倫敦旅跑 – Camden Town

回帶一下,之前到英國愛丁堡參加馬拉松,到達倫敦後,由於離馬拉松仲有兩星期,所以要搵地點繼續練tempo,既然要練定速課,地點好重要,BnBKing’s Cross附近,原本想返去Regent Park, 奈何距離有啲遠,單程跑去要3公里,而且公園路況唔夠平坦,擔心只專注速度而忽略路面狀況導致意外,所以搵咗個比較近新King’s Cross Station嘅河邊跑!

位置就喺火車站後面嘅Camden!喺出發前搵BnB已經知道呢度有條運河,考慮過住呢度嘅原因就係諗住方便沿河邊練跑,今次雖然無揀呢度住,但同King’s Cross Station非常近,如果因為想方便搭車而住近附近範圍,Camden都係非常唔錯嘅選擇!

一早嚟到運河,沿住火車站一直跑入Camden範圍,會經過幾座商業大廈,過咗橋就見到運河,一如所料,沿河兩邊相對平坦,亦見到有人練跑,河上有船停泊,相信係有人住喺船上,就係咁沿住河邊完成10K tempo!沿途當然有單車、行人、跑友亦有家貓,英國嘅貓都係放養嘅,同香港嘅貓只宅在家好大分別,以我所知,當地人經常喺群組尋貓😆

另外Camden其實係一個幾清幽嘅住宅區,亦有商業大廈,運河固然出名,區內有唔錯嘅餐廳,酒吧、市集、露天劇場!跑完步當然要醫肚!附近有唔錯嘅麵包店及咖啡店,跑完再慢慢享受早餐及運河風景,真係幾重享受!

倫敦旅跑 – Regent Park

自從開始跑步,及跌入精品咖啡深海後,每次出走除咗享受當地風光外,搵幾家咖啡店試、搵幾個地點跑步,已成為每次旅行To Do List!被困三年,我終於再踏上旅途!

如果碰啱時間,揀返隻馬拉松跑下,會令自已更感受到當地風土人情;每一個地方都有好唔一樣嘅體驗,為旅程增添色彩!

今次揀咗5月尾愛丁堡馬拉松(可參考馬拉松與人),由於提早兩星期到達英國展開旅程,所以呢兩星期都要找時間同地點維持訓練,如果唔係要練跑,相信有啲公園同河邊都未必會去,但呢啲地方往往夠地道,可以了解當地人日常生活,如果你唔係一個走馬看花、只跑景點嘅人,反而想搵一啲唔會有旅客去嘅地方,咁就啱晒!

三年無嚟機場,上機前當然要搵朋友歎返杯手沖先!(位置係64 Gate

搭完長途機,課表有20K長課喺weekend ,落機唔理其他,先到BnB放低行李,就跑封Regent Park享受英國Park run。要知道外國唔似香港咁隨隨便便就有個標準運動場喺身邊,較為似樣嘅運動場都要俾入場費(但都唔代表一定有4008線圈),而且按每節收費。

當地人如果要跑步,都會選擇通勤跑或者Park run,今次BnBKing’s Cross站附近,距離Regent Park3k距離,附近嚟講呢個公園夠大,唔使兜太多圈,就係咁一換好衫就衝出去跑!

沿路會零星見到有人跑,跑到公園範圍,更見到有人邊放狗邊跑,亦有其他跑友、單車友向公園方向進發,當然亦有遊人。

喺英國公園無特定活動規範,只要唔阻到人,你做乜都得。公園內有好多路線,四通八達,當中會夾雜草地、石屎地、沙地同泥地,簡直係多元訓練!

開頭原本係園內兜圈跑,但發現個圈細,最後決定跑外圈,順便欣賞公園外建築。一個外圈大慨4.7K,繞咗4個圈,沿途有幾個跑友都迎面碰面幾次,睇嚟大家都練緊相約長課。由於路面唔算平坦,跑時要小心。

另外你會發現隨便一個擦身而過、貌似師奶嘅人都可以跑得好快!曾經想追,跟咗唔夠10秒放棄咗(故事教訓不要以貌取人,高手在民間)!倫敦跑友就係長期喺呢類唔平嘅路面 沙地及泥地練跑,變成生活一部份,難怪倫敦馬年年都咁多人參加,係成個英國高手雲集嘅賽事!

估唔到落機第一站就係跑公園食20K….我都服咗自己!長課後真係幾攰,可能長途機未夠休息,而且要應付唔熟習嘅路面,更攰!雖然攰,不過長課後仍繼續探索外面嘅世界,跑完仲有半日時間,終於全日跑+行一共5萬幾步…搞到連上落樓梯都開始有困難,唯有返去休息,希望經過一晚休息會好轉~

喺英國終於可以見返紅色郵筒,呢度每一個郵筒都印上唔同時代國王徽號,相中係Edward VII1901年設立嘅古郵筒!!