1. 跑步年資？為什麼開始跑步？
6年幾。人到中年，每日返工放工以外就係暴飲暴食，中間有幾年放棄任何運動。直至發現身體出現問題（症狀包括大肚腩、唔見咗條頸同埋踎低起身見頭暈⋯），開始想搵返啲運動做吓。咁啱嗰陣有同事提議一齊去跑步，之後每個禮拜會有一日收工會去香港仔運動場或者跑馬地跑步。
直至2019，因為抽中芝加哥馬拉松，想跑到一個好啲嘅時間，所以上網搵跑會跑班。機緣巧合入咗runningman，正式開始恒常練跑直到依家。
2. 最喜歡的一對跑鞋是？為什麼？
Nike ZoomX Vaporfly Next%，夠輕身兼且有推動力，係我每次比賽嘅賽鞋。
3. 最喜歡的跑步用品品牌是？有哪些原因令你選上？
Nike。佢嘅product line夠闊可覆蓋到唔同訓練需要；另外顏色選擇夠多，可以買多幾對方便襯衫。
4. 有沒有喜歡的日常跑步路線？
因為住喺九龍，所以jogging都會喺九龍區。九仔、尖東、西九、大坑東都係我成日會跑嘅地方。而長課就會揀青公，可以睇風景之餘又練到斜路。
5. 你認為香港是適合跑步的城市嗎？為什麼？
以跑步路線嚟講，我覺得香港絕對係一個適合跑步嘅城市。路跑都可以有唔同嘅路線組合，就算喺市區，都可以好輕易搵到路線上山練斜路或者跑海邊睇吓風景。
香港嘅夏天雖然又熱又潮濕，不過我哋成日都話，捱得過夏天嘅練習，冬天就係收成嘅時候。
6. 喜歡一個人跑還是一班人跑步？為什麼？
練program就當然鍾意一班人一齊。衝圈可以互相推動；長課跑吓傾吓時間都會過得快好多。當大家一齊完成訓練，成件事真係好熱血。
Easy run通常會一個人跑，可以放空一下，舒緩一下平時練跑嘅壓力。
7. 有遇到過跑步低潮/傷患嗎？怎樣克服過來？
2021年底hamstring同hip開始出現問題，差唔多有三個月跑唔到，之後傷患斷斷續續持續咗大半年。
有傷患都會盡快搵物理治療師，始終佢哋有專業嘅知識可以針對處理。另外今年都會做多啲其他運動，例如游水、行山同埋瑜伽，希望可以放鬆身體之餘，仲可以強化一啲平時跑步用唔到嘅肌肉。另外而家每日都會做足伸展，希望每次練習完身體都可以盡快恢復。
8. 有沒有因為跑步而放棄了其他運動？
早幾年成班朋友有打籃球私league，不過近兩年已經放棄咗。始終跑步同打籃球係兩種截然不同嘅運動，無論身形同埋力量都唔足夠好似以前咁喺籃底衝撞。
9. 近期將會參與什麼賽事？怎樣計劃訓練？
啱啱喺渣打馬拉松跑全馬。訓練係一星期會有六日練跑：星期二主課練習，星期四long tempo，星期日長課，其他日子都係jogging為主。
10. 現時跑步的目標是什麼？
長遠目標希望全馬sub-3之外，希望可以有生之年能夠完成六大馬。
11. 可用一句說話總結跑步對你的意義嗎？
會借用林海峰上次跑完倫馬嘅一句：「容易就冇意思啦」
12. 有什麼社交媒體可以找到你？
FB: Kevin Leung
IG: kevindotcomdothk
