘅執拾都感受到身邊嘅跑手用奇異嘅眼光望我。

於 15K 執到一包 MagOn，係 18K 同 25K 分別執到一包類似黑色神 gel 和一包白色 gel（被鏡頭有錄低😂）（後知兩包均為 SAURUS） ；25K 後一包大藍色 Amino（食完之後即刻有嘔既感覺），但係嘔出到嘴邊之際，我心想係 energy 來的，不要浪費，所以便生吞回去。

雖然天氣惡劣，不過其實濕凍也有一個好處，就係能夠保持心率偏低，令我可以維持到平均嘅輸出亦不致於體力透支，去到 35-36K ，分別遇到了同跑會的 Kenny 班長 ( @kennychan122 ) 和 Ted ( @tedrunnote ) ，佢哋鼓勵我加速，那時我睇錶知 5 分披應該大約 327-328 左右完成 (以賽前目標嚟講真正高不成低不就)，所以無特別加速，安全完賽就算了，最後完成時間 3:27:00。

最後，我要感謝我兩位 Team ASICS 隊友，係我備戰呢一隻馬拉松嘅專屬 pacer，分別係陪伴我長課既坤仔 ( @louis_run ) 同 Tempo Run 既 Philip ( @philip.leung.7528 )，完了渣馬後少了好多跑手出現係運動場，無你哋兩個我係唔會有咁大嘅動力同進步🙏🏻🫶🏻

完賽後陸續收到很多恭喜 PB 的訊息，我感謝各方好友對我嘅關注，原來有人追蹤時間係咁窩心，但我內心其實係有些失落，因為這是不合格既時間。

今季賽事嘅旅程還未結束；首爾，故事待續。

大會時間Gun Time: 2:35:16；晶片時間Chip Time: 2:35:10
又完成一隻六大馬拉松喇🎊！衷心感謝New Balance提供名額🫶🏻，但今次能夠完成真喺得來不易。

2023年12月21日確認咗名額，心諗有四個月時間練，實可以做個好成績。
可惜世事未必可以諗得咁完美，幾日後就證實咗胃潰瘍，而且照到個肺有粒嘢，但唔太大，定期mon住就得。

住咗三日院後就出院，除咗要食三個月藥仲要戒口，頭兩個月食親嘢都好唔舒服，跑步嘅時候就會突然間乸住痛，有時個胃仲會脹到個波咁，長課每次想試30K又跑唔到，嗰陣覺得要完成一隻全馬根本係天方夜譚嘅事。

直至去到三月中，除咗有時食完嘢會有啲唔舒服，跑步都好似唔覺有咩大問題，連比賽都全程無痛，感覺似係好返。

到咗四月頭，三個月嘅藥食哂，所以安排再照個胃同個肺，結果醫生話我個胃完全好返哂，連之前照到肺嗰粒嘢都無埋，終於都可以回復正常喇。

照完隔咗一日無啦啦又跑到37K，又唔太辛苦，之後個星期跑咗場10,000m又唔錯，咁要完成隻馬睇落似無乜問題，咁就照盡力去試下跑個好時間，要爆都唔緊要，我知唔會跌出240。

就係咁，頭半程用返隻10,000m嘅pacing去跑，又真喺跑到，梗係啦，涼咁多又舒服咁多。

過咗半程開始跌喇，亦有抽筋感覺，去到30K都知道Sub230無望，而且右腳hamstring會不定時咁彈幾下，keep住4分頭pacing跑埋佢啦，235內可以完到賽嘅，點知去到41.5K終於大抽，唯有停喺度拉下，睇嚟要行返去㗎喇，但兩邊嘅觀眾見到即刻幫我打氣，我又繼續跑返，佢哋都好熱烈咁鼓掌，嗰陣我真係好感動😭。

就係咁，終於都成功完成咗場倫馬，大休一陣就會準備下之後嘅比賽。既然人無事，下半年要追返上半年嘅目標，咁後生，實做到嘅。
呢段日子好多朋友/跑友都好關心我，每次見到我都會問我個身體狀況，感謝您哋🫶🏻！

賽前冇定目標時間，希望跟住體感，享受同突破。

比賽當日，我同B哥04:45起身，佢準備白飯，我整咖啡。06:10出門口去Boston Common嗰邊寄存行李，然後搭黃巴士去選手村，車程60分鐘。09:15開始離開選手村，移動去起點。

0:00開跑！頭段包含落斜，加上氣氛實在太好，盡量鬆住去，避免興奮用多咗力，第一次比賽沿途係咁同路邊嘅人俾個✋🏿。

5k時間19:07，10k 38:27。

17k多啲，終於到咗傳說中啲女學生排哂出嚟打氣加任攬任咀嘅Wellesley College scream tunnel，一直靠左跑嘅我都跑返去右邊睇吓佢哋咩料☺️。

半程，1:21:20。

25k後，真正嘅考驗依家先開始，嚟緊大概13k都係連續嘅上落上落，包括要打大佬 – Heartbreak Hill。喺賽道加熱天氣下累積嘅負荷，後段就算落斜同平路，都已經令配速保持唔到4分內，只可以努力唔跌速太多🥵。

30-40k，avg pace 4:15。
衝線，2:49:25。

突破嘅唔係數字上，而係體驗。
波馬真係好正！

過往琵琶湖每日馬拉松與福崗及東京馬拉松是日本三大馬拉松賽，其中琵琶湖的限時更是嚴謹的2小時30分，是日本國內歷史最悠久的馬拉松賽，自1946年已開始舉辦。

但自從日本選拔馬拉松的MGC賽事出現以來，加上與東馬舉行時間相約，琵琶湖的注目度略有下降。自2023年起，賽事易名為琵琶湖馬拉松（不再由每日新聞社冠名），變為平民也可報名參加的賽事，限時為6小時。

此賽事沒有賽前Expo，號碼布是賽前2星期以郵寄寄出到日本各地。選手須經Runnet報名。

起點所在的大津京站，乘坐JR湖西線由京都站出發，只需兩個站10多分鐘的車程。大會在交通指南也清晰指出乘坐不同時段出發的JR/火車的到達時間。起步場地，皇子山競技場，分別有一個田徑場及棒球場。

日本人的細心有時候是達到恐怖級別的，因為他們佈置設備的動線已考慮到跑手的需要，為什麼這樣形容呢？

由在月台及出閘開始，沿路有義工在2度寒冷天氣下為選手指路前往會場及打氣。到達會場，在場地入口順序設有更衣大帳篷（內舖防水地布及有足夠桌子），在必經之路上，清晰看到行李寄存車的號碼（而行李車號也是在號碼布上印好，而不是另外要有一個行李號碼）。

分號碼放好行李後，進入諾大的棒球場，入口是水站（有水、運動飲料）。水站後看見棒球場被分為C、D、E出發的等候區，選手可在棒球場內空地跑步熱身。而大量流動廁所則設在棒球場邊緣，除了分男，女隊之外，還有一條是男（小）隊。除了在數量上有足夠的廁格讓跑手使用，更重要是，不需上小解的跑手等待長長的隊伍，而大隊排一條隊的做法，可以避免個別大解人士使用較長時間，引致同列人士等候時間比隔鄰列久的不公平問題。

再往前走，離開棒球場，進入田徑場外圍就是B、A、S區選手的等候區，同樣有流動廁所及熱身場區安排，也有三條大隊按需要使用流量廁格。我在起步時間50分鐘前到達，熱身前先上洗手間，基本不用排隊。

進入運動場，起步點在後約100米已圍封好預留給S區選手，A區選手則圍封預留了100米彎道跑道及外圍區域。B區的跑手則以打蛇餅形式使用整個足球場（像機場排隊航空公司櫃位check in）。

隔壁棒球場出發的C、D、E區跑手會在起步後跟蹤B區隊尾，進入田徑場起點出發。

一個有趣的觀察是，B、A、S區提早入場的安排在起步前15分鐘會停止，大會在最後2分鐘會報秒（真係逐秒）倒數，遲來的B、A、S區選手會被封在運動場閘外，要與C、D、E區選手一同跟在後面。

我在等候時剛剛對著閘口，看見關閘情況有點像那霸馬拉松一樣，是真的會有人最後衝閘的，當然那霸那個衝不到的後果慘一百萬倍。

比賽起步時間是早上8:20，我在比賽開始前30分鐘熱好身進入等候區，排在A區第5排。起步前A區選手也可前行匯合S區隊尾後，我距離起點仍有40米，可見早在前方的S區選手其實也不少。大會鳴槍計，大鐘與個人時間相差20秒左右。

比賽路線大致是環湖的馬路，高低時有起伏，但都是短短、微斜或暗斜，每公里的高低差只有數米，可說非常平坦（對比香港馬拉松，龍和道隧道已比任何一條斜路長及斜）。在15-20公里處有兩個180度掉頭，有機會可迎面可看到前列選手，有朋友同跑的也有機會看見，可以聽到選手間打氣聲此起彼落。

到26公里處賽道會經過終點會場烏丸半島的外圍，好處當然是在終點等跑手的朋友可以停在同一地方看到跑手多一次，選手聽到朋友打氣也有見到明顯提速的！28-42公里則是往復路段，能看見前後不同的選手，加上賽道旁的打氣民眾，時間感覺比較容易過。

當然，琵琶湖馬拉松路經的幾個區域（大津，草津，守山）也不是大區，而環湖的路段更不在市區中心，所以打氣的人流不能與大城市沿途都是打氣民眾的熱鬧情況相比。

是日天氣算是不俗，起步時為2-3度，小有太陽因此非常寒冷，聽到不少日本選手不斷大叫「沙梅沙梅」（好凍），濕度52%則有利選手表現。部分路段比較大風，常常吹到流眼水，也吹到面部僵硬有點失去知覺。但在21公里後太陽出來高照，氣溫升到約7-9度，風勢也緩和不少，整體仍是合適發揮的。

我有幸在準備不算很充足的情況下，將塵封數年的個人記錄更新，算是十分滿足（本身愈慢，進步空間愈大😅），不過後半程不能維持配速的情況早在22公里便開始出現，看著手錶，每公里比目標慢5秒，到之後慢10秒，再後期慢了15秒，說實在是難熬的，但回想，又哪有馬拉松是容易的？

賽後大會在終點設有Expo，都是當地的食物（近江牛柳粒最受歡迎）及支持團體的攤位，也有手信購買，休息區及拍照區等。整個賽事只有馬拉松距離，名額7,000人，但比賽日的準備看得出不比香港容納70,000人的少。所以報名費15,000 Yen仍是物有所值的。大會沿路補給指引也十分清楚，遠遠已知道是水、運動飲料或是其他補給。

如果把著自助餐心態的跑手，勢必可大快朵頤。今次自己則為安全起見，只準備5包能量補充，沿途沒有享用大會的其他補給。賽後大會提供接駁車送選手到車站，但足足坐了25分鐘車，有位坐都感到腳麻，大概可說是賽會選址上比較不親民的地方。

整體而言，在大城市附近的馬拉松，路況合適PB的賽事，琵琶湖不會令你失望。但要體驗更豐富的（如Expo、打氣氣氛、地點方便），琵琶湖可能未必是首選。

後記：比賽同日有名古屋女子及靜岡馬拉松（私心恭喜林穎璋在靜岡做出好成績，踏上2:19台 ），喜見不少跑友也做出理想成績。 

跑完金澤馬之後一直好想挑戰 320 內，所以計算下時間，3 月內跑多個應該夠時間練，因為作為廢廢嘅我係唔會連馬。成個 cycle 入面又有兩隻半馬當練習，12月台北半係旨在玩，冇目標時間；1月渣打就當係 test 預估自己目標時間，慶幸使做到 pb 跑隻1:33。最後 3:16:01 完成 ✅！

今次練習強度比之前高，長課都跑左 5 次 30 或 30+，希望建立好耐力。吸收上次經驗，今次搵人幫手拉筋做伸展，自己用筋膜刀，加埋針灸去解決 lower back 繃緊嘅問題，但練習後期因為強度提高，左 ITB 都係有少少問題，自己勤力啲拉伸、碌 foamroller 打按摩槍。

講番首爾馬，作為白金級賽道，成個安排都一般，網站指示不足夠；另外報名嗰時連course map 都未有，最後就係只有一日攞選手包，因為韓國境內係會寄到選手手上減低現場工作人員。同行朋友夠通透，咁多年都係咁，你哋咪又係報名 🤷🏾‍♂️。

星期四到達後開始加碳食嘢，都要認真搵吓食乜，因為唔係辣就係燒肉，最後賽前都食咗 2 餐燒肉加白飯解決 😂，金豬食堂又真係好好食嘅。

揀咗住近起點，就算凍，jog 落去都唔怕。比賽當日 6 點半寄完行李上返酒店作最後準備，做 gear check，確保 gel 同鹽都準備好，再同幹大 Kalvin 一齊出發上線。7 半左右去埋最後一次廁所，係 B 區人群中活動熱身時撞到 @misslaichukong 。 A 區起步後一陣就到我哋，仲放曬煙花咁。

一開波頭10k 開快咗，45:36 ，半程 1:38，我知自己會捱唔到尾，同 Kalvin 講唔好等我，自己去先，最後同佢拍跳咗 32-3k 先甩。中間幾次要俾市民過馬路輕輕打亂咗節奏，去到32k 聽到 On 韓國同事打氣，即刻將迷咗嘅我叫番醒。過咗 35k 之後有歪念，計過 5分披 jog 番去都 sub320 啦，最後我拍醒自己同自己講轟埋落去，最後冇乜點跌速下衝線。

慶幸中途冇乜出現咩狀況，擔心嘅 ITB 又冇咩事，中途食足 6 包 gel；好彩中間攞咗 2 包 amino powershot，最尾我 38-9k 食埋嚟衝線。美中不足之處係 2016 我嚟跑 10k 都仲係衝入首爾運動場衝線，但今年改咗喺出面做終點。多謝今次456小隊，大家都 PB 成功 🏆！

多謝 @kailokwong @virginialyc 之前金澤幫我打好咗個底，今次用咗一個強度較高嘅訓練都食得晒。過去 8-9 個月一直都係自己練習，冇上跑班，夾到朋友就一齊練。

多謝我媽俾我出嚟跑，終於 off season 可以抖下。

初馬大成功！🥹，Net time: 3:48:57！

跑之前覺得自己好不自量力咁要挑戰初馬sub 4，畢竟自己跑齡尚淺，覺得自己當初報名有啲衝動有啲唔理性🫢，不過既然都報咗，就盡力努力練習🔥，我每次練prog跑長課都咁同自己講：路係自己揀嘅，辛苦係你自己攞嚟，要怪就怪自己😅，到差唔多比賽我先俾自己一個名確嘅目標。

3.9，全馬前一日。我喺名古屋城附近jog緊期間突然腳痛🥲，同渣馬半馬前嘅痛感一樣，加上天氣突然凍咗好多仲落雪，好多不明狀態令我心情變得好複雜，好擔心🥺。

3.10 全馬當日。
上線：起身食咗3個飯團 + 1枝咖啡😗，然後扮靚靚get ready出發！落到街覺得唔算太凍，都放心少少。同buddy @running_0305kw 會合之後去bag drop，然後去warm up試試腳，無痛！即刻放下心頭大石，可以安心上線😌，但由於早咗到上線區，要喺戶外吹風等一小時，雖然有大大太陽曬住但都係凍到癲😵‍💫，手指腳趾完全無暖過🥶

開跑：我有想去廁所嘅感覺但我無諗太多，頭1k不停過人同不停俾人批踭🫠，跑緊6”09🥲，不過都有心理準備㗎喇，始終我都排到去E區，下次點都寫expected time係330㗎喇🤪。

2k人群都開始疏落番，已經可以跑番5”30，見到 @chungtikc 打咗聲招呼佢就同朋友跑走咗🫣，4k見到4小時波波，想去廁所嘅感覺再強烈咗🫠，見到個牌寫住下一個廁所係6k，諗咗一輪我決定要去咗廁所先。

6k一嘢衝入去個廁所，用咗30’出番黎💨，因為本身係預咗頭幾k都要過人，所以時間上唔太大影響，之後即刻追番個pacing繼續去🏃🏽‍♀️。15k又再次見到4小時波波，由於太多人跟4小時pacer，我加速咗少少過堆人群。21k有想再加少少速，但右腳小腿緊緊哋好怕自己爆，keep住個人都仲係好凍，所以都係平穩跑算。

30-32k我開始擔心自己體力，由於我無做過多過30k嘅長課，唔知自己會唔會頂唔順，幸好無撞牆，但明顯覺得自己攰咗，開始呆呆滯滯咁😶，繼續同自己精神喊話，仲有10k咋！34k上緊暗斜見到🚕，同佢講加油頂住呀！其實都係同緊自己講要頂住🥹。

35k打後跑嘅係意志力，一路都好凍同有大逆風，手同腳一直無暖過🥶，喺水站仲要倒到成腳濕晒，同埋無預到啲皮膚會乾到癲，所以一路跑個身都有刺痛感，好辛苦超辛苦極辛苦😫。見到周圍開始有人行，我即刻唔望叫自己唔好諗，點都唔可以行，每見自己開始跌速就食gel，唔可以俾自己有一刻係諗負面嘢，好彩一路都有啲影相位出現，我就一定影相為上㗎啦😙，影相重要過跑呀！每次見到都即刻好有動力去擺pose影相📸，即刻覺得無咁難捱🫶🏽。

最後1k係人生最漫長嘅1k，一路跑一路望點解仲未入到會場嘅😫？終於見到個入口喇，望一望錶3:48，拼盡最後嘅力爆埋最後幾百米3:49衝線🥹。

完走：完成人生初馬，我以為自己會喊，但我無，其實跑完內心有啲平靜，可能我已經攰到傻咗。反而係番酒店途中見到最後一位參加者喺度跑緊，有旅遊巴喺後面準備cut off接走佢，佢仍然仲跑緊無放棄過，大家都拍手同佢講「頑張って」，我有啲眼濕濕，要放棄好易，只要一秒個位參加者就可以停低上車走，但佢最後選擇堅持繼續想跑落去，😭😭😭好感動。

多謝自己❤️，用腳骨力換人生第一條Tiffany，好有滿足感😍！多謝 @karsenyeung ❤️一路以嚟嘅支持，喺名古屋城見到你跟住一齊跑，好開心！辛苦你陪我一齊5點起身，走唔同嘅點等我幫我影相同我講加油😘。你都係我繼續跑落去嘅動力，無你我一定走唔完呢個初馬。

多謝一路以來俾信心我嘅人❤️；多謝一路以來俾好多意見提點我嘅人❤️；多謝一路以來有留意到我有努力嘅人❤️；多謝你地同我打氣同我加油❤️！

名古屋女子馬拉松（前傳）

自從開始玩山起，一直都好覺得路跑好悶，又覺得自己都唔係路跑人，好抗拒練路😖；點知…上年賽季都未入戲肉，教練就已經叫我休季時落隻馬試下！

計劃是這樣的…上一個賽季以12月嘅泰B作結，今年8月就有CCC呢場大賽，所以鎖定3月係跑馬嘅好時機。於是東馬、名古屋、首爾隨便揀～東馬…抽唔中😆；知道無份嘅時候名馬又已經截咗，只剩底首爾馬了，又唔知點解心繫韓國嘅我當時又對首爾馬不太感興趣，拖下拖下…名馬registration re-open喎🫢，整定要我玩，於是9秒9即報💨！

名古屋女子馬拉松 （訓練篇）

1月中剛開始練時仲要問咩係tempo咩係LSD？鞋要點揀又唔識…Nike Next%？Adidas Pro 3？總之唔會係你對初馬Asics DS Trainer啦🤣！

一直怕著厚底鞋嘅我好彩因為對Hoka Mach X打救咗，當時已經開始著慣Mach X，變得無咁怕厚底鞋，每一課都被催要快啲決定用邊對鞋落場。仲記得死線係第一場長課當日，朝早出門口前我仲要兩對鞋都著下，最後都係決定Pro 3，而家諗返轉頭好彩有人催谷同借鞋我試🫶🏻。

訓練期頭半多數都係自己嚟，有時跑唔到入目標時間會氣餒；後半開始有隊友嘅加入，時間就愈跑愈好、愈跑愈順，一直覺得自己跑入5分pace內10K都hold唔到，而家竟然係target一隻全馬，真心要多謝各位🙏🏻🫶🏻！

雖然過程中都有啲小傷患影響咗訓練，不過訓練係長遠的，呢場馬其實都只係一小段…今次跑到咩成績都只係當日嘅一張成績表，練咗就係練咗，練咗就係自己嘅😌。

名古屋女子馬拉松 （作戰日）🔥

起步前1粒鐘有多就drop bag好，心諗大把時間熱身去廁所同上線，原來搵廁所去好難㗎！

場地係擺咗好多流動廁所，但排隊情況混亂，幾經辛苦搵到個隊尾，又會有人舉牌話已經截咗龍，點你去第二個廁所又重複呢個情況一次😤，結果我無視咗一個工作人員照排，都真係排咗一粒鐘…排排下已經見到我個C區啲人唔見晒…

好彩排隊前都叫做踢過下腿，不過都成粒鐘前咁濟，去完廁所即刻衝上線仲有5分鐘就開跑，但嗰5分鐘就因為已經除咗雨褸，凍到起晒雞皮都幾係嘢🥶！

9:10am嗚槍起步，塞車塞到暈咗，頭1K開5:24，好彩第2K已經可以開返正常速度。

心諗慢慢追唔好急😬，頭幾K個人仲係好凍，凍到面同腳都其實無乜知覺，但速度又OK仲比預期中快，感覺好順但有啲擔心維持唔到。

10K後開始有啲大暗斜，俾自己放鬆少少睇住HR唔追pacing，時間係跌咗幾秒但仍然範圍之內，15K夠鐘食gel個人上晒力，順走再推快咗落4:3X，執咗幾K心諗賺夠填返隻5:24就好開心，連半馬都PB埋🥳，過咗一半開始小心留意自己狀態，怕30K過後會跌速，點知喺呢個時候開始覺得右腳有唔妥😩，就係兩星期前發過出嚟嘅傷患，都係ITBS之類，我開始同腳仔講數，你乖… 我地一齊努力多大概1個鐘好無？🥺

跟住佢又真係鬆返啲喎，不過都係時鬆時緊，唯有繼續好好控制住個節奏，同埋習慣個痛楚🔥！38K…連埋啲尾數大約最後5K，開始想加力但又要就住隻腳，慢慢加唔再俾自己跌返落4:40，同時feel到隻腳嘅壓力愈嚟愈大，頂到最後1K…已經望到場館，全程第一次有點解跑極都未到嘅感覺。原來仲要兜成半個場館嘅外圍，最後1K加到落4:22知道一定夠做😏，數底極差嘅我都知一定做到Sub 3:20，只係想快啲完成呢個挑戰，入到場館都未好好享受個氣氛就已經衝咗線，Yeah!!! 我真係做到喇！🥹🥹

今次除咗做到最終理想時間，過程中pacing同HR都hold得好穩，啲數據靚到睇咗成晚都未睇夠🤭，不過興奮過後又係時候做檢討喇～而上頭已經俾咗新一輪任務我了😬～

大會時間 3:20:30
個人時間 3:19:05
排名 287位

由上年開始接觸全馬，原來不經不覺已經係第三隻馬，當初諗住一年跑一隻馬對自己黎講已經係極限，今次竟然機緣巧合下造就咗隻連馬，渣馬完一個月後就到阪馬。

說真的，跑完渣打之後已經身心大疲勞，都有啲擔心應付唔黎， 畢竟全馬經驗尚淺，以及全馬路上遺留落嚟嘅各種陰影同黑暗經歷，加上今次全馬嘅訓練完成度不高，有好多關鍵嘅課表一係傷咗跑唔到，一係時間管理失敗練唔到，唔多唔少都有影響信心，但無論如何上到線就應該感恩，盡情去享受比賽！

相信有跑阪馬嘅跑友們都知道當日嘅天氣不似預期，5度+落雨體感可能減多2度，至於能否正常發揮要視乎當下嘅狀態同決心了。

記得當日未開跑前都經歷咗重重難關，同隊友失散自亂咗陣腳，被安排在G區起步，最估唔到係塞人嘅情況如此嚴重。

記得當日未開跑前都經歷咗重重難關，同隊友失散自亂咗陣腳，被安排在G區起步，最估唔到係塞人嘅情況如此嚴重，以往比賽頂盡最多都係塞2-3k，今次竟然塞到10k、20k都仲塞緊，有啲位甚至迫於無奈停咗喺到，原來不停喺人群中穿插真心消耗好多體力，追追下發現已經追到去block C。

其實大概跑到咁上下都知追唔返啲時間，但並無因為咁而心急唔耐煩，反而決定降低目標放鬆心情享受埋佢，穩定地順利完成，反正我之前兩隻馬都無試過順利返到終點！

上年名古屋初馬加碳失誤、失眠、作嘔、撞牆、抽筋、仆街、行路，真係咩狀況都出齊…到今年渣馬跑到臨尾熱衰竭暈低又行路，死頂捱返終點最後要去救護站吊鹽水…真係多次質疑自己究竟唔適合定未ready跑全馬，甚至乎唔想再跑，但偏偏唔信邪，覺得總有一槍一定可以順利跑返終點。

今次阪馬終於成功做到了！時間上雖然只係3:41:13並無pb， 但我覺得今場係跑得最開心最滿意嘅一次。

與其淨係用成績去定義自己跑得好唔好，應該嘗試欣賞自己，戰勝咗好多不利因素，及時調節心態，保持穩定發揮，衝過終點後亦有一份莫名嘅感動，彷彿見證住自己嘅成長，終於再無出現任何狀況同意外下順利完賽，再唔需要令人擔心，同時覺得用一場海外賽去為今個賽季作結感到好圓滿。

每次失敗嘅比賽經驗都真係難能可貴，成為咗我想繼續進步嘅動力，好多時自我反思後會成日覺得自己有好多不足，唔夠決心，又唔夠勤力，但無論表現如何，都要好好多謝當下盡力發揮嘅自己。

能夠完成一場馬拉松比賽同整個訓練周期本身已經好唔容易，要相信日後係可以改變這個狀態去變成一個更強大嘅自己吧。

好感恩遇到馬拉松呢項運動，為我嘅人生留下咗一個又一個熱血嘅故事！最重要一定要多謝我教練陳俊希，喺我每次跑得唔好嘅時候佢都仲緊張過我，每當我否定自己嘅時候佢又俾咗無限嘅肯定我！當然仲要多謝一齊經歷咗呢場風雨嘅大阪小隊，同背後支持我地嘅偉龍sir & 一班落力打氣嘅RWHK teammates！

🇯🇵 名古屋初馬體驗
\ 終於完成人生第一隻全馬！！/

多謝每個同我為我打氣加油、陪練嘅每位（請對號入座）。
準備一個全馬過程真係好漫長，每日嘅訓練、休息、工作都要安排好，認真唔容易！

比賽前有時都會問自己：「做咩要跑步？仲要跑個全馬咁辛苦？」當時都只係覺得想挑戰下自己。

但經過星期日名古屋比賽後，答案可以話係「努力回來的滿足感」，對自己一個肯定「我真的做得到！」

比賽前一日生理期來了真係好擔心影響到比賽，而當日比賽熱身時真係有少少唔舒服，立即食止痛藥再捉埋Pony一齊祈個禱比賽順利唔好有痛！（因為佢肋骨仍有少少痛）

感恩！最後大家都無痛開跑🏃🏼‍♀️。

頭25k同Pony、Kelly都Keep住5:30（不准超速），25K後就開始加少少速🤏🏻，當隻腳搭入30k（望住個30K牌）兩隻小腿想抽筋😨，心諗「吓？唔係嗎？依家先真正開始！做咩事想抽？訓練都無抽過架！」

個心慌咗一下，之後冷靜同自己講保持速度，再拎抽筋水出嚟飲，慢慢再跑下就好似好少少，之後又開始計數幾時食Gel，仲有幾耐水站。跑下跑下就36k，同發現自己開始有少少攰，但仲有6k先到終點，頂埋佢！

跑到37-38k🤔，無記錯嘅話好似有個長暗斜，唔係好斜啫，做咩咁辛苦嘅💀？之後跌咗少少速，突然聽到後面有一隊人嘅腳步聲就望一望😱，Sub 4 pacer帶緊pace….

當下心諗唔好慢過佢呀！加速！
慢慢聽唔到後面嘅腳步聲，心情冷靜返落嚟食埋最後一包gel，就衝埋個4K！
最後個4K覺得好漫長…

內心對話非常多，例如「不如停低休一陣再跑過啦」😬，呢句嘢分別出現喺尾4K、2K…不過呢個想法都係分別彈咗出嚟一下就取消咗。

跑到40K真係意志力大爆發，同自己講頂住仲有2K！！
之後見到金蛋啦！轉埋個彎就直路啦！
記得教練講尾1K可以再進取啲衝埋佢！

就用多少少力跑埋上去（其實好驚1K我都會爆唔敢加太多）。
衝啊～～～到終點！個人時間 3:56:16 完成 ✅！

衝完當下大嗌咗出嚟，之後見到Phoebe就攬住佢喊 🫂！
\ 啊～～～完！成！啦！做到啦！/
呢個初馬嘅感受會好好記住。

呢個初馬要感謝有好多人支持打氣！
最重要多謝我教練、老公、330Team、專登嚟名古屋為我打氣嘅曾氏！仲有我嘅天父 🙌🏻。

身邊太多朋友都好感謝！你哋盡情對號入座啦！
仲有謝謝NB比賽裝備、比賽酒店各細心安排🙏當日安心上場。