大概講下 yul 係一個咩品牌。
佢係一個以減少消耗、浪費物料同生產過剩嘅一間運動品牌公司。其中喺跑鞋鞋底就用咗比較耐用嘅 Vibram 物料（一般用係山鞋鞋底上），希望可以增加耐用性，而且喺唔同運動之上，都可以運著用到對鞋。
你睇到佢鞋身個 logo 睇落似半棵樹，亦都係代表佢哋嘅理念。
yul基地設於加拿大，其出品包括有路跑鞋、越野跑鞋、衫款及帽款。佢嘅路跑同山跑鞋款都擁有相同型號 – Hummingbird、Swiss Knife同Rager，相信策略係喺鞋款細節上作出調整（如山跑會加入Megagrip大底及加厚膠釘）。
yul 鞋款嘅另一特色，係設計非常繽紛，就好似將啲畫放上對鞋一樣，而佢亦有同藝術家 crossover 嘅版本推出過。呢一方面，相信大家都好容易將 yul 聯想到另一品牌 – Craft Spoetswear。
根據官方嘅講法，今次介紹嘅 Swiss Knife Borealis 係 yul 定性為中性著用，全天候型號，一對適合日常運動嘅前後差 7mm 訓練鞋（Hummingbird屬於快鞋，而Ranger就屬於舒適為主，相信適合優閒跑或復元跑之用）。
最好跑嘅距離長度係 12KM，我就試過著佢跑到 18KM 距離，都冇乜問題。
官方資料，佢嘅耐用度聲稱可以去到 1,000KM，呢個就有待去驗證；由收到鞋至今為止，我總共跑咗 24KM，見鞋底都冇乜任何異樣出現。
鞋面就用咗比較挺身嘅防水物料，而鞋籠包幅性都好唔錯，跑個陣唔會容易走位，後踭位亦有足夠保護性，唔怕刮損腳。
如要數美中不足嘅話，我會覺得佢鞋底比較硬，比以前嘅 AP 膠更硬，需要一啲時間去習慣及run-in。相信而家好多跑友都已經習慣晒厚底嘅彈彈鞋，所以薄而硬嘅設定，好可能未必即時吸引到市場關注。
