1. 跑步年資？為什麼開始跑步？
2012年開始跑步，咁之前係做攝影師嘅，專係影啲戶外嘅運動相，一次機緣巧合之下，就去到一個跑沙漠嘅比賽影相，咁我望到啲跑手可以孭住個背囊、喺沙漠咁熱嘅地方跑overnight，仲有咁精神咁，嗰刻心諗，我都好想好似佢哋咁型。咁所返香港之後，我就放低個相機，開始練習跑步 喇！
2. 選擇跑鞋的第一個條件是甚麼？
第一個條件係要闊要舒服。因為我腳型較闊，另一樣係我體型比較重，比起一般精英跑手重，所以會揀啲避震好啲嘅，唔會揀啲薄底嘅比賽鞋。
3. 喜歡跑山還是路跑？原因？
跑山同路跑都咁鍾意。跑山可以享受風景，同埋挑戰性好大；路跑就可以俾我有機會去explore唔同嘅城市，睇到唔同嘅風景，好似我而家做緊嘅，去到唔同國家做跑步嘅挑戰。所以我就兩樣都咁鍾意。
4. 經歷過最長距離的山跑賽事是？
暫時經歷最長嘅山賽係香港四徑挑戰，全長298公里，跑晒香港4條主要嘅山徑，好難忘！因為嗰時我啱啱跑完夏威夷（圍繞Kona大島跑），亦可以將學到嘅嘢全部攞返出嚟應用；同時一路跑時都係抱持住一個享受嘅心態，而唔係挑戰嘅心態，所以對我哋嚟講，嗰次經驗係輕鬆同享受。
5. 為甚麼你不時會想做一些極具挑戰性，或之前未有人做過的跑步活動？
我想去挑戰嘅原因，就係想認識自己。
因為我覺得人嘅潛能係無限嘅，每次我都想做啲未有人做過，人哋諗到唔敢做，又或者唔夠膽做嘅，冇人試過，又冇人知嘅，我咪第一個做囉！就係帶住冒險嘅精神去嘗試呢啲挑戰。
6. 香港哪一段山跑路線覺得最具挑戰性？
我諗係八仙嶺路段，沿途補給少，攀升亦多，如果大家想要挑戰嘅話，就一定要小心，由其而家咁熱嘅天氣！
未完㗎！跑步與人：黃俊橋（下）
