REPORT

華哥不專業鞋評 Brooks Levitate 6

17 6 月

Broorks係一個有過百年歷史嘅運動品牌，1914年成立（背後大老闆係股神巴菲特），創立精神係 Run Happy，希望帶領大家可以通過跑步獲得健康同快樂，體驗不一樣嘅人生。品牌象徵住「一條無盡頭嘅路，邁進勝利嘅路」。 Levitate 用咗 “Find Your Springboard” 作為口號，希望可以幫大家搵到想要嘅嘢。

今代 Levitate 6 鞋面網布使用 100% 回收聚酯纖維、設計為魚簍織紋，有兩層設計，好有彈性，另外用咗 73.9% 回收聚酯纖維作為鞋面原材料（包埋所有鞋面副料材質）、整體碳足跡（CO2eq）減少 473g，希望 2024 年可以達到零排放。佢同想像嘅好唔同，唔好以為會硬同唔舒服，基本上完全唔一樣。

中底用咗 DNA AMP v2，入面加入咗一定份量嘅氮氣，可以減輕重量，對比上一代輕咗 10%，同時比上一代厚咗 2mm，所以唔會減重同時失去咗原有嘅保護性同彈性；前後掌相差 8mm，算喺比較差得小。

本身 Levitate 係為正常足弓同高足弓嘅朋友設計，但佢為咗扁平足嘅朋友另外推出咗 GTS 版本（用咗 GuideRails 做中底），希望唔同腳型嘅朋友都可以搵到啱腳感嘅鞋。

鞋底厚度為 2mm，用咗指向性箭頭刻紋同菱形切法做設計方向，刻紋更加用波浪紋去增加抓地性，外側就轉做光滑面，希望易於清理。

Levitate 6 一開始拎上手好似無乜料到，唔會有「嘩」一聲，練習鞋嚟講都唔應該會有呢種情況，但著上去個吓就會覺得佢同一般練習鞋唔同，又唔止係一對普通練習鞋。

因為佢除咗慢跑有反應之外，仲可以跑啲略快嘅練習，反應嚟講都唔錯。係短 Tempo 嚟講更有一流表現。如果以賽代練嚟講，呢對都可以係一對唔錯嘅選擇。不過著佢前就要試清楚size，我個人覺得可以著細半個碼。

author-avatar

About 余顯華

自稱想做全職運動員嘅全職教練; Zero Running Club Head Coach; 2012 亞洲青年田徑錦標賽香港代表; 2017 亞洲田徑錦標賽香港代表

Tags:
, , , ,
Newer 氮氣加速 PUMA FAST-R Nitro Elite
Back to list
Older 馬拉松與人：Car 愛丁堡馬拉松

Related Posts

02 6 月
REPORT

華哥不專業鞋評 – Topo MTN Racer 3

之前都講過，大家好少聽過 Topo 呢個牌子， 佢係一個設計簡單，無任何噱頭嘅跑鞋品牌。佢哋相信（世界上最好嘅天然跑鞋，就係從一個簡單嘅使命開始，令到運動自然地變得更好），只要跑得自然同舒服，咁第二日再去跑嘅機會就會增加；喺市場上，佢哋嘅山鞋應該就比較多人認識，所以今日就講佢嘅山鞋 – 山豹3。

中底用咗 Zip Foam™️，係品牌自己研發嘅物料，相比 EVA 更加耐用，但係會軟身啲同輕身啲，改良咗搖桿設計令到每步踏出都自然，更平穩舒適。腳踭就用咗 TPU 同 stabilizer，加強腳腕落地嘅穩定性。

而加厚咗做 33mm（腳踭） x 28mm（前掌）提供額外嘅緩震同保護 ；鞋底就用咗全掌Vibram Megagrip 6mm大底，提供最多嘅抓地性同防跣能力。

鞋頭比較寬，波子骨位仲有一個好好嘅support，符合人體工學，為腳趾提供咗充足嘅空間，確保穩固貼合。雖然佢比較寬，但係佢向前性比較好，如果向外兩邊就會覺得到有嘢頂住。

最後外底鞋紋都比教深，加強咗鞋底耐用性，適合喺各種天氣下去跑，行碎石山路又或者任何山徑地形到訓練。總括而言 Topo MTN Racer 3係一款全能性嘅山鞋，適合日常訓練同想比賽一鞋兩用嘅朋友。

21 5 月
REPORT

華哥不專業鞋評 – On Cloudflow 3 / Cloudflow 4

第一對 Cloudflow 喺 2017 年出現，定位為緩震同速度並存嘅一對鞋，啱拎嚟做速度同中長距離訓練。直到而家已經出到第三，四代，有好多嘢都改良咗。

On Cloudflow 3中底較硬及薄，保持元祖版本嘅設計

鞋底以前係好薄、好硬，而家Cloudflow 3 就keep 住原本嘅設計、Cloudflow 4 就開始加厚咗，變中薄底。相比之下 Cloudflow 4 係比Cloudflow 3 好著，因為前者有 2 層 Cloudtec，而後者只有一層 Cloudtec 。

CloudFlow 4 前掌位有一塊類近 Cloudboom Echo3 嘅鞋底同鞋紋，而 Cloudflow 3 就同 Cloudflow、Cloudflow 2 一樣繼續懸空咗中間位（就好似摩西分紅海咁）。Cloudflow 3 同 Cloudflow 4 中層都係有塊TPU板（Speedboard)。

鞋面方面，Cloudflow 3 得一塊網面布，同傳統跑鞋無分差，加埋布料上啲大洞，透氣能力十分好。而Cloudflow 4鞋面就用咗 2 層布料，雖然多咗一層物料，但唔代表佢透氣性差咗，仲提升咗著上感。

對於我嚟講，Cloudflow 3會比較硬，所以啱拎嚟跑啲短嘢（1,000以內），Cloudflow 4 就相較軟熟，拎嚟跑tempo，甚至去到90分鐘以內嘅慢跑都算唔差，如果120分鐘就會有啲硬有機會唔舒服。

23 4 月
REPORT

華哥不專業鞋評 – On Cloudstratus 3

On Cloudstratus喺2017年推出，個陣對鞋底嘅Cloud模塊比較細小、去到第二代，Cloud模塊就大返小小同多咗、而家去到第三代同上一代基本上差唔多，只喺改良咗小小。而本身呢對鞋嘅定位係一對慢跑到日常休閒鞋，甚至有人會拎佢嚟跑馬拉松，基本上可以講呢對鞋喺「一鞋走天下，孤身走我路」。

鞋面為咗提升穿著嗰陣嘅舒適感，除咗係用咗跑鞋成日都會用到嘅網布之外，仲改良鞋舌， 加厚咗成個鞋舌。同時後踭同腳面比其他款都加厚咗。
其中一個亮點就係用佢利用咗100%再生物料打造鞋面，而成對鞋嘅再生材料使用率為23%（相比之前個代嘅20%提升咗個3%）。

中底係用咗兩層物料組成，下層為CloudTec®️科技作為每步嘅緩衝物料，有數過大大少少嘅Cloud模塊，每一步都有唔錯嘅反應，On利用Helion™️ superfoam呢個超級大底，用嚟增加跑步個陣嘅靈敏度。再喺兩個物料中間加埋Speedboard，而今次更改良咗，利用咗尼龍混紡材料去製造，從而增加鞋嘅彈性。鞋底用咗人手做嘅階梯狀造型，增加抓地性同耐磨性。
而今次最鮮豔嘅係全新嘅鞋底結構，封閉式雲模塊形態之下，唔會再擔心喺跑嗰陣入石仔。
如果用佢作日常生活中慢跑係好好，而跑long run、長距離訓練亦係一個唔錯嘅選擇。

03 1 月
INTERVIEW

馬拉松與人：Candy 台北馬拉松

時間 3:30:01，無 PB，目標一直 327。

所以心情沈重到好似失戀咁…賽後包膠真係有啲難落筆，不過沈澱左幾日之後，又係一條女漢子🤭，繼續好好練跑，今次就當跑左個 42k 長課🔥！

一開始跟到 pacer 朋友仔步伐，仲幫我喺水站攞水，唔駛我逼入去，真心感激。不過去到 14k 上斜我哋就失散咗喇，下隻渣打我會跟緊緊㗎喇🫡。

繼續孤身上路，21k差不多要上高架斜路，即刻搵集團遮風擋雨，所以都 handle 到，只係落斜轉肌肉就有啲搞唔掂😅。

30k 入河濱，歡迎我嘅係唔講得笑嘅大風，提醒自己唔好慢落嚟，另一面希望果道牆唔好咁快嚟。

跑到 35k 左右，不妙了，集團開始疏落，要自己食風，喺呢一段小腿肌肉開始好跳脫，兩隻小腿處於抽筋嘅邊緣…😫

腳啊腳，再努力一下，捱到前面會見到黃生！我就可以攞噴噴啦！

終於救星出現，不過佢好似唔記得攞噴噴出黎😂，要一路陪我跑一路摷袋再好似接力棒咁遞俾我，噴完再遞返俾佢，過程相當搞笑！辛苦你跑咗啲100米❣️。

離開咗黃生之後身心都得到慰藉，繼續上路搵人擋風…同埋繼續同自己心靈對話…

去到 40k，黃生又再次出現，佢今次叻咗啦，見到我面容扭曲，就知道我要噴噴，識得攞定出嚟等我🤣。

最後 2k，睇錶知道 PB 唔到，但都唔想放棄，加速啦！呢一刻小腿就嚟料喇…喺呢 2K 我應該停咗 3、4 次黎拉，去到差不多入會場，時間無多！衝啦！

終於衝過拱門，望錶…3:30:0X，我爭啲一下就暈過去😫

想喊，但抑壓咗落去…但返到酒店梳洗好自己之後，見到神隊友 Bonnie Yan 都係忍唔住爆喊咗😆。

總結：
今次 42.195 裡面學到好多嘢。

人生唔會一直一帆風順，總會遇到挫折；但呢個正正係思考同學習嘅機會，最重要係識得面對失敗，重新振作，累積下來嘅經驗只會令自己更加強大💪🏽！

多謝跑班嘅一班義氣仔女一直支持
多謝教練余顯華幫我打咗個好好嘅底
令我死得無咁難睇
多謝黃生 support

感恩❣️感激🥹

21 11 月
REPORT

華哥不專業鞋評 – On Cloudboom Echo 3

之前一直試 On 嘅跑鞋都喺一啲慢跑款，未有試過比賽鞋款，今次收到呢對 On Cloudboom Echo 3，有種眼前一亮嘅感覺。

On 嘅第一對碳板跑鞋 – Cloudsurfer 喺 2010 年面世，當中有 TPU 同碳纖維唔同物料作為板材。而去到今代，物料上已經進步咗唔少，因為 On 喺推出前已同運動員一齊研發；喺唔同嘅練習、比賽都有亮相過。

鞋面喺用咗一塊高科技嘅編織布料，除咗透氣性高之外，仲好薄。大家唔好以為佢薄就好易爛，其實都好堅挺（一般嘅跑鞋網面如果好薄，都會易爛）。

鞋舌面係一塊好薄、軟嘅薄猄皮薄棉，再喺面上額外加咗兩塊軟薄墊，減低長時間跑步鞋帶對腳背嘅壓力。而鞋帶有啲膠質，係希望增加磨擦力，減少鬆脫嘅機會。而雙層鞋眼設計俾唔同腳背⾼度嘅用家用嚟調節。

⽤咗 Pebax 材料打造最新 Helion HF 超級泡綿⾼性能中底，除咗提供輕盈緩震之外，仲提供極好嘅回彈。而 CloudTec 只喺前面，後面只保留三個細細嘅空間（同慢跑款嘅大粒 CloudTec 好唔同）。

利用三明治結構將全掌碳纖維速度板 Speedboard 放喺兩層 Helion HF 之間，以提升推動⼒。鞋底前掌用咗⼤⾯積橡膠外底，喺離地推進嗰陣提供更好嘅助⼒，後踭關鍵受⼒位置都配置咗輕薄防滑嘅橡膠墊。

一對比賽鞋未必可以捱多過 2-3 場比賽，我相信呢對鞋就可以跑大概 4 場馬拉松，而過咗 4 場賽之後，以佢嚟作為練習鞋都好唔錯。但如果唔係經常比賽，或者未有興趣比賽嘅朋友，就未必建議買呢對，個人覺得反而 Cloudmonster 可能會更好。

31 10 月
REPORT

華哥不專業鞋評 – Craft Nordlite Speed

Craft前幾年就出咗幾對有碳板嘅路跑 + 山跑鞋 – CTM Ultra carbon、CTM Ultra Carbon 2、CTM Ultra Carbon Race Rebel。而今年就出咗對真真正正剩係屬於路跑嘅碳板鞋 – Nordlite Speed，同Craft Nordlite Ultra一樣，同以往自家嘅跑鞋都好唔同，直頭成對鞋款都改晒。

鞋面嘅網布比起Nordlite Ultra唔同，係一塊鞋紗網狀面嘅物料，利用咗無縫剪裁技術去做成個鞋面，佢非常輕、軟熟同透氣性好高。而呢對鞋個前掌位置都係加闊咗，俾前掌同腳趾有更加多位置，再喺鞋頭腳趾位上加咗猄皮作穩定同耐磨、對於闊掌嘅朋友係一個福音。

之前都講過，以往Craft嘅中底用咗UD Foam（即係以前嘅EVA膠），相對較硬身（需要過100公里去run in對鞋）。而Nordlite Speed同Nordlite Ultra一樣，都係改用咗CR Foam，就咁踩落去個下已經覺得有啲淋，大大縮短咗run in嘅時間（當然呢對鞋我都係覺得屬於半百公里去run in對鞋）。

加上用咗Ultra-Rebound 鞋墊，呢對鞋墊除咗大大增加彈性之外，更夠厚，可以增加保護性。而今次鞋底就冇用到膠釘（lug），反而用咗一塊過嘅橡膠，橡膠開窿之外仲有啲暗紋增加抓地性，款式同之前其他嘅Craft鞋唔同晒。

對於喺乾爽嘅地下，抓地性唔錯嘅，但心諗喺濕滑嘅路上面，可能要小心啲，不過今次落雨試跑，都冇乜大問題，抓地性可以。Craft Nordlite Speed拎嚟作強度練習、LSD同比賽我建議可以試吓著。但如果慢跑就著用返啲冇碳板嘅跑鞋會比較好啲。

27 10 月
INTERVIEW

馬拉松與人：Fiona 柏林馬拉松

我們是Gogogo Auntcle（aunties + uncles，亦即叔叔與姨姨），喜歡相約一起跑步的香港中年人士。

暫別馬拉松比賽3年後，我們作出了一個瘋狂的決定，就是參加2023年柏林馬拉松。我們選擇柏林馬出於以下原因，不僅因為這是世界六大馬拉松之一；行程費用合理（與倫敦和波士頓相比）；大家均有信心適應當地與香港間的6小時時差；還有最重要的就是比賽路段大部分是平路。

雖然比賽在平路上進行，然而不論以什麼速度跑畢42公里都絕對不是一件兒嬉事。由於大家平時家庭和工作忙碌，因此制定有效的練跑計劃尤其重要。有見及此，我們邀請了余顯華教練（Zero）協助我們每人設計一個訓練方案。

Zero因應我們各自的目標和能力，分析各人的練習進度，並就我們的個別需要安排每星期訓練。在合共25週的計劃期間，我們每星期都要在炎炎夏日下跑80 – 90公里，對我們來說絕不輕鬆。每逢星期六，我們都會從早上6時開始接受各種艱苦長跑訓練。

在比賽舉行前的星期四，我們一行人已抵達柏林。在酒店卸下行裝後，便動身前往博覽會。會場人山人海，Adidas展覽區更擠得水泄不通，幸運地我們是在首天入場，因此能順利找到我們尺寸的裝備和衣著。後來才知道酒店（柏林皇宮飯店）旁邊的Adidas旗艦店亦有售賣相關產品。

馬拉松比賽當日早上天氣相當寒冷，起跑時間早上9時40分。有別於在日本舉行的其他馬拉松，由於這裡提供的洗手間數量並不足夠，光是輪候洗手間已花了接近一小時。從行李放置區步行到起跑區大約需時15分鐘，到達起跑區已是上午9時20分了。

比賽快將開始，現場氣氛亦逐漸熾熱起來。我們遇到不少香港的參賽者，包括林海峰，他非常友善，而且樂意與我們合照。過了不久，起跑進入最後倒數階段：10、9、8…，我們都更為緊張而心跳加速。 

比賽初期一切都順利進行，直到跑了大約20公里，開始感到腸胃不適，只好停下上洗手間。大會在沿途提供足夠的洗手間，無需浪費時間排隊。在整場比賽期間，我因緊急狀況而上了3次洗手間，沿途的洗手間成為了我的救星。

大約上午10時30分開始，天氣逐漸暖起來，我跑到供水站希望儘快補充水份，可是大會提供的是不能折疊的塑膠杯，因此喝水時90%的水都灑在臉上，真正喝下去的只有幾滴。

另外，大會未有提供電解質飲品！當跑到38公里時，我因為開始抽筋而必須減速，當時還抱著一絲希望能夠在3小時30分鐘目標時間內跑畢。

然而，當看見330的配速員在我身邊經過時，希望幻滅了；在看到布蘭登堡門之際，比賽只剩下最後400米，終點在望。但這400米感覺就如4000米般長！

結果，雖然我比目標時間慢了40秒，可是考慮到沿途上了3次洗手間，再加上在尾段抽筋，因此我還是對自己的成績感到滿意。

雖然已過終點線，但雀躍的心情絲毫未退。大批參賽者不約而同地坐在草地上休息。對於GoGoGo Auntcles每一位成員所付出努力，我感到無比驕傲，同時亦希望向其中一位以1小時8分鐘跑出PB，以及另一位在膝痛下仍盡力完成比賽的朋友，致上衷心祝賀。經過這次，我再一次體驗到年齡只是一個數字。

以下是柏林馬拉松之旅的一些心得：

  • 現場氣氛極佳，賽道十分理想，比賽期間無需聽音樂調息心情，建議一邊享受四周的歡呼聲，一邊努力完成比賽。 
  • 起跑位置洗手間數量不足，建議在比賽開始前預留一小時以上，提前到達起跑區。
  • 大會沒提供電解質飲料，需要自備或另行攜帶鹽片。
  • 確保自己適時補充水分，當發現自己需要補水時，便應停下來喝水。
04 10 月
REPORT

華哥不專業鞋評 Craft Nordlite Ultra

Craft 前幾年就出咗幾對路跑 + 山跑嘅兩用鞋， 當中包括 CTM Ultra Carbon、CTM Ultra 3 等等。而今年出咗對 Nordlite Ultra，同以往自家嘅跑鞋都好唔同， 直頭成對鞋款都改晒。

鞋面嘅網布比起 Ultra 3 更加軟身同透氣，比較似用咗布料而唔喺網布，比起以前嘅款式著落更加舒服。鞋舌位用膠做主料，內側加上網布，減少鞋舌同腳背磨擦；前掌位置加闊咗，俾前掌同腳趾有更加多嘅空間，對於闊掌嘅朋友係一個福音（可能Craft想開拓埋亞洲市場！？）

以往 Craft 嘅中底就用咗UD Foam（即係以前嘅EVA膠），相對比較硬身（需要接近 100 公里去 run in 對鞋）。今次嘅 Nordlite Ultra 就改用 CR Foam，就咁踩落去個吓已經覺得有啲淋，大大縮短咗 run in 嘅時間。加上用咗 Ortholite 鞋墊，大大增加彈性之外，更加透氣、防臭、防霉同吸汗。

今次鞋底嘅膠釘（lug）形狀比以前大，款式唔同咗，中底連接位置設有細孔，每次跑步落地個吓中底都會有一定嘅空間俾佢減壓。

喺乾爽嘅地下有唔錯嘅抓地性，但係濕滑嘅路上面可能就要小心啲，有機會跣。如果係短途山賽、炎熱乾爽嘅地面，甚至拎嚟 easy run、long jog，我會好建議著呢款鞋。但如果落雨天、濕嘅地面，或者對自己肌力好有信心嘅朋友，可以一試。

21 9 月
REPORT

華哥不專業鞋評 Mizuno Wave Rebellion Pro

以前日本牌子嘅比賽鞋出名輕、薄同抓地性強。近呢幾年碳板跑鞋陸續出現，Mizuno 一開始都不為所動；去到後期發現大眾同精英嘅需求，開始努力去研發碳板鞋。
今次Mizuno將碳板鞋同石墨底融合埋一齊，希望革新到鞋外，又可以保留番原本嘅長處。Wave Rebellion Pro鞋面相當輕、平滑，係一塊冇太多縫線嘅布面，帶嚟最好包覆感；鞋面兩邊同前面都有透氣洞，目的增加鞋內散熱效果，可以維持鞋內乾爽同透氣。
足弓內外兩側同鞋頭周圍都有利用熱壓合貼片嚟增加鞋面結構強度，鞋脷就用單層式設計，利用特殊雙孔鞋帶固定環，等鞋脷唔會輕易滑動。

中底用咗兩層膠去造，上層係Enerzy Lite+，而下層就用咗Enerzy Lite，希望可以為用家帶來更淋、回彈更好嘅感覺，能夠每一步都有更好嘅腳感。兩層膠之間再夾入一塊碳纖維強化尼龍波浪片（類似三文治咁夾住），前掌位更加偷空咗，中掌位置以蜂巢狀結構強化碳板嘅硬度。
鞋底方面繼續用G3大底（即係石墨底），但同以前嘅分別，係成對鞋底都有石墨，而以前只會得腳掌位置有石墨。
鞋底設計就用咗全新SMOOTH SPEED ASSIST（簡稱SSA）技術，透過腳前掌到腳踭嘅特殊形狀，能夠支援用家更流暢利用前掌落地，減少肌腱嘅負擔。

前掌加寬增大面積用嚟提供穩定嘅觸地感，中間位置就提高雙腳落地過渡時嘅平穩性，強化向前動力；後踭嘅特殊裁切，幫助用家以自然方式前腳掌落地。
對鞋雖然係一對比賽鞋，同以前嘅好唔同，無論喺設計、鞋感、發力方法都好大改變。建議喺比賽前都要著一段時間去適應同習慣，咁先可以發揮到佢最大用處。我自己覺得有Sub3 能力嘅用家先好嘗試呢一對鞋。

05 9 月
REPORT

華哥不專業鞋評 Asics GEL-Kayano 30

適逢今年係Kayano 30週年 – 自1993年開始主攻為偏平足或腳掌有過度外翻（內旋）問題而設計嘅一對厚慢跑鞋，而呢對鞋以足弓有足夠支撐為主 – 所以今代嚟一個華麗變身，除咗鞋型改咗之外，亦轉用新物料。Kayano 30係Asics第一對計算完整碳足跡嘅環保型跑鞋，利用環保中底物料同低碳製造，佢嘅碳排放量為10.7kg，低於其他品牌平均嘅14%，喺鞋盒同鞋墊上有明確標示碳足跡。

今代Kayano 30鞋面改用一塊工程網布，喺跑嗰陣透氣得嚟又唔會左右歪。佢腳踝位個包覆做得比較細緻同舒服，另外腳跟位有刻意加強支撐性，鞋踭內側邊高度會比外側高少少，應該係為咗加強內側嘅支撐。

中底改用FF BLAST PLUS ECO（環保概念中底）同將PureGEL放喺鞋内嘅後踭位，再利用4D GUIDANCE SYSTEM穩定系統，由寬度、長度、高度、時間4方面去改良。
寬度係加寬咗前、中、後掌，希望增加鞋底面積用嚟分散壓力。長度就係加長咗弧度引導重心轉移，減少足弓持續受力；高度係加厚咗中底，通過唔同嘅幾何設計嚟支撐內外側，希望有更好嘅緩衝。
時間就係指足弓位轉用咗更軟同更彈嘅物料（以前係用DUOMAX或LITETRUSS去支撐，物料比較硬），目的係俾足弓更快回復到原位、減少足弓負擔。鞋底就用咗AHAR+膠增加耐用性。

呢對鞋喺著上去就已經覺得好柔軟同有彈性，唔似以前著慢跑鞋咁覺得好硬、好笨重。慢跑方面佢都算無可挑剔，當嘗試跑快小小，會發現佢都可以輕易控制到，同佢嘅外觀感覺有啲唔同。
當然跑到4分內/公里就會有少少吃力，始終佢定位係一對慢跑恢復同日常活動鞋，所以要求都唔可以太過份。呢對鞋我建議著嚟恢復慢跑同日常活動都好夠用。

13 8 月
INTERVIEW, MAGAZINE

ON釘鞋Cloudspike 余顯華率先試著

余顯華，人稱「九龍仔打躉王」，因為經常在九仔出現。但其實 Zero Running Club 在斧山道運動場或跑馬地遊樂場亦有跑步訓練班。
而剛重新入選香港隊名單的華哥，將會有什麼計劃呢？

1）將會有什麼比賽計劃？
本來想跑柏林馬拉松，但因太遲決定，所以精英選手報名資格一直未作實。Agency 回覆因為明年奧運年，很多跑手需要爭取取分數，令精英選手名額供不應求而最後放棄參賽。剛決定主攻田徑場賽事，地點應該是臺灣，順便跟老婆去旅行。

2）為什麼不轉到另一個馬拉松？
主要怕突然改整個訓練計劃，勉強練會效果不理想。香港太熱，怕會熱衰竭😂。

3）現時日常訓練會是怎樣？
多數上午練跑，晚上教跑班。間中上午都有跑班，就下午找時間在教跑班前練習。無論長課、interval 地點多數在九龍仔。
跑班除了九龍仔，就在跑馬地、沙田、斧山道都有。

4）經常看到你寫鞋評，家中有多少跑鞋？
無數過，老婆唔會怪我但外母會😂；始終係是阻了屋企地方。

5）平常訓練會多用品牌提供的跑鞋嗎？
因為跑量高，而多數著用300多里數後，功能會減弱，就會換鞋。正常計算，大概兩至三個月就會用盡一對鞋。

6）現在跟哪一位教練？
澳洲 Run Crew 的 Gary。因為之前跑黃金海岸馬拉松前，在悉尼跟跑會訓練時認識，一直跟到現在。

7）遙距教練是怎樣運作的？當中有難度嗎？
有教練在身邊當然會好一點，有問題時可以即時有答案和糾正錯誤。
遙距的話，首先一定要自律性很高，又要跟教練有一定的信任，而且亦要很清楚自己身體狀況。
Gary 現時的課表都沒有給我配速，靠自己身體感覺應該跑什麼配速。

8）相比本地教練，遙距教練有什麼好處令你選用？
香港當然有不少好教練，教出很多好運動員。
不過，我之前都有跟外國教練的經驗，比較香港教練的教學方法，會喜歡全外國模式，感覺上較適合我。
雖然外國教練未必能完全了解香港的訓練天氣或地理等因素，但經過溝通後，教練會對訓練有所修改來配合。

9）為什麼會成為香港 10,000 米代表？
今年沒想過成為港隊，該場賽事是渣馬後兩星期的，並沒有特別部署。特別是渣馬時拉傷，但全力跑之下，竟意外成為香港全年最快時間而再次成為港隊代表。

10）成為香港代表有什麼感想？
好彩。
十年前都是靠 10,000 米成為港隊，估不到十年後沒太大目標下再做一次。
其實主要是比賽當天是亞妹過大禮，要快點跑完回家，所以時間跑快了😂！

11）坊間田徑釘鞋選擇很少，品牌亦少有入貨而做 seeding，比賽會如何入手？
從前多數跟釘鞋舖訂，近年就可以自己上網訂。間中會有品牌贊助，但品牌在香港的貨源都不太穩定，所以多數會自己購買。（現在 On 的網上可以直接網購）

12）會在下場比賽試著 On 的 Cloudspike 嗎？
感覺是一對好鞋，輕身及有推動力，只是尺碼要大半號才合適。
釘鞋一定要先開鞋，用來練習一段時間作適應，之後才會用作比賽。

13）下一場比賽是什麼時候？
9月香港有田徑系列賽 Round 4；台灣有兩場比賽，或日本日體大的比賽都有可能參加。
全部自費報名，先取得田總批准，再嘗試申請集訓基金。

14）最後一條，傳聞你很多時在 LSD 中吹無聊水，對跑步訓練有沒有幫肋？
其實「吹水」是很有益處啦，LSD 需時長，咁 x 辛苦，90-120 分鐘不等，吹水會令時間過的快一點，何樂而不為呢？

Zero Running Club 的學生們或九龍仔的跑友們，都對華哥的「癈up」非常受落，但其實華哥對待教練和運動員的身份都非常認真。
要不是認真，就不會香成為港隊代表吧

03 7 月
REPORT

華哥不專業鞋評 Brooks Hyperion Elite 3

試完 Hyperion系列嘅訓練鞋 Hyperion Max，今次就試最高級別比賽款 – Hyperion Elite 3，同樣以 “Find Your Lightspeed” 為口號。上次都提過，佢同 Hyperion Max 係兄弟鞋款，前者係一對長距離比賽訓練鞋（無碳板），後者就係長距離比賽鞋（有碳板）。今次就講吓 Hyperion Elite 3 有咩特別？

Hyperion Elite 3 鞋面用咗 QuicKnit 針織面料、立體結構嘅凹凸紋理編織製作鞋身，令成對鞋更加透氣同耐用。鞋帶用咗 100% 回收聚酯纖維，而半開放式鞋脷設計上就設置咗固定鞋帶嘅彈性收納位，能夠穩固鞋帶，降低快跑時嘅干擾。同時 Brooks 喺鞋帶邊緣做出立體螺紋，俾鞋帶能夠咬得更加實，喺跑步過程中不易鬆脫。後踭同鞋口設計都比 Hyperion Max 短身，提供更好嘅舒適同穩定感。

中底同 Hyperion Max 唔同，入面除咗都係 DNA FLASH – 加入咗液態氮氣轉化成密閉式氣囊結構之外，並用咗兩層 DNA FLASH，仲加入咗碳板係入面，有助跑手喺跑比賽個陣，對鞋輕亦同時喺避震同加速反應效果前提下，利用槓桿原理，將落腳時嘅蹬地作用力轉做推力，幫助推蹬，以增加跑步經濟性，有利跑手喺更加慳力嘅情況之下跑出好成績。

前後掌用咗 Rapid Roll 弧形設計，落腳嗰下可以加快力量轉移到前掌，做好成個推蹬動作。而前、後鞋底厚度都係同 Hyperion Max 一樣相差 8mm，提供良好嘅避震同回彈感。

筆者第一次著上腳無開鞋就拎去跑 30K，感覺比較硬，雖然每一步都好平穩過渡，但都幾彈吓。如果著嚟跑速度練習，每步反應都唔差，仲可以幫你每一步都推向前。

如果想試 Hyperion Elite，要考慮得好清楚，佢唔係唔好，只覺得著佢上腳對跑手嘅要求比較高同定價都貴，市面會有更好嘅選擇。記得都係買鞋亦要買細半個 size。