是次賽事喺約旦 Wadi Rum protected area 舉行，Wadi 係阿拉伯文 river valley 河谷嘅意思，Rum 係 high 或者 elevated 嘅意思。由於沙漠上面紅色嘅沙土，呢度被稱為 Valley of the moon，其實冇咩，呢啲嘢都係上網睇。
比賽出發前，主持介紹 Wadi Rum 呢個地方，講到好耐好耐好耐好耐好耐之前呢度係海底，嗰一刻望住藍色嘅天空幻想自己喺深海中仰望，周圍就係礁石，好似深海入面前進咁。我哋 400 幾個參賽者，全部都係海底奇兵向終點進發。
一路上我哋幾個都覺得自己發緊夢咁。咁寬闊嘅沙漠一望無際，跟隨大會路線指示，望到最遠嗰個路標就 direct bearing 殺過去，務求最直接咁前進，因為中間根本就冇遮擋任你闖。
120 公里賽道內，官方數字大約沙地同硬地各一半，但有好多時候路雖然唔係浮沙，不過始終唔係硬，其實應該連隨一齊嚟計，沙地比例應超越一半，Which means 大部分時間都係同沙戰鬥緊，不過呢啲技術問題遲啲再分享🙌。
Wadi Rum 入面仍然有原住民，不過似乎佢哋都唔係長期居留，因為當中好多已經成為沙漠營地接待旅客之用，所以幾日間都不斷有農夫車接載旅客喺我哋身邊經過。
沙漠入面日間同夜晚嘅溫差大，長期乾燥，多數時間萬里無雲，只要方向正確，岩山就成為我哋烈日下唯一嘅避暑依靠，日夜間嘅沙漠感覺非常唔同。日間既沙漠如狼似虎，有無比力量將你煎熬，將身軀生吞活剝，而夜間嘅沙漠就陰柔莫測，弦月之夜路上根本冇光線，四野漆黑無邊，如果冇指引，漆黑會將你內心磨滅殆盡。
沙漠地帶之所以有地球第三極之稱，係因為呢個極端天氣根本唔適合生物生存
路上只見到少量小型生物，例如蟲，蜥蝪等，甚至望向天幾日間都冇見過鳥類飛過，真正鳥不生蛋嘅地方。
如此嚴酷嘅環境，亦有如此引人入勝嘅風景，所以先有一堆選手前仆後繼參與沙漠舉行嘅極地馬拉松，當中無數人都曾經分享過喺沙漠入面，你會覺得自己好渺小，巨大岩山，難以立足嘅沙地，仲有烈日同黑暗，人類根本就係微不足道，生存必須先要誠實，評估好自己能力，亦都要根據自己能力行事。
「見天地，見眾生，見自己」，係敬重嘅山藝教練國寶 sir 教曉我哋嘅，呢個旅程由環境中我嘅體會係
敬畏大自然，尊重眾生共存，了解自身知所進退。
老實講，我未必會想再返嚟呢度，因為我地已經以最豐盛最 hard core 嘅形式，用腳走過 Wadi Rum 120公里，如果再比賽，我想去其他沙漠感受；如果要同其他遊客一樣坐車遊覽，咁就你玩埋我嗰份喇！所以我覺得自己用咗最深刻嘅方式感受過呢片土地已經足夠，萬分感恩！
多謝你睇到呢度，希望憑有限篇幅同圖片，都可以令你都感受到我哋當時心中嘅震撼🫶🏼！