1. 跑步年資？為什麼開始跑步？
2010 年，體重火箭式飆升至 190 磅，也產生了不少健康問題，於是就開始了減肥大計。
2 年間每天一直喺 Gym Room 奮鬥，最初只喺後排嘅 Skywalker 機默默咁搖擺，而眼前景象就係前排 Treadmills 上嘅俊男美女，總覺得佢哋跑得又型又快。
直至 2013 年體重已減至135磅，終於鼓起勇氣踏上跑步機上，嗰一刻發現自己原來可以跑步。然後 2014 年就跑上半馬、2015 年就完成初馬。
2019 年更考獲長跑敎練證書課程。就係咁一跑就跑咗 10 年。

2. 喜歡跑山還是路跑？
近年山跑與路跑雙線發展，個人感受兩邊嘅訓練都會有互相帶動同幫助。所以我會答你我凡係「跑」都喜歡。

3. 最深刻的一場賽事？原因？
最深刻嘅一場馬拉松賽事係 2018 年柏林馬拉松。其實自 2015 年完成初馬後，開始多接觸到跑步嘅朋友，了解到六大馬拉松，於是就膽粗粗報名試試運氣，跑開嘅朋友都知要抽籤，心諗邊有咁易中？但世事偏偏就係咁橋，係無乜準備嘅情況下就隻身飛去參加咗我第一隻海外馬。可能因為靚天氣，平坦路線，同埋氣氛濃厚嘅關係，竟然喜出望外咁首次跑入 sub4！

4. 日常跑步路線？

近年跑步練習都會以系統性訓練為基礎，每週課表都好規律。Key Section 都會喺運動場進行，容易調節唔同訓練組合，推介跑步聖地「跑馬地運動場」。而長課就會選就近屋企嘅路線。西進就多上落，由香港仔經域多利道至中環灣仔來回；東進好風景，同樣由香港仔出發，途經深、淺水灣至南灣來回。

5. 最喜歡的練跑運動場地（原因？）
Key Section 都係選「跑馬地運動場」。
– 路線安全，穩定性高
– 容易配合系統性訓練唔同嘅訓練組合模式
– 有時可以約埋其他跑友，互相鼓勵/傷害，技術交流

6. 最喜歡的跑步用品品牌？
有穿著唔同跑步品牌，如 Nike、Adidas 及 Uglow 等，我覺得每一個牌子都會有其獨特性，喺訓練過程中尋找適合自己嘅跑步用品，然後與跑友交流分享，都會為跑步增添不少樂趣。

7. 最喜歡一對跑鞋？
跑鞋一直都以 Nike 為主。自 Nike 革命性研發出碳版鞋，再加上偶像 Eliud Kipchoge 作為代言人， 就已經深深愛上 Nike Vaporfly。鞋身輕巧，鞋面透氣，鞋底充滿彈性，加上碳版帶嚟動力回饋，絕對係一對追求時間嘅戰鞋！

8. 跑步對人生有沒有幫助/改變？
最初跑步係為咗減肥，大家睇到嘅當然係外在嘅改變，而真正發生係內心嘅蛻變。跑上一場馬拉松，就好似走過一趟人生。
起步時，如青少年一樣精力無限，狠狠地衝。走至中段，懷住唔少負擔，只有默默地幹。直至中尾段時，往往就會懷疑人生，有如踏進中年危機。撐得過，一切都塵埃落定！當你跑上多場馬拉松時，人就漸漸變得成熟，面對人生唔同嘅挑戰，都變得從容不迫。
所以我成日話「所有事情變得容易之前都是困難的」！

9. 有沒有因為跑步而放棄了其他運動？
因為唔同運動都有風險，如公路車、snowboard 等，所以當接近賽季時，都會減少進行其他運動。喺不知不覺間就剩低跑，不過我認為一項運動要做得好，其實都要專注。

10. 現時跑步目標是什麼？
路跑仍然以完成 Major 6 為最終目標，Covid 嚟已經消失咗 3 年，希望未來日子可以加快完成，當然都要睇抽籤運氣。另外亦努力以 sub3 為時間目標！

11. 除了跑步，有沒有做交叉訓練？（例如舉重/游泳/瑜伽）對跑步有沒有幫助？
10 年以來都試過受傷，所以都會喺課表中加插交叉訓練，如山跑可以加強協助肌肉發展、重訓可以重點加強主項肌肉能力。最後都要配合伸展 mobility training 等，以減少筋腱受傷。

12. 喜歡什麼時段跑步（晏跑/晚跑）？為什麼？
除咗跟從系統訓練課表，仲要配合工作同家庭生活，所以都冇指定早晚時段，相反每週課表反而會按特定時間場地進行。如 Key Section 就會放工後於運動場進行，長課就會週未晨早開始，咁就可以能更善用時間同配合日常生活。

13. 有什麼社交媒體可以找到你？
IG: fatwing.run