13 9 月
INTERVIEW

跑步與人（COROS SPARK篇）- 鄭文皓

1. Marcus你的跑步年資？及為什麼開始跑步？
4年，當初聽到中學老師問有冇人想加入田徑隊，自己當時冇玩任何運動，聽到好似幾有趣，就好快咁舉咗手，成為全班唯一舉手嘅人，亦慢慢加入咗田徑隊。

2. 有沒有跟跑會或教練跑？選擇原因？
有，Heartbeat，當時係主要跑 800m，但發覺自己身型比較瘦，覺得長跑應該較有利，而且當時 Heartbeat 嘅運動員當紅，自己亦好想跑得快、破紀錄，就喺 IG 搵咗陳嘉威教練。

3. 最深刻的一場賽事？原因？
啱啱 7 月嘅 Gold Coast Half Marathon，打破咗 U20 半馬青年紀錄。做到呢兩年多嘅目標，呢個紀錄亦都肯定咗自己疫情至今嘅堅持同努力，都算彌補咗自己冇得跑學界嘅遺憾。

4. 日常跑步路線? 最喜歡的練跑運動場地（原因？）
西九文化區嘅海傍，我屋企跑去西九大約 3 公里，跑到嗰邊又望住個海，對於慢跑、長課都非常寧靜同放鬆。運動場就深水埗運動場，因為會見到教練，佢會喺度教班。

5. 最喜歡的跑步用品品牌？ 最喜歡一對跑鞋？
Nike，練習鐘意 Pegasus 同 Zoomfly；比賽就 Alphafly。

6. 有沒有跑步傷患？如何處理？
有呀，由今年年頭一月嘅腳外側 stress fracture，之後到三月腳趾發炎，再到 6 月半月板勞損。今年都過得好唔容易，去到 7 月 Gold Coast 前都傷緊，當自己愈想做好嘅時候，反而可能會令心態緊張，恢復得差，操勞過度引致受傷；所以練習真係應該適可而止，consistent 最重要，同教練制定好練習計劃，有時太攰要識得休息。

7. 現時跑步目標是什麼？
現時呢兩三個月都希望注重練習，喺年尾 11-12月，希望可以打破 10,000m，10km U20 紀錄，亦都想再推快自己半馬紀錄。

8. 未來會否挑戰全馬？如果會，會選擇哪個作為初馬?
會，相信全馬同其他項目唔同，係另一個世界，自己好想體驗。初馬嘅地點就想係渣打馬拉松，喺香港比賽特別大歸屬感，沿途聽到廣東話打氣會特別有動力。

9 於 COROS SPARK 你會參加 10KM 路跑賽段， 有沒有比賽 tips 可提供予參加者？路段上有哪些要注意事項？
路段好多上落斜，較易出乳酸，比賽時跑嘅 pacing 應該要控制一下，唔好一開始有力就狂衝，先穩定，再喺後程落斜嘅適當時候加快。訓練上多加斜路同加速跑，亦可以係長課時候加插跑山。

10. 10KM 比賽一般練習應該專注哪方面？會如何應用 Coros 手錶去配合練習？
10km 最重要係速耐，3-4 個月準備。每次嘅訓練都唔應該大辛苦，強度亦應控制於 70-80% full effort（以Coros手錶data作監控）。練習量亦應循序漸進。

11. 有什麼社交媒體可以找到你？
IG: ho_marcussssss

*照片由受訪者提供

11 9 月
INTERVIEW

跑步與人（COROS SPARK篇）- 紀嘉文

1. 跑步年資？當年為什麼開始跑步？
22 年，當年因為無聊跟咗啲朋友去田徑場練習，跑下跑下又覺得好玩，咁就玩咗 20 幾年啦！

2. 你參加過不少比賽，哪一場印象最深刻？原因？
應該係 2012 香港馬拉松半馬，嗰年贏冠軍。其實喺西隧嘅時候被 Kiprotich Thomas 大概甩咗 200 米，最後竟然係中環追番，我自己都估唔到。

3. 日常跑步路線? 最喜歡的練跑場地（原因？）
大欖郊野公園、西貢北潭涌，因為冇乜人，同埋嗰度風景比較靚。

4. 最喜歡的跑步用品品牌？ 最喜歡一對跑鞋？
Nike Alphafly。 

5. 你現時作為港隊教練及半馬代表，你自己怎看這個身份？作為香港代表，又有沒有什麼使命感？
都係咁囉，冇乜特別嘅感覺，都係想大家一齊練習一齊進步。

6. 現時跑步目標是什麼？未來將會參加什麼比賽？
都係跑馬拉松，希望去到亞運。今年去唔到，有少少失望，不過盡力去追求啦，嚟緊可能玩下三鐵或者山賽定向等。

7. 作為教練，你怎看香港的長跑發展？
其實香港嘅運動員都係進步緊，同埋我覺得佢哋俾我哋以前練習嘅方法更加全面，希望將來香港有機會出到個世界級嘅運動員。

8. 於 COROS SPARK 你會參加 10KM 及 50KM 山路賽，今次會怎樣準備山賽部分？
山賽我之前都有玩，不過怕受傷，所以費事影響路賽表現，而家都開始想跑下越野跑，會多訓練腿部嘅肌肉力量，為越野賽做好準備。

9. 賽前又會怎樣作部署？體力應該怎分配？
其實我都冇乜經驗，所以應該都係跟住其他跑手跑。

10. 同時，你有什麼比賽 tips 可提供俾參加者？路段上又有冇需要注意事項？
我覺得 10 月天氣可能都仲係好熱，所以跑手應該量力而為，避免中暑。

11 這類連續式比賽應該怎樣練習？ 應該集中訓練路跑還是山跑？
其實今次嘅 50K 路段難度唔算太高，而且比較多石屎路，所以我都係照返平常練習方法咁去訓練。

12 訓練上，你會如何應用 COROS 手錶去配合練習？
我會利用 COROS 心率來控制自己訓練嘅強度，最重要係避免自己 overtrain。

13. 有什麼社交媒體可以找到你？
IG: gikaman_

07 9 月
INTERVIEW

3球野與人：Marquise & Raymond

1. 跑步年資？為什麼開始跑步？
Raymond：應該七八年左右，以前係因為打拳要練體能同減磅，先一星期跑一次，直到疫情冇得打比賽，冇咩寄託，之後就跑多咗步，慢慢就愛上咗。
Marquise：未到半年。跑步原因 40%係另一半鍾意跑步，佢會成日鼓勵我郁多啲跑多啲；60%係自己想練下意志，學跑步，令跑山路跑技術上有更多進步。

2. 有沒有跟跑會或教練跑？選擇原因？
M：朋友介紹下，今年五月開始join咗Trailblazer，因為喺比賽其間發現，喺路跑嘅路段比其他跑手弱，所以想針對訓練下路跑同埋改進下跑姿，減少受傷機會。

3. 日常練習地點或路線？原因？
R：平時如果星期日上山，我比較鍾意操單M或雙M！
第一：起點終點一樣，又可以泊車喺東涌，可以帶少好多嘢。
第二：我住青衣去東涌算近，交通方便，可以慳好多時間。
第三：大嶼山夏天涼過西貢好多。

4. 最喜歡的跑步用品品牌？最喜歡一對跑鞋？
R：Mountain Martial Arts（MMA），因為每個款都限款，好少會撞款；鞋我就比較鍾意Salomon S/Lab Pulsar SG，因為夠包腳。
M：無咩特別，邊件抵著就著咩，成身都著唔同牌子。跑鞋就最鍾意 ASICS Novablast 3，包腳穩定性高，日常襯到衫，對我呢啲新手嚟講咩 program 都駕馭得到。

5. 跑步對人生有沒有幫助/改變？
R：跑步令我生活規律咗好多，時間管理好咗！同埋明白有句好老土嘅野：沒有奇蹟，只有累積！
M：一個人可以跑得快，一班人可以跑得更遠。平時自己跑都無乜意志撐落去，但有人陪就唔同，死都死埋佢🤣！

6. 有沒有跑步傷患？如何處理？
R：好好彩除咗幾年前試過ITBS外冇咩受傷，嗰陣處理方法係停跑、按摩同休息。
M：2021年頭做過半月板微創手術，不過就唔係因跑步而傷，而係因為放自己一年假，喺香港同我家狗狗四處露營，以前掛住返工無運動，一下子負荷太大肌力不足而受傷。處理方法就係做完手術後露住營休腳，轉咗玩Freedive做水療，療好傷就上返山。

7. 未來跑步或比賽目標是什麼？
R：希望今年唔好受傷，HK100順順利利做個滿意嘅成積，之後專心練多啲路跑，馬拉松可以Sub3。
M：養成跑步習慣，學好跑步減低受傷機會。2023年尾嘅馬拉松可以Sub4；2023年嘅HK100 THE HALF係行住去完成，無點跑過。希望2024年可以跑住完成。

8. 想到外國比賽嗎？會選擇到哪處比賽？
R：最想去旅行順便hea玩CCC睇風景，因為如果認真去比賽，之後就唔會有力去玩。

9. 跑步途中會想什麼？
M：觀察自己嘅跑姿、體感、強度、當下嘅感覺。

10. 路跑跟山跑有什麼不同感受？
M：路跑比較悶，如果路線不變通常啲風景一樣，但山跑就算路線一樣，但落咗場雨已經可以變化好大，望到遙遠嘅山脈風景，好多時都會覺得好幸福。雖然住喺石屎森林入面，但一上到山居高臨下嘅城市風景係香港另一種美，同埋可以見到好多小動物小昆蟲同花草樹木。

11. 最深刻的一場賽事？原因？
R：上年HK100，因為去到尾段上緊針山嗰陣突然肚痛，之後十幾公里又痾又嘔搞到血糖太低，要坐係路邊休息，差啲要撤。
M：2023年頭HK100，原本諗住可以去開大食會。點知自己熱到只係食到橙同罐頭水果…🫠

12. 你們都有一起跑步、一齊練習？怎樣互相扶持？會否於假期時間都去了練習？
R：我地正常星期一、三、日都會一齊跑，不過喺同一個地點但各有各練🤣！
女朋友本身惰性大啲，所以平時假期一定我起身先，然後再叫佢起身，同埋跑完步要買定雪榚俾佢食😂。年尾冬天要練長課時，假期通常都係我自己一個操，女朋友就會專登早啲起身煮早餐俾我食，然後送我出門口。你哋再問我冇得跑步㗎喇…我哋只係假期上山拍拖啫。
M：有時佢去操山我就抽時間Freediving、做下副業、喺屋企陪下狗狗龜龜，做下家務整下蛋糕煲下湯水等男人返屋企🤭。

13. 有沒有試過一齊比賽？
R+M：啱啱3球野比賽嘅兩場：柏架山/大帽山。

14. 於 9/9 舉行的3球野系列賽第3球 – 畢架山站，有什麼 tips 可建議參賽者？又有什麼要注意？賽前可以針對哪方面提升自己？
R：一開頭就要爬升300幾米，記住唔好去咁盡，可以去到引水道先快少少，如果未試過路嘅，記住留力上畢架山，仲有呢條路較多technical嘅路段，著返山鞋安全啲。
M：練多啲長命斜，感受用咩配速最適合自己。

15. 有什麼社交媒體可以找到你？
Marquise:
FB: Marquise Li
IG: Marquiselpy

Raymond:
FB: Wai Ming Ng
IG: wai_ming_ng

*照片由受訪者提供

05 9 月
INTERVIEW

3球野與人：Cherry & Joseph

1. 兩位跑步年資？為什麼開始跑步？
Cherry: 2014 年開始起跑，因為想減肥所以跑步。
Joseph：跑步年資有二十多年。2000 年我去了台北讀大學，一個人身在異鄉，很陌生、很孤單，我開始用跑步「消磨」課餘時間。當時跑步除了「消磨」時間，也「消磨」脂肪；母校國立政治大學四面環山，因此便養成慢跑和行山習慣。

2. 開始跑步時有沒有跟跑會或教練跑？選擇原因？
C: 沒有跟跑會，純粹自己落街跑，沒有系統地訓練。
J : 沒有跟教練或跑會，也因為這樣，我走了很多冤枉路，如果當年一跑步就跟教練，我可以減省好多好多時間，走少好多錯誤的路。
2005 年第一場比賽是渣打全馬。當時回港後，恰好遇上渣馬開始報名，於是踏上了全馬旅途。初出茅廬跑全馬的我，沒有跟教練，也沒有任何馬拉松知識，只掛著一個「勇」字，跑了一半路程已耗盡所有體力，最後非常吃力地以 4 小時 40 分左右完賽。

3. 日常練習地點或路線？原因？
C：日常練習沒有特定路線，練長課會由屋企跑去蓮姐度，約 21k 。原因：又有山又有路。
J : 沒有特定路線，不受地域所限。

4. 最喜歡的跑步用品品牌？最喜歡一對跑鞋
C：ASICS Magic Speed 3。
J : 直到 23 年 8 月 31 日，我是 Team Salomon 成員，仍然會著 Salomon 參加越野比賽。

5. 有沒有跑步傷患？如何處理？
C: 有，膝頭內側痛，要多拉筋及強化周邊肌肉。
J : 一寸傷一寸強，傷患與進步只係一線之間。

6. 知道 Joseph 已完成了六大馬，未來有什麼目標？ 路跑尚有什麼目標想達到？
J：要完成六大馬，話難唔難，話易唔易，我當初訂目標是六大馬全 sub 3，去年倫敦馬是我第六隻六大馬，2 小時 46分 完成，六大馬平均時間是 2 小時 57 分。但我有些馬拉松失手，未能 sub 3，這些我會再補考的，
我已經跑了好多場馬拉松，好多場都能 sub 3，甚至 sub 250，但我仍想 PB，自己係有一個時間目標想衝破，受限於工作太忙，工作、家庭、戰神越野跑會，山賽… 分配上令我未能專心為馬拉松下多些心血。跑完 UTMB，下半年或者會放多些時間練馬！

7. Cherry 入選了 Team ASICS，又成為過 Garmin pacer，覺得自己跑步跟作為 pacer 跑步的分別是什麼？
C：有分別㗎！自己跑步可以竭盡所能，挑戰自己極限；作為 pacer 要做準確及穩定配速，引領跟隨自己的 runner 在目標時間內完成，責任較大，但相對滿足感亦增加。

8.  2 個都有一起跑步，會一齊練習？怎樣互相扶持？會否於假期時間都去了練習？又有否試過一齊比賽？
C：我地有一齊喺運動場跑步的（當 Joseph 慢跑時） ，因為我哋配速不一樣，運動場就一定會遇見對方，可給予對方鼓勵。而我哋假期或去旅行時都會跑步，亦有試過一齊比賽，例如渣打馬拉松及HK100。
J : 我和老婆經常一起比賽，例如倫敦馬、台北馬、東京馬、UTMB、UTMF…. 很多很多。

9. Joseph 開立了自己的跑班，自己跑步跟教跑步有什麼分別？
J：去年成立了「戰神越野」跑會，我開心有一班好好的學生一齊訓練，他們除了很 nice，實力也很強，而且很團結。加上太太 Cherry、我的 sub 3 好兄弟綸 Sir、豪 Sir 一齊協助，還有贊助商及好友幫忙，跑會才能成功運作。自己跑步及教跑步分別是：一個人可以跑好快，一班人可以跑好遠！

10. 兩位各自最深刻的一場賽事？原因？
C：2023 年日本的 UTMF KAI 69k。跑到 12k 舊患出現 ，打後痛住 57k 跑回終點，途中一直堅持著，有喊過又嬲自己點解會痛？最後落斜行也痛…. 但我知道我先生在終點等我、所以我一定堅持跑回終點，最後以14:57 完成，沒有 PB，但贏咗自己。

J : 最深刻一定是 4 徑…麥徑是我最熟悉的山徑，頭 50k 因太輕鬆太興奮，跑快了，到獅子亭半程 50km 才花了 5hrs 50mins 。這樣下去是 11 小時完 100k 的配速！故在後 50k 修正及拖慢，最後 13:21 完成，與目標 13.5hrs 相若。

抗眼瞓能力極差的我，預期第二條徑衛奕信徑會比麥徑慢一點，起步時下著大雨，體感溫度寒冷，這段訂 14.5hrs 完成。凌晨 4、5 點不敵睡魔呼喚，在城門水塘敗下陣來，跌跌撞撞地入了結界，幾經掙扎終於趁日出時分逃出生天，繼續前進。跑到飛鵝山時，開始感受到左腳腳腕有痛楚，沒有處理就繼續跑向藍田。痛楚慢慢加劇，在往太古地鐵站列車內脫了鞋，才發現腳腕紅腫了。用身上的頭巾包著腳腕，勉強跑畢衛徑 2、1 段（後來才知道在超長途山賽鞋帶不能綁得太緊，否則腳脹後會撞鞋頭或鞋舌引起腫脹及腫痛）。

還有兩條徑，不是還有兩段。港島徑 50k 及鳳凰徑70k，這是一個 120k 的距離，傷痛著繼續跑除了超現實，還有超痛苦，但我不想放棄。最後港島徑用了 7 小時 40 分跑到山頂及再 jog 3.5km 落中環 6 號碼頭。在中環碼頭等 30 多分鐘船的期間，我看到一眾好友都來了，那一刻很感動，熱淚盈眶。

到達梅窩，終於展開最後一條徑了。腳腕已好腫好痛，極度痛苦、痛楚；也極度眼瞓，但我不可以放棄，再慢也要完成。我內心只有一句 “ I must finish”。接下來的鳳凰徑，大澳至伯公坳這 20k 應該算是我生平走過最痛苦最煎熬的路段，腳腕傷患令我產生疼痛感。傷痛令我一次過消磨了所有時間，60 小時內完成也不清楚能否做到。下午 3 時尾終走畢鳳凰山，在伯公坳我聽到很多打氣聲、加油聲。

「人生總要為自己歡呼一次！」這一句說話及現場的加油聲，突然刺穿了我的心房，將早已熄滅的戰火重燃起來，大東山往南山返梅窩最後 9k 越野路，我忍著強痛再次跑起來了，豁了出去地直奔，只花了 1 小時 10 分便到梅窩市區，迎面望著綠色郵筒及等了良久的 Cherry和眾多好友、攝影師，這段捱了 16 小時，終於「捱」返梅窩…

有人說跑完一場 42.195km 的馬拉松可以體驗人生；我跑畢 298km 的超級越野馬拉松也感受不了人生，但感受了友情。

11. 知道兩位都想有小朋友，期望未來與兒子/女兒一起跑步嗎？
C：期待玩親子組！
J : 絕對會。

12. 於 9/9 舉行的3球野系列賽第3球 – 畢架山站，有什麼 tips 可建議參賽者？又有什麼要注意？賽前可以針對哪方面提升自己？
J : 第3球畢架山，路況技巧性高，比賽時要多加注意，不要受傷。

13. 有什麼社交媒體可以找到你？
Joseph:
FB: Joseph Yeung
IG: YCshero

Cherry:
FB: cherrycherry cheng
IG: running_cherrycherry

FB: 戰神越野Mars Trailrunning
IG: mars_trailrunning _hk

*照片由受訪者提供

29 8 月
INTERVIEW

跑步與人：Daniel Wong

1. 跑步年資？為什麼開始跑步？
正式開始跑步係 2022 年 4 月份，大概一年幾，因為 2021 年 9 月尾，打咗第二針疫苗後持續發燒，之後入醫院住咗兩星期，出院後發覺身體好弱好潺，又發覺意志好差，所以迫自己做運動，最終選擇跑步；因為跑步辛苦又悶，但係覺得咁樣先有改變 🤣 。

2. 有沒有跟跑會或教練跑？選擇原因？
最初無嘅，之後 Kolor 主音 Sammy 創立咗「頑張」，咁就加入咗，隨後到阿歹創立咗「無名」就直到現在。因為喺頑張嘅時候感受到阿歹嘅教導方式好適合自己，亦都係好短嘅時間提升咗好多跑步上嘅知識同技術，由其心理質素，阿歹經常提醒 「求快先求慢」，變相唔會單一追求速度。 

3. 承上，頑張經常會有自主活動，是什麼原因令你們會自發參與？
最初活動主要係 Sammy 同阿歹發起，例如星期日係假期，會按排大家跑出運動場，又一齊參加好多唔同嘅跑步 event 例如 Kolor x Carbon brews 中環夜跑、飲跑食醉等等。又因大家都好喜歡 Kolor 又會一齊去睇 show，變相好多唔同嘅活動令大家關係好緊扣，即使係團員自發嘅活動都會好積極參加。

4. 最深刻的一場賽事？原因？
最深刻一定係頑張同 NB 紐約馬 vtriual，因為係我嘅初馬😂，第一次感受到訓練嗰種辛苦到往生嘅感覺，亦都確切感受到跑馬拉松係有幾咁辛苦。

5. 最喜歡的跑步用品品牌？最喜歡一對跑鞋？
最喜歡一定係 New Balance，暫時最喜歡係 SC Elite V3

6. 跑步對人生有沒有幫助/改變？
我覺得跑步之後，面對困難同壓力時變得積極咗，會懂得用開心嘅態度去面對，身體本身好多問題又得到改善，個人會有返自信心。因為跑步接觸多咗朋友，對於社交又會開放咗。

7. 見你也有跑山，喜歡跑山還是路跑？
其實我比較喜歡跑山😂！

8. 路跑跟山跑有什麼不同感受？
路跑全程要 keep 住一穩定嘅 pacing，要留意嘅主要都係自己個狀態，所以比較悶，不過有速度感。
山跑就會冇咁悶，因為山路始終唔平坦，又上又落，要留意嘅野多好多，好多變化，變得好有趣。

9. 跑山有沒有遇到奇怪事件？
暫時未有，只係上年逆之男比賽差啲跌落山😂！

10. 現時跑步目標是什麼？有沒有目標比賽？
目標都係想係馬拉松做到 sub3，賽事都係出年渣馬。

11. 有沒有因為跑步而放棄了其他運動？原因？
沒放棄呀！因為都好耐冇做運動，跑步之後反而想參與其他運動。

12. 有什麼社交媒體可以找到你？
FB: Daniel Wong
IG: dedanielwong 

21 8 月
INTERVIEW

跑步與人：Mandi

1. 跑步年資？為什麼開始跑步？
大概 1-2 年。因為另一半好鐘意運動，久而久之俾佢影響到，一齊跑步。 

2. 有沒有跟跑會或教練跑？選擇原因？
冇，都係業餘興趣跑，另一半就係我嘅教練😆！

3. 最深刻的一場賽事？原因？
2022年嘅渣馬，因為係人生第 1 場渣馬同第 1 次 10K 比賽，印象好深刻。

4. 跑步途中會想什麼？
咩都會諗下：今日做過啲咩？跑完食咩好？聽日有咩做？有時又會望下沿路風景或聽下歌。

5. 最喜歡的跑步用品品牌？最喜歡一對跑鞋？
最鐘意 Nike，最常着 Nike Vaporfly Next%，有碳板，覺得好輕身，有利比賽表現。

6. 日常跑步路線，會選擇朝早定夜晚跑？
通常會夜晚跑，會由堅尼地城跑到中環海濱長廊。

7. 最喜歡的練跑運動場地（原因？）
堅尼地城海濱長廊同屋企嘅跑步機就係我地練跑場地😆！

8. 知道你另一半都有跑步，仲係熱愛同會感染人去做運動，佢有否陪你一齊練習？或者教你跑步？
有，最開頭就係佢不停鼓勵我同佢一齊做運動，每次我同佢一齊做佢都會好開心，除咗跑步仲會買單車俾我，務求令我愛上運動，而又俾佢成功到！當我跑步上遇到問題佢都會提供方法俾我再去練習，見到有進步嘅時候，佢會比我更開心。 

9. 現時跑步目標是什麼？有沒有想過參加馬拉松？或者到外國比賽？
現時希望 10K 表現可以 45min 內完成（第一次渣馬 10K 成續 54:55），打算會參加出年嘅渣馬。外國比賽就暫時未 ready，但會陪另一半去外國比賽做住觀眾先，希望有一日覺得滿意自己成績先再跑外國。

10. 見你是一位化妝師，如果女士放工要跑步，化妝上有沒有什麼建議？
一律建議做晒半永久眉、美瞳線，加接睫毛，咁就點出汗都唔怕！如果比賽想影靚相就搽番少少遮瑕同唇膏，就可以靚住跑，收靚相✌🏻！

11. 你期望未來香港會搞一個同寵物一齊玩的跑步比賽嗎？你覺得可以怎樣舉辦？
呢個係我一直都好期望嘅事！希望可以同狗狗一齊比賽，賽程可 1-2 公里，狗狗用體重嚟分組別，贏咗有狗狗零食做獎品🤟🏻！

12. 有什麼社交媒體可以找到你？
IG: leungmandi 🫶🏻

11 8 月
MAGAZINE

The North Face Urban Exploration 23秋冬 多面探索 溯遊而往

The North Face Urban Exploration 2023 秋冬系列 RE: EXPLORATION「重溯都市」繼續以每月一主題概念，在都市中喚醒探索本色。今個 8 月，The North Face 邀請大家開啟旅 途新篇章，以「溯遊而往」為題，推出一系列創新剪裁及兼備機能科技與潮流美學的時尚單品，令都市探索家能隨心踏出探索步調。

Urban Exploration 8 月新品以「溯遊而往」為核心概念，將戶外靈感融入城市穿搭細節，加入釣魚裝備收納元素為創作特色，帶來令人耳目一新的作品。

寬鬆剪裁的 GORE-TEX 戶外外套，透過拼接紋理與平織兩種不同物料，展現無拘無束的時尚穿搭。

外套加入多口袋造型，設計前衛型格亦增添實用 性，配合升級回歸的 GORE-TEX 防水硬殼休閒長褲，即使身處都市，無論任何天氣變化，亦可瀟灑啟動探索模式。

女士長款拼色外套採用 Dryvent 雙重防水硬殼技術，立體袖型設計與腰部可調節抽帶為探索者締造自在舒適感，前中兩側拉鍊可拉開與小背心合二為一，創出多重層次穿搭。搭配工裝風格背心外套，奪目撞色效果聚焦潮流視線，構建率性街頭主義。

左：VECTIV EXPLORIS 2 MID FUTURELIGHT LTHR、右：VECTIV INFINITE 2 FUTURELIGHT

鞋履方面，穿著融合 VECTIV 及 FUTURELIGHT 兩大防水技術的 INFINITE 2 FUTURELIGHT 機能防水鞋，無懼濕滑場景，隨時隨地以自在節奏探索城市脈絡。

8 月新品亦包括展現硬朗個性的男裝牛仔外套，外套的梭織面料拼接深淺牛仔褲裝，碰撞出獨特化學反應，輕鬆營造街頭時尚風。內搭設計簡約的撞色 Logo 印花 T 恤，打破刻板都市印象，瞬間激活探索基因。

女裝 A 字版型牛仔外套採用利落裁剪設計，配合寬鬆直筒牛仔褲，實用設計加上裝飾細節，釋放獨樹一幟的探索態度。

Cordura（輕身、速乾、柔軟且耐用性強的功能性面料）與 CoolMax（能將汗水迅速排走，保持清爽）軟殼物料更為穿著者帶來輕盈清爽的穿著體驗，無懼盛夏潮濕酷熱，時刻盡享探索自由。

10 8 月
INTERVIEW

跑步與人：Daniel So

1. 跑步年資？為什麼開始跑步？
8年。一開始係養生跑，話說2014年底驗身，驚覺壞膽固醇「很高」。驚訝係因為向來瘦底、飲食尚算均衡、間中運動（踢波），咁都過高？應該係遺傳。無論如何，都要積極「降醇」，決定從飲食同運動兩方面着手，開始咗隔日慢跑嘅目標。然後發覺有啲朋友、行家都有跑，就約埋一齊練跑、報比賽，由10K、半馬到全馬，漸漸領略到長跑嘅樂趣，但仍然係養生跑嘅層次，月跑量最多100K就膽粗粗跑初馬，結果當然係「撞牆」。
2019年中參加咗運動品牌跑班，接觸較有系統嘅訓練，亦體驗到團練嘅威力。自此想更認真跑步、力求進步，亦開始跟跑會。

2. 有沒有跟跑會或教練跑？選擇原因？
跟了Trailblazer黃啟樂教練一年半，主要鍾意訓練內容科學化、黃Sir會講解每課嘅目的同原理、強度適當（減低受傷風險）、每星期有課表、賽季有備戰課表。其次係欣賞黃Sir有心推動香港跑界進步，例如加強跑會之間嘅合作、扶掖年輕跑手。

3. 最喜歡的跑步用品品牌？最喜歡跑鞋？
服裝鍾意ASICS、Mizuno，一來偏好日系，二來可能較啱亞洲人身形。
跑鞋最愛adidas ADIOS PRO 3，今年初買嚟3月東京馬着，結果大PB。輕身、推進力強、厚底鞋嚟講算穩定，小腿負荷唔特別大（着過另一款碳板鞋覺得小腿好攰）。

4. 日常跑步路線? 最喜歡的練跑運動場地（原因？）
日常跑步路線 (i) 鰂魚涌海濱：近屋企，有海風、維港景、500米直路練interval都得；(ii) 康山斜路：屋企樓下，最慳時間，兼練埋斜路，跑慣咗就唔驚渣馬西隧；(iii) 寶雲道：近公司，善用 lunch time；(iv) 跑馬地馬場：長課首選。
最喜歡運動場地：將軍澳同小西灣，因為較新淨、少人、場邊好多空間熱身。

5. 有沒有跑步傷患？如何處理？
算好彩，只試過2018年右腳足底筋膜炎，因為胡亂買咗對薄底鞋（當時仍然流行 racing flat）、未開鞋就着嚟快跑10K。當時冇處理，以為過一陣自己會好番，點知痛咗個幾月。諗番轉頭，可能應該碌按摩球、食消炎藥。

6. 最深刻的一場賽事？原因？
2023年3月東京馬拉松。深刻在於期待已久、大PB同時有點遺憾。本應係2020年跑，當時第一次抽東馬就中獎，奈何撞正COVID，名額保留到2023年至跑，但焉知非福，以三年前嘅跑力，估計最叻跑3:30，經過三年努力，結果PB由3:52推快到3:10:53，但離今次嘅高標BQ尚有54秒差距。對自己表現已好滿意，但賽後檢討，總有可以改進之處，第一係比賽日早啲到，保證有時間去廁所同熱身，第二係賽前嗰日唔好行咁多街，雖然三年冇去日本真係好難忍……
大概有一點點遺撼，至有動力繼續向目標奮鬥💪 

7. 海外馬跟香港馬的分別？最想到外國哪裏跑馬拉松？
冇喺香港跑過全馬，姑且用渣打半馬嘅經驗同海外馬（日本）比較，有三大分別：(i) 天氣，呢點對成績最關鍵。香港衰在濕，就算比賽日咁好彩夠涼，潮濕環境都好影響發揮；(ii) 賽道，渣馬「三隧三橋」出名魔鬼，海外馬賽道當然唔係條條都似東京咁平坦，我跑過嘅奈良馬斜路之多應該超越渣馬，但日本天氣一般較香港適合長跑，令本來較辛苦嘅賽道都可應付；(iii) 氣氛，日本馬沿途超多市民打氣，賽前攞選手包嘅EXPO亦通常比香港豐富有趣。
已去過日本跑四隻馬，但日本馬總有再去嘅理由。此外，最想跑倫敦同波士頓。

8. 現時跑步目標是什麼？
今個賽季目標10K 40分內、半馬1:30內、全馬BQ（3:10內）。

9. 未來想完成六大馬嗎？下一隻目標是什麼？
倫敦、波士頓我都想跑，但唔係因為六大馬，而係想去倫敦旅行探親、去「馬拉松殿堂」波馬觀摩。倫馬抽咗幾年都唔中，希望下一隻就係憑實力報名嘅波馬！對六大馬無特別感覺，冇打算追求「冬甩牌」。揀海外馬主要係配合旅行，所以我跑過四隻馬全部係日本，細賽亦有自己嘅特色。暫時無興趣去美國同柏林旅行。

10. 自己跑步，跟作為品牌Pacer跑步分別是什麼？
自己跑，有時專注於完成課表，有時Easy Run讓腦袋放空，都係只須顧自己。時間、地點、配速，全部可以自己決定、靈活處理。忙碌時，自己跑肯定較為time-efficient。
做Pacer則有種責任感，要「成就他人」。比賽帶pace固然要準要穩，同時兼顧路面安全同鼓勵跟你嘅跑友，幫助大家跑出理想成績。COVID期間帶比賽嘅機會唔多，日常主要喺各種練跑同city run活動中分組帶跑，通常配速唔使太講究，跑得相對輕鬆。成就他人，自己當然都有得着：幫助跑友完成賽事或訓練帶嚟嘅滿足感、識到幾位好教練同一班好隊友、帶跑時自己都練到嘢、解鎖自己未跑過嘅地方。

11. 跑步對人生有沒有幫助/改變？
健康咗（壓番低膽固醇）、社交圈子闊咗、話題多咗、覺得人生多咗個目標。
另一方面，長跑訓練投入大量時間，難免減少咗其他嗜好（打機、睇書、踢波）。

12. 期望未來和女兒一起跑步嗎？
期待！嚟緊11月我會跑日本下關海響馬拉松，幫阿女報咗2K fun run，希望佢都會被日本馬嘅氣氛感染。我有時去運動場練跑都會帶埋佢，教佢做動態熱身、一齊輕鬆跑、拉筋cool down。我話搵次帶埋佢上跑班，佢追問過幾次幾時帶 😂？
阿女肯同我跑步當然好，但只要佢愛上運動、有定期運動習慣，無論跑步、游水、球類乜都好啦。

13. 最後一題，有什麼社交媒體可以找到你？
IG: daniel_sopuifung

08 8 月
INTERVIEW

3球野與人：Ruby & Jacky

Ruby
1. 跑步年資？為什麼開始跑步？
四年左右。
大約讀完書出嚟做嘢就開始跑步。一開始唔習慣返工經常坐，覺得需要多啲運動去平衡生活。跑步可以自已選擇跑快定慢，幾時想跑就跑，係非常好嘅運動，所以逐漸愛上。

2. 有沒有跟跑會或教練跑？選擇原因？
而家主要跟Blue Monday Running Club（Action Panda）跑，因為同我工作地點好近，收工過去好方便。
而且呢度又可以認識新朋友，二嚟教練團隊每次都有安排唔同嘅訓練內容/路線，都幾好玩。

3. 喜歡跑山還是路跑？
路跑。

4. 路跑跟山跑有什麼不同感受？
路跑比較城市化，喺熟悉嘅環境下跑步都係一種減壓。
而山跑，我覺得可以親親大自然，我都很享受，係另外一種體驗。

5. 最喜歡的跑步用品品牌？最喜歡一對跑鞋？
我最常穿着嘅跑步牌子係Nike；最鍾意應該係Nike Zoom Fly系列。

6. 日常跑步路線? 最喜歡的練跑運動場地（原因?）…
因為跟Blue Monday Running Club嘅關係，我通常會喺觀塘海濱跑步，有時跑去啟德郵輪碼頭，吹住海風嘅感覺好舒服！
第二個地方我會選擇深水埗運動場，因為居住地點鄰近，好喜歡一個人喺運動場放空自在咁跑。

7. 有沒有試過跑步傷患？如何處理？
幸運地暫時都沒有。每次訓練完我都會拉筋或者用按摩槍放鬆肌肉。

8. 最深刻的一場賽事？原因？
我嘅比賽經驗唔多，但係我期待下年渣打馬拉松10公里賽事，我希望可以跑出50分鐘內成績。

9. 除了跑步，有沒有做交叉訓練？（例如舉重/游泳/瑜伽）對跑步有沒有幫助？
都有嘅。除咗跑步，我都有上過瑜伽班或體適能練習，因為我覺得做核心肌肉群訓練對我跑步絕對有幫助。

10. 現時跑步目標是什麼？
我一直希望可以突破自己，慢慢進步。長遠跑步目標都係希望可以挑戰更遠嘅距離。

11. 於12/8舉行的3球野系列賽第2球 – 大帽山站，有什麼 tips 可建議參賽者？又有什麼要注意？
大家加油！天氣熱，飲多啲水！

Jacky
1. 知你快將跑芝加哥馬拉松，有什麼目標？會否想繼續挑戰六大馬？
首要係PB ，最希望做到Sub 3，所以我而家都積極備戰中。
挑戰六大馬拉松一直係我心願，但最近抽唔中倫敦馬拉松，希望抽中下年東京馬拉松啦，哈哈！

2. 除了跑步，你亦有玩兩鐵及跑山，對平時路跑有沒有幫助？
絕對有幫助。因為我當兩項鐵人同越野跑係交叉訓練。
兩者都屬於帶氧運動，相對單一跑步練習，可以使用唔同嘅肌肉，減低受傷風險。

3. 現在工作都與跑步有關，會接觸到很多品牌及裝備，有沒有特別推介或選購建議？
近排我嘅最愛跑鞋係New Balance Fresh Foam X More v4（絕對唔係廣告，雖然Action Panda真係有得賣，笑） ，着上腳嘅感覺非常柔軟、緩震力十足，好適合我輕鬆跑或者長課嗰陣使用。

4. 於12/8舉行的3球野系列賽第2球 – 大帽山站，有什麼 tips 可建議參賽者？又有什麼要注意？
因為八月都係比較炎熱，我建議參加者要適量嘅補水，帶定幾粒鹽糖，避免中暑。
路段上，前段會大量上斜，大家要適當地分配體力。

*相片由受訪者提供

04 8 月
INTERVIEW

跑步與人：Lily

1. 跑步年資？為什麼開始跑步？
真正有系統練跑應該由 2019 年開始。最初最初開始跑，是因為我「中同」上網搵跑班資料，佢問一唔一齊上？就誤打誤撞開始跑步之路。 

2. 最喜歡的跑步用品品牌？最喜歡一對跑鞋？
New Balance & Garmin，最喜歡New Balance FuelCell RC Elite V2（紫色）。 

3. 有沒有跟跑會或教練跑？選擇原因？
有。睇同教練、跑班同學仔夾唔夾到，仲有上堂地方與時間。

4. 有沒有跑步傷患？如何處理？
基本上很多輕量傷患我都試過😂，目前最嚴重的都是右膝臏骨有輕微撕裂，要全休同勤力做物理治療先會好。

5. 跑步對人生有沒有幫助/改變？
我對自己需處理的事情欠缺耐性及專注力，跑步有助輕微改善。

6. 最深刻的一場賽事？原因？
是2023年澳洲黃金海岸的全馬賽事！因為last minute 先報名、搵酒店、買機票，連練馬都很趕急去練…而且是我第一次跑這麼長的長課練習，加上遇上香港的濕熱天氣，想不到自己衝破重重障礙完成了這場賽事，加上當地天氣、賽道、氣氛好，都應該是一場令我到老仍回味的比賽。

7. 另一半係成功 sub 3，你怎樣支持他？他對你跑步有什麼意見？會否一齊練習？
無論對方 sub 3 與否，我都一樣無條件支持他！他做長課，我做補給者；他去跑步練習就給予他 MeTime，反之亦然。每個向自己目標努力的人，都值得我尊敬，包括我自己（笑）。

我倆對對方的跑姿都比較有意見，因為我們都並非典型的勤力存里數跑手（笑），唯有在跑步期間學習如何省力前進，讓跑步有較好的跑步經濟性及減低受傷機會。 我們配速不同，好少會一起練習，但有重課、長課時都會互換位置陪對方。

8. 有沒有跑步偶像？原因？
好像比較官腔的說法：跑步偶像就是我身邊仍在跑步或依然懷着跑步目標的朋友，因為他們的鬥志、分享、信念等，影響著我亦想向標竿前進。有時他們會跟我一起跑或者領跑，又或者去到不同地方練習，見到他們滿腔熱血，亦感染到我有動力一起跑得更遠。

9. 有沒有因為跑步而放棄了其他運動？
我本身一直都無做運動的恒常習慣，反而接觸跑步後就開拓了我在運動領域的版圖。（於下文第10題詳解） 

10. 除了跑步，有沒有做交叉訓練？（例如舉重/游泳/瑜伽）對跑步有沒有幫助？
有做瑜珈、勁少量 gym (笑），膝頭受傷時期有踩單車、嘗試學游水，轉換/活動不同肌肉都對跑步有幫助，例如游水及瑜珈可放鬆筋膜。 

11. 跑完步最想吃什麼？
不同時期想吃的東西都不同，我甚麼都想吃! 

12. 現時跑步目標是什麼？未來有什麼比賽？目標？
如下題。 

13. 最想到外國哪裏跑馬拉松？
用自己一步一步跑出來的 BQ 去到波士頓。

 14. 有什麼社交媒體可以找到你
IG: laylay.w
FB: 琍奔立跑

*相片由受訪者提供