林海峰 – 〈全球百大型男〉主唱者，相信香港人都會覺得他是全球百大型男之一；筆者從小已有聽903軟硬節目。

筆者除了試過 phone in「軟硬」，〈廣播道Fans殺人事件〉這首歌背得琅琅上口；婚禮中起菜歌是〈經典〉，絕對是Jan 的粉絲。

Jan 一直是潮流 Icon，加上近年熱愛跑步而且成績不俗，除了潮童以外亦吸納不少運動愛好者成為 fans。在跑馬地、淺水灣練跑時，經常是一眾跑手的集郵對象。

要得知 Jan 的跑步消息一定聽《在晴朗的一天出發》，因為每次比賽後，其拍檔都會在節目中作訪問。而Google 上亦找到很多 Jan 的跑步新聞、比賽成績。不過，就是沒有一個關於跑步的專訪。

今次大膽地邀請 Jan 試著 On 的 Cloudboom Echo 3 順便做訪問，竟然一口應承，令筆者喜出望外。

1）平時很少做有關跑步嘅訪問，點解？
其實所有訪問都少做。點解？唔知呢，你覺得呢？
筆者：應該係大眾對 Jan 嘅感覺係神級，令大家覺得難以接觸吧。

2）總共跑咗幾多隻全馬？
7-8次左右。
東京兩次，大阪兩次，神戶（最後先上橋好辛苦）、倫敦、琦玉各一次，另外名古屋半馬又有跑過，係咁上下。
琦玉馬拉松係跑友金毛（楊錦鴻，已故香港精英跑手）建議跑嘅，之前都未聽過有呢個馬拉松，只聽過有足球隊。不過金毛提出話做時間好，所以就一齊報名同場跑，亦係 PB 嘅一場馬拉松。

3）初馬係邊一隻？成績？
大阪馬，4 個鐘多啲，30k 後開始抽筋。

4）將會參加哪一個馬拉松比賽？
柏林馬拉松。

5）目標會係？
唔好停就得。
唔想定太高目標，之前倫敦馬拉松預期嘅都未做到，所以今次只要順利完賽就最好喇。

6）目標會係再次 BQ 嗎？
（笑）我呢個年紀要 BQ 比後生輕易，所以唔算係目標吧！
年輕跑手們嘅 BQ 時間愈推愈快，聽到都覺得辛苦。
而且近幾年封關，BQ咗嘅都要重考，慘！

7）更長遠嘅目標會係六大馬冬甩獎牌嗎？
更長遠嘅目標係「長跑長有」。由開始跑步時已經聽有經驗嘅師兄們講呢4個字，唔受傷係最緊要嘅。
要「笑住跑，不要痛住跑」。
（筆者按：〈我與安多芬〉歌詞嘅最後一句「要跑足一佰歲」，應該就係「長跑長有」嘅意思。）

8）承上題，有過嚴重嘅傷患嗎？
筋膜炎，四頭肌拉到之類。當然會有。我答你呢啲太悶喇啩…
我會覺得真正遇到嘅傷患係累積造成，係生活習慣、坐姿、睡姿…等等，令人唔夠 balance 、發力不佳所引起嘅。

就如一架車，唔係「炒車」先叫有事，每一個細組件有問題加埋一齊，架車都會出問題。
所以要遠離傷患，應該由生活開始調整。
呢啲都係一啲師兄嘅分享，當時聽嘅時候唔太明白，跑多咗就會感受到。
試過跑馬拉松時跑到35K，左邊頸抽筋，頭部向左；39k 後為咗要拉伸，就將頭拉向右。呢樣唔會係跑步引起，應該係平時坐姿靠邊而引起，到跑馬拉松時發作。

9）有試過改跑姿嚟減低受傷機會嗎？ 有聽過 Pose Method？
有呀，Pose Method 就係愈 PK 就跑得愈貼近 Pose Method 嘅 Fall！跑步太正直會好易傷，愈 PK 愈 work。

筆者：華哥（余顯華）係 Pose Method 教練呀。
Jan : 就係因為佢夠PK！（笑）

10）由325係如何練到313 BQ？增加訓練量？定改訓練時間？
（笑） 點解經常要斟酌時間？我都唔敢講我係喺度訓練，每個人對訓練嘅定義都唔同，我只算係出汗吧！
跑界太多人「口術」，有啲快跑就話自己只係 Easy；有啲一邊 Easy 就一邊叫辛苦。

我嘅速度喺其他人眼中可能只係慢跑。

跑馬拉松嘅成績好與壞，原因唔會只有一個，係千萬個因素決定。天氣、program、休息係咪足夠、日常飲食同坐姿、筋係咪太緊…都會有影響。

另外，華哥有分享一啲訓練課表俾我參考，亦有提點下我，其他跑友有時都會俾意見。

我覺得有時都要靠自己，要睇自己嘅領悟程度。另外，若果搵到一個夾得嚟嘅跑手拍跳，令到配速、姿勢都舒服，可能反而係一個 roll 得順嘅一個方法，就好似夫妻、醫生、上司下屬嘅關係一樣。

11）現時嘅訓練（或出汗）應該會好規律，一星期嘅訓練計劃係點？
比起踢足球、游水應該係最 consistent（持久）。游水就以前就游泳池，而家就游沙灘。跑步似返長工嘅感覺，其他嘅就似打散工，打一兩個月就會想轉工。

12）除咗跑步，見你有游水踩單車，係用作交叉訓練，還是有興趣玩三項鐵人？
只係當交叉訓練，有時喺 rest day 唔想又係跑 Easy，但又想做運動，所以就用游水踩單車代替。

13）之前喺足球場撞過你踢波，有冇因跑步而少了踢波？
主要係年紀大咗，波友們各有各忙，以前負責訂場嘅都唔見人，邊有場踢波？
（筆者按：估計少踢波應該由〈男子組〉開始找到端倪。）

另外，發覺身邊踢波嘅都少跑步，跑步嘅少踢波。原因可能係力學問題：跑步係前向運動，踢波係多方向運動，所用肌肉唔同，會增加受傷機會。

曾經喺仿真草地上踢咗幾場波後，因波砵鞋底太硬，之後足底筋膜炎，停跑休養咗好幾個月。加上冇入球，有入波可能會開心啲；隊友又唔交波，波癮大減，為免影響跑步，所以少踢。

我最 update 嘅足球砵係 C 朗款，但唔係而家快要退休時著用款，係佢當fit 時著嘅款；反而跑鞋就愈嚟愈多，不停更新款式。

14）有咁多跑鞋，有冇按照唔同訓練而更換跑鞋？
我多數會按品牌活動而選擇著邊個品牌嘅跑鞋！（笑）
今天我就選擇著 On 嘅 Cloudmonster 到場。
比起換鞋，我比較想換腳同換腰。（笑）

15）對比賽鞋有冇特別要求？
你今日俾 Cloudboom Echo 3，我當然話呢對最好啦。😂

16）有著 On Cloudmonster 跑步嗎？感覺點？
有，當然有著嚟跑步，初時對外觀上嘅穿窿中底有啲卻步，感覺比較似山鞋，但穿著後非常舒適。
亦因如此，先有興趣試對比賽競速鞋。
之前喺英國路過 On 嘅專門店，面積好大，以為只是為上市而打造，估唔到原來真係做實業嘅品牌。

（筆者按：英國 On 專門店位於倫敦 Regent Street，係 On 全球三間旗艦店之一。On 亦於 2019 年紐約上市）

17）對呢對 Cloudboom Echo 3有冇認識？
我不算對跑鞋好專業，就似有啲講食主持都只會用「好食、有魚味」之類嘅簡單形容詞。

但身體係會懂得分辨別跑步時嘅感覺，之前跑 tempo 借咗華哥嗰對嚟試下，推動力不俗，整體感覺良好，所以就撮合咗今日嘅訪問。唯一不足就是楦位偏窄。

18）間中你會係IG 影一個字，再寫一啲野；又見你 post 過 「容易就冇意思」。你跑步有冇一句「座右銘」？

無啦，邊有咁多正能量呀？跑步時最多想到嘅係「想放棄」、「好辛苦呀」之類，任何運動都係 Love and hate。
正所謂「唔辛苦邊得xxx」，你放任何字入去都可以。例如「唔辛苦邊得女朋友」，跑步都算係你嘅伴侶，陪伴與理解自己更多。

（Jan 諗咗一陣後）有啦！「下次」。無論係跑出成績好唔好、傷咗再從新起跑，都要有「下次」！

後記：預備 Jan 的訪問時間是筆者在眾多訪問中最多的，主要用在網上搜尋他的不同資料，希望找到比較有趣的問題。
但過程中，Jan 主動回答的答案比筆者問的還要豐富有趣，連一直在旁的攝影師事後都說「個訪問好好聽。」

相信這就是全港最頂尖 DJ 的吸引力。

另外，Jan 對跑步的執著很值得尊敬。在拍攝相片時，因為背光問題，攝影師要求順時針在九龍仔運動場跑。但 Jan 表示這樣有違規矩，寧願多走幾步在另一位置拍攝。完成後，在跑道上逆線而行，又會細心地拉筆者離開線道。

最後，攝影師要拍 Jan 一個人的跑步照，Jan 擺出一些輕鬆得意的神情，盡顯明星功架。