20240225 大阪馬 3:14:01 PB
由 6 月手術之後到 9 月復操再到 2 月正式比賽，中間真係有嘗試俾心機去訓練，所以做唔到目標時間都真係有啲灰。賽前預自己大概 305 左右，但係今次教練莫名咁對我有信心直接 sub3，真係打咗支強心針㗎（雖然都知自己未得（所以都要好多謝佢。
比賽當日
天啊~~ 點解會落大雨㗎？明明早一日重陽光普照，點解今日會大雨到咁？
心諗唔怕，最近長課都打水戰應該習慣嘅！但係就睇少咗樣嘢 – 溫度，起跑前氣溫大概 6 度加埋落雨體感得返 1 至 2 度（舊年首爾馬 1 度起步都唔覺凍今次感覺凍到就死，第一次有棄賽嘅念頭）。
0-10km
有上次首爾馬嘅經驗，C 區上線都唔太逼人今次 B 區應該問題不大，點知一上線完全見唔到起點就心知不妙。起步頭 1k 不斷搵位置希望盡快可以離開人群，心知頭 1k 一定會慢咗但求唔好慢太多。一睇錶 4:45 心諗 okay 嘅唔怕慢慢追。直到第 3k 走返 target pace，身都開始暖返少少，去到 4k 位終於可以除低件雨褸，之後落嚟嗰幾 k 都選擇順住體感去跑，感覺都還（上面張相我重笑得出）。
11-20km
完咗 10k 對腳開始鬆返少少走咗兩三 k 見 pace 已經去到 4:00。始終唔敢太進取，去到 16k 選擇收慢返少少大概 4:10 左右，諗住頭半馬 129 內就穩陣。就喺 20k 位置見到 Joe 同 Sarah 打氣重同佢哋揮手。充心多謝兩位咁大雨都嚟打氣重要着埋橙色衫怕我哋見唔到🤣🤣。
21-30km
到咗半程睇錶 129 内，唔通今次真係有機會 305 內？！重要未覺攰，個心開心咗一下心諗今次無死喇。於是順住 target pace 跑咗 5-6k，突然噩運嚟喇…去到 26k 一個 U turn 位忽然大雨又大風。見 pace 跌咗少少心諗唔怕過雲雨好快完嘅，頂多幾 k 就無事，但係實在睇少咗天氣突然轉變嘅影響，身體開始失溫..
31-42km
唔知係唔係關失溫事，對腳都開始愈嚟愈緊。見到錶同自己嘅目標時間愈嚟愈遠都開始有啲灰。之後落嚟嗰 10k 都接近半 jog 形式捱返去，最後嗰幾 k 轉身見到大會 315 嘅 pacer 就跟住 pacer 完成埋最尾嘅路段。
完賽 3:14:01
雖然 PB 咗但係自己知今次都有做得唔好嘅地方。天氣差可能係一個原因，不過都依然有人跑得好好呀，所以唔想俾藉口自己。希望今年會做得好啲向 sub3 進發🤘🏻🤘🏻！
再一次多謝教練 @chvnwaiming 嘅指導，多謝 @joechung2314 同 @sarah.fitness.pilates 打氣同夜晚搵燒肉慶功；多謝好隊友 @jaywong5 陪我玩咗成個 trip，下次東京okay？😂
後話
Bag drop 位真係另一個噩夢嚟，落大雨搞到個公園浸咗周圍都係泥氹。未開賽就整場泥漿摔角先，大佬啊，我對 AF3 Proto 全白㗎頂…睇返啲相係咪唔覺對鞋污糟咗呢，唔係講大話真係好大雨，大雨到跑嗰陣洗乾淨咗對鞋🫠🫠。
