馬拉松與人:Candy 台北馬拉松

時間 3:30:01無 PB,目標一直 327。

所以心情沈重到好似失戀咁…賽後包膠真係有啲難落筆不過沈澱左幾日之後,又係一條女漢子🤭,繼續好好練跑,今次就當跑左個 42k 長課🔥

一開始跟到 pacer 朋友仔步伐,仲幫我喺水站攞水,唔駛我逼入去,真心感激不過去到 14k 上斜我哋就失散咗喇,下隻渣打我會跟緊緊㗎喇🫡

繼續孤身上路,21k差不多要上高架斜路,即刻搵集團遮風擋雨,所以都 handle 到,只係落斜轉肌肉就有啲搞唔掂😅

30k 入河濱,歡迎我嘅係唔講得笑嘅大風,提醒自己唔好慢落嚟,另一面希望果道牆唔好咁快嚟。

跑到 35k 左右,不妙了,集團開始疏落,要自己食風,喺呢一段小腿肌肉開始好跳脫,兩隻小腿處於抽筋嘅邊緣😫

腳啊腳,再努力一下,捱到前面會見到黃生!我就可以攞噴噴啦

終於救星出現,不過佢好似唔記得攞噴噴出黎😂要一路陪我跑一路摷袋再好似接力棒咁遞俾我,噴完再遞返俾佢,過程相當搞笑!辛苦你跑咗啲100❣️

離開咗黃生之後身心都得到慰藉,繼續上路搵人擋風…同埋繼續同自己心靈對話…

去到 40k,黃生又再次出現,佢今次叻咗啦,見到我面容扭曲,就知道我要噴噴,識得攞定出嚟等我🤣

最後 2k,睇錶知道 PB 唔到,但都唔想放棄,加速啦呢一刻小腿就嚟料喇…喺呢 2K 我應該停咗 3、4 次黎拉,去到差不多入會場,時間無多!衝啦

終於衝過拱門,望錶…3:30:0X,我爭啲一下就暈過去😫

想喊,但抑壓咗落去…但返到酒店梳洗好自己之後,見到神隊友 Bonnie Yan 都係忍唔住爆喊咗😆

總結:
今次 42.195 裡面學到好多嘢。

人生唔會一直一帆風順,總會遇到挫折;但呢個正正係思考同學習嘅機會最重要係識得面對失敗,重新振作,累積下來嘅經驗只會令自己更加強大💪🏽

多謝跑班嘅一班義氣仔女一直支持
多謝教練余顯華幫我打咗個好好嘅底
令我死得無咁難睇
多謝黃生 support

感恩❣️感激🥹

馬拉松與人:Fiona 柏林馬拉松

我們是Gogogo Auntcleaunties + uncles,亦即叔叔與姨姨),喜歡相約一起跑步的香港中年人士。

暫別馬拉松比賽3年後,我們作出了一個瘋狂的決定,就是參加2023年柏林馬拉松。我們選擇柏林馬出於以下原因,不僅因為這是世界六大馬拉松之一;行程費用合理(與倫敦和波士頓相比);大家均有信心適應當地與香港間的6小時時差;還有最重要的就是比賽路段大部分是平路。

雖然比賽在平路上進行,然而不論以什麼速度跑畢42公里都絕對不是一件兒嬉事。由於大家平時家庭和工作忙碌,因此制定有效的練跑計劃尤其重要。有見及此,我們邀請了余顯華教練(Zero)協助我們每人設計一個訓練方案。

Zero因應我們各自的目標和能力,分析各人的練習進度,並就我們的個別需要安排每星期訓練。在合共25週的計劃期間,我們每星期都要在炎炎夏日下跑8090公里,對我們來說絕不輕鬆。每逢星期六,我們都會從早上6時開始接受各種艱苦長跑訓練。

在比賽舉行前的星期四,我們一行人已抵達柏林。在酒店卸下行裝後,便動身前往博覽會。會場人山人海,Adidas展覽區更擠得水泄不通,幸運地我們是在首天入場,因此能順利找到我們尺寸的裝備和衣著。後來才知道酒店(柏林皇宮飯店)旁邊的Adidas旗艦店亦有售賣相關產品。

馬拉松比賽當日早上天氣相當寒冷,起跑時間早上940分。有別於在日本舉行的其他馬拉松,由於這裡提供的洗手間數量並不足夠,光是輪候洗手間已花了接近一小時。從行李放置區步行到起跑區大約需時15分鐘,到達起跑區已是上午920分了。

比賽快將開始,現場氣氛亦逐漸熾熱起來。我們遇到不少香港的參賽者,包括林海峰,他非常友善,而且樂意與我們合照。過了不久,起跑進入最後倒數階段:1098…,我們都更為緊張而心跳加速。 

比賽初期一切都順利進行,直到跑了大約20公里,開始感到腸胃不適,只好停下上洗手間。大會在沿途提供足夠的洗手間,無需浪費時間排隊。在整場比賽期間,我因緊急狀況而上了3次洗手間,沿途的洗手間成為了我的救星。

大約上午1030分開始,天氣逐漸暖起來,我跑到供水站希望儘快補充水份,可是大會提供的是不能折疊的塑膠杯,因此喝水時90%的水都灑在臉上,真正喝下去的只有幾滴。

另外,大會未有提供電解質飲品!當跑到38公里時,我因為開始抽筋而必須減速,當時還抱著一絲希望能夠在3小時30分鐘目標時間內跑畢。

然而,當看見330的配速員在我身邊經過時,希望幻滅了;在看到布蘭登堡門之際,比賽只剩下最後400米,終點在望。但這400米感覺就如4000米般長!

結果,雖然我比目標時間慢了40秒,可是考慮到沿途上了3次洗手間,再加上在尾段抽筋,因此我還是對自己的成績感到滿意。

雖然已過終點線,但雀躍的心情絲毫未退。大批參賽者不約而同地坐在草地上休息。對於GoGoGo Auntcles每一位成員所付出努力,我感到無比驕傲,同時亦希望向其中一位以1小時8分鐘跑出PB,以及另一位在膝痛下仍盡力完成比賽的朋友,致上衷心祝賀。經過這次,我再一次體驗到年齡只是一個數字。

以下是柏林馬拉松之旅的一些心得:

  • 現場氣氛極佳,賽道十分理想,比賽期間無需聽音樂調息心情,建議一邊享受四周的歡呼聲,一邊努力完成比賽。 
  • 起跑位置洗手間數量不足,建議在比賽開始前預留一小時以上,提前到達起跑區。
  • 大會沒提供電解質飲料,需要自備或另行攜帶鹽片。
  • 確保自己適時補充水分,當發現自己需要補水時,便應停下來喝水。

華哥不專業鞋評 Craft Nordlite Ultra

Craft 前幾年就出咗幾對路跑 + 山跑嘅兩用鞋, 當中包括 CTM Ultra CarbonCTM Ultra 3 等等。而今年出咗對 Nordlite Ultra,同以往自家嘅跑鞋都好唔同, 直頭成對鞋款都改晒。

鞋面嘅網布比起 Ultra 3 更加軟身同透氣,比較似用咗布料而唔喺網布,比起以前嘅款式著落更加舒服。鞋舌位用膠做主料,內側加上網布,減少鞋舌同腳背磨擦;前掌位置加闊咗,俾前掌同腳趾有更加多嘅空間,對於闊掌嘅朋友係一個福音(可能Craft想開拓埋亞洲市場!?)

以往 Craft 嘅中底就用咗UD Foam(即係以前嘅EVA膠),相對比較硬身(需要接近 100 公里去 run in 對鞋)。今次嘅 Nordlite Ultra 就改用 CR Foam,就咁踩落去個吓已經覺得有啲淋,大大縮短咗 run in 嘅時間。加上用咗 Ortholite 鞋墊,大大增加彈性之外,更加透氣、防臭、防霉同吸汗。

今次鞋底嘅膠釘(lug)形狀比以前大,款式唔同咗,中底連接位置設有細孔,每次跑步落地個吓中底都會有一定嘅空間俾佢減壓。

喺乾爽嘅地下有唔錯嘅抓地性,但係濕滑嘅路上面可能就要小心啲,有機會跣。如果係短途山賽、炎熱乾爽嘅地面,甚至拎嚟 easy runlong jog,我會好建議著呢款鞋。但如果落雨天、濕嘅地面,或者對自己肌力好有信心嘅朋友,可以一試。

華哥不專業鞋評 Mizuno Wave Rebellion Pro

以前日本牌子嘅比賽鞋出名輕、薄同抓地性強。近呢幾年碳板跑鞋陸續出現,Mizuno 一開始都不為所動;去到後期發現大眾同精英嘅需求,開始努力去研發碳板鞋。
今次Mizuno將碳板鞋同石墨底融合埋一齊,希望革新到鞋外,又可以保留番原本嘅長處。Wave Rebellion Pro鞋面相當輕、平滑,係一塊冇太多縫線嘅布面,帶嚟最好包覆感;鞋面兩邊同前面都有透氣洞,目的增加鞋內散熱效果,可以維持鞋內乾爽同透氣。
足弓內外兩側同鞋頭周圍都有利用熱壓合貼片嚟增加鞋面結構強度,鞋脷就用單層式設計,利用特殊雙孔鞋帶固定環,等鞋脷唔會輕易滑動。

中底用咗兩層膠去造,上層係Enerzy Lite+,而下層就用咗Enerzy Lite,希望可以為用家帶來更淋、回彈更好嘅感覺,能夠每一步都有更好嘅腳感。兩層膠之間再夾入一塊碳纖維強化尼龍波浪片(類似三文治咁夾住),前掌位更加偷空咗,中掌位置以蜂巢狀結構強化碳板嘅硬度。
鞋底方面繼續用G3大底(即係石墨底),但同以前嘅分別,係成對鞋底都有石墨,而以前只會得腳掌位置有石墨。
鞋底設計就用咗全新SMOOTH SPEED ASSIST(簡稱SSA)技術,透過腳前掌到腳踭嘅特殊形狀,能夠支援用家更流暢利用前掌落地,減少肌腱嘅負擔。

前掌加寬增大面積用嚟提供穩定嘅觸地感,中間位置就提高雙腳落地過渡時嘅平穩性,強化向前動力;後踭嘅特殊裁切,幫助用家以自然方式前腳掌落地。
對鞋雖然係一對比賽鞋,同以前嘅好唔同,無論喺設計、鞋感、發力方法都好大改變。建議喺比賽前都要著一段時間去適應同習慣,咁先可以發揮到佢最大用處。我自己覺得有Sub3 能力嘅用家先好嘗試呢一對鞋。

華哥不專業鞋評 Asics GEL-Kayano 30

適逢今年係Kayano 30週年 – 自1993年開始主攻為偏平足或腳掌有過度外翻(內旋)問題而設計嘅一對厚慢跑鞋,而呢對鞋以足弓有足夠支撐為主 – 所以今代嚟一個華麗變身,除咗鞋型改咗之外,亦轉用新物料。Kayano 30係Asics第一對計算完整碳足跡嘅環保型跑鞋,利用環保中底物料同低碳製造,佢嘅碳排放量為10.7kg,低於其他品牌平均嘅14%,喺鞋盒同鞋墊上有明確標示碳足跡。

今代Kayano 30鞋面改用一塊工程網布,喺跑嗰陣透氣得嚟又唔會左右歪。佢腳踝位個包覆做得比較細緻同舒服,另外腳跟位有刻意加強支撐性,鞋踭內側邊高度會比外側高少少,應該係為咗加強內側嘅支撐。

中底改用FF BLAST PLUS ECO(環保概念中底)同將PureGEL放喺鞋内嘅後踭位,再利用4D GUIDANCE SYSTEM穩定系統,由寬度、長度、高度、時間4方面去改良。
寬度係加寬咗前、中、後掌,希望增加鞋底面積用嚟分散壓力。長度就係加長咗弧度引導重心轉移,減少足弓持續受力;高度係加厚咗中底,通過唔同嘅幾何設計嚟支撐內外側,希望有更好嘅緩衝。
時間就係指足弓位轉用咗更軟同更彈嘅物料(以前係用DUOMAXLITETRUSS去支撐,物料比較硬),目的係俾足弓更快回復到原位、減少足弓負擔。鞋底就用咗AHAR+膠增加耐用性。

呢對鞋喺著上去就已經覺得好柔軟同有彈性,唔似以前著慢跑鞋咁覺得好硬、好笨重。慢跑方面佢都算無可挑剔,當嘗試跑快小小,會發現佢都可以輕易控制到,同佢嘅外觀感覺有啲唔同。
當然跑到4分內/公里就會有少少吃力,始終佢定位係一對慢跑恢復同日常活動鞋,所以要求都唔可以太過份。呢對鞋我建議著嚟恢復慢跑同日常活動都好夠用。

ON釘鞋Cloudspike 余顯華率先試著

余顯華,人稱「九龍仔打躉王」,因為經常在九仔出現。但其實 Zero Running Club 在斧山道運動場或跑馬地遊樂場亦有跑步訓練班。
而剛重新入選香港隊名單的華哥,將會有什麼計劃呢?

1)將會有什麼比賽計劃?
本來想跑柏林馬拉松,但因太遲決定,所以精英選手報名資格一直未作實。Agency 回覆因為明年奧運年,很多跑手需要爭取取分數,令精英選手名額供不應求而最後放棄參賽。剛決定主攻田徑場賽事,地點應該是臺灣,順便跟老婆去旅行。

2)為什麼不轉到另一個馬拉松?
主要怕突然改整個訓練計劃,勉強練會效果不理想。香港太熱,怕會熱衰竭😂。

3)現時日常訓練會是怎樣?
多數上午練跑,晚上教跑班。間中上午都有跑班,就下午找時間在教跑班前練習。無論長課、interval 地點多數在九龍仔。
跑班除了九龍仔,就在跑馬地、沙田、斧山道都有。

4)經常看到你寫鞋評,家中有多少跑鞋?
無數過,老婆唔會怪我但外母會😂;始終係是阻了屋企地方。

5)平常訓練會多用品牌提供的跑鞋嗎?
因為跑量高,而多數著用300多里數後,功能會減弱,就會換鞋。正常計算,大概兩至三個月就會用盡一對鞋。

6)現在跟哪一位教練?
澳洲 Run Crew 的 Gary。因為之前跑黃金海岸馬拉松前,在悉尼跟跑會訓練時認識,一直跟到現在。

7)遙距教練是怎樣運作的?當中有難度嗎?
有教練在身邊當然會好一點,有問題時可以即時有答案和糾正錯誤。
遙距的話,首先一定要自律性很高,又要跟教練有一定的信任,而且亦要很清楚自己身體狀況。
Gary 現時的課表都沒有給我配速,靠自己身體感覺應該跑什麼配速。

8)相比本地教練,遙距教練有什麼好處令你選用?
香港當然有不少好教練,教出很多好運動員。
不過,我之前都有跟外國教練的經驗,比較香港教練的教學方法,會喜歡全外國模式,感覺上較適合我。
雖然外國教練未必能完全了解香港的訓練天氣或地理等因素,但經過溝通後,教練會對訓練有所修改來配合。

9)為什麼會成為香港 10,000 米代表?
今年沒想過成為港隊,該場賽事是渣馬後兩星期的,並沒有特別部署。特別是渣馬時拉傷,但全力跑之下,竟意外成為香港全年最快時間而再次成為港隊代表。

10)成為香港代表有什麼感想?
好彩。
十年前都是靠 10,000 米成為港隊,估不到十年後沒太大目標下再做一次。
其實主要是比賽當天是亞妹過大禮,要快點跑完回家,所以時間跑快了😂

11)坊間田徑釘鞋選擇很少,品牌亦少有入貨而做 seeding,比賽會如何入手?
從前多數跟釘鞋舖訂,近年就可以自己上網訂。間中會有品牌贊助,但品牌在香港的貨源都不太穩定,所以多數會自己購買。(現在 On 的網上可以直接網購)

12)會在下場比賽試著 On 的 Cloudspike 嗎?
感覺是一對好鞋,輕身及有推動力,只是尺碼要大半號才合適。
釘鞋一定要先開鞋,用來練習一段時間作適應,之後才會用作比賽。

13)下一場比賽是什麼時候?
9月香港有田徑系列賽 Round 4;台灣有兩場比賽,或日本日體大的比賽都有可能參加。
全部自費報名,先取得田總批准,再嘗試申請集訓基金。

14)最後一條,傳聞你很多時在 LSD 中吹無聊水,對跑步訓練有沒有幫肋?
其實「吹水」是很有益處啦,LSD 需時長,咁 x 辛苦,90-120 分鐘不等,吹水會令時間過的快一點,何樂而不為呢?

Zero Running Club 的學生們或九龍仔的跑友們,都對華哥的「癈up」非常受落,但其實華哥對待教練和運動員的身份都非常認真。
要不是認真,就不會香成為港隊代表吧

華哥不專業鞋評 Brooks Levitate 6

Broorks係一個有過百年歷史嘅運動品牌,1914年成立(背後大老闆係股神巴菲特),創立精神係 Run Happy,希望帶領大家可以通過跑步獲得健康同快樂,體驗不一樣嘅人生。品牌象徵住「一條無盡頭嘅路,邁進勝利嘅路」。 Levitate 用咗 “Find Your Springboard” 作為口號,希望可以幫大家搵到想要嘅嘢。

今代 Levitate 6 鞋面網布使用 100% 回收聚酯纖維、設計為魚簍織紋,有兩層設計,好有彈性,另外用咗 73.9% 回收聚酯纖維作為鞋面原材料(包埋所有鞋面副料材質)、整體碳足跡(CO2eq)減少 473g,希望 2024 年可以達到零排放。佢同想像嘅好唔同,唔好以為會硬同唔舒服,基本上完全唔一樣。

中底用咗 DNA AMP v2,入面加入咗一定份量嘅氮氣,可以減輕重量,對比上一代輕咗 10%,同時比上一代厚咗 2mm,所以唔會減重同時失去咗原有嘅保護性同彈性;前後掌相差 8mm,算喺比較差得小。

本身 Levitate 係為正常足弓同高足弓嘅朋友設計,但佢為咗扁平足嘅朋友另外推出咗 GTS 版本(用咗 GuideRails 做中底),希望唔同腳型嘅朋友都可以搵到啱腳感嘅鞋。

鞋底厚度為 2mm,用咗指向性箭頭刻紋同菱形切法做設計方向,刻紋更加用波浪紋去增加抓地性,外側就轉做光滑面,希望易於清理。

Levitate 6 一開始拎上手好似無乜料到,唔會有「嘩」一聲,練習鞋嚟講都唔應該會有呢種情況,但著上去個吓就會覺得佢同一般練習鞋唔同,又唔止係一對普通練習鞋。

因為佢除咗慢跑有反應之外,仲可以跑啲略快嘅練習,反應嚟講都唔錯。係短 Tempo 嚟講更有一流表現。如果以賽代練嚟講,呢對都可以係一對唔錯嘅選擇。不過著佢前就要試清楚size,我個人覺得可以著細半個碼。

馬拉松與人:余顯華 曼徹斯特馬拉松

跑完黃金海岸馬拉松之後,叫休息咗一排,喺呢段時間開始同教練傾嚟緊練習嘅目標同目的,以及下一隻馬拉松可以做到啲咩出嚟?

而喺呢段時間,工作上開始排山倒海咁嚟,學校、跑班、私教etc,基本上我星期一至五係可以由6:00am-1030pm都係有班,已經星期六、日盡量唔教,加埋自己嘅練習,我諗每日休息時間都唔多過8個鐘(已經包埋坐車、食飯嘅時間)。

11月就開始重新進入cycle,同一時間就不斷物色唔同嘅比賽,日本、荷蘭、英國(當然首選係日本啦,啱自己多啲吖嘛),之後見到年頭嘅比賽都報晒,所以開始留意4月嘅(有人叫我揀首爾,但太近渣馬,驚回唔到,所以睇4月係最穩陣)。而渣打本身想跑半馬,但教練話有錢喎當去跑長課,又睇吓身體點啦!所以先揀咗全馬。

之後嘅練習可以話好好,亦都可以話唔係咁好。基本上係無心情、無感覺,甚至乎有啲心緒不寧。完全唔知發生咩事,可能係跑完渣馬後輕輕拉傷咗左邊大髀後肌、比賽前一個禮拜右腳阿基里斯腱腫痛、賽前兩日頭痛反胃同嘔,咁我先至無咗咁大野心啩?

比賽前一日,自己調整番之後,感覺唔錯,都覺得有機會跑得唔錯,目標由PB暗暗改做想博一博,睇吓自己可以去到幾遠。

一開始跑個陣,見到頭車,但唔敢去咁盡,所以離開主車群大概50米左右,喺我個集團得我同另一個英國運動員,頭半程同佢開3:20,節奏係好輕鬆,過咗半程佢就上岸(佢應該下個禮拜要跑倫敦),跟住得返一個人跑。

喺唔夠5分鐘後就開始勁大風,喺22k左右再追到2個運動員,點知其中一個突然掉隊;另一個突然加速,變咗又得返自己一個。係後半程除咗大風之外,更要面對無數嘅上斜、急轉彎落斜同街磚路。喺最後4英里我計過數,keep速都可以PB,但最後1英里唔知點解跑勁耐,只可以2:28:47SB)跑完。

馬拉松好玩之處就係你準備得幾多、幾好都好,一日未跑完都唔會知結果,只有盡力而為。

Thanks Coach @garyhoward800,多謝一路支持我嘅老婆、屋企人、學生、朋友、物理治療師 @g.li_osteo,喺英國賽道上一路同我講加油嘅咁多位香港人。

跑步與人(名馬篇):Bebi、Candy & Cookie

上星期一眾 Zero Running Club 女生已經完成東京馬拉松,Gloria(3:51:08)及 Cynthia(4:36:31)各以 PB 成績完成;晴子(3:57)則以 sub4 完賽。
今個星期日,Zero Running Club 亦有 3 位女生出發到名古屋。因為一個只為女子而設的馬拉松,每一年吸引不少香港女生專誠到訪,不單是為了挑戰自己,最重要當然還有特設待遇及紀念品!

左起:Candy、Cookie、Bebi。

1. 為什麼大家會開始跑步?
Cookie 是當年見到劉心悠穿上 adidas 跑衫宣傳渣打馬拉松,覺得運動女生很吸引,便跟姊妹勾手指尾,約定一齊報渣馬(當年挑戰 10 公里)。Candy 一開始是因為想改善失眠問題而開始跑步,但愈跑愈上癮,現在要跑步先安樂。
Bebi 曾經有段時間住小西灣藍灣半島,睡房的落地玻璃窗向下望便是運動場;每天見有人散步、有人慢跑,也有跑班成群結隊快跑,有老人家有小朋友。夏天烈陽下每天風雨不改亦有一位鋼條身型的伯伯帶著漁夫帽、赤膊自轉跑 1 小時。後來有一天,決定從睡房遙望轉為親歷在其中。第一次跑連續跑了10圈,大約25分鐘,朋友都說「快」,Bebi 也覺得幾容易,便開始跑步。

2. 為什麼跑全馬?
Cookie 開始跑步後加入了一些團跑,結識很多跑友,後來聽到跑友們都說海外馬氣氛很好、天氣很適合,於是就有了想法 – 甚麼時候放大假,就看看哪個地方剛好有馬拉松賽事,順便旅行遊覽,一舉兩得。
疫情期間,Candy 感到跑步的生涯好似暫停了一樣,現在見疫情減退,覺得要「做返啲嘢」,追回失去幾年的時間,因為未知將會遇到什麼大風浪,所以活在當下一息尚存,趁有能力就便盡力而為,突破一下放低了 3 年的全馬成績。
Bebi 開始跑步無耐,已經買了一隻 GPS 手錶,然後去巴黎旅行,每天繼續跑步,有試過沿着塞納河跑,也試過跑去凡爾賽宮。跑完看見 GPS 顯示的地圖和路線,很有成功感,所以便開始想跑全馬。讓路線更長,地圖面積更廣。

3. 以前有參加過其他海外馬嗎?
3 位都不是初哥,疫情前已有一定經驗,Candy 亦已經不止一次參加名古屋馬拉松;Bebi 更用雙腳走遍不同地方,自 2018 年渣馬完成初馬後,之後跑過拉脫維亞的 Riga Marathon、澳洲黃金海岸 Gold Coast Marathon 以及 2019 年日本金澤馬拉松。

4. 為什麼會揀名古屋馬拉松?
Cookie 於 2019年時分別抽中東京馬拉松及名古屋馬拉松,並計劃連馬,可是完成東馬後元氣大傷,最後選擇放棄名馬,隨後疫情爆發,今次趁旅遊放寛再次報名,彌補上次的缺賽。
Candy 認為全女班跑馬拉松好型,而且自己當年初馬都是名馬,想在剛步入不惑之年重拾跑步初心。
Bebi 則主要是想感受一下全女子的馬拉松,當然品牌項鍊也是吸引報名原因。

5. 有什麼特別針對性的訓練嗎?
Cookie 因自身瘦削,肌肉不夠,訓練時容易受傷,希望以不受傷地訓練,余顯華教練知道她們經常會亂練習,所以 program 上不會太辛苦。
Candy 之前試過受 ITB 傷困擾,知道自己不足之處,除了恆常跟教練 program 外,亦有多做慢跑及體能加強肌力。
Bebi 已經有差不多 2 年沒有投入訓練,現在只是重新起步,主要以慢跑為主,讓肌肉重新適應跑步的感覺。

6. 華教練有甚麼出賽提示?
Cookie:「聽自己身體感覺去跑,不要時快時慢,保持均速。」
Candy:「教練成日提醒我不要跑太快,enjoy 比賽,不要亂衝。」
Bebi:「教練提醒要強化肌肉力量和剛性,不能只著重柔軟度、活動幅度而忽略肌力訓練。」

Bebi - 前公務員,已經有不少海外馬經驗,今次名馬沒特別目標,給自己時間再次發掘跑步的樂趣。

7. 會不會一齊衝線? 定各有目標?
Cookie:「我們幾個女仔訓練水平都不太一樣,各人亦有各人的目標時間,只能說『終點見』」。
Candy:「每個人都有自己目標時間,所以未必一齊衝線,但我會在終點等她們  🥰。」
Bebi:「跑步是一班人也是自己一個人的旅程。今次名古屋女子馬拉松有好多朋友一齊參加,但到最後,各人也是自己跑自己的,我沒有要結伴跑步的習慣。不過衝過終點後,仍然會期待可以見到朋友等待我的 😆。」

Candy - 自認是一個貪玩的人,再次挑戰名古屋馬拉松,想重拾初心,目標 3:30 內完成。

8. 會穿什麼跑鞋?
Cookie:「adidas adizero pro 2 或 Nike Zoom Vaporfly 4%(但 4% 可能已經太耐沒著而變硬 🤣)!」
Candy:「Nike ZoomX Vaporfly Next% 2。」
Bebi:「未有決定,但會選擇功能性與外形並重的跑鞋。」

9. 名馬以品牌頸鏈及禮服男為賣點,有什麼期待?
Cookie:「今次完全忘記了有頸鏈同禮服男,3 年沒有去旅行,難得同一班跑步同學一齊去,一齊笑教練已經好期待 🤪!」
Candy:「禮服男名單中有一位香港人呂偉強先生,大家都是香港人講廣東話同聲同氣,會更有親切感,希望到時會遇到他。」
Bebi:「品牌項鍊是吸引報名的原因!」

10. 下一個比賽或海外馬目標是?為什麼?
Cookie:「NYC Marathon(如抽中),希望 BQ 達標。」
Candy:「11 月渣打半馬,在剛剛過去的渣馬也是參加半馬組別,但因天氣關係及準備名馬,所以發揮不太理想,所以想再挑戰多次西隧 🤣。」
Bebi:「名古屋後, 4 月會去倫敦馬拉松及 9 月柏林馬拉松。我的重點比賽會放在柏林馬,因為訓練一個馬拉松最好有 6 個月時間。現在距離 9 月剛好夠練習一個完整週期。」

余顯華教練在訪問最後一樣寄語 3 位學生:加油,好好享受成段旅程。
名古屋馬拉松是為全女生打造的賽事,參加者專享禮服男迎接衝線及品牌項鏈,預祝 3 位香港女跑手在好氣氛、好天氣下將會做出佳績。
隨著生活逐步回復正常,期許大家能繼續跑下去,永遠保持對跑步的熱情。

跑步與人(東馬篇):晴子、Gloria & Cynthia

疫情前,海外馬對大部分香港跑手來說是人生必備項目,直接用自己雙腿感受世界挑戰自我。日本作為馬拉松聖地,每年於不同城市有大大小小比賽,有為奧運名額而戰的 MGC,亦有以不同食物補給作特色的。
香港人闊別 3 年的東京馬拉松將於 3 月 5 日星期日舉行,相信不少香港跑手已準備就緒,盡情享受日本馬拉松的熱情及氣氛。
Zero Running Club 亦將有 3 位女生參加,3 位皆不是全馬初哥,問及有甚麼特別針對性訓練時?都不約而同指出專心跟隨華教練的訓練計劃練習。

由左至右,Cynthia、Gloria、晴子及余顯華教練。

1. 各人的跑步年資?
晴子已有 5 年跑齡,由跟朋友參加神戶馬拉松開始跑步。Gloria 則跑了 4 年,2019年一班朋友更一齊中籤參加名古屋女子馬拉松,去年更參加了倫敦馬拉松;Cynthia 由 2017 年已開始接觸跑步,但因家庭原因斷斷續續停了一段時間,現在重拾跑步樂趣。

2. 為什麼會跑馬拉松?
晴子想在旅行期間通過跑步,以一雙腿用特別的方式體驗每一個城市;Gloria 認為馬拉松非常有挑戰性,而且自己鐘意跑步,想挑戰更長距離。而 Cynthia 亦想以馬拉松挑戰自己,並有意想再次挑戰名古屋女子馬拉松。

3. 為何會跑東京馬拉松?
東京馬拉松本身已經不易中籤,這幾年更因為疫情,有很多 defer quota ,直至今年終於可以有海外選手參與。晴子是因為幸運抽中了,所以要把握這次機會;Gloria 及 Cynthia 兩位均希望可以完成「六大馬」,達成跑者夢寐以求的甜甜圈。

4. 期望成績如何?
3 位對自己都有一定目標,晴子將會嘗試以 3 小時 45 分完成, Gloria 則希望做到 sub4,Cynthia 則定下一個較保守的目標, 4 小時 30 分內完成。

晴子 - 跑步年資約 5 年,職業是一位音樂老師,已參加了 2 次馬拉松,分別為神戶及金澤。今次東馬目標時間為 3 小時 45 分內。

5. 以前有參加過其他日本馬拉松?
日本作為香港人的「鄉下」,不少跑者皆以日本作海外馬首選,因為氣氛、Expo、補給及賽後的 shopping 絕對精彩。3 位都已經不是第一次參加日本賽事,3 人曾參加的馬拉松:
晴子: 神戶、金澤 / Gloria: 名古屋、富士山 / Cynthia: 名古屋

6. 有什麼特別針對性的訓練嗎?
3 位不約而同都指出只跟從華教練的訓練,看來華教練已經為 3 位學生度身訂造了一套專屬的訓練。

7. 會穿著那款跑鞋挑戰今次馬拉松?
每人都有自己的精選鞋款,按自己需要喜好著用:
晴子 – adidas Adios 6 / Gloria – New Balance fuelcell RC elite v2 / Cynthia – Nike ZoomX Vaporfly Next%2

Gloria - 跑步年資約 4 年,是一位眼科醫生,已經參加了 3 次馬拉松,分別是名古屋、富士山及倫敦。今次東馬目標時間 4 小時內。

8. 東京好多時都會遇上落雨或天氣比較凍,會怎樣準備?
晴子表示會戴帽及穿上手袖,同時謹記余顯華訓示。Gloria 亦會穿上手袖、手套及帶上暖包。Cynthia 則會帶上便利雨衣,預備手袖、手套及戴帽,最重要是保暖及比賽前做足熱身。
(編按:預計東京當日天氣約 6-15 度,乾爽天陰無雨,屬有利跑手發揮)

Cynthia - 由 2017 年開始跑步,一名素人,曾參加名古屋女子馬拉松。今次東馬目標時間 4 小時 30 分內。

9. 下一個比賽或海外馬目標是?為什麼?
Gloria 會繼續向六大馬進發,9 月將與一班跑友一齊出發挑戰柏林馬拉松。Cynthia 將目標放在 11 月的香港渣打馬拉松,想以 4 小時 15 分目標挑戰這條魔鬼賽道。晴子暫時未有目標,會保持訓練迎接下一場。

10. 華教練有甚麼出賽提示:
晴子:跑得開心!
Gloria:盡力,均速。
Cynthia:注重休息,盡力便好了,Enjoy the game。 

余顯華教練在訪問最後寄語 3 位學生:加油,好好享受成段旅程。
馬拉松過程雖然長,由準備至比賽中間投放了不少時間,每一個過程均為下一個比賽打造更好的基礎。放下緊張,好好享受定必做出更好成績。
3 位女跑手已於香港訓練充足,準備就緒,大家是時間出發,重新感受疫情後的海外馬。