1. 跑步年資？為什麼開始跑步？
以前工作日夜顛倒，精神壓力大，pressure eating令自己體重上升到56kg, 我個子唔高，漸漸感覺身體狀況唔太好，亦因為爸爸喺07年突然離世，鬱悶感加劇，想搵個出口振作起來，於是的起心肝開始做運動，由減肥出發！起初我只係游下水，後來覺得每次游水都要帶好些東西，又要計來回車程，好花時間，就想到以往讀書時都有跑步，不如就試試喺屋企附近跑，同自己講，萬一拗柴都可以喺最短時間內回家。😅
2. 最喜歡的一對跑鞋。
Nike Flyknit Racer。
3. 選擇跑鞋的第一個條件是甚麼？
舒適、抓地、輕及有足夠保護腳跟。
4. 有沒有喜歡的日常跑步路線？
屋企附近（九龍塘一帶，尖沙咀海旁、畢架山龍欣道）。
5. 喜歡一個人跑還是一班人跑步？為什麼？
兩者都喜歡，自己一個跑嘅時候，會專注啲，用自己嘅節奏去諗吓日常生活嘅人和事，一個人跑係我嘅mindful practice 時間，會漸漸地進入自己同自己溝通嘅狀態，好純粹，冇鬥爭冇憂慮，係一個很好嘅自我減壓方法。但一班人跑嗰種歡樂又會比任何時候跑步更hyper，尤其有一班熱愛跑步嘅朋友喺周圍時，可以互相鼓勵，講吓笑吹吓水，喺不經不覺下跑得更遠。
6. 有遇到過跑步低潮/傷患嗎？怎樣克服過來？
2015年尾得悉自己得了癌症，需要很漫長嘅時間治療，那段期間，沒有跑步嘅日子覺得好痛苦，因為身體於化療後變得虛弱，冇體力練跑，漸漸地失去咗嗰種動力與熱情，覺得自己好冇用！1公里都跑唔郁，我係一個心急嘅人，要還原基本步，喺完成所有治療後，我決定再游水，希望自己能夠一點一點鍛練返耐力與及心肺功能，找回當初嗰份做運動嘅熱情。當其時我嘅一班朋友準備去泰國布吉參加三項鐵人賽，我膽粗粗叫朋友問大會可唔可以轉做隊制賽，佢負責騎單車和跑步，我幫佢游水。起初練習嘅時候，20米都游唔到，就似係洩咗氣嘅氣球一樣，我唯有一點點嘅「游返嚟」，游水可以令我肺活量增加，有助之後我嘅跑步訓練。慶幸當初自己有這份勇氣叫朋友畀我嘗試參加三鐵，使我喺嗰段練習期繼續運動，雖然慢，但一點點找回來嗰種感覺係開心嘅。康復後我冇停低，喺2016年下半年至2018年三年裏面完成咗一次嘅三項鐵人比賽同3隻海外全馬；包括倫敦馬、芝加哥馬同紐約馬。所以那些掛在口邊：「今天都是不跑了，唔會有進步的了……」都是藉口，只要你肯繼續，沒有做不到的。
7. 現你身為品牌賽事Pacer，你覺得成為Pacer要具體哪些條件？及對你的跑步有甚麼影響？
成為Pacer 最主要係能夠帶動和鼓勵身邊人開始跑步，喺互相鼓勵支持同一齊訓練下，令大家向着同一目標進步。
我認為成位Pacer首要條件一定係熱愛跑步，要有紀律，團隊裏邊我哋會互相鼓勵，營造一個很好嘅氣氛，亦會鼓勵到身邊嘅人愛上跑步。自從我跑返步以後，我都影響咗我身邊嘅家人，一啲舊朋友、舊同事都愛上跑步，當中已經有數十人投入到跑步世界，而且都會每天訓練，也繼續影響佢哋身邊嘅人去跑步。
8. 跑步途中會想什麼？
以往跑步嘅時間都係我放空嘅時間，留白、沒有想太多，只是跟住自己嘅節奏同呼吸跑；近年就有啲唔同，因為加入咗Pacer 嘅大家庭，所以會注重返自己嘅跑姿、跑步時間、里數、飲食配合同自己是否有足夠休息等等。現在跑步嘅時候都會想一轉以上提到嘅各種，同嗰星期嘅訓練內容！
9. 有沒有因為跑步而放棄了其他運動？
以往未跑步嘅時候，所有運動與我都無緣，因為工作嘅關係，冇太多可以運動嘅時間，近年放慢工作，反而做多咗運動。除咗跑步之外會行山、游水、踩單車，挑戰三項鐵人；喜歡打網球、自由潛水，重會學一啲較小眾嘅運動，例如水底曲棍球。
10. 你認為香港是適合跑步的城市嗎？為什麼？
香港絕對適合跑步，相比起其他國際大都市，香港跑步十分安全，跑街你會感到安心。而家跑步風氣盛行，香港其實有好多風景怡人嘅跑步路線，好適合初入門至資深跑手。其實我覺得香港重有很多路段可以發掘，加以推廣，吸引多啲遊客嚟香港旅遊嘅時候，喺安全嘅情況下喺城中跑步，去認識我哋嘅社區。
一年一度的香港馬拉松亦可以研究修改一下路段，可以唔需要跑入充滿廢氣嘅隧道，亦希望更多本港市民可以多啲參與，等同我哋喺海外跑馬時，當地嘅市民會好踴躍跑上街上支持。
11. 喜歡什麼時段跑步（晏跑/晚跑）？為什麼？
喜歡晨跑，因為我有個 #GoodmorningHKSeries 😂，夜晚跑步好多時會瞓唔着，安多芬滿瀉……休息對跑手好重要，睡眠質素對我尤其重要，所以我寧願早起都唔想夜跑。
12. 現時跑步目標是什麼？
以往跑步嘅時候係朝著比賽為目標，喺賽事上做出好成績；現時心態有所轉變，同時亦因為加入咗Pacer，會覺得可以帶到一眾跑者係佢哋設定嘅目標時間內一齊完成，嗰種快感比任何自己完成時間更為高興。
13. 可用一句說話總結跑步對你的意義嗎？
停低落嚟你就輸掉了！
14. 有什麼社交媒體可以找到你？
Facebook: Vivian Leung
Instagram: vivwyleung
