日本旅跑 – 妙高高原

6月中完成了自己首個實體越野跑比賽,亦是首個超馬距離賽事,比賽叫「Rockin Bear妙高Trail Running Race」。

比賽地點位於日本中部新潟県和長野県交界的妙高高原,從東京乘新幹線經長野往妙高高原,全程約2.5小時,都算方便。比賽全長48k,標高在約700-1,400m之間,累積攀升2,000m

6月中本應是日本梅雨季節,比賽前一日和後一日都是微雨陰天,唯獨比賽當日天公做美,全日放晴,氣溫約18-23C,是極度舒適的跑山天氣。

48k比賽的時限是10小時,早上8:30am出發,黃昏6:30pm前要回終點。中途有4個補給站(8172443k),提供清水、可樂、香蕉、冬甩、薯片、塩糖等。

起點至CP1是微下坡,經過稻田、河邊等田野風景,大家都跑得非常舒服。

過了CP1後就開始比較technical的上山路,前幾日一直下雨,即使當日晴天,山徑也很濕滑。但辛苦同時,旁邊的森間瀑布,大量負離子釋放,很爽快。過了瀑布便到了比賽的天梯段,雖然不算長,但原始沒修飾而且幾斜,所以大家都小心翼翼上行。

CP2CP3是在標高1,100m左右的平坦林道環一圈,雖然是正午時分,但都在樹蔭下,非常涼快。 

CP3CP4是先有少許上落然後大落,我在這段追過了約20位跑手,自我感覺良好! 

CP4至終點的最後5k是上暗斜,慶幸體力還能應付,於9小時1分鐘52秒成功完賽。不能做到9小時內有少許失落,但完走了自己的首個山賽,已經萬分感恩!

日本旅跑 – 三浦半島

三浦半島位於東京近郊一個暫時少海外遊客嘅hidden gem。以前住喺東京嘅時候,去過三浦半島東岸海港横須賀,西岸就一直未有機會去。

見到好多日本跑友打咭西岸富士山海景,我都決定跟佢哋跑一次三浦半島!

起步點係JR横須賀線逗子駅,東京市區坐火車去,大概1小時車程,都幾方便。今次路線基本上係沿海岸線南下,經過好幾個可以遠眺富士山嘅沙灘。

亦有當地神社、絕景巴士站、地質公園、菜田、花海最緊要係景靚,但遊客唔多,唔會同人撞相!

路面情況就主要係石屎行人道,沿途有燈位但唔算多,亦冇乜分叉路,如果唔係停低打咭都可以跑得幾順。

終點係京急三崎口駅,可以喺旁邊嘅便利店小休再返東京。其實最初想「綑邊」跑返上東岸横須賀,不過當日太熱而且觀光時間太長,唯有下次!

日本旅跑 – 陣馬山至高尾山

這次選了東京山跑最熱門路線,由JR藤野駅出發,先登陣馬山,然後沿関東山道縱走至大家熟悉的高尾山。

當日舒服天氣,15C,但天陰陰。這種天氣能在路途中數次見到這麼近那麼遠的富士山,超感恩!

這段跑程除了最初1/3的攀升外,其餘路段起伏不大,適合新手;山徑管理做得不錯,有很清晰的路標。

陣馬山頂有展望茶屋可作小休補給,幸運的我在茶屋望到富士山。離開茶屋,往前走幾步,就見到打咭位陣馬山白馬。

往後至高尾山的路不算風景優美,但很能夠感受到森林的氛圍,特別是這天人很少,大部份時間都和森林獨處。

提醒一下,在日本登山,最好準備熊鈴,特別是春天,熊們冬眠蘇醒覓食,如果沒有熊鈴,就用電話播點音樂。一般來說,牠們聽到聲音是會避的。

這次行程的終點是JR高尾駅,以JR駅作起終點很方便。完成後坐火車很快就回到市區,在目黑和朋友居酒屋小聚!

這天身體狀態不算好,而且第一次走,不大熟路,沒有怎麼起腳跑,都是以行為主。下次再來的話,希望可以jog下。 

日本旅跑 – 鎌倉江之電

最受歡迎東京近郊,一定要數鎌倉!

鎌倉位於関東神奈川県,東京市區坐JR一個鐘就到,除咗鎌倉大佛、江之島、湘南海岸外,好多人都為咗坐江之電小火車而來。

江之電連結JR鎌倉駅至名勝江之島,大部分路線近距離沿湘南海岸而行,景觀靚到冇得頂。當中最多人打咭嘅就一定係《Slam Dunk》聖地鎌倉高校前駅!

咁出名嘅線路,剩係坐又點能夠滿足跑友?
所以我決定沿路跑一次。

我喺JR鎌倉駅出發,最初2km喺舊商店街同民居穿梭,充滿懷舊樸素情懷。到達由比之浜後就一直沿海岸線跑,當日天氣好到望見遠處富士山。

接近尾段有running station可供跑友沖涼換衫。我就一直跑到入江之島嘅大鳥居前先停步。

非常推薦呢條鎌倉絶景旅跑路線, 大家快啲plan吓啦!

日本旅跑 – 横浜港

之前分享過4條東京旅跑路線,今次帶大家嚟跑吓東京旁邊嘅另一大都會 – 横浜。
横浜距離東京唔夠一個鐘火車程,觀光點集中喺港未來臨海一帶,即日來回過嚟跑吓玩吓,係唔錯嘅選擇。

建議起點係横浜地鐵港未来線嘅港未来站,呢度連接大型商場同遊樂場,如果朋友唔跑嘅話,都可以行街打咭等你。

開始可以先跑去横浜新港碼頭兜一圈,望返轉頭影摩天輪好靚!
跟住再沿路跑去赤磚倉庫同紅磚牆打咭,再沿海邊跑到山下公園,吹住海風非常爽快。

去到盡頭再轉上港見丘公園,呢度開始進入住宅區,可以同放學嘅小朋友一齊跑公園。

公園連接山手洋風建築區,最後嚟到日式庭園 – 三溪園。鍾意觀光嘅朋友可以留低參觀,愛跑嘅朋友可以沿路折返港未來站。
下次去東京,不妨落去横浜跑一轉,相信你都會有唔少新發現! 

日本旅跑 – 東京心心路線

有冇跑友將會同另一半出發去東京玩同跑?不妨同另一半喺東京留個心心印 💜

呢條心心路線我唔係上網搵,亦冇人傳俾我,係自己腳痕坐喺酒店,睇地圖搵路跑嘅時候無意中發現。呢啲就係非比賽式旅跑嘅樂趣!

我今次跑嘅8k路線主要途經以下大站:

-JR山手線恵比寿駅
-JR山手線目黒駅
-地下鉄南北線 / 三田線白金台駅
-地下鉄南北線 / 三田線白金高輪駅

恵比寿駅至目黒駅嗰一段,係沿住山手線火車軌嘅小路跑,中段有條短短嘅天橋仔,嗰個位可以同山手線火車一齊打卡,非常Perfect

如果條路線近大家住嘅酒店或者出沒嘅地方,不妨試吓搵呢個心心跑下。不過東京咁多大小交錯嘅馬路,我相信你都可能會搵到屬於自己嘅「東京愛的故事」!

日本旅跑 – 隅田川

上兩次同大家介紹咗東京最熱門嘅跑步路線皇居同彩虹橋今次帶大家嚟到東京嘅城門河隅田川(Sumida River)。

隅田川係流經東京市中心嘅一條23.5公里河川大概係城門河3條多啲嘅長度。今次我揀咗最接近市中心嘅一段約12k路程同大家分享。

出發位係位於我住嘅酒店門口三越前地鐵站其實好近東京火車站所以如果大家打算跑來回,亦可以考慮東京火車站放行李出發。 

我先沿住山手線跑落有樂町(銀座)方向,到達商店街之後就直出至築地,到達隅田川,沿河邊向東北方向跑。隅田川有唔少跨河橋,好多都幾靚幾有特色,方便打咭!

跑到大概一半,就會開始見到東京Skytree喺對岸。

我係去到浅草吾妻橋過河,再沿本所吾妻橋商店街往Skytree作結。

想跑長啲嘅朋友,則可以沿路折返東京站;淺嘗嘅朋友就可以入Skytreemall換衫、食飯或者上去影吓相。

係一條唔錯嘅東京旅跑路線!