New Balance FuelCell Propel v4 不只顏值擔當
配色好fresh好清新！不過New Balance FuelCell Propel v4絕對唔只顏值擔當咁表面嘅。
雖然而家嘅跑鞋分類已經極致化，唔只比賽與練習有明顯區分，當中仲會細分，例如練習鞋都有Tempo、Interval、LSD、Easy Run嘅專屬型號，不過，一對跨界別嘅泛用型練習鞋，點都要有！
如果同一節課要練晒Easy、Tempo等混合練習時，一對鞋都應付得晒；尤其是對長跑初哥，泛用型跑鞋無論喺適應性與經濟考慮都係冇得輸嘅選擇，而Propel v4就係泛用型嘅一分子。
同其他泛用型鞋款相比，Propel v4最特別之處係中底內藏全掌式底板，不過唔係碳纖，係TPU，唔似碳纖咁推咁aggeessive。實測時，發覺TPU嘅推進力唔係冇，但只算輕微，就似凍檸茶少甜；反而最明顯係穩定性，對應標榜高緩震高回彈仲係雙層組合嘅FuelCell泡綿中底，正好過濾咗高彈性泡綿易晃動嘅天性。
呢個組合，既有充足嘅緩震與穩定表現，又保持到不俗嘅速度感；比起同屬NB嘅860、880等傳統穩定型跑鞋，Propel v4更適合Tempo、Interval等速度練習。
另一方面，雖然依家厚底當道，但係Propel v4未有盲目跟風，前後高度分別為25與31mm，屬於中等水平，新手都好易適應，唔使run in，而Heel to Toe Drop只有6mm，係有助加速，尤其是中前掌落地跑法嘅設定。
鞋身方面，網眼表層嘅透氣度相度高，配合穩定、緩震、速度都兼顧到嘅中底，應付20km以內嘅LSD都做到舒舒服服。
而且鞋頭空間夠晒闊，絕對應付到亞洲人腳形，甚至筆者有跑友着開US 8，試着筆者嘅US 7.5反而仲fit，不過對腳掌偏窄嘅跑友嚟講，最好試埋細半號了。
the last but not least，今次實測嘅清新配色，喺香港係Runderful獨家有售！
