1. 跑步年資？為什麼開始跑步？

之前有另一本跑步雜誌嘅訪問都有提過，我自小被診斷先天性盤狀半月板異常，膝部會比一般人容易受傷，亦做咗手術修正，醫生勸告不宜運動。直至11年前我出於好奇心，心諗愈睇起嚟不能夠做嘅事，就愈想嘗試。而且，咁多年嚟做其他運動（例如滑雪）都無大問題， 即管俾自己試下跑。短短幾個月內發覺原來我都可以一口氣完成10K！無幾耐就發現自己染上跑癮！

2. 選擇跑鞋的第一個條件是甚麼？

可唔可以多過一個條件？我要求嘅條件係靚、輕盈、透氣，同時又穩定。

3. 最喜歡的跑步用品品牌？有沒有原因？

NIKE！識得我嘅朋友都知我係NIKE超級FANS。原因好簡單，因為款式多，有型又靚，質料耐用兼透氣。有時真係唔買都對唔住自己。

4. 最喜歡的一對跑鞋？

Nike ZoomX Vaporfly Next% 2。

5. 有遇到過跑步低潮/傷患嗎？怎樣克服過來？

跑咗咁多年，我經常都有唔同程度嘅傷患。除咗之前提過我膝頭嘅問題，腳踝同腰都曾經困擾咗我好一段時間。受傷低潮既時候，最緊要知道自己身體狀況，唔需要加強訓練，甚至完全休息。

6. 甚麼時候開始有想成為Pacer的想法？

由於工作唔定時，覺得自己唔會夠時間去training，直至疫情前都無諗過做Pacer。到一年前有Pacer朋友邀請，了解後知道做Pacer目的係幫人達到目標，係能力範圍內透過自己興趣去幫人，何樂而不為？

7. 現你身為品牌賽事Pacer，你覺得成為Pacer要具體哪些條件？及對你的跑步有甚麼影響？

同我工作一樣（資深空中服務員），做Pacer首要條件係服從。遵從教練安排指定配速，加以練習，保持穩定發揮。另外要有助人嘅心，喺賽事中協助參賽者邁向目標。做咗Pacer對我跑步有正面嘅影響，因為有專業教練團提供多元訓練，增進咗我跑步知識。透過Pacer活動，亦可以感染到其他人，堅定我一直以嚟堅持跑步嘅信念，JUST DO IT。

8. 有沒有喜歡的日常跑步路線？

平日訓練會揀美孚至昂船洲大橋底，來回剛好10公里。如果練長課，就會選擇靑公。因為風景靚，空氣好，而且配套充足，有洗手間又有汽水機。

9. 喜歡一個人跑還是一班人跑步？為什麼？

我比較鍾意一個人跑，因為較彈性、配合到我schedule。另外，一個人跑嘅時間可以更加留意到自己呼吸同跑姿。

10. 你認為香港是適合跑步的城市嗎？為什麼？

其實我覺得香港對跑步相對唔係太方便。香港路面人多車多，留意交通會令我跑步時分心，增加受傷機會。加上夏天又熱又潮濕，比較辛苦。

11. 跑步跟工作有沒有關係？同時跑步有沒有影響到你的工作心態？

跑步跟工作有相輔相成嘅關係。跑步為我帶來正能量又良好嘅體魄，令我保持一個好嘅狀態去工作。而且跑步令我保持樂觀心態面對工作。因為跑步會遇到唔同嘅障礙，只要保持信念及決心，最後會有唔同嘅得着；應用到工作上亦一樣，飛機上時刻會有唔同挑戰同突發情況，只要時刻保持信念及決心，臨危不亂，處變不驚，最終都可以解決到問題。跑步如是，工作如是，人生也如是。

12. 如遇上工作太忙或不容許跑步時，會怎樣安排或調整？

2021年試過兩次35日「閉環式」工作，期間冇得外出。每次喺酒店隔離時（除咗食同瞓…）會做HIIT同拉筋，希望可以保持狀態。

13. 除了跑步，有沒有做其他運動（如游泳/瑜伽）？得對跑步有沒有幫助？

夏天會潛水同wakesurf ，冬天會行山同滑雪。唔同類型嘅運動可以刺激到唔同肌肉群，對跑步都有唔錯嘅幫助。

14. 現時跑步目標是什麼？

跑出健康美麗人生。同時希望帶到正能量影響到更多身邊嘅人跑步。

15. 可用一句說話總結跑步對你的意義嗎？

放棄是一秒鐘的事
堅持是一輩子的修養

16. 有什麼社交媒體可以找到你？

FB: Ida Chan
IG: ida___chan