07 11 月
INTERVIEW

跑步與人：Joey

1. 跑步年資？為什麼開始跑步？
從接觸跑步起計，是 8 年；真正有系統訓練的話，是 3 年。中四開始跟學校田徑訓練，不過當時兼顧學業，同時準備中六 DSE，所以疏於練習。後來升上大學跟校隊訓練，當時卻又不想專注跑步，一直對練跑都不上心。直至投身社會大學，才開始真正堅持每星期練習。

2. 有沒有跟跑會或教練跑？選擇原因？
RMAC 文少杰教練。原本大學時期只依賴校隊訓練，year 4 時經校隊教練介紹，加入了文少成立的 WeMan。跟文少練習後，成績有所提升，期望之後可以繼續進步，一起努力！😆

3. 日常練習跑步地點或路線？原因？
跑 program（intervals、tempo etc..）的話會到運動場，jogging 的話喜歡跑街，例如馬鞍山海濱長廊、大埔吐露港、沙田城門河，可以放鬆心情看看風景。

4. 最喜歡的跑步用品品牌？最喜歡一對跑鞋？
Adidas 為我提供了訓練及比賽所需的裝備，跑鞋 adios Pro 3 更是助我在各項路賽中有所發揮。

5. 有沒有跑步偶像？原因？
Sifan Hassan，短至 800m 長至馬拉松都有很好的成績。

6. 最深刻的一場賽事？原因？
2023 渣打馬拉松 10km，賽前幾天突然感染了 Covid-19，以為不能出賽了。當時很失落，因為努力準備了很久。白天上一整天班，下班練跑，回家還要溫習或寫畢業論文，然後第二天又重複著。稱不上很辛苦，但確實投放了不少心機準備這場比賽，最後跑不到的話，十分可惜。

幸好是第二次感染，身體復原得比想像中快，4 天便康復了，剛剛好在比賽前一天轉為陰性，身體感覺也十分良好，所以決定出賽。雖然康復，但始終令狀態大打折扣，也告訴自己盡力就好，不要太過博命。最終上場，竟僥倖獲得女子壯年組第三名、全場第五名（要哭了🥹）。一直付出的努力沒有白費，也很感激一路走來幫助過我的人。

7. 有沒有跑步傷患？如何處理？
很幸運，暫時未有傷患。

8. 除了跑步，有沒有做交叉訓練（例如舉重/游泳/瑜伽）？對跑步有沒有幫助？
每星期都有一課體能訓練，提升肌肉狀態；肌力好了，跑步表現也會有所提升。 偶爾也會做瑜珈，拉伸及放鬆一下身體。 

9. 有沒有因為跑步而放棄了其他運動？
跳舞是我另一項興趣，但近年全職上班、兼職讀碩士，工餘時間則專注練跑，可投放於跳舞的時間已經很少。

10. 見你一直都是跑中短途，未來會試挑戰長距離如半馬、全馬嗎？有沒有哪個比賽好想參加？
將於今年年底到台北跑我的初半馬，而全馬則暫時未有計劃，但應該會是 1-2 年後的事。

11. 未來有什麼比賽？現時跑步目標是什麼？
會跑些路賽及田徑賽，例如 RMAC 15km、台北半馬及田徑系列賽等等。跑步目標就是各項距離都希望有好成績！

12. 另一半有跑步嗎？對你跑步有意見嗎？有沒有到比賽現場支持你？
只要我想做的，他都十分支持。他以前是短跑運動員，所以更加明白練跑所需的時間和心力。雖然他現在已沒有練跑，但偶爾仍會陪我慢跑或練習。每次比賽他都會陪我一起去，給予我很多鼓勵及支持。

最後一題，有什麼社交媒體可以找到你？
個人IG: sumgirlwong
Team IG: wemanbyrmac 

*照片由受訪者提供

06 10 月
INTERVIEW, MAGAZINE

黃金海岸15公里賽2023 長跑女生備戰攻略

現時坊間有很多不同風格的路跑比賽，以各種特色或Character Run的形式呈現，以吸引更多不同需求的參加者，然而，一些傳統「本格式」（即以經典形式作為風格）路跑賽依然有著它的獨特魅力，成功留著不少跑手的心。

以「黃金海岸15公里賽」為例，首先，賽道大部分都是平路，超過90%是沿著汀九引水道，其次，只有兩個折返點，讓跑步過程更加順暢。再者，賽道景色宏偉，可以飽覽汀九、青馬兩橋以及藍巴勒海峽；更吸引跑手的是15公里賽事比10公里更具挑戰性，不論是作為TT（Time Trial）又或作為之後的半馬、全馬預戰賽事，估算自己的配速及能力，比賽的時間安排都非常適合大家！

今年，賽事名為「amazfit Cheetah x RMAC 黃金海岸15公里賽2023」，RMAC教練之一的Chloe和跑手Sum女都是首次參加這場賽事，讓我們一起看看她們是如何為這場比賽做準備。

1. 有什麼吸引你參加「黃金海岸15公里賽」？
Chloe：「其一應該係佢嘅景色，中間會見到汀九橋嘅靚景！除此之外，因為佢頭一公里係要上斜嘅，呢個位我覺得好有挑戰性！」

Sum女：「因為我暫時跑過最長嘅比賽係10公里，所以我想今次試下15公里嘅比賽。加上我嚟緊會跑半馬，所以參加佢嚟作個預戰，估計下自己半馬嘅狀態會係點。」

2. 會怎樣準備這個15公里賽？
Chloe：「因為一起步就要上斜，跑斜路體力要求較大，而家已開始練多啲斜路課等身體適應同埋強化肌肉；同時因為15公里同跑開嘅10公里比賽，喺體力同配速上都好唔同，所以會練長啲距離，將平時6至8公里嘅課，增加到每星期兩課、12公里左右嘅。」

Sum女：「因為我而家個課表都係準備緊台北半馬同埋渣打半馬，所以都冇乜需要特別調節，只係加返長少少距離咁去練。」

3. 很多人都會以「黃金海岸15公里賽」作為之後半馬或全馬的預賽，你們都是？
Chloe：「我自己下半年有唔少時間會係海外所以冇乜報大賽。但我就覺得呢個15公里賽，好適合用嚟備戰渣馬同港珠澳半馬、美津濃半馬，或者係海外馬等等，都好啱用佢嚟TT或者作為其中嘅長課訓練。」

Sum女：「好似之前咁講，我預備緊台北半馬同渣打半馬。呢個15公里賽當係俾我一個預計，睇下自己身體狀況同耐力，有冇需要再做咩調節去應付半馬。」

4. 目標時間是？
Chloe：「今次主要係同跑會一班教練一齊參與跑下開心下，for fun咁，冇乜時間壓力！」

Sum女：「希望可以跑到4:00 pace，大概1小時左右完賽。」

5. 會穿著什麼跑鞋出戰？
Chloe：「我會試下對On Cloudstratus 2，開咗對鞋冇耐，個回彈力同緩震都幾好。」

Sum女：「比賽我多數會著adidas ADIZERO ADIOS PRO 3，我比較鐘意啲好『去』嘅鞋！」

6. Chloe你作為跑會教練，有什麼想提醒大家作賽時要注意？上落斜時又需要留意？
Chloe：「通常比賽一起步時都會好興奮！因為頭一公里係上斜路段，所以建議大家要冷靜啲，保留番個體力先。上斜時要保持眼望前面，身體輕微前傾，保持擺手，步頻密少少同時亦記住避免過分跨步，keep住平均嘅步距就可以。」

「接近終點前亦會有500米落斜嘅，到時最好都係要保持番平穩嘅速度。因為都已經跑咗10幾公里，體力都用得差唔多，如果忽然加快或步幅過大較容易受傷或者仆親。希望大家都可以安全完賽，開開心心咁享受呢個『黃金海岸15公里賽』啦！」

amazfit Cheetah x RMAC 黃金海岸15公里賽2023

即時報名連結
日期：2023年11月12日（星期日）
起跑時間：09:00
比賽路線：汀九引水道（九成平路）
集合地點：在青山公路汀九停車場
報名費用：每位港幣 330 元正 *當中 20 元會資助 MercyHK 給無家者身心靈的支援服務

獎項及紀念品

  • 紀念品：所有參賽者跑畢全程者，均可獲得紀念 T-Shirt 乙件
  • 全場首名男及女子，各可獲得 amazfit Cheetah Pro 手錶及現金獎 HK$1,000，各個人組冠軍可得 amazfit Cheetah Round or Square 手錶，亞軍可得 amazfit GTR 4 or GTS 4，季軍可得 CW-X 短壓力褲
  • 各個人組首三名均可獲得 Nike 跑鞋乙對（合共 27 對）
  • 個人組首三名均可得現金獎、各組所有得獎者均可得獎盃乙座
  • 所有獎項及紀念品只可在大會指定時間親身領取，不設預領、代領及補領，賽後將不會補發任何紀念品及獎品
26 6 月
INTERVIEW

跑步與人：Chiwa

1. 跑步年資？為什麼開始跑步？
7年。一開始為咗減肥先開始跑步。由小學到大學期間身型都比較肥胖，喜歡食嘢嘅我雖然有玩過其他運動例如羽毛球，但身型都係較肥；無意中係網上發現原來跑步係消耗最多卡路里嘅運動之一，所以就嘗試開始跑步。

2. 最喜歡的跑步用品品牌？最喜歡一對跑鞋？
Nike。因為 Nike 嘅衣物碼數適合我哋亞洲人穿著。
Nike Vaporfly Next%，因為比較輕巧同回彈高，所以能減少當日練習後帶嚟嘅疲勞。

3. 有沒有跟跑會或教練跑？選擇原因？
而家有跟 RMAC 跑會。起初加入跑會都係朋友介紹，慢慢認識到一班志同道合嘅跑友，佢哋對跑步嘅熱誠感染到我繼續同佢哋一齊跑落去，我相信一班人跑步先可以走得更遠更快。

4. 最深刻的一場賽事？原因？
港安健康心臟十公里長跑 2016 賽事。呢場係人生第一場布任何特別練習及準備嘅比賽。記得當時我冇運動手錶，只求完成賽事，加上中段開始出太陽，有種就嚟中暑嘅感覺，好想停低休息。但因為唔想浪費之前走下嘅路，就堅持跑落去。衝過終點後，冇想過原來十公里係咁長嘅距離，有種唔想再跑步嘅感覺。

5. 日常跑步路線？知道你經常於運動場練習，為何喜歡跑運動場？

日常跑步路線係深水埗運動場。我咁鐘意跑運動場有幾個因素。
第一：發現九龍區嘅長跑路線唔多，作為長跑愛好者，一起步就唔想停低，而九龍區嘅長跑路線燈位比較多，遇到紅燈就要停低，跑起嚟唔太爽。

第二：對膝頭或肌肉嘅負荷減少。因為運動場地面係塑膠跑道，適度吸收每一步嘅衝擊力，減少跑步對膝頭或肌肉傷害。

第三：方便補給。運動場嘅終點位置有得放水樽，加上長跑會流失大量水份，可以喺適當時候補一補水。

6. 跑步對人生有沒有幫助/改變？
我覺得跑步令到人生變得更積極，活得更快樂。因為長跑最能鍛練一個人嘅意志，係辛苦嘅過程中堅持下去，只要唔放棄，必定捱到終點線。正如人生中不如意事十常八九，只要堅持到底，懷住樂觀嘅心態，最後問題總會迎刃而解。

7. 現時跑步目標是什麼？
保持身型不變，因為平時好鐘意打邊爐同食甜品，好容易會食多咗，所以希望透過跑步消耗多餘嘅卡路里。

8. 未來有什麼比賽？目標？會否嘗試跑全馬？
年尾台北半馬。希望能跑出 1:15 左右嘅成績。當完成半馬目標時間後，就會試下跑全馬。

9. 最想到外國哪裏跑馬拉松？
日本。因為跑完馬拉松，可以浸一個舒舒服服既溫泉。

10. 有沒有因為跑步而放棄了其他運動？
有，因為跑步而放棄了羽毛球。始終兩項運動要求嘅肌力各有不同，加上一日只得 24 小時，好難兼顧兩項運動。

11. 有沒有跑步偶像？原因？
有，Kenenisa Bekele。佢喺受傷患困擾下，冇放棄跑步，堅持相信能夠突破自我。

12. 除了跑步，有沒有做交叉訓練（例如舉重/游泳/瑜伽）？對跑步有沒有幫助？
沒有，因為平日都要返工，剩番嘅時間唔多，好難參加唔同類型嘅訓練，而放假時都想過得輕鬆啲，陪下家人，所以都冇選擇額外訓練。我相信交叉訓練能夠鍛練唔同肌肉，對跑步一定會有幫助。

13. 跑完步最想吃什麼？
打邊爐加糖水。因為可以慢慢坐、吹下水，享受短暫嘅慢活。

14. 有什麼社交媒體可以找到你？
FB ：Chiwa Chung
IG: chiwa chung

14 6 月
INTERVIEW

跑步與人：Francis Cheung

1. 跑步年資？為什麼開始跑步？
中學時期開始接觸跑步，係講緊三十幾年前😅，無讀書就停咗，無跑到5-6年前先開始跑返步。點解開始跑返步？因為工作壓力大想放鬆一下，就即刻諗起跑步。

2. 有沒有跟跑會或教練跑？選擇原因？
開頭都係自己跑，無咩系統，都係上網搵資料跟住試吓。2年後就疫情出現，私人時間多咗又想跑好啲，就上網搵吓近自己屋企有咩跑班，之後搵到Running Man，睇埋個教練資料就報了。

3. 最深刻的一場賽事？原因？
最深刻一場比賽一定係2023渣馬，因為係我初馬，加上比賽前幾個月中咗招（COVID），好擔心之前練習咗嘅嘢無晒又錯過咗啲長課，加上當日濕度爆錶，慶幸都跑到教練定下俾我嘅目標時間。

4. 最喜歡一對跑鞋
最喜歡一對跑鞋，暫時都係ASICS METASPEED SKY +。

5. 最喜歡的跑步用品品牌？
跑步用品都無乜特別喜歡，著得舒服同靚就ok。

6. 跑步對人生有沒有幫助/改變？
跑步令到我戒咗煙！

7. 有沒有跑步傷患？如何處理？
跑完渣馬後就真係傷咗，真係要忍腳唔好跑及伸展拉根、睇醫生、俾耐性就會好快好。

8. 喜歡越野跑比賽還是路跑比賽？
梗係喜歡越野跑！上到山頂、望住個景大大力咁吸一口氣，真係好爽！

9. 現時跑步目標是什麼？
現在目標係年尾個TransLantau 100公里。

10. 期望女兒一起跑步嗎？
非常期望！

11. 你也有影比賽相，你認為影這類相片有什麼不同？怎樣可以「中你槍」（被拍到照片）？
影運動相最容易接觸一定係跑步相。
自己都係一個跑者，都想喺一場比賽中有相留念，影跑步相最特別係跑者同攝影師好有互動；影越野跑比賽更加係特別靚，因為有美麗山景配搭，通常我都來者不拒嘅，係要選擇嘅話，著特別顯眼嘅顏色會吸引到我。

12. 影相最鍾意擺的姿勢？要附照片。
都係成碌木企喺度唔望鏡頭扮有型多😅。

13. 有什麼社交媒體可以找到你？
IG: francis512
FB: Francis Cheung

*照片由受訪者提供