呢個東京馬拉松真係要寫編essay，因為練得好辛苦，好多口水，夜晚瞓唔著先好睇！
– 中咗 中咗東馬 –
好記得抽中嗰日係10月4號。10月2號跑咗個迪欣湖半馬，當時hip flexor剛傷完，仲未操得夠就要去跑半馬，仲要係挑戰組，跑得好辛苦，覺得自己係小廢廢！但抽中東馬，我就諗，唔得！3年冇跑全馬，我要做個好啲嘅成績，用21年渣半馬嘅成績計，我可能會練到330。
– 3️⃣3️⃣0️⃣ –
330對我嚟講好似唔關我事！2018年名古屋初馬 – 4:16:08 ；2019年Covid前最後一隻金澤馬 – 3:49:03，shin splin傷得好緊要。雖然成日話成績唔係最重要，過程先係，但我想知道如果我好俾心機咁練一隻馬，可以做到幾多，所以我俾自己一個目標 – 330！
– 只有 累 • 積 嘅日子 –
但事與願遺，11月中Covid 加上生活上各樣種種，我一路都練得好攰，每一課速度都跑得好勉強，有時仲跑唔哂個；每次長課都跑唔到想跑到嘅速度，係我太攰？定冇能力？就算好氣餒，我都堅持繼續加里數，1月嘅里數去到400km，which以前嘅我300km都已經覺得多！
1月尾準備peaking，好衰唔衰病咗，狀態又減2成！仲記得跑渣馬嘅同學最後一個長課係青公16k，我24k，佢哋輕鬆，我20k就爆咗！當時好灰~ 🫤到跑渣馬半馬，心態當長課，跑到時間，感覺算係幾有力，但都係冇信心，覺得42k好長！
-東京到著-
賽前一晚11點半先瞓，1點都未瞓得著，瞓下醒下應該瞓得3、4個鐘。嗰日天氣係一大助攻，前一日有太陽驚要曬住跑，結果大部分時間都陰天，少少風，只係起步有啲凍，做時間一流！
-上線-
起步都冇特登企前，只諗住做好chip time時間就夠。一開跑，密集程度同渣馬差唔多，我隻錶個gps唔準，要一路計住時間距離，又要keep住pacing唔好加快，所以好專心跑。去到14k左右覺得右腳第二隻腳趾怪怪哋，有夾住嘅感覺；個鞋帶位好唔舒服，所以一路都留意住就返個跑姿，又要計住時間同避人，個腦好occupied。去到一半感覺都算幾輕鬆，但時間只係啱啱好做330。就到29k嘅時候，繼續keep住，直至去到32-34k感覺仲有力，決定加速追返啲時間，最後3k嘅時候繼續衝，望見我隔離嗰啲人開始冇力，我仲可以一路加速衝返終點，爽！
-衝線-
感覺好surreal！點解會跑到？點解可以keep住有力？仲要後半可以加速？我真係做到！我真係做到！內心好激動！想喊！好想快啲見到男朋友！我行咗半個幾鐘都揾唔到佢，好凍好攰行到好忟，我哋見面第一句應該係：我行咗好x耐呀~
呢次比賽，真係好俾心機練，對自己有要求，所以算係練得最辛苦嘅一次。不過最辛苦嘅練習，換嚟一次無傷無痛跑得最舒服嘅一次 – 值得！
