跑步與人：黃俊橋（下）
1. 會以同一對跑鞋進行山賽及路賽訓練嗎？為甚麼？
好少會用同一對鞋去操山同路跑，通常會分開，因為操山對鞋可能每次都著好耐，例如10個鐘，所以啲山鞋會粗著啲嘅，我會揀啲冇咁aggressive、唔係咁比賽型嘅山鞋。通常比賽鞋係會貼腳啲呀、咬地啲呀，舒適程度會高啲嘅；因為我想對腳少啲呢類情況出現，例如唔生水泡、唔會著到腳趾痛，又或者唔會太夾腳，所以我一定會有兩種唔同嘅鞋做訓練 。
2. 你覺得最能影響山賽表現的因素是？訓練／裝備／十卜／天氣？為什麼？
最影響山賽表現係心態，心態決定境界。例如無論你遇到咩天氣都好，懷住個好嘅心態，幾辛苦嘅路程都可以完成。當你識得調整自己心態，就算喺比賽中爛咗啲衫褲gear呀、唔舒服呀，就算係support team我都試過miss過，有好心態，呢啲嘢都唔會影響到你比賽。
3. 有遇到過跑步低潮/傷患嗎？怎樣克服過來？
呢兩年出去挑戰完日本縱斷之旅後，因為受到COVID影響，所以再冇去外國跑，相對地跑步距離同訓練嘅時間都少咗，狀態上都有影響，再加上工作繁重咗，可能身體上又有啲舊嘅傷患呀、勞損呀咁。所以喺未出發去美國之前（TransAmericana 2022），一路嘅操練都係唔夠，要做嘅就係要令自己攞返個身體節奏，例如做返啲體能訓練啦，慢慢用interval去調整心肺功能，去返個比較好嘅狀態，一個合適同正當嘅水平。
4. 你認為香港是適合跑步的城市嗎？為什麼？
香港非常適合跑步，無論跑城市啦，有好多路線嘅選擇，喺新界九龍香港島都有好多沿海同好靚嘅跑步路線；而跑山嘅話，亦比起好多外國嘅地方方便，外國城市分分鐘要搭好耐車先可以跑到山，所以香港其實真係好適合跑步。
5. 到外國參加山跑賽，和在香港有哪些差別？
喺外國參加跑山比賽只可以靠大會嘅補給站，但係香港，除咗大會之外，亦可以去啲便利店、超級市場，隨時買到想要嘅嘢，所以就算天氣真係唔係咁好，或者係難度提高咗嘅話，無論你要咩或者想臨時撤退剪帶嘅話，都可以好快咁返到城市裡面，去到一個安全地方。外國就可能跑嘅路線會比較wild，一啲人煙罕至嘅地方，相對地係危險性會高啲。
6. 可用一句說話總結跑步對你的意義嗎？
跑步對我嚟講係個天賦嘅Talent，可以俾我去用跑步去體驗、去見識呢個美麗嘅世界，用雙腳身心去感受整個宇宙嘅奧秘。所以我會繼續用跑步呢個工具去體驗世界！
