2022年11月決定從新踏上馬拉松訓練，原因係想尋回跑步嘅初心。

疫情導致渣打馬拉松未能舉行，但當田總話可以再次舉辦，我就好想跑隻全馬，俾返啲目標自己，可惜田總放棄咗因疫情而冇任何比賽嘅我。因此決定出去跑 – 愛丁堡馬拉松。

11月找了擅長低心率訓練嘅長跑教練來為我設定全馬program，以往用開傳統訓練方法練跑，一開始好難用慢到好似行嘅跑法去控制心率，不過教練嘅一句話：「唔係你唔識，只係你唔去控制」，就點醒咗我要學習新事物，應該洗走你之前嘅認知，從新去認識，好似當初飲精品咖啡一樣！

5月出發，成個trip 20日，除咗喺倫敦嘅6日比較行程緊密，往後Birmingham、York，臨時加插Leeds再入Edinburgh嘅行程都相對悠閑，始終唔想令自己太攰去比賽。雖然身體未見任何異樣，但由於3年無跑過馬，一直未敢定下太進取嘅目標，加上比賽係15日行程後嘅尾站，故今次愛丁堡馬拉松以完賽為目標！

愛丁堡其實好靚，有山又有威士忌，嚟到舊城有一刻我問自己點解要嚟跑馬拉松？

明明可以去高地，去參觀威士忌酒廠，去行山….比賽前兩日，我帶住隻唔算拗得好嚴重嘅腳，最終行咗上去Arthur’s Seat，條山路唔難行，得27X米高，沿途景色當然靚，暴力藍天再配上綠草如茵及黃色小花，強烈嘅顏色對比好似賣電視機廣告咁鮮艷，作為一個會行山嘅旅客，好難忍腳唔行！上到頂係值回票價！嗰日仲係selfie得最多。

比賽日，早上10點開跑，由apartment行去起點時沿途已經見到半馬進行中，見到跑手跑過我心情無比興奮！好快就輪到自己。

由於比賽前出現無數狀況，所以我當比賽係超長課去跑。鳴槍起步一刻簡直忍唔住大叫，非常雀躍咁起跑，頭8K都係落斜好開心，但不忘教練提點心率要控制喺158以下，如是者跑到16、17K身體開始有啲唔舒服，出現輕微頭暈，我心諗點解會頭暈…好驚影響比賽，所以即刻放慢令自己唞順先繼續。

去到18K 開始覺得攰…嗰一刻我就知想做Sub4係無咩可能，因為連20K tempo嘅效果都做唔到，於是我調整心態盡力去完成。

講返條賽道，最初睇高度圖頭段落斜，中後段都係平路為主，以為好好跑，但跑落原來除咗頭段落斜會開心外，中段係會令我好易拗柴嘅石仔路，呢段石仔路我非常小心去應付，因為如果再大拗就一定無法完成。時間去到中午，天色非常明朗，連氣溫都上升到20度以上，加上沿海邊跑，其實係幾曬幾熱，不過總比香港又濕又焗好，之後睇返數據原來去到29度高溫，真係估唔到同埋開始肚餓…

跑到28K 跑入一個舊莊園Gosford House範圍，裡面竟然要跑2K沙地….呢段沙地都用咗我好多力，又熱又曬又石仔路又有沙地…我再次問自己「點解要跑全馬？」「邊L個話要報全馬？」更不得不佩服外國人跑馬嘅能力，真心比我高好多。

係頭段當我用緊4分尾披跑落斜嘅同時，佢哋係可以輕鬆交談，而且係兩星期行程中，我要搵唔同地點繼續練習tempo同長課，無論跑街定跑公園，歐洲路況都唔理想，90%路面唔平，公園要避人避狗避單車，有時仲有隧道要低頭跑，但佢哋普遍嘅速度都唔慢，可想而知外國人跑步嘅穩定性係長時間訓練出嚟，比起跑開靚路嘅我真係高好多班！

淨返12K我決定用enjoy心態去完成，全程都有當地居民支持，佢哋真係睇你號碼布叫你名大叫「Car, keep going!」「Car, amazing!」去為你加油，聽到係好鼓舞好窩心！

最後以4:17完成，雖然時間唔理想，但完到賽算執到！過咗終點拎過完成牌我就開始搵大會巴士，行到中途先驚覺要行25分鐘先有大會巴士，個刻心情簡直崩潰！一路行一路爆粗….要知道雙腿「已經不是我的」，原來跑完隻馬後嘅25分鐘先最痛苦，龜速行走25公鐘，終於見到巴士，平時只會坐上層嘅我，今次老虎蟹都坐樓下！！！

呢42公里嘅心路歷程，大起大跌，有天使亦有魔鬼，最後都係靠意志力去戰勝！愛丁堡馬拉松唔係咩大賽，參加人數7千幾人，賽道好地道，途經嘅地方跑過相信一定唔會再嚟，但正正因為夠地道，先睇到當地人溫情嘅一面。

今次旅跑我好enjoy，有旅行、有啡撚、有朋友、有山行、有馬跑、有柴拗、有劣食亦有美食！愛丁堡馬拉松雖然條路比我想像中難跑，天氣又熱，但賺咗一個體驗，暫時喺日本同香港都俾唔到我嘅一個memorable旅跑體驗！

大部份人都比較現實，去搵有qualified嘅比賽，或者要每槍PB，但當你可以放低呢啲包袱，好好享受一場馬拉松，愛丁堡係唔錯嘅選擇，如夾到日子，跑完馬繼續行程，可以explore嘅嘢會更多，例如高地行山、去北部威士忌廠飲幾杯，令旅程更精彩！