天氣預測今天是間中有驟雨，中午把握傾盆大雨的罅隙，相約友人由大埔富善村跑去大尾篤。星期二天陰灰暗的大尾篤人丁單薄，跑遊的角度十分享受，生意的狀況卻不好受。跑到海邊，暴雨後的海面回歸平靜，一群黃色的鴨仔…船有序排列。烏雲給微弱的陽光穿透，那份半灰不黑的氛圍帶著蓋天氣勢，後來才知是山雨欲來的前奏。
跑過8公里，為的是到訪位於龍尾村的「Brian Café」。
簡單的Americano，先看咖啡的顏色，略帶油份的質感，色相誘人。碰近深呼吸，濃郁的咖啡香氣，是我偏愛的果仁風味。淺嚐一口，咖啡由舌尖慢流到口腔，好飲！店內更有一款得獎的老撾咖啡豆，可供選購。
點了卡邦尼意粉，芝士奶油味有豐盈口感，煙肉鹹香帶出美味，意粉硬度適中，好吃！我想起昨天在赤柱海旁某餐廳的同一款意粉，芝士蛋黃醬不夠味，煙肉太少太淡不夠香，今天為卡邦尼大平返。帶著滿足喜悅，回家繼續工作，心想這店可以再來「一趟」﹗
每次旅行除咗觀光、食嘢、跑步、行山…當然唔少得就係啡遊！今次4日4夜，真正啡遊嘅時間其實得半日！
頭兩日比較忙，都係飲7仔啡解決，而事實上日本7仔啡都唔差，所以我先會一飲再飲。聽講香港7仔即磨都唔差的～不過日本7仔飲杯啡只係120yen …才$6，真係平得太過份。
第二日去咗下吉田，天氣凍凍地，見到杯雪糕嘅同時，有間大啡店係隔離，仲寫住Specialty Coffee，無理由唔試啦，兩日無飲手沖，點都會好飲嘅…應該。
於是就行入去睇下有咩豆揀，唔熟嘅環境一般都會揀Ethiopia，簡單，易入口，衰極有個譜，揀完豆仲可以揀隻杯添，我就揀隻貓貓杯襯返我隻Kuma！手沖送上，比我想像中好，花香雖然唔算太出眾不過沖出來好甜，起碼俾我止止渴。
第三日行完目黑川，知道附近唔少啡店，就求其揀咗間小店，基本上無店內坐位，只有店外小櫈，繼續點Style Coffee Ethiopia，今次明顯好花香，有佛手柑，好好飲！啡師都會問下你邊度嚟，有冇睇櫻花之類，閒談幾句，享受完杯咖啡就準備下一站。
Fuglen新店，今次Cloud叔叔比指令叫我去了解下軍情，由於新店以日本Omakase形式招待客人，所以必須提前預約時間，整個體驗約一個鐘，提供兩杯唔同沖法啡精品啡，一杯係店內當天選定兩款豆其一，另一杯係house blend，用挪威沖法去沖煮，還有指定小點心，唔會飲到餓，過程啡師跟客人好多互動，介紹兩款豆嘅分別，風味，過程中亦會介紹法器。
工具我都略知一二，對於會露營嘅我，挪威沖法用嘅露營水煲、戶外爐都唔陌生，最吸睛當然係我眼前價值超多一萬蚊嘅手磨同木長枱。有飲開Fuglen嘅豆對呢兩杯咖啡出嚟嘅風味唔會surprise，不過佢用咗快紙過濾，酸度相對明顯，後段飲得舒服！而挪威沖法其實就係方便喺野外較簡單嘅沖法，雖然佢直接倒粉攪拌浸泡，但最後用濾紙過濾，所以乾淨程度跟手沖無異，風味比較balance 順喉！最後啡師仲問我係咪啡師？唔通我知得太多…（講笑）！
整個體驗很不錯，感覺回到最初喺香港飲手沖啡一樣。自己好鍾意坐bar枱，一來可以跟啡師交流，又可以觀察唔同啡師嘅沖煮方式及細節，呢個係最直接學習方法。而且店內以舊屋簡約裝修保留日式風格，感覺放鬆享受，有機會記得去體驗。
見時間尚可，順便去埋Leaves Coffee。其實啡店收5點，到達時4點，估唔到仲有咁多人而且要排隊，大概等咗10分鐘就可以入坐，二話不說揀咗杯貴東西 – Panama Deborah Geisha！
平時飲開Accro都會識，店內算多人飲手沖，不過無論我喺Accro現場飲又或者買豆自己沖嘅比較之下，Leaves呢杯明顯無喺香港咁出色，不過都買咗三包豆返香港～
原本想係最後一日去Glitch飲多杯兼買豆返嚟，點知10點前去到嘅我，驚見長長人龍，詢問後連淨係買豆都要排…心諗有冇咁多人飲手沖呀？最後打消念頭，去食早餐，唯有帶住一點點唔完美留待下一次。
旅行對我嚟講遊歷過程比跑景點重要，好享受萬無目的咁閒逛，所以每日行超過3萬幾步係基本，但當中有一個小習慣，就係有目的咁啡遊！
如果計劃好地方，一定會係附近尋找心水啡店歎啡，順便買豆回家兼做手信！去跑神戶馬時，當然唔會放過買豆買爆喼嘅機會啦！
來到神戶第二日朝早，就搵間酒店附近嘅傳統喫茶店「元町喫茶店」歎返個日本人嘅西式早餐！行到門口附近已見有幾個日本人排隊等開門，相反喺香港成日要等位嘅Komeda’s就無人排…就知咩料！
入坐後叫咗pancake加black coffee，飲開咖啡嘅都知日本咖啡文化長久，而且以深烘碳燒而聞名，不過近年北歐淺烘焙大行其道，日本亦有不少新派咖啡店出現～ 元町呢杯甘醇唔會澀，易入口，配上帶甜嘅panacke就啱啱好！
食完早餐，繼續發掘第二間啡店「Taoca Coffee」。
啡店位置喺小巷入面，門口感覺似去咗法國風情小店一樣，門口對正bar 枱，已經擺放咗十款咖啡俾客人試飲，成個experience真係幾唔錯，當然亦叫咗杯啡同買豆做手信，日本人著重包裝，令人見到樣樣都好想買返去，佢哋仲有自家麵包，又放上沖煮咖啡嘅recipe，好細心！
第二日自由活動，行去隔離站 – 三宮，同行跑友介紹有間水準唔錯嘅Beyond coffee roaster ，就好似香港啡人前，都係附近住宅熟客多，睇住佢磨豆、煲水、手沖…成個過程都好治癒～
回到大阪，大量熟悉啡店！首選去咗Glitch。
平時喺香港見到豆都知係貴東西，今日終於親臨舖頭，真係異常興奮，入到去見到有超過十幾款豆俾你揀，令我雙眼發光，隨手點咗兩款completition lot !
歎完兩杯手沖，買咗大堆豆，一朝早就係Glitch放低咗3萬yen…開心仔！
隨後遊京都，去埋港人熟悉嘅啡店。
京都：Walden Woods、Kurasu（Kurasu最近係香港都開新店），再趕返大阪喺佢收舖前去埋Mel 買豆！超級大滿足！
另一個最surprise 就係7仔啡，咁啱做緊藍山限定，見朋友飲完大讚即刻去試，果然好好飲，有藍山香醇，餘韻長，只賣250円一杯！好飲過機場藍樽！$40 vs & $13 你點揀？今次旅程起碼飲咗3-4杯7仔藍山！
神戶馬行程7日，4日神戶2日大阪及京都，一共買咗13包豆，飲咗唔知幾多杯啡～
適逢日元跌至五算，變成低消費國家，而家唔爆飲爆食爆買等幾時？？
我非常喜歡坪洲呢個地方，貪佢人少又無車，每隔幾年都會入嚟行下！
疫情後再嚟到，發現多咗好多市區搬入嚟嘅人，小店多咗，啡店都多咗，不過地方細細，仍然感覺到佢地鄰里關係仍然保持到，只係島上豪宅別墅多咗，老外多咗，感覺有啲似愉景灣～
坪洲環島大約6公里，有一個95米嘅手指山，沿途亦經過家樂徑、海岸線，可以享受島上不同風貌！市中心細細，懷舊餐廳冰室不少，各有風味，不過大部份由原居民經營，好多都做夠就收舖，甚至4點已關門！所以想食盡當地美食就要plan plan行程時間！
作為啡友嘅我，必定會去搵「騎住鳳凰沖咖啡」啡師所沖嘅「靈丹妙藥」！出面啡店間唔中會見到佢哋嘅豆，今次終於嚟搵烘焙師沖返轉，一邊撚啡一邊同啡師吹水，順便八下島上有咩好野食😃！
然後就嚟到啡師推介嘅「三姊妹」店（ Island Table Grocer Cafe），叫咗佢哋必食嘅Tuna牛角包、Pizza、肉卷…點知3樣都好出色，非常好食！
見到架上放咗啲意大利食品，鍾意睇食材嘅我當然要望吓….點知一睇…嘩！價錢非常親民，見到好多小餅乾好吸引，忍唔住買咗幾包做手信！而且三姊妹好nice，同我哋有講有笑，仲收順啲，相信應該係三姊妹有人嫁咗個意大利佬，再係島上經營餐廳！我個人十分推介🙂。
環島完成了，有山又有沙灘，有古蹟亦有古廟，島上美食有本地、國際、日本…仲有啡師烘焙師，充滿藝術氣息嘅秘密花園，懷舊復古古物店。
估唔到呢幾年坪洲變咗咁多！希望呢度唔會過份地發展，繼續保持原島風貌！
Island Table Grocer Cafe
地址：坪洲坪洲永興街9C號地舖
講開跑馬地，繼續介紹埋另一間位置超方便嘅coffee shop – NOOT，相信大部分跑友經黃泥涌峽道入馬場時都會經過，門口嘅幾個座位，望落係幾chill幾舒服。
講吓杯咖啡先，order嘅時候佢地會問客人要nutty定fruity？Nutty嘅係Brazil嘅yellow bourbon + yellow catuai，味帶milk chocolate / toffee / hazelnut 。Fruity嘅係Colombia + Ethiopia + Honduras，味帶citrus / grapefruit /cocoa。
門口嘅檯面上面都放住餐廳menu，好聰明地放咗food menu喺第一版，方便入座前睇下有冇嘢啱食，salad / pancakes / all day breakfast / bakery / pasta 都有。入到counter order咖啡先發現仲有today’s special，一款sourdough、一款pasta、一款mashed potatoes，好適合跑完步醫肚。
店面唔算細，大概有10張檯，座位間亦唔算迫夾，門口有4個outdoor座位。落order時店員會有一個座位表細心問你坐邊，方便serve咖啡同食品，而門口座位只會坐兩檯客，唔會坐得太迫。
☕️ Caffe latte w/ Oat Milk $47
評分：
☕️ Coffee ⭐️⭐️⭐️⭐️
🌿 Environment ⭐️⭐️⭐️⭐️⭐️
💰 Price ⭐️⭐️⭐️⭐️
📍 銅鑼灣黃泥涌道149號地舖
🏃🏽♀️ 由NOOT步行2分鐘好快到跑馬地馬場黃泥涌道入口
跑馬地馬場相信係好多跑友最常去嘅一個「遊樂場」，其實馬場位置有少少「吊腳」，但勝在有個1.4km嘅大圈，無論easy run / tempo run / interval，喺呢度跑都會覺得冇咁辛苦。跑步前如果有少少肚餓又唔想食嘢，可以選擇飲杯咖啡，但最近馬場嘅Times Square（A出口）附近嘅coffee shop都比較多人，呢一間就少人好多。
Lee Garden One嘅Cupping Room ，menu上面選擇唔少，除左一般咖啡外，亦有hojicha latte / chai latte。最特別嘅當然就係Coco Chanel，寫住係matcha/coconut/milk/espresso ，三個不同層次，以matcha latte做底，加上椰香syrup，再撞杯espresso落去，椰香味重，但又唔會搶咗抹茶味，非常特別。不過又椰香又syrup，應該係肥仔嘢嚟。飲完真係要落力啲跑喇！
食物方面，有pizza / pasta / salad / all day breakfast，平時lunchtime都好full㗎！
加分位仲有呢度嘅環境，座位多而闊落，加上窗外光線令空間感十足，以前係樓上返工，朝早買咖啡都好想攞埋部laptop落嚟chill吓！
☕️ Oat Milk Mocha $50
評分：
☕️ Coffee ⭐️⭐️⭐️⭐️
🥯 Food ⭐️⭐️⭐️⭐️
🌿 Environment ⭐️⭐️⭐️⭐️
💰 Price ⭐️⭐️⭐️⭐️
📍 銅鑼灣希慎道33號利園一期3樓306號舖
🏃🏽♀️由Cupping Room步行至跑馬地馬場黃泥涌道入口大概7分鐘
上次介紹過堅尼地城嘅%Arabica，其實九龍區亦有一間好方便到跑友們跑步加歎啡嘅分店。
講緊嘅係K11 Musea嘅%Arabica，分店位於商場外面海邊嘅正方形盒子，以外賣takeaway為主，無座位提供。不過盒子隔離有一堆雲石櫈，高矮剛剛好可當作檯櫈，又或者沿住海邊行，都一定會搵到位坐。對住個無敵海景歎咖啡真係好寫意，亦可以當作跑完步俾自己嘅獎勵。
喺%Arabica買咖啡，職員會問你要 %Arabica Blend定Single Origin。
%Arabica Blend係由4種咖啡豆混合深炒而成，味道Nutty得嚟帶smokey。至於由邊4種豆混合呢？店員就話由於商業理由，不便透露。鍾意呢種口味嘅話，店內都有發售% Arabica Blend咖啡豆，當然亦有Ethiopia、Colombia等不同口味嘅咖啡豆以供選購。每杯熱奶啡都會好有心機咁拉花，客人攞咖啡嘅時候會先睇到拉花，再自助冚返個膠蓋。連鎖店嚟講算係用心。
☕️ Cappuccino (w/ Oat Milk) $46
評分：
☕️ Coffee ⭐️⭐️⭐️⭐️
🌿 Environment ⭐️⭐️⭐️⭐️⭐️
💰 Price ⭐️⭐️⭐️⭐️
📍 尖沙咀梳士巴利道18號Victoria Dockside K11 Musea地下K06號舖
🏃🏽♀️ 跑友可以由尖沙咀碼頭跑至紅磡海逸豪園對出嘅海濱公園，大概3公里，再跑返%Arabica，全程大概5.5公里。
近年愈來愈多小型咖啡店誕生，店主通常都係咖啡愛好者，買杯咖啡都可以同佢哋交流吓傾吓計，大家不知不覺少咗幫襯連鎖咖啡店，主要係因為對咖啡嘅認識愈多，愈知道自己鍾意邊一類型咖啡，會發覺連鎖店選擇較少。
話雖如此，都仲有幾間唔錯嘅連鎖咖啡店。
%Arabica 為全世界發展最快嘅精品咖啡品牌，2014 年創辦人 Kenneth Shoji 喺京都創立旗艦店，品牌於 2017 年登陸香港，由當時嘅兩間分店，到現時發展到10間分店。
當中筆者最鍾意去嘅就有堅尼地城，鄰近海濱長廊，望住個海景歎咖啡，嗰種寧靜係香港少有。當然亦可以沿海濱長廊跑個步，以%Arabica為終點，獎勵吓自己。
堅尼地城分店分為兩層，以白色為主加上落地玻璃，地下室內室外都有長櫈，樓上仲有一排海景座位。
堅尼地城 %Arabica 仲有 % Soft Cram 咖啡味軟雪糕提供，唔係間間都有㗎！適合黃昏跑又驚飲咖啡會瞓唔著嘅朋友。
店內外坐滿嘅話，亦可以「To Go」，行過對面馬路嘅海邊歎。但就要小心睇車。
% Soft Cream（4oz）$30
評分：
🍦 Coffee ⭐️⭐️⭐️⭐️
🌿 Environment ⭐️⭐️⭐️⭐️⭐️
💰 Price ⭐️⭐️⭐️⭐️
📍 西環堅尼地城爹核士街1號裕福大廈地下G04號舖
🏃🏽♀️ 跑友如果由灣仔碼頭出發，跑至卑路乍街海濱長廊，大概5-6公里。卑路乍灣海濱向堅尼地城海邊邊向步行至%Arabica約5分鐘
疫情關係，之前冇得去旅行，香港人多咗發掘本地景點，長洲絕對係係數一數二最多人去嘅離島，出名嘅當然係街頭小食，跑友應該都有聽過「長洲綑邊跑」，全長大概12公里，好多跑步Blog都有介紹。島上面亦不難發現多咗咖啡店，島中坊研係最多人推介嘅一間。
咖啡 menu 都係大路嘅 Espresso / Americano / Latte / Cappuccino / Mocha 。點咗一杯 Oat Milk Cappuccino，正常水準，不過不失。Menu 上面有一杯 Espresso Tonic，寫明用本地品牌嘅 Tonic 調配，近年愈來愈多咖啡店利用 Espresso 同 Tonic 製作特飲，鍾意 Tonic 嘅話可以試下。
勝在 menu 夠多嘢揀，飲杯咖啡又得、加件 cake/三文治/croissant 輕食、all day breakfast、午市便當、甜品拼盤咩都有。飲品除咗咖啡，仲有自家製糖漬梳打、茶類飲品、雪糕特飲。一間細細嘅咖啡店嚟講，選擇多到有啲誇張，一定有嘢啱食。只不過入到長洲，究竟係食個 all day breakfast 定留肚掃街好呢？
環境絕對一流，室內有4-5張長檯，室外就有5-6張檯。聽聞唔單只週末，好多時平日都排晒長龍，咁啱上次係星期五去，12點前到達，室內滿座，一向鍾意坐outdoor，天氣涼涼哋、靜靜哋，飲杯咖啡都坐咗個幾鐘，市區難求嘅清靜。
☕️ Cappuccino（w/ Oat Milk）$46
評分：
☕️ Coffee ⭐️⭐️⭐️⭐️
🌿 Environment ⭐️⭐️⭐️⭐️⭐️
💰 Price ⭐️⭐️⭐️⭐️
📍 長洲中學路16號地下
🏃🏽♀️ 長洲綑邊跑以碼頭為終點的話，步行6分鐘到達
好多跑者都會有跑步前或跑步後飲咖啡嘅習慣。
咖啡因可以幫助提神，奶啡中嘅奶/豆奶亦可以為身體提供蛋白質，兩樣都有助提升跑步表現，跑步後補充蛋白質亦有助肌肉修復。
喺跑馬地跑完步前後想飲杯嘢，我就會去呢間巷仔角落咖啡店 – Artista Perfetto。
House blend嘅Cappuccino / Mocha 味道比較 balance，如果鍾意 Americano 而prefer nutty啲，同店員講聲就可以，但個人認為 nutty 嗰種豆仍然太酸。Menu上面亦有 S.O.E.，可以因應個人喜好選擇 Kenya / Ethiopia 咖啡豆。
偶然一次試飲咗 menu 上面嘅 Cascara Sparkle，係咖啡豆果肉同咖啡果實外皮做成嘅signature drink，因為咖啡果實外皮長期與果肉相連，晒乾後仍然保有部分咖啡果實香味，以外皮作基調浸泡出獨有嘅梅子、山渣同桂圓酸甜味，配合青檸與 tonic water，酸甜似果茶，味道相當清新。
店面唔算大，兩張 free seating bench，風格清新，店外面亦有一張 bench，冬天黃昏喺後街坐住長木凳都會俾到一種日本歎啡嘅感覺。加上鄰近 Times Square，算係鬧市中尋找到一點寧靜。值得一提嘅係，嚟呢度飲咖啡嘅都係享受寧靜環境嘅 coffee lovers，所以 free seating 之中大家都會 respect 彼此嘅空間，絕對唔會有迫嘅感覺。
☕️ Iced Americano (Nutty) $40
評分：
☕️Coffee ⭐️⭐️⭐️⭐️
🌿Environment ⭐️⭐️⭐️⭐️
💰Price ⭐️⭐️⭐️⭐️
📍銅鑼灣霎西街3A號地下2號舖
🏃🏽♀️步行8分鐘到達跑馬地遊樂場
咖啡，係好多人生活嘅必需品，有人鍾意佢嘅香味；有人需要當中嘅咖啡因。跑步，亦係好多人生活中嘅一部分，有人為挑戰自己；有人為跑步時可以有me time；有人為減肥。兩樣都鍾意嘅人有好多，包括我自己。
由細鍾意飲咖啡，舊年終於考咗咖啡師牌，夢想係擁有一間咖啡花店；兩年幾前開始鍾意咗跑步，雖然係一個slow runner。得意嘅地方係兩樣嘢都驅使到我周圍去，周圍去搵running track，周圍去飲咖啡，最理想當然係搵到一間附近有running track嘅咖啡店。
第一篇想介紹嘅係 Lungo
曾經係每個星期2-3次嘅早餐地方，喺九龍灣返工，早餐如果可以安靜飲杯有質素嘅咖啡，加一件bagel，絕對可以喺開始工作前幫自己打打氣。而且鄰近九龍灣運動場、兒童醫院海濱同啟德空中花園，想練跑前後飲杯咖啡亦非常方便。
Bagel口味亦有不同選擇：Smoked Salmon / Chicken w/ Wasabi Mayo / Ham & Cheese / Avocado ，每次都即叫即造。外面脆，咬落口感煙韌，每款都會加上生菜，而且非常足料。想簡單啲嘅亦有plain / blueberry / all-in-one 芝麻洋蔥味提供。
要留意嘅係店面細，座位有限而且比較迫夾，多人排隊嘅時候等侯嘅位置唔多，有時可能要喺店外面等，weekdays早餐/tea time或者跑步前後飲杯咖啡都冇問題，如果想同閨蜜打卡傾心事就未必係理想嘅選擇。
☕️ Cappuccino (w/ Oat Milk) $46
🥯 Smoked Salmon & Onion Bagel $54
☕️ + 🥯 Set menu $82 includes a $35 coffee
評分：
☕️Coffee ⭐️⭐️⭐️⭐️
🥯Food ⭐️⭐️⭐️⭐️
🌿Environment ⭐️⭐️⭐️
💰Price ⭐️⭐️⭐️⭐️
📍九龍灣宏冠道6號鴻力工業中心B座地下B3B號舖
🏃🏽♀️步行6分鐘到達九龍灣運動場，及附近嘅兒童醫院海濱及啟德空中花園亦可供跑步。
