1. 跑步年資？為什麼開始跑步？
Raymond：應該七八年左右，以前係因為打拳要練體能同減磅，先一星期跑一次，直到疫情冇得打比賽，冇咩寄託，之後就跑多咗步，慢慢就愛上咗。
Marquise：未到半年。跑步原因 40%係另一半鍾意跑步，佢會成日鼓勵我郁多啲跑多啲；60%係自己想練下意志，學跑步，令跑山路跑技術上有更多進步。

2. 有沒有跟跑會或教練跑？選擇原因？
M：朋友介紹下，今年五月開始join咗Trailblazer，因為喺比賽其間發現，喺路跑嘅路段比其他跑手弱，所以想針對訓練下路跑同埋改進下跑姿，減少受傷機會。

3. 日常練習地點或路線？原因？
R：平時如果星期日上山，我比較鍾意操單M或雙M！
第一：起點終點一樣，又可以泊車喺東涌，可以帶少好多嘢。
第二：我住青衣去東涌算近，交通方便，可以慳好多時間。
第三：大嶼山夏天涼過西貢好多。

4. 最喜歡的跑步用品品牌？最喜歡一對跑鞋？
R：Mountain Martial Arts（MMA），因為每個款都限款，好少會撞款；鞋我就比較鍾意Salomon S/Lab Pulsar SG，因為夠包腳。
M：無咩特別，邊件抵著就著咩，成身都著唔同牌子。跑鞋就最鍾意 ASICS Novablast 3，包腳穩定性高，日常襯到衫，對我呢啲新手嚟講咩 program 都駕馭得到。

5. 跑步對人生有沒有幫助/改變？
R：跑步令我生活規律咗好多，時間管理好咗！同埋明白有句好老土嘅野：沒有奇蹟，只有累積！
M：一個人可以跑得快，一班人可以跑得更遠。平時自己跑都無乜意志撐落去，但有人陪就唔同，死都死埋佢🤣！

6. 有沒有跑步傷患？如何處理？
R：好好彩除咗幾年前試過ITBS外冇咩受傷，嗰陣處理方法係停跑、按摩同休息。
M：2021年頭做過半月板微創手術，不過就唔係因跑步而傷，而係因為放自己一年假，喺香港同我家狗狗四處露營，以前掛住返工無運動，一下子負荷太大肌力不足而受傷。處理方法就係做完手術後露住營休腳，轉咗玩Freedive做水療，療好傷就上返山。

7. 未來跑步或比賽目標是什麼？
R：希望今年唔好受傷，HK100順順利利做個滿意嘅成積，之後專心練多啲路跑，馬拉松可以Sub3。
M：養成跑步習慣，學好跑步減低受傷機會。2023年尾嘅馬拉松可以Sub4；2023年嘅HK100 THE HALF係行住去完成，無點跑過。希望2024年可以跑住完成。

8. 想到外國比賽嗎？會選擇到哪處比賽？
R：最想去旅行順便hea玩CCC睇風景，因為如果認真去比賽，之後就唔會有力去玩。

9. 跑步途中會想什麼？
M：觀察自己嘅跑姿、體感、強度、當下嘅感覺。

10. 路跑跟山跑有什麼不同感受？
M：路跑比較悶，如果路線不變通常啲風景一樣，但山跑就算路線一樣，但落咗場雨已經可以變化好大，望到遙遠嘅山脈風景，好多時都會覺得好幸福。雖然住喺石屎森林入面，但一上到山居高臨下嘅城市風景係香港另一種美，同埋可以見到好多小動物小昆蟲同花草樹木。

11. 最深刻的一場賽事？原因？
R：上年HK100，因為去到尾段上緊針山嗰陣突然肚痛，之後十幾公里又痾又嘔搞到血糖太低，要坐係路邊休息，差啲要撤。
M：2023年頭HK100，原本諗住可以去開大食會。點知自己熱到只係食到橙同罐頭水果…🫠

12. 你們都有一起跑步、一齊練習？怎樣互相扶持？會否於假期時間都去了練習？
R：我地正常星期一、三、日都會一齊跑，不過喺同一個地點但各有各練🤣！
女朋友本身惰性大啲，所以平時假期一定我起身先，然後再叫佢起身，同埋跑完步要買定雪榚俾佢食😂。年尾冬天要練長課時，假期通常都係我自己一個操，女朋友就會專登早啲起身煮早餐俾我食，然後送我出門口。你哋再問我冇得跑步㗎喇…我哋只係假期上山拍拖啫。
M：有時佢去操山我就抽時間Freediving、做下副業、喺屋企陪下狗狗龜龜，做下家務整下蛋糕煲下湯水等男人返屋企🤭。

13. 有沒有試過一齊比賽？
R+M：啱啱3球野比賽嘅兩場：柏架山/大帽山。

14. 於 9/9 舉行的3球野系列賽第3球 – 畢架山站，有什麼 tips 可建議參賽者？又有什麼要注意？賽前可以針對哪方面提升自己？
R：一開頭就要爬升300幾米，記住唔好去咁盡，可以去到引水道先快少少，如果未試過路嘅，記住留力上畢架山，仲有呢條路較多technical嘅路段，著返山鞋安全啲。
M：練多啲長命斜，感受用咩配速最適合自己。

15. 有什麼社交媒體可以找到你？
Marquise:
FB: Marquise Li
IG: Marquiselpy

Raymond:
FB: Wai Ming Ng
IG: wai_ming_ng

*照片由受訪者提供

Ruby
1. 跑步年資？為什麼開始跑步？
四年左右。
大約讀完書出嚟做嘢就開始跑步。一開始唔習慣返工經常坐，覺得需要多啲運動去平衡生活。跑步可以自已選擇跑快定慢，幾時想跑就跑，係非常好嘅運動，所以逐漸愛上。

2. 有沒有跟跑會或教練跑？選擇原因？
而家主要跟Blue Monday Running Club（Action Panda）跑，因為同我工作地點好近，收工過去好方便。
而且呢度又可以認識新朋友，二嚟教練團隊每次都有安排唔同嘅訓練內容/路線，都幾好玩。

3. 喜歡跑山還是路跑？
路跑。

4. 路跑跟山跑有什麼不同感受？
路跑比較城市化，喺熟悉嘅環境下跑步都係一種減壓。
而山跑，我覺得可以親親大自然，我都很享受，係另外一種體驗。

5. 最喜歡的跑步用品品牌？最喜歡一對跑鞋？
我最常穿着嘅跑步牌子係Nike；最鍾意應該係Nike Zoom Fly系列。

6. 日常跑步路線? 最喜歡的練跑運動場地（原因?）…
因為跟Blue Monday Running Club嘅關係，我通常會喺觀塘海濱跑步，有時跑去啟德郵輪碼頭，吹住海風嘅感覺好舒服！
第二個地方我會選擇深水埗運動場，因為居住地點鄰近，好喜歡一個人喺運動場放空自在咁跑。

7. 有沒有試過跑步傷患？如何處理？
幸運地暫時都沒有。每次訓練完我都會拉筋或者用按摩槍放鬆肌肉。

8. 最深刻的一場賽事？原因？
我嘅比賽經驗唔多，但係我期待下年渣打馬拉松10公里賽事，我希望可以跑出50分鐘內成績。

9. 除了跑步，有沒有做交叉訓練？（例如舉重/游泳/瑜伽）對跑步有沒有幫助？
都有嘅。除咗跑步，我都有上過瑜伽班或體適能練習，因為我覺得做核心肌肉群訓練對我跑步絕對有幫助。

10. 現時跑步目標是什麼？
我一直希望可以突破自己，慢慢進步。長遠跑步目標都係希望可以挑戰更遠嘅距離。

11. 於12/8舉行的3球野系列賽第2球 – 大帽山站，有什麼 tips 可建議參賽者？又有什麼要注意？
大家加油！天氣熱，飲多啲水！

Jacky
1. 知你快將跑芝加哥馬拉松，有什麼目標？會否想繼續挑戰六大馬？
首要係PB ，最希望做到Sub 3，所以我而家都積極備戰中。
挑戰六大馬拉松一直係我心願，但最近抽唔中倫敦馬拉松，希望抽中下年東京馬拉松啦，哈哈！

2. 除了跑步，你亦有玩兩鐵及跑山，對平時路跑有沒有幫助？
絕對有幫助。因為我當兩項鐵人同越野跑係交叉訓練。
兩者都屬於帶氧運動，相對單一跑步練習，可以使用唔同嘅肌肉，減低受傷風險。

3. 現在工作都與跑步有關，會接觸到很多品牌及裝備，有沒有特別推介或選購建議？
近排我嘅最愛跑鞋係New Balance Fresh Foam X More v4（絕對唔係廣告，雖然Action Panda真係有得賣，笑） ，着上腳嘅感覺非常柔軟、緩震力十足，好適合我輕鬆跑或者長課嗰陣使用。

4. 於12/8舉行的3球野系列賽第2球 – 大帽山站，有什麼 tips 可建議參賽者？又有什麼要注意？
因為八月都係比較炎熱，我建議參加者要適量嘅補水，帶定幾粒鹽糖，避免中暑。
路段上，前段會大量上斜，大家要適當地分配體力。

*相片由受訪者提供

1. 越野跑年資？為什麼開始越野跑？
2002 年第一次參加毅行者到而家玩咗 21 年喇！
當時年少無知，有 friend 話有 team 三缺一，所以就參加咗。但當年冇經驗冇知識冇 Youtube 教學，行咗一半就 DNF。因為唔忿氣完成唔到，就玩返 50 公里賽事去爭取返經驗，2003 年再挑戰毅行，結果 46 個鐘完成，就係咁就上咗癮。

2. 有沒有跟跑會或教練跑？選擇原因？
我自己冇跟跑會。20 年嚟都係同班 friend 一齊玩、交流，有啲就跟咗跑會，有啲就掛靴退隱。
阿女（Gabrielle）就試過去 The Peak Hunter 小朋友暑期班玩咗兩個暑假 。去暑期班係因為見佢好似有少少天份，同埋 COVID期間冇乜嘢做，個個星期由港島揸車去大埔上堂。而且老竇我又可以見下偶像 Chung Sir（黃浩聰）。

3. 跑步跟工作有沒有關係？
我工作係唔需要跑步，但要跑數。不過喺越野跑學識嘅毅力就一定喺工作戰場用得上。

4. 最深刻的一場賽事？原因？
每次阿女好辛苦地突破自己嘅極限，都好深刻。最深刻嗰幾次都應該係爹哋計錯時間，或者行錯路跑到天黑先完。記得 Round the LION 我地行錯路，上咗兩次筆架山，搞到時間長咗，心情又有影響，最後阿女都好辛苦先落到黃大仙完成。

有一次喺大嶼山玩大東鳳凰再棧道落，10pm 先落到東涌 call 的士返屋企食飯。嗰次仲預少咗嘢食，兩個人分咗最後一細包嘅 gummy bear 充飢。另外一次西貢跑過大浪四彎，走到夜晚 10 點到西灣亭，但係夜闌人靜冇晒車又收唔到電話。我要返上山等有訊號 call 咗好耐先有車到。

好彩次次都有驚無險，全靠阿女對爹哋完全有信心冇驚過。諗返起我都有啲唔好意思，但呢啲就係越野跑 adventure 精神。

5. 最喜歡的跑步用品品牌？
Salomon、Asics、T8。

6. 最喜歡的練跑場地/山徑（原因？）
冇時間嘅時候，就穿梭寶馬山/柏架山/港島徑 5 段/衛奕信徑 2 段。
有時間嘅時候，就一定係西貢麥經三四段附近，因為風景靚，亦有唔同嘅路段鍛練上山落山。

7. 為何會想同阿女一齊參加越野跑？
我一路都覺得小朋友係應該周山跑。對上嗰十萬年人類發展都係近一百年先至將啲小朋友困喺個室內地方，要佢哋坐定定唔出聲。
跑越野跑嘅人會知道，透過越野跑係可以學會認識自己，所以想阿女都有呢個認識自己嘅旅程。

8. 小朋友玩越野有什麼困難？爸爸有什麼需要特別準備？
最大嘅困難唔喺小朋友度，喺父母度；要識得放手，唔驚佢跌親受傷，跌多幾次就自然學識點樣平衡。所以阿女膝頭度係有疤痕戰績。
當然其他日常嘅需要都要準備好，例如飲食衣着方面或者路線嘅計劃，要隨時有 backup plan。
最後就係要有好好嘅 EQ，同經常給予鼓勵。

9. 越野跑阿女較擅長哪方面？有什麼最怕？
佢而家最叻係上樓梯同跑落山，試過喺東洋山一口氣 22 分鐘由頂跑到落底。佢最怕嘅當然就係昆蟲同埋爆林時候啲雜草。小朋友亦都相對唔係咁捱得熱嘅天氣。

10. 會否想一齊去外國參加山賽？未來有什麼比賽目標？
當然要玩吓香港以外嘅山！外國地方嘅地形都好唔同。海外嘅比賽就未有目標，但係都 plan 緊同佢行上富士山頂。

11. 會否期望阿女大個女挑戰 UTMB、HK100 這些大型比賽？
一定有期望，因為老竇懶所以都唔知有冇機會玩到 UTMB。想要阿女完成老竇嘅夢想，不過都唔會特別迫，都係培養咗興趣之後隨緣。

之前主要玩 virtual 賽，今年轉玩實體賽，佢好 enjoy 實體賽嘅氣氛同埋最緊要 check point 有好多嘢食。上次比賽係 CP 仲食極都唔肯走。

12. 除了越野跑，有沒有參與其他運動？（例如舉重/游泳/瑜伽）對跑步有沒有幫助？
跆拳道黑帶 2 段，對平衡有幫助。

13. 跑完步最想吃什麼？
蓮姐燒賣！

14. 將於15/7舉行的3球野系列賽第1球 – 柏架山段，有什麼比賽 tips 可以建議參賽者？
成條賽道好好跑，得渣甸山前後有樓梯。柏架山道上白波要上 3km，呢段要量力而為保留實力從白波跑落大潭水塘。落到水塘可以食能量食品，幫助一口氣上到渣甸山頂。渣甸山之後就一路衝落終點。

15. 路段上有什麼要注意事項？
開始 1km 後記住轉右上小馬坑條小路，唔好行錯路！

16. 有什麼社交媒體可以找到你？
Thomas Lee ，主要都會喺我自己 Facebook post 每次嘅跑山相和短評。比賽時間 data 就會喺阿女嘅 Strava 記錄低。