06 10 月
INTERVIEW, MAGAZINE

黃金海岸15公里賽2023 長跑女生備戰攻略

現時坊間有很多不同風格的路跑比賽，以各種特色或Character Run的形式呈現，以吸引更多不同需求的參加者，然而，一些傳統「本格式」（即以經典形式作為風格）路跑賽依然有著它的獨特魅力，成功留著不少跑手的心。

以「黃金海岸15公里賽」為例，首先，賽道大部分都是平路，超過90%是沿著汀九引水道，其次，只有兩個折返點，讓跑步過程更加順暢。再者，賽道景色宏偉，可以飽覽汀九、青馬兩橋以及藍巴勒海峽；更吸引跑手的是15公里賽事比10公里更具挑戰性，不論是作為TT（Time Trial）又或作為之後的半馬、全馬預戰賽事，估算自己的配速及能力，比賽的時間安排都非常適合大家！

今年，賽事名為「amazfit Cheetah x RMAC 黃金海岸15公里賽2023」，RMAC教練之一的Chloe和跑手Sum女都是首次參加這場賽事，讓我們一起看看她們是如何為這場比賽做準備。

1. 有什麼吸引你參加「黃金海岸15公里賽」？
Chloe：「其一應該係佢嘅景色，中間會見到汀九橋嘅靚景！除此之外，因為佢頭一公里係要上斜嘅，呢個位我覺得好有挑戰性！」

Sum女：「因為我暫時跑過最長嘅比賽係10公里，所以我想今次試下15公里嘅比賽。加上我嚟緊會跑半馬，所以參加佢嚟作個預戰，估計下自己半馬嘅狀態會係點。」

2. 會怎樣準備這個15公里賽？
Chloe：「因為一起步就要上斜，跑斜路體力要求較大，而家已開始練多啲斜路課等身體適應同埋強化肌肉；同時因為15公里同跑開嘅10公里比賽，喺體力同配速上都好唔同，所以會練長啲距離，將平時6至8公里嘅課，增加到每星期兩課、12公里左右嘅。」

Sum女：「因為我而家個課表都係準備緊台北半馬同埋渣打半馬，所以都冇乜需要特別調節，只係加返長少少距離咁去練。」

3. 很多人都會以「黃金海岸15公里賽」作為之後半馬或全馬的預賽，你們都是？
Chloe：「我自己下半年有唔少時間會係海外所以冇乜報大賽。但我就覺得呢個15公里賽，好適合用嚟備戰渣馬同港珠澳半馬、美津濃半馬，或者係海外馬等等，都好啱用佢嚟TT或者作為其中嘅長課訓練。」

Sum女：「好似之前咁講，我預備緊台北半馬同渣打半馬。呢個15公里賽當係俾我一個預計，睇下自己身體狀況同耐力，有冇需要再做咩調節去應付半馬。」

4. 目標時間是？
Chloe：「今次主要係同跑會一班教練一齊參與跑下開心下，for fun咁，冇乜時間壓力！」

Sum女：「希望可以跑到4:00 pace，大概1小時左右完賽。」

5. 會穿著什麼跑鞋出戰？
Chloe：「我會試下對On Cloudstratus 2，開咗對鞋冇耐，個回彈力同緩震都幾好。」

Sum女：「比賽我多數會著adidas ADIZERO ADIOS PRO 3，我比較鐘意啲好『去』嘅鞋！」

6. Chloe你作為跑會教練，有什麼想提醒大家作賽時要注意？上落斜時又需要留意？
Chloe：「通常比賽一起步時都會好興奮！因為頭一公里係上斜路段，所以建議大家要冷靜啲，保留番個體力先。上斜時要保持眼望前面，身體輕微前傾，保持擺手，步頻密少少同時亦記住避免過分跨步，keep住平均嘅步距就可以。」

「接近終點前亦會有500米落斜嘅，到時最好都係要保持番平穩嘅速度。因為都已經跑咗10幾公里，體力都用得差唔多，如果忽然加快或步幅過大較容易受傷或者仆親。希望大家都可以安全完賽，開開心心咁享受呢個『黃金海岸15公里賽』啦！」

amazfit Cheetah x RMAC 黃金海岸15公里賽2023

即時報名連結
日期：2023年11月12日（星期日）
起跑時間：09:00
比賽路線：汀九引水道（九成平路）
集合地點：在青山公路汀九停車場
報名費用：每位港幣 330 元正 *當中 20 元會資助 MercyHK 給無家者身心靈的支援服務

獎項及紀念品

  • 紀念品：所有參賽者跑畢全程者，均可獲得紀念 T-Shirt 乙件
  • 全場首名男及女子，各可獲得 amazfit Cheetah Pro 手錶及現金獎 HK$1,000，各個人組冠軍可得 amazfit Cheetah Round or Square 手錶，亞軍可得 amazfit GTR 4 or GTS 4，季軍可得 CW-X 短壓力褲
  • 各個人組首三名均可獲得 Nike 跑鞋乙對（合共 27 對）
  • 個人組首三名均可得現金獎、各組所有得獎者均可得獎盃乙座
  • 所有獎項及紀念品只可在大會指定時間親身領取，不設預領、代領及補領，賽後將不會補發任何紀念品及獎品
04 10 月
INTERVIEW

馬拉松與人：Darren 柏林馬拉松

今次柏林馬已到尾聲，我見好多人都寫咗好多得獎感受，好似話Darren都應該要寫下，不過未必有人會明，又未必有人會睇晒。😇

其實講真，今埸跑呢個時間真係不似預期，雖然大PB，其實我又冇乜特別感覺。因為一路以嚟，我都打算今次比賽係開4‘10″，即係走around 2hr55min，完全無諗過要跑到咁快。

冇同我一齊練習嘅人，一定會覺得我係出口術或者好似好寸，不過佢哋唔知唔緊要，我唔會怪佢哋。有同我一齊練習嘅人都知道，我從來嘅立場都係要練習辛苦而比賽舒服，所以我過去四個半月嘅辛苦練習，係為咗可以比賽走到舒服嘅配速。

然而今次比賽所做出嘅時間，其實係我平時訓練開嘅「披醒」，所以喺比賽嘅時候，完全冇舒服嘅感覺。 講真，如果真係要走呢個速度而舒服，練習應該要比之前更辛苦。

可惜去到比賽起點線，遇著兩個三十出頭嘅老千，一時話跟我，又一時開355披，完全玩弄我於掌上。

大家睇到我每5km過板時間係20分鐘超靚，其實頭2次過板嘅每km配速好亂 ，有3:45又有4:05，心諗，再跟兩位後生咁走法，我肯定收皮。 於是決定唔理佢哋，自己keep 3:55-4:00 咁走。

可惜因為頭10km 嘅走法消耗太多肌力，30k 開始作抽筋，35k後直頭左、右小腿，左、右脚指輪住咁抽筋，要keep住4:00-4:05咁捱7k返終點。期間不斷咁計住數，我配速要做幾多先至安全sub 3！😵‍💫

如果下次要走呢個配速，練習又未能練到更高強度，就真係唔好再搞我了，做時間嘅嘢交返俾啲後生去做啦！😌

不過總括嚟講，今次呢個行程係開心嘅，沿途見到好多認識嘅香港人，重咁多個都做到好成績。

25 9 月
INTERVIEW

PUMA支持田徑港將 梁筠宜、高澔塱、陳一樂 出戰亞運

我們看到的運動員，大多數都是正向、陽光、輝煌的一面…尤其是大眾眼見他們出發到外地比賽前、上賽場，甚至踏上領獎台一刻。但其實這只是運動員的極細少部分，更多時候，他們都和平常人一樣，有平常人的情緒、思考及需要面對的生活問題，更不用說要付出的，就更多。

3位PUMA全力支持的香港田徑運動員 – 梁筠宜、高澔塱和陳一樂，將於今個星期五（29/9）起陸續出戰杭州亞運的田徑項目，起行之前，Insports Hub就與他們3位傾談過。

梁筠宜：Stay positive, bring happiness

今屆是梁筠宜第二次參與亞運，23歲的她將出戰女子4 × 100米接力和100米項目，本來她對於是次出戰充滿信心，但卻於訪問前一星期，訓練時再次拉傷大腿後肌！ 

現在心情怎樣？
「唔…搵個形容詞先…忐忑！而家距離比賽只有17日，點解忐忑係因為本身都覺得自己操得好fit。雖然（2個月前）世大（世界大學運動會）都係扯到同一個位，但呢段時間都復原同預備得好好，本身亞運係諗住破香港紀錄為目標（梁PB係11秒69，香港紀錄11秒62），本身都好有信心，可惜就喺上星期就傷咗。」

受傷那刻，腦中想到什麼？
「第一時間係安慰自己，跟住當晚就崩潰！但一直都冇喊。成個星期一直都跑唔到，慢跑做drills都唔得，係直到尋晚先爆喊咗一場，不過奇怪係喊完今日又跑得番喎，你見我影相都跑到，可能係喊完之後，抒發咗，個心情同個腦都清晰咗、諗通咗，stay positive, bring happiness，係我今次學到嘅嘢。」

27號上飛機，29號比賽，這段時間借怎樣預備？
「每練完一課都會睇physio，注意番飲食啦，其實整親之後唔開心，都食多咗（笑）！」

那現在亞運目標是什麼？
「個人方面，希望入到semi-final；本來接力係有機會攞牌嘅，我都唔想隊友擔心我，所以都會盡量跑好我嗰棒。」

完成亞運之後，會有什麼計畫？
「完成亞運之後，會休息一陣間，然後準備亞室（亞洲室內運動會）60米賽事；個人方面就讀緊EdU year 1啦，準備想做PE老師，教練亦很贊成我這個決定。」

高澔塱：已不是初哥心態

今次跳遠運動員高澔塱都是第二次參加亞運。比較兩屆，他認為最大不同是心態，上屆自己仍屬初哥身分去鬥，而今屆就成為真正有競爭力的運動員出戰。

現在心情如何？
「少少緊張梗有嘅，但儘量輕鬆啲啦，因為始終第二次去，今次係想多啲享受個比賽。」

和第一次參與時，有什麼不同？
「第一次係抱住學嘢嘅心態，今次就能力好咗啦，有能力去爭獎牌嘅身分，但都唔想俾太大壓力自己嘅，我唔想有背負爭獎牌嘅壓力去比賽，落到場啲腎上腺素自然會上升㗎喇！」

現在覺得狀態怎樣？
「其實早幾個星期有整傷到腰嘅，停咗一個星期嘅訓練，pick up番反而仲好咗喎！可能係俾我停一停，重新諗下之前嘅訓練，refresh一下、沉澱下，反而仲好。」

你之前有去到歐洲集訓，那是一個怎樣的經驗？
「喺歐洲集訓嘅特色係，每一個星期或者兩、三日，就會俾一場賽，所以個強度都keep住幾高。初初唔係好習慣嘅，去咗3個月，初嗰個半月都係練習，後嗰個半月就每個星期都有比賽！我覺得係個好嘅經驗，因為比賽嘅感覺，平時練習唔會有，累積咗好多心態調節同技術嘅修正，所以返到香港每次出賽都用得返啲經驗，裝備得自己更好、發揮得更好。」

今次亞運有什麼目標？
「今次都希望跳番8米呢個成績，因為喺世界賽要有8米先有爭獎嘅競爭力。爭獎牌當然想，就算唔係都希望爭取較高嘅名次，上次係12名，今次希望最低限度入到final、以頭8名完成。」

完成亞運之後，會有什麼計畫？
「暫時都未有咩比賽要預備嘅，最大嘅目標都係想爭取巴黎奧運嘅入場券啦，因為無論排名又好、直接達標又好，都要開始準備。亞運返嚟可能唞一、兩個星期，因為得番7個月左右去爭取積分同排名。」

陳一樂：純粹之心享受跑步

與梁筠宜和高澔塱不同，本屆是陳一樂首次參加亞運會，心情當然興奮。他以16歲之齡高踞U18男子100米世界第一長達4個月，作為 「世一」，讓他增添不少今次參賽的信心。訪問第二日，他會先到中國參加另一個接力賽，然後回港再出發到杭州，出戰4 × 100米接力。

年初剛滿16歲的他，第一次出席如此大型運動賽事，現在心情怎樣？
「有啲緊張呀，因為冇去過咁大型嘅比賽，聽隊友講觀眾席係坐滿晒人，未去過一個比賽係坐滿晒人！」

那教練有和你做一些心理輔導，讓你不會太緊張嗎？
「我鍾意緊張呀！緊張嘅時候先跑得快啲！跑PB（10秒40）嗰次我記得係好緊張，但之後出多咗比賽，放鬆咗個緊張嘅level，今次大比賽，又會緊張番，我鍾意嗰種感覺。」

今次的目標是什麼？
「希望能夠快過我們的seasonal best：39秒66！」

完成亞運之後，回來後會有什麼比賽或計畫？
「返嚟之後會有一、兩個比賽，有個喺廣西，另外亦會去亞室（亞洲室內運動會）等等。」

對於這些比賽會有些什麼目標？
「希望可以破到青年紀錄（10秒38）。」

會希望達成100米sub10的成績嗎？
「會呀，而家慢慢一步步跑上去，預計用一年時間，希望做到。」

你現在才16歲，年紀非常輕，你覺得已跑到現時的成績，會有點太早嗎？
「我覺得時間啱啱好，泰國有位選手都喺16歲跑出超快嘅成績（Puripol Boonson），仲要比我快！趁年紀細跑得快，可以參加到更多比賽。」

說到接力隊隊友會給予自己什麼意見？一樂說，除了技術上的提議，亦說過隊友都好喜歡他一落場就可以好單純地衝衝衝，跑出自己的最快，以真心享受跑步。是的，人大了，思考多了，有時未必可以單純地，用直覺感受跑步的純粹與樂趣。

PUMA Deviate NITRO Elite 2：為打破紀錄而設，為運動員而生

而伴隨著3位香港田徑運動員平時作速度課訓練的，PUMA Deviate NITRO Elite 2就提供了極大的保護性及推動力，它採用了PWRPLATE純碳纖強力推進板，確保穩定性之餘，同時幫助幫跑手發揮最高效率。

NITRO Elite Foam輕量氮氣中底科技，在不會對運動員產生額外負擔下，提供極致緩震和回彈力；輕量單層透氣網面配合PUMAGRIP防滑耐磨橡膠大底，令運動員即使置身不同路況，都能夠擁有足夠牽引力。筠宜就在傾談中對PUMA Deviate NITRO Elite 2有如此評價：「佢比起Deviate NITRO 2輕好多，而且再包腳啲，每一步跑出去都好輕鬆！」

19 9 月
INTERVIEW

陳偉聰 跑往全職運動員之路

陳偉聰在青年組賽事已經為人熟悉，在21和23年渣馬半馬拉松賽事（壯年組）中獲得季軍和亞軍，令人期待在長跑賽事中有一番作為。
誰料回到田徑場上的1,500米中，卻差1秒就打破香港紀錄。

1. 不如先回說一下日本體育大學的那場1,500米賽事。出發前預備了什麼？比賽報名/酒店/賽事如可安排？
機票、酒店、行程全部自己搞。只是在日本比賽報名是需要有 account的，即是要日本屬會才可以申請，於是就透過Queenie（黃尹雋經理人）幫忙報名。

2. 為了這個賽事，賽前訓練了多久？
開始訓練是4月開始的香港田徑聯賽，之後中間跑了5、6場小比賽，用了兩個月一步一步建立起來。

3. 為什麼有到日本比賽的想法？
見到好多香港運動員都有到過日體大，尹卓熙、余顯華…自己都想一試在高水平比賽下做成績。

4. 試過後，跟香港比賽有什麼不同？
天氣都是熱，跟香港差不多，濕度低一點，但因為跑的是1,500米，天氣因素影響不大。
反而是氣氛，在香港跑1,500米，少有一大班人跑，多數我自己帶，當TT（Time Trial） 跑。在日本有人跟，發揮會好一點。

5. 是否達到賽前目標？
其實一直沒有想破香港紀錄，只是想破4（4分鐘之內）。

6. 訓練過程中有沒有難忘事情？
訓練過程是辛苦的，雖然跑量低，60-80k一星期，但練 1,500米的強度很高，而且亦要全職工作。
而且在如此高速下，多數自己一個人練習，要自己迫自己跑快。

7. 將會有什麼比賽計劃？
田聯系列賽4會跑5,000 米。（結果是得到第一名）
因為完了1,500米的訓練週期，今期是5,000米，所以今次系列賽選擇不跑1,500米而是 5,000米。
整個週期是一年，所以再到1,500米會是明年。
現時最終目標是10,000米，所以這次5,000米只是基礎期，主要用作TT來測試訓練強度是否正確。

8. 現時日常訓練是怎樣？
剛剛再次成為全職學生，讀教育相關的課程，會多了時間休息回復。
一星期練六天，星期二休息教跑班。早上一課慢跑，放學後下午練一課練強度。
跟著將會星期二放棄教跑班，全日用作休息，因為休息對運動員來說都很重要。

9. 知道你換了教練一段時間，有什麼感覺？
現在跟王容儲剛好一年了，主要想試不同的訓練方法。
跟他溝通得不錯，理念相似，訓練強度和獨特性都合適自己。

10. 作為一個跑田徑場跑手，坊間田徑釘鞋選擇很少，品牌亦少有入貨來做seeding，比賽時會如何入手？
之前就算有贊助都只是訓練鞋，釘鞋都是自己在ebay或Amazon購買。

11. 雖然你未正式著On 的 Cloudspike，但初步感覺如何？
包腳性比其他釘鞋強，特別有些品牌是 Knit（針織）鞋面，會易於變型；彈性比之前著過的都高。

12. 會在下場比賽試著On的Cloudspike嗎？
先要開鞋，看一看是否習慣。

13. 知道你現時有正職，會考慮轉做全職跑手嗎？
有。所以想達到體院全職運動員資格，1,500米是sub 3:50。雖然門檻有點高，但亦覺得合理，因為的確要到這個時間，在海外才有競爭力。
而以現時能力上計，1,500米是較 5,000米容易達標。

14. 未來想再做教練嗎？
無絕對決定不做教練，只是不想主理跑班，因為需要很多時間和心機。若有需要，例如代堂，沒問題的。
只是現時目標是爭取時間訓練，跑出更好的成績。

14. 未來想主攻中距離的田徑賽事還是較長的公路賽？
主要是想跑田徑比賽，很喜歡穿田徑釘鞋抓地推動的感覺；再者亦想取得體院全職運動員資格。
今年渣馬會轉10k，雖然連續兩年於半馬獲獎，但在主攻1,500米下，跑10k的訓練會比較合適。

15. 有計劃挑戰全馬賽事嗎？
想跑！好想跑！但教練不批准。因為教練建議先打好速度基礎，3年後再挑戰全馬。
始終兩者的訓練強度與量度是不同的。

16. 最後一題，現時個人目標是什麼？
一定是達體院全職運動員的資格，亦即是要破香港紀錄。
以我現時的訓練計劃，下年三月左右會主力做1,500米訓練，6月的狀態應該是最頂峰，希望能達到目標。

18 9 月
INTERVIEW, MAGAZINE

SALOMON香港越野系列賽報名起動 4大高手預戰教路！

為推廣本港越野跑普及化、提升新一代越野跑手技術及水平，SALOMON 於今個賽季隆重推出「 SALOMON 香港越野系列賽」!

一連 5 場賽事，將於今年 10 月至明年 2 月間舉行。賽道特色為參照國際級越野跑盛事 Golden Trail Series powered by SALOMON 而設計 – 著重中短距離、高爬升、加入更強比賽競爭性，以挑戰跑手的速度及技術；除刺激性之外，系列賽的 5 條賽道更包攬香港各條主要山徑的漂亮景色，讓跑手爭分奪秒之間， 亦可體驗香港山徑的不同美態。

左起：張祺豐（KFC）、陸卓廷（Plato）、 SALOMON 港澳區負責人 James Ng、Cam2Sport 負責人 Toby、林成業（火車 Sir）及楊志成（戰神）。

日前 SALOMON 就於 Cam2Sport 舉行了雲集本地越野跑各路精英的新聞發布會。與會嘉賓包括：「SALOMON 越野跑精英培訓班」主教練林成業（火車 Sir）、「Run To Play 越跑跑會」創辦人陸卓廷（Plato Luk）、「戰神跑會」創辦人楊志成（戰神，Joseph Yeung）、「豐山跑會」創辦人張祺豐（KFC，Kevin Cheung）、「SALOMON 越野跑精英培訓班」學員、越野跑 KOL 及 SALOMON 港澳區負責人 James Ng。

左起：kelvin_.kk、Amy Lai、yhlmay、enjoyce.hike、rundeful、Yuki Chan、kinkichuchu。
左起：kinkichuchu、yhlmay、enjoyce.hike。
左起：KFC、戰神、Plato。

3 大越野跑高手 賽前預戰 Tips 大公開！

3 大越野跑精英級嘉賓 – Plato、戰神及 KFC，都會參戰「SALOMON 香港越野系列賽」多於一場賽事，其中 Plato 更會參戰全 5 場！
高手當前，當然要請 3 位嘉賓分享備戰心得！Plato：「2月的香港動力50公里挑戰賽，對我來說是個長距 離賽的挑戰，我比較少玩 50 公里山賽。我會預備多些長課，以加強自己的耐力！

戰神：「針對 Cam2 大嶼山（22.7Km）的賽事，因為我比較少跑大嶼山路線，所以會加強及多習慣該條賽道。」而 KFC 就同樣針對 50 公里挑戰賽教路：「因為攀升幅度大及非常多樓梯，所以建議要做多些攀升及樓梯訓練去應付。」
而同時 3 位教練亦叮囑大家，除了訓練及試路重要之外，預留時間休息及恢復體能，亦不能忽視，才能交 出好比賽表現！

「SALOMON 越野跑精英培訓班」主教練火車 Sir 及部分學員。

推動 x 提升 「SALOMON 越野跑精英培訓班」正式展開！

為推動本港越野跑文化普及、培育更多新一代越野跑手，會間亦同時宣布「SALOMON 越野跑精英培訓班」 正式成立！
經過早前嚴謹選拔，大會由 110 位參加者中選出 30 位有潛質成為精英越野跑手學員，透過主教練林成業（火車 Sir）設計的一連串嚴格訓練，以提升其越野跑能力。首要任務是為出戰 10 月份展開的「SALOMON 香港越野系列賽」作好準備，爭逐前列成績。

作為主教練，火車 Sir 的一連串訓練內容會怎樣針對「SALOMON 香港越野系列賽」，以令學員爭取到優秀 成績呢？火車 Sir：「12 節訓練內容會包括 6 節上山長課及 6 節運動場，會針對斜路、敏捷度及越野跑作出訓練；其中更會有 3 次實戰訓練，正式走一次其中 3 條系列賽賽道，以熟悉路況。」

左起：Jassie、細比、Ryan、火車 Sir。

「SALOMON 越野跑精英培訓班」的 3 位學員代表，莫偉雄（Ryan，上屆 SALOMON 50K 男子冠軍）：「有火車 Sir 作為教練，當然會於訓練上有更大提升，但最主要是想與一眾精英跑手一同訓練，互相鼓勵、帶動，相信會有更好效果！」黃琪珍（細比，上屆 SALOMON 50K 女子冠軍）：「期待於培訓班中改善跑步的速度及上斜能力，令整體表現更有所提升！」
而「SALOMON 越野跑精英培訓班」學員更有機會成為 Team SALOMON 成員，陳嘉欣（Jassie，「SALOMON 越野跑精英培訓班」選拔賽 5K 女子組第一）:「我會於學習上多持開放態度，多點與學員交流，當然亦會遵循 火車 Sir 的教導，爭取成為 Team SALOMON 一員！」

SALOMON 港澳區負責人（Head of HK and Macau）James Ng。

SALOMON 積極籌辦 Golden Trail Series 香港站賽事

發布會壓軸，SALOMON 港澳區負責人（Head of HK and Macau）James Ng 更宣布：「除了 10 月會派出年輕選手到國內出戰越野跑重要賽事『柴古唐斯 – 括蒼越野賽』外，我們現正積極籌辦於出年舉行 Golden Trail Series 香港站賽事！暫時於亞洲區只有韓國及日本兩站賽事。Golden Trail Series 特色為距離短一點，但難度又會高一點，今次我們籌辦的 5 場『 SALOMON 香港越野系列賽』，就是以 Golden Trail Series 作參考。」

James 續說：「透過舉辦 Golden Trail Series 香港站賽事，希望能夠令香港越野跑的水準及文化與國際舞台接軌，並且能夠令更多香港新一代精英越野跑手，參與到年中的 Golden Trail World Series 世界性決賽！」

「SALOMON 香港越野系列賽」選手包、超吸引早鳥禮品及 HK$300,000 豐富獎品

報名及詳情: https://salomontrailseries.com.hk/

2023年10月22日：Cam2 大嶼山（22.7公里）
2023年11月19日：Cam2 大帽山（28.9公里）
2024年1月1日：Cam2 西貢（27.9公里）
2024年1月14日：香港動力 大帽山（28.9公里）
2024年2月25日：香港動力 50 公里挑戰賽（49.3公里）

報名各場比賽可獲得豐富紀念品及即享優惠，選手包包括：
SALOMON 香港越野系列賽紀念T恤（價值$450）
SALOMON 香港越野系列賽特別版層層疊積木（價值$80）
aminoVITAL Gold 1 包（價值$14）
Cam2 $50 購物現金優惠券兩張

– 各場紀念T恤及特別版層層疊積木設計各有不同，報名全部 5 場 SALOMON 香港越野系列賽，更可獲得 特別版層層疊積木紀念盒（價值$120）
– 完成賽事可獲得:完賽獎牌、電子証書
– 特別推加！凡完成任何 2 場或以上「SALOMON 香港越野系列賽」賽事，即可獲得特別版紀念衛衣一件。

– 9 月 20 日或前完成報名全部 5 場「SALOMON 香港越野系列賽」（不需同時報名），可獲得 SALOMON Active Skin 4 Running Vest一個（價值$798）
– 9 月 20 日或前完成報名其中任何3場 「SALOMON 香港越野系列賽」(不需同時報名），可獲得 SALOMON Adv Skin Belt Race Flag 一條（價值$298）

*** 參加者只能享有以上其中一項贈品
*** 有關色款會隨機送出
*** 贈品有機會改為同價值之腰袋

13 9 月
INTERVIEW

跑步與人（COROS SPARK篇）- 鄭文皓

1. Marcus你的跑步年資？及為什麼開始跑步？
4年，當初聽到中學老師問有冇人想加入田徑隊，自己當時冇玩任何運動，聽到好似幾有趣，就好快咁舉咗手，成為全班唯一舉手嘅人，亦慢慢加入咗田徑隊。

2. 有沒有跟跑會或教練跑？選擇原因？
有，Heartbeat，當時係主要跑 800m，但發覺自己身型比較瘦，覺得長跑應該較有利，而且當時 Heartbeat 嘅運動員當紅，自己亦好想跑得快、破紀錄，就喺 IG 搵咗陳嘉威教練。

3. 最深刻的一場賽事？原因？
啱啱 7 月嘅 Gold Coast Half Marathon，打破咗 U20 半馬青年紀錄。做到呢兩年多嘅目標，呢個紀錄亦都肯定咗自己疫情至今嘅堅持同努力，都算彌補咗自己冇得跑學界嘅遺憾。

4. 日常跑步路線? 最喜歡的練跑運動場地（原因？）
西九文化區嘅海傍，我屋企跑去西九大約 3 公里，跑到嗰邊又望住個海，對於慢跑、長課都非常寧靜同放鬆。運動場就深水埗運動場，因為會見到教練，佢會喺度教班。

5. 最喜歡的跑步用品品牌？ 最喜歡一對跑鞋？
Nike，練習鐘意 Pegasus 同 Zoomfly；比賽就 Alphafly。

6. 有沒有跑步傷患？如何處理？
有呀，由今年年頭一月嘅腳外側 stress fracture，之後到三月腳趾發炎，再到 6 月半月板勞損。今年都過得好唔容易，去到 7 月 Gold Coast 前都傷緊，當自己愈想做好嘅時候，反而可能會令心態緊張，恢復得差，操勞過度引致受傷；所以練習真係應該適可而止，consistent 最重要，同教練制定好練習計劃，有時太攰要識得休息。

7. 現時跑步目標是什麼？
現時呢兩三個月都希望注重練習，喺年尾 11-12月，希望可以打破 10,000m，10km U20 紀錄，亦都想再推快自己半馬紀錄。

8. 未來會否挑戰全馬？如果會，會選擇哪個作為初馬?
會，相信全馬同其他項目唔同，係另一個世界，自己好想體驗。初馬嘅地點就想係渣打馬拉松，喺香港比賽特別大歸屬感，沿途聽到廣東話打氣會特別有動力。

9 於 COROS SPARK 你會參加 10KM 路跑賽段， 有沒有比賽 tips 可提供予參加者？路段上有哪些要注意事項？
路段好多上落斜，較易出乳酸，比賽時跑嘅 pacing 應該要控制一下，唔好一開始有力就狂衝，先穩定，再喺後程落斜嘅適當時候加快。訓練上多加斜路同加速跑，亦可以係長課時候加插跑山。

10. 10KM 比賽一般練習應該專注哪方面？會如何應用 Coros 手錶去配合練習？
10km 最重要係速耐，3-4 個月準備。每次嘅訓練都唔應該大辛苦，強度亦應控制於 70-80% full effort（以Coros手錶data作監控）。練習量亦應循序漸進。

11. 有什麼社交媒體可以找到你？
IG: ho_marcussssss

*照片由受訪者提供

11 9 月
INTERVIEW

跑步與人（COROS SPARK篇）- 紀嘉文

1. 跑步年資？當年為什麼開始跑步？
22 年，當年因為無聊跟咗啲朋友去田徑場練習，跑下跑下又覺得好玩，咁就玩咗 20 幾年啦！

2. 你參加過不少比賽，哪一場印象最深刻？原因？
應該係 2012 香港馬拉松半馬，嗰年贏冠軍。其實喺西隧嘅時候被 Kiprotich Thomas 大概甩咗 200 米，最後竟然係中環追番，我自己都估唔到。

3. 日常跑步路線? 最喜歡的練跑場地（原因？）
大欖郊野公園、西貢北潭涌，因為冇乜人，同埋嗰度風景比較靚。

4. 最喜歡的跑步用品品牌？ 最喜歡一對跑鞋？
Nike Alphafly。 

5. 你現時作為港隊教練及半馬代表，你自己怎看這個身份？作為香港代表，又有沒有什麼使命感？
都係咁囉，冇乜特別嘅感覺，都係想大家一齊練習一齊進步。

6. 現時跑步目標是什麼？未來將會參加什麼比賽？
都係跑馬拉松，希望去到亞運。今年去唔到，有少少失望，不過盡力去追求啦，嚟緊可能玩下三鐵或者山賽定向等。

7. 作為教練，你怎看香港的長跑發展？
其實香港嘅運動員都係進步緊，同埋我覺得佢哋俾我哋以前練習嘅方法更加全面，希望將來香港有機會出到個世界級嘅運動員。

8. 於 COROS SPARK 你會參加 10KM 及 50KM 山路賽，今次會怎樣準備山賽部分？
山賽我之前都有玩，不過怕受傷，所以費事影響路賽表現，而家都開始想跑下越野跑，會多訓練腿部嘅肌肉力量，為越野賽做好準備。

9. 賽前又會怎樣作部署？體力應該怎分配？
其實我都冇乜經驗，所以應該都係跟住其他跑手跑。

10. 同時，你有什麼比賽 tips 可提供俾參加者？路段上又有冇需要注意事項？
我覺得 10 月天氣可能都仲係好熱，所以跑手應該量力而為，避免中暑。

11 這類連續式比賽應該怎樣練習？ 應該集中訓練路跑還是山跑？
其實今次嘅 50K 路段難度唔算太高，而且比較多石屎路，所以我都係照返平常練習方法咁去訓練。

12 訓練上，你會如何應用 COROS 手錶去配合練習？
我會利用 COROS 心率來控制自己訓練嘅強度，最重要係避免自己 overtrain。

13. 有什麼社交媒體可以找到你？
IG: gikaman_

07 9 月
INTERVIEW

3球野與人：Marquise & Raymond

1. 跑步年資？為什麼開始跑步？
Raymond：應該七八年左右，以前係因為打拳要練體能同減磅，先一星期跑一次，直到疫情冇得打比賽，冇咩寄託，之後就跑多咗步，慢慢就愛上咗。
Marquise：未到半年。跑步原因 40%係另一半鍾意跑步，佢會成日鼓勵我郁多啲跑多啲；60%係自己想練下意志，學跑步，令跑山路跑技術上有更多進步。

2. 有沒有跟跑會或教練跑？選擇原因？
M：朋友介紹下，今年五月開始join咗Trailblazer，因為喺比賽其間發現，喺路跑嘅路段比其他跑手弱，所以想針對訓練下路跑同埋改進下跑姿，減少受傷機會。

3. 日常練習地點或路線？原因？
R：平時如果星期日上山，我比較鍾意操單M或雙M！
第一：起點終點一樣，又可以泊車喺東涌，可以帶少好多嘢。
第二：我住青衣去東涌算近，交通方便，可以慳好多時間。
第三：大嶼山夏天涼過西貢好多。

4. 最喜歡的跑步用品品牌？最喜歡一對跑鞋？
R：Mountain Martial Arts（MMA），因為每個款都限款，好少會撞款；鞋我就比較鍾意Salomon S/Lab Pulsar SG，因為夠包腳。
M：無咩特別，邊件抵著就著咩，成身都著唔同牌子。跑鞋就最鍾意 ASICS Novablast 3，包腳穩定性高，日常襯到衫，對我呢啲新手嚟講咩 program 都駕馭得到。

5. 跑步對人生有沒有幫助/改變？
R：跑步令我生活規律咗好多，時間管理好咗！同埋明白有句好老土嘅野：沒有奇蹟，只有累積！
M：一個人可以跑得快，一班人可以跑得更遠。平時自己跑都無乜意志撐落去，但有人陪就唔同，死都死埋佢🤣！

6. 有沒有跑步傷患？如何處理？
R：好好彩除咗幾年前試過ITBS外冇咩受傷，嗰陣處理方法係停跑、按摩同休息。
M：2021年頭做過半月板微創手術，不過就唔係因跑步而傷，而係因為放自己一年假，喺香港同我家狗狗四處露營，以前掛住返工無運動，一下子負荷太大肌力不足而受傷。處理方法就係做完手術後露住營休腳，轉咗玩Freedive做水療，療好傷就上返山。

7. 未來跑步或比賽目標是什麼？
R：希望今年唔好受傷，HK100順順利利做個滿意嘅成積，之後專心練多啲路跑，馬拉松可以Sub3。
M：養成跑步習慣，學好跑步減低受傷機會。2023年尾嘅馬拉松可以Sub4；2023年嘅HK100 THE HALF係行住去完成，無點跑過。希望2024年可以跑住完成。

8. 想到外國比賽嗎？會選擇到哪處比賽？
R：最想去旅行順便hea玩CCC睇風景，因為如果認真去比賽，之後就唔會有力去玩。

9. 跑步途中會想什麼？
M：觀察自己嘅跑姿、體感、強度、當下嘅感覺。

10. 路跑跟山跑有什麼不同感受？
M：路跑比較悶，如果路線不變通常啲風景一樣，但山跑就算路線一樣，但落咗場雨已經可以變化好大，望到遙遠嘅山脈風景，好多時都會覺得好幸福。雖然住喺石屎森林入面，但一上到山居高臨下嘅城市風景係香港另一種美，同埋可以見到好多小動物小昆蟲同花草樹木。

11. 最深刻的一場賽事？原因？
R：上年HK100，因為去到尾段上緊針山嗰陣突然肚痛，之後十幾公里又痾又嘔搞到血糖太低，要坐係路邊休息，差啲要撤。
M：2023年頭HK100，原本諗住可以去開大食會。點知自己熱到只係食到橙同罐頭水果…🫠

12. 你們都有一起跑步、一齊練習？怎樣互相扶持？會否於假期時間都去了練習？
R：我地正常星期一、三、日都會一齊跑，不過喺同一個地點但各有各練🤣！
女朋友本身惰性大啲，所以平時假期一定我起身先，然後再叫佢起身，同埋跑完步要買定雪榚俾佢食😂。年尾冬天要練長課時，假期通常都係我自己一個操，女朋友就會專登早啲起身煮早餐俾我食，然後送我出門口。你哋再問我冇得跑步㗎喇…我哋只係假期上山拍拖啫。
M：有時佢去操山我就抽時間Freediving、做下副業、喺屋企陪下狗狗龜龜，做下家務整下蛋糕煲下湯水等男人返屋企🤭。

13. 有沒有試過一齊比賽？
R+M：啱啱3球野比賽嘅兩場：柏架山/大帽山。

14. 於 9/9 舉行的3球野系列賽第3球 – 畢架山站，有什麼 tips 可建議參賽者？又有什麼要注意？賽前可以針對哪方面提升自己？
R：一開頭就要爬升300幾米，記住唔好去咁盡，可以去到引水道先快少少，如果未試過路嘅，記住留力上畢架山，仲有呢條路較多technical嘅路段，著返山鞋安全啲。
M：練多啲長命斜，感受用咩配速最適合自己。

15. 有什麼社交媒體可以找到你？
Marquise:
FB: Marquise Li
IG: Marquiselpy

Raymond:
FB: Wai Ming Ng
IG: wai_ming_ng

*照片由受訪者提供

05 9 月
INTERVIEW

3球野與人：Cherry & Joseph

1. 兩位跑步年資？為什麼開始跑步？
Cherry: 2014 年開始起跑，因為想減肥所以跑步。
Joseph：跑步年資有二十多年。2000 年我去了台北讀大學，一個人身在異鄉，很陌生、很孤單，我開始用跑步「消磨」課餘時間。當時跑步除了「消磨」時間，也「消磨」脂肪；母校國立政治大學四面環山，因此便養成慢跑和行山習慣。

2. 開始跑步時有沒有跟跑會或教練跑？選擇原因？
C: 沒有跟跑會，純粹自己落街跑，沒有系統地訓練。
J : 沒有跟教練或跑會，也因為這樣，我走了很多冤枉路，如果當年一跑步就跟教練，我可以減省好多好多時間，走少好多錯誤的路。
2005 年第一場比賽是渣打全馬。當時回港後，恰好遇上渣馬開始報名，於是踏上了全馬旅途。初出茅廬跑全馬的我，沒有跟教練，也沒有任何馬拉松知識，只掛著一個「勇」字，跑了一半路程已耗盡所有體力，最後非常吃力地以 4 小時 40 分左右完賽。

3. 日常練習地點或路線？原因？
C：日常練習沒有特定路線，練長課會由屋企跑去蓮姐度，約 21k 。原因：又有山又有路。
J : 沒有特定路線，不受地域所限。

4. 最喜歡的跑步用品品牌？最喜歡一對跑鞋
C：ASICS Magic Speed 3。
J : 直到 23 年 8 月 31 日，我是 Team Salomon 成員，仍然會著 Salomon 參加越野比賽。

5. 有沒有跑步傷患？如何處理？
C: 有，膝頭內側痛，要多拉筋及強化周邊肌肉。
J : 一寸傷一寸強，傷患與進步只係一線之間。

6. 知道 Joseph 已完成了六大馬，未來有什麼目標？ 路跑尚有什麼目標想達到？
J：要完成六大馬，話難唔難，話易唔易，我當初訂目標是六大馬全 sub 3，去年倫敦馬是我第六隻六大馬，2 小時 46分 完成，六大馬平均時間是 2 小時 57 分。但我有些馬拉松失手，未能 sub 3，這些我會再補考的，
我已經跑了好多場馬拉松，好多場都能 sub 3，甚至 sub 250，但我仍想 PB，自己係有一個時間目標想衝破，受限於工作太忙，工作、家庭、戰神越野跑會，山賽… 分配上令我未能專心為馬拉松下多些心血。跑完 UTMB，下半年或者會放多些時間練馬！

7. Cherry 入選了 Team ASICS，又成為過 Garmin pacer，覺得自己跑步跟作為 pacer 跑步的分別是什麼？
C：有分別㗎！自己跑步可以竭盡所能，挑戰自己極限；作為 pacer 要做準確及穩定配速，引領跟隨自己的 runner 在目標時間內完成，責任較大，但相對滿足感亦增加。

8.  2 個都有一起跑步，會一齊練習？怎樣互相扶持？會否於假期時間都去了練習？又有否試過一齊比賽？
C：我地有一齊喺運動場跑步的（當 Joseph 慢跑時） ，因為我哋配速不一樣，運動場就一定會遇見對方，可給予對方鼓勵。而我哋假期或去旅行時都會跑步，亦有試過一齊比賽，例如渣打馬拉松及HK100。
J : 我和老婆經常一起比賽，例如倫敦馬、台北馬、東京馬、UTMB、UTMF…. 很多很多。

9. Joseph 開立了自己的跑班，自己跑步跟教跑步有什麼分別？
J：去年成立了「戰神越野」跑會，我開心有一班好好的學生一齊訓練，他們除了很 nice，實力也很強，而且很團結。加上太太 Cherry、我的 sub 3 好兄弟綸 Sir、豪 Sir 一齊協助，還有贊助商及好友幫忙，跑會才能成功運作。自己跑步及教跑步分別是：一個人可以跑好快，一班人可以跑好遠！

10. 兩位各自最深刻的一場賽事？原因？
C：2023 年日本的 UTMF KAI 69k。跑到 12k 舊患出現 ，打後痛住 57k 跑回終點，途中一直堅持著，有喊過又嬲自己點解會痛？最後落斜行也痛…. 但我知道我先生在終點等我、所以我一定堅持跑回終點，最後以14:57 完成，沒有 PB，但贏咗自己。

J : 最深刻一定是 4 徑…麥徑是我最熟悉的山徑，頭 50k 因太輕鬆太興奮，跑快了，到獅子亭半程 50km 才花了 5hrs 50mins 。這樣下去是 11 小時完 100k 的配速！故在後 50k 修正及拖慢，最後 13:21 完成，與目標 13.5hrs 相若。

抗眼瞓能力極差的我，預期第二條徑衛奕信徑會比麥徑慢一點，起步時下著大雨，體感溫度寒冷，這段訂 14.5hrs 完成。凌晨 4、5 點不敵睡魔呼喚，在城門水塘敗下陣來，跌跌撞撞地入了結界，幾經掙扎終於趁日出時分逃出生天，繼續前進。跑到飛鵝山時，開始感受到左腳腳腕有痛楚，沒有處理就繼續跑向藍田。痛楚慢慢加劇，在往太古地鐵站列車內脫了鞋，才發現腳腕紅腫了。用身上的頭巾包著腳腕，勉強跑畢衛徑 2、1 段（後來才知道在超長途山賽鞋帶不能綁得太緊，否則腳脹後會撞鞋頭或鞋舌引起腫脹及腫痛）。

還有兩條徑，不是還有兩段。港島徑 50k 及鳳凰徑70k，這是一個 120k 的距離，傷痛著繼續跑除了超現實，還有超痛苦，但我不想放棄。最後港島徑用了 7 小時 40 分跑到山頂及再 jog 3.5km 落中環 6 號碼頭。在中環碼頭等 30 多分鐘船的期間，我看到一眾好友都來了，那一刻很感動，熱淚盈眶。

到達梅窩，終於展開最後一條徑了。腳腕已好腫好痛，極度痛苦、痛楚；也極度眼瞓，但我不可以放棄，再慢也要完成。我內心只有一句 “ I must finish”。接下來的鳳凰徑，大澳至伯公坳這 20k 應該算是我生平走過最痛苦最煎熬的路段，腳腕傷患令我產生疼痛感。傷痛令我一次過消磨了所有時間，60 小時內完成也不清楚能否做到。下午 3 時尾終走畢鳳凰山，在伯公坳我聽到很多打氣聲、加油聲。

「人生總要為自己歡呼一次！」這一句說話及現場的加油聲，突然刺穿了我的心房，將早已熄滅的戰火重燃起來，大東山往南山返梅窩最後 9k 越野路，我忍著強痛再次跑起來了，豁了出去地直奔，只花了 1 小時 10 分便到梅窩市區，迎面望著綠色郵筒及等了良久的 Cherry和眾多好友、攝影師，這段捱了 16 小時，終於「捱」返梅窩…

有人說跑完一場 42.195km 的馬拉松可以體驗人生；我跑畢 298km 的超級越野馬拉松也感受不了人生，但感受了友情。

11. 知道兩位都想有小朋友，期望未來與兒子/女兒一起跑步嗎？
C：期待玩親子組！
J : 絕對會。

12. 於 9/9 舉行的3球野系列賽第3球 – 畢架山站，有什麼 tips 可建議參賽者？又有什麼要注意？賽前可以針對哪方面提升自己？
J : 第3球畢架山，路況技巧性高，比賽時要多加注意，不要受傷。

13. 有什麼社交媒體可以找到你？
Joseph:
FB: Joseph Yeung
IG: YCshero

Cherry:
FB: cherrycherry cheng
IG: running_cherrycherry

FB: 戰神越野Mars Trailrunning
IG: mars_trailrunning _hk

*照片由受訪者提供

29 8 月
INTERVIEW

跑步與人：Daniel Wong

1. 跑步年資？為什麼開始跑步？
正式開始跑步係 2022 年 4 月份，大概一年幾，因為 2021 年 9 月尾，打咗第二針疫苗後持續發燒，之後入醫院住咗兩星期，出院後發覺身體好弱好潺，又發覺意志好差，所以迫自己做運動，最終選擇跑步；因為跑步辛苦又悶，但係覺得咁樣先有改變 🤣 。

2. 有沒有跟跑會或教練跑？選擇原因？
最初無嘅，之後 Kolor 主音 Sammy 創立咗「頑張」，咁就加入咗，隨後到阿歹創立咗「無名」就直到現在。因為喺頑張嘅時候感受到阿歹嘅教導方式好適合自己，亦都係好短嘅時間提升咗好多跑步上嘅知識同技術，由其心理質素，阿歹經常提醒 「求快先求慢」，變相唔會單一追求速度。 

3. 承上，頑張經常會有自主活動，是什麼原因令你們會自發參與？
最初活動主要係 Sammy 同阿歹發起，例如星期日係假期，會按排大家跑出運動場，又一齊參加好多唔同嘅跑步 event 例如 Kolor x Carbon brews 中環夜跑、飲跑食醉等等。又因大家都好喜歡 Kolor 又會一齊去睇 show，變相好多唔同嘅活動令大家關係好緊扣，即使係團員自發嘅活動都會好積極參加。

4. 最深刻的一場賽事？原因？
最深刻一定係頑張同 NB 紐約馬 vtriual，因為係我嘅初馬😂，第一次感受到訓練嗰種辛苦到往生嘅感覺，亦都確切感受到跑馬拉松係有幾咁辛苦。

5. 最喜歡的跑步用品品牌？最喜歡一對跑鞋？
最喜歡一定係 New Balance，暫時最喜歡係 SC Elite V3

6. 跑步對人生有沒有幫助/改變？
我覺得跑步之後，面對困難同壓力時變得積極咗，會懂得用開心嘅態度去面對，身體本身好多問題又得到改善，個人會有返自信心。因為跑步接觸多咗朋友，對於社交又會開放咗。

7. 見你也有跑山，喜歡跑山還是路跑？
其實我比較喜歡跑山😂！

8. 路跑跟山跑有什麼不同感受？
路跑全程要 keep 住一穩定嘅 pacing，要留意嘅主要都係自己個狀態，所以比較悶，不過有速度感。
山跑就會冇咁悶，因為山路始終唔平坦，又上又落，要留意嘅野多好多，好多變化，變得好有趣。

9. 跑山有沒有遇到奇怪事件？
暫時未有，只係上年逆之男比賽差啲跌落山😂！

10. 現時跑步目標是什麼？有沒有目標比賽？
目標都係想係馬拉松做到 sub3，賽事都係出年渣馬。

11. 有沒有因為跑步而放棄了其他運動？原因？
沒放棄呀！因為都好耐冇做運動，跑步之後反而想參與其他運動。

12. 有什麼社交媒體可以找到你？
FB: Daniel Wong
IG: dedanielwong