馬拉松與人:Peggy 名古屋女子馬拉松

2019年9月,我膽粗粗報名參加名古屋女子馬拉松(名馬),怎料三年後才能正式跑這場初馬。
202210月,在各地開始所謂復常之際,名馬也開始接受報名。我選擇在三年前停頓的那一點砍掉重來。

定了目標,便要認真準備。
以為練習馬拉松一定會很辛苦,這5個月以來我卻很享受每一課,尤其教練把我從錯誤跑姿改正過來;跑班朋友們一同練習,又給我很多提醒;加上改掉晚飲食作息的壞習慣,每個time trial都見進步,開始定下比原先4個半小時快一點的完成目標。教練的建議是,保持5:40/km就可以穩定完成。

名馬當日早上五點多便起床,預早去會場寄行李去洗手間再熱身。幸好天氣不算凍,甚至有點暖,完成排洗手間這一關,正式上線。

因為排得比較後,大會時間開始了9分鐘才到起跑線,又塞了3k女人後才可跑回自己pacing。雖然落後不少,天氣又曬又乾,但記住教練叮囑不要急於1k內追回所有時間,所以我keeppacing,心率正常便一直去。 

果然30k之後才是真正的戰鬥。右腳踝和左腳ITB舊患開始出現狀況,每次出入水站因為人多,又有點吃力。名馬的路況良好也很少變化,所以愈跑愈精神恍惚,唯有不斷自我安慰:「仲有10k咋」、「腳有少少痛啫無事嘅無事嘅」,甚至幻想眼前的女跑手都是平日練習的師兄們(!),感覺頓時良好😌

到最後4k,開始下雨了。「幾攰都撐埋落去呀」我又自言自語。到尾段時,聽到站在路邊拿著啤酒的朋友大叫我全名,真的很感動,本來累透的我突然有力加速,衝向傳來〈Dancing Queen〉的會場,帶著有雨有汗有淚的臉,出盡全力衝過FINISH…終。於。完。成。喇!🥹

完成時間04:00:56。雖然就是差了56😆,但我依然很快樂。三年前的我根本無法想像可以笑著跑完全馬,由衷感謝一直陪伴的教練和朋友們,以及最強的應援小隊,還有自己的勇氣和堅持,不然就走不到今日。少少的遺憾就留待進步空間給自己,下次再追回來吧。

記得每次練習遇上極端天氣或者好累時大家都會說:「跑咗係自己嘅」!真的真的,努力過都是自己的。
初馬快樂🙂!

(按:親友可以進入會場見證衝線的跑手,但朋友因為打氣啤酒而被拒進入會場😆

馬拉松與人:P 名古屋女子馬拉松

*賽前部署*
比賽前已經同教練溝通咗,目標係維持5’35” pacing,有落斜就順勢落,留力到34K左右上斜,過咗40K暗落就順勢衝番終點!前半盡量保持5‘30” – 5’35”,必須提醒自己唔好俾人帶快,過咗30K就憑自己感覺跑,盡量唔好喺水站暫停留過久。

*起步前*
一早起身即刻食定之前一晚便利店買嘅飯團,由於食咗4日三餐嘅關係,個飯團真係好惡啃;大會時間9點起步,一早7:30到會場drop bag 同熱下身,一直都好擔心中途肚痛急s💩,終於可以起步之前了咗件心事🤣。

*起步*
起步喇!跑唔郁啊🙈!太多人好似行花市咁!頭3k都因為太塞人,要不停左閃右避,實在係混雜!我懷疑係報名嘅時候我寫自己Target 5 hours完成所以編排我去呢一組😅,咁係嘅,我當時真係求完成呀嘛🥹

*腳痛*
到4k開始鬆動番少少,可以用自己pacing跑。因為想追番少少時間,所以先用平時Tempo pacing 5’10” – 5’20”跑,之後去到16k左腳舊患後腳跟開始痛!點解咁唔聽話呀?而家先16K,點捱到完😭?唯有慢慢放軟番腳步到5’25” -5’30”左右,一直到20k。

一路跑,一路幫左腳腳腕打圈,順時針轉下又逆時針轉下,喺疼痛嘅過程中係咁同自己講:「冇嘢嘅痛之嘛!跑跑下就會唔記得痛」但真係好L痛啊媽的🙈,之後我個腦用另一個策略同自己講:「你平時每個星期LSD30k啦,普通料嚟,而家先20k,頂硬上啦~」、「你睇前面個阿婆都跑得快過你」媽呀~腳痛令到我好似有少少精神分裂,不停咁同自己激情對話🙈。

*中段*
20k-30k呢一段可以話係相當難頂……腳已經攰到仆街了,個腦要同自己講好多激勵嘅說話!而且呢段突然出太陽,好熱好曬,每次經過水站除咗飲水我都要用啲水淋身降溫!

呢段路最重要係留力,食gel同食鹽丸少不免,好彩路邊一直有好多人打氣,佢哋嗌得咁激烈,自己都唔好意思停低同放太慢!呢段pacing大約係5’30”-5’50”

*尾段*
30k之後我而家諗返起都冇乜印象🤣,但我好記得自己望過吓隻錶,知道進度唔錯,只要6分披以內都應該可以sub4

雖然好似好穩陣,但條路未跑過,又唔知GPS準唔準,所以我都加快腳步,希望拉返少少時間等自己鬆動啲,但明明對腳已經踩左油,但隻錶show出嚟個pacing都係慢嘅🙈?原來對腳已經唔受自己控制😭30k-40k pacing大約係5’40”-6’10”,要sub4真係有啲抆水,點算?

*衝線*
最後2k得番15分鐘左右喳😭,但尾段係暗上斜再加落雨,我真係好想停低行呀😭,好攰呀隻左腳,好似全身中咗天馬流星拳咁!個腦入邊爆晒粗😭🙈!

剩返1k我聽到有人大嗌「阿p」!好開心🤭即刻上番力,雖然話上咗力,但爆到盡都係5‘30”,最後面容扭曲住咁衝線🙈,衝線果刻睇下錶,時間係3:59:04,即刻喊咗出嚟😭!好感動😭!我嘅初馬完成咗啦!我個sub4目標都完成到啊😭!真係要多謝腳腳冇抽筋,有好多人要多謝,當然最緊要係多謝一直冇放棄嘅自己😭

馬拉松與人:Coco 名古屋女子馬拉松

相隔5年,終於完成第二隻馬拉松。
仲記得初馬嗰陣練得唔夠,膽粗粗同阿哥報咗渣馬全馬,最後當然跑到一pat屎咁!

今次名古屋女子馬拉松,大家都俾好多支持我,話我aim 3:45都太保守,但我一直都無信心,因為跑之前又病過、腳又痛過、番工又忙以致成個人都好緊張,上線前一刻都好驚,驚到落尾!

— 這是一條跑緊步的分隔線 —
天氣比想像中熱,warmup完著住件雨褸都出曬汗,明明天氣報告話陰天,點知勁好太陽,未出發成身都已紅係汗。
9:10 起步,因為我排G組,所以遲4分幾鐘先上到線,一開頭塞車係必然嘅,由於我aim 3:45keep pace 5:19min/km就可以,勉勉強強都可以追番時間;頭20k我都可以within預計時間,我仲以為今舖ok應該穩陣啦☺️~

— 到底發生過什麼事 —
但跑到23-24k 右邊腰好鬼痛,我一度以為自己可以忍到,但跑到30k痛到停低,嗰陣喺度諗:「我喺咪會完成唔到?」心裡有十萬個不甘,但我腰太痛,嗰下一定要停低。好!咁唯有跑下停下,目標要下調,盡量3:50ok
我每2.5k就會停低飲水,唞一陣再跑,啲痛都係有增無減,頂到42k停低咗。我俾咗10秒時間自己,最後99衝番去終點😂,望一望錶,3:51:32,我總算叫完成到。

— 終於完成 —
番到終點,第一時間想搵二寶呀唔係,係輪椅😂!腰痛到側埋一邊行,見到禮服男都無力睇邊個靚仔啲😂!行咗好耐 終於搵到 @misslaichukong,啲眼淚真係忍唔到流出嚟,好唔甘心跑到咁差,覺得好辛苦,忍咗17k 嘅痛,終於可以唔使再忍!

— 賽後檢討 —
自知不足,我諗我都係要做番好基本功;stregnth training要做、拉筋放鬆嘅都要做。賽後一日感覺唔算好攰,感覺上我未盡全力去跑;但遺憾要留俾下一次全馬,我一定會再接再厲🥹

馬拉松與人:June 名古屋女子馬拉松

終於都完成我個big project lu😙,總結下先,「跑到入330滿意,但未滿足😝!」
「有練習,願意俾時間,我得人人都會得,唔試你點知?」

呢個330 Project 係準備咗好耐,多謝身邊一直有一班志同道合、齊上齊落嘅朋友,肯定我陪住我!

312號名馬,9:10am開跑,因為太多嘢要準備,5點幾要起身,73寄袋、warm up…當日天氣係嚇親,熱到痴線,真係不似預期,平時無乜汗,但果朝warm up都爆晒汗,心都淆一淆嘅,帶唔夠鹽丸😰F區起步,朋友話預咗要塞,所以有晒心理準備,最後用咗307秒去到起點。

起步非常非常非常擔心同緊張,因為人多到係無可能跑,不斷喺「密質質」嘅女人堆度穿插穿插左2k,第3k開始跑得返目標pacing,穩陣地先做到均速,睇下自己乜料先,果時心裡面係「塞兩k,唔怕,跑順慢慢賺返,唔好亂」。
跑緊頭段一啲都唔輕鬆,跑到10k同目標預定時間有差,開始緊張,對腳即刻攰咗一下,個心沉咗一下,兩秒調整返:「無嘢嘅,追得返,仲有成30k有時間」,的確過咗10K就無攰,繼續專心走,到16k見到Shita cheer me up咗一下,當時狀態唔錯,但仲蝕緊,繼續一路跑一路留意自己狀況點

下一個cheer me up27k,見到Shita又醒一醒,繼續順走舒服,gel、鹽丸、BCAA食齊晒,印象中都好似仲蝕緊,但仲有信心,「係無問題嘅、handle到嘅」,大概30k左右見時間終於有賺,個心安樂咗,但未敢大意住,無信心加速,勁怕爆🥺,所以幾秒間決定繼續走均速,到3536k開始個人少少呆又係食鹽丸嘅時候,原來又到cheer me up point(仲呆緊嘅時候)Shita🎥:江麗珠加油,頂住呀!

好好好,繼續吖😝,之後都均速去跑,沿途有嘅📷都有把握到嘅✌🏿,專心跑跑跑呢個時候真係個「意志力」要出嚟喇🤨,繼續均速(唔好跌出5pace),誰不知到大會嘅41k時左小腿後面有少少反應(個心離一離,唔係呀想抽筋,你咪呀大gor),得得得唔衝嘅到咗42k喇,正想轉入會場(真係轉個彎就到🥺),到右邊有反應,想抽🤯(唔係呀😩又),生性呀!再望一望錶,ok嘅目標內嘅,要靚住咁過終點呀,做好表情管理呀🤩,轉入會場嘅地氈位真係開心到加左少少咁過終點,YEAH🥳!我最終3:28:49 Bib time,安全🤩!(最正係無抽出嚟,仲笑得出,好緊要🥰

過終點一刻其實開心嘅同時係有覺得自己可以做得更加好嘅,些少可惜,即刻覺得自己平時練習上有咩做得未夠,有咗今次經驗,我信心大咗,第一次做時間咁去跑馬,原來「我可以」,今次係「滿意,但未滿足🤨」!

跑完喇,多謝我自己,好俾心機練習!

終於可以去玩去放鬆,多謝您倆陪響我身邊,同我去玩去relax去飲飲食食🫶🏾 @shita_cheung @chiting.lee 。

要好好多謝一啲人先🫶🏾:
Edward、@dylanlee0513、@edward_lo、@joechung2314、@jordan.cct、Vi姐、Connie、蓉、全馬組嘅大佬 @farlau、@jasontso、教主 @johnsondio、@ryan_tangg、@fung.lauf、郭智勝 @sing_kcs。 

多謝Nike多謝So sir @sohoinam 俾我有機會喺Pacer team一邊練習,同時裝備自己,成就咗今次嘅3:28:49🫱🏾‍🫲🏿!

我真係好珍惜好享受每一次Pacer training每星期日嘅長課🥰!

多謝每一位支持我,鼓勵過我,同我分享跑步嘢,一齊跑過嘅朋友仔🫶🏾!
多謝多謝多謝大家!
我會努力練習,成為更加穩陣,游刃有餘嘅跑手,下次一定要更加好,加油!

馬拉松與人:Cherry 名古屋女子馬拉松

Official Time:3:45:01
Net Time:3:41:27
又傻又開心的初馬!
傻的是人叫我報我就報,當時連半馬比賽都沒有參加過的我,就傻傻地報了名古屋女子馬拉松。

開心的是我可以順利完成並做到目標時間。由未開始訓練前自己目標sub430,到訓練中期,教練覺得可以sub4,再到後期可以調整至sub340-350。最後我跑出來是中間sub345內,我自己很滿意,因為是開心完成!好好的回憶!

當日的氣氛很好,沿途都很多人打氣,好開心。比賽前我跟朋友說,我要笑住跑,享受我的初馬,時間其次,順利開心完成最緊要!他們都說,跑馬好辛苦,不會笑得出,但我做到了!我大部份時間都是面帶笑容的,除了太曬加上斜與胃痛的那段時間比較辛苦外,其餘時間我都不停提醒自己要開心享受比賽。

其實我個人覺馬拉松精彩之處是訓練過程,比賽是幾小時的事,但訓練是幾個月的事,由11月到3月,這4個月讓我重新遇見自己。

跑步,讓我更認識自己,無論是身體上或精神上。慢跑給予我許多安靜思考的機會,無形中處理了許多我的情緒及壓力,相對以前性格變得柔和了些。
見到自己衝破了許多身體上的極限,挑戰自己的感覺很自虐亦很滿足。
訓練過程中亦有沮喪的時候,要學懂接受、消化、處理,再重新出發。慢慢地我也將這機制帶到日常生活中去處理問題。

堅持到底是對自己的交代,既然開始了就沒有停下來的理由。中間雖然有傷患困擾,訓練受阻,但還是盡量完成大部份訓練。
另外,我開始練馬拉松後有個很深的體會,就是不要介意在哪裏開始,只要踏出第一步,那裏就是好開始。
最後,心入面好感謝曾經與我一起練跑的你你你、鼓勵我的你你你、為我打氣的你你你……

馬拉松與人:Candy 名古屋女子馬拉松

人生第三次馬拉松順利完走
時間 3:29:09 Sub 330成功
比上次PB咗10分鐘

剛好見到名馬海外報名,又咁啱幾位跑班姊妹想跑馬,所以順理成章地,「名馬」就作為我嘅第三場馬拉松喇!

練跑篇 – 5個月課表跟到9成,有時夜晚無時間返跑班就攞program,晨早去運動場練,練完趕返工;有時為咗儲里數就連lunch time得一個鐘都唔放過,真係比返工更勤力。

長課篇 – 每個週末「晨7」都自動出現係九龍仔打無盡既8字圈,記得有一次30K長課肚痛,洗手間都去咗4次,真係痾到手軟腳軟,好彩有九仔嘅「村民」一齊跑先可以頂埋,所以一班人跑更遠係真嘅。

比賽前篇 – 比賽前一日同名馬團友輕鬆晨跑,早上8:00出發,街道人同車都少,空氣特別好,與其講係晨跑不如話係觀光跑,順便緩和下緊張嘅心情,我地由酒店跑去白川公園,係相當舒服嘅一個地方,同時都係名古屋城市馬拉松(半馬)終點。

比賽篇 – 嚟到比賽當天,氣溫唔算凍,大概係14-15度左右,天陰,係跑步好天氣,我地由酒店到起步點名古屋巨蛋大既用咗40分鐘,合照後就喺空地做簡單熱身,快速又手忙腳亂咁寄完行李,洗手間都嚟唔切去就要準備上線!
強烈建議跑日本馬嘅朋友一定要提早到,至少預20-30分鐘去排厠所,因為人多到你會驚😂

比賽前教練叮囑「順住去」,所以一開始都順住自己感覺跑,但可能真係太興奮關係,越過咗330集團,仲超咗自己半馬PB時間,唯有立即修正開慢啲,到30K時感覺到小腿肌肉開始作怪,即時飲抽筋水,真係好難飲⋯ 但感覺有用嘅,之後天氣放晴開始轉熱,每入水站基本上都攞一杯水同一杯運動飲品,一杯飲一杯淋身降溫,如果水站有埋可樂就好啦🫠!

35K左右,人生第一次跑步抽筋嘅成就要解鎖喇!仲要係傳說中嘅左右腳輪住抽,唯有停低路邊稍稍拉一拉,鬆咗再上路,入咗兩次噴霧護理站,因為係自助,所以你可以噴到夠先走,跑完出返跑道仲有5星級嘅歡呼聲,不過我只係聽得明果句「奸爸爹」😆

中間果位就係執我返嚟嘅330 Pacer。

一路頂到去差不多39K終極大抽筋就嚟喇,連企都企唔穩嘅我就跌坐咗喺路邊,一路睇住自己兩嚿小腿肌肉硬化,果刻我諗我係咪玩完?!🥲

係我徬徨無助嘅時候,路邊有個日本大叔好肉緊咁同我講嘢🗣,我只可以對住佢苦笑,同時330 pacer跑過我面前啦!仲係咁做手勢叫我起身,又係同我講一大堆日文,我諗佢係叫我跟返上,果該我同自己講:330無放棄我!我仲有希望!然後就試吓慢慢起返身再跑,不停叫自己唔好急,跟住佢返去就得架㗎喇!

我諗最後呢幾K係人生暫時跑過最漫長嘅一段路,一面擔心會唔會再抽,一面又緊張仲可唔可以330,但教練講過跑馬拉松要好專心,所以…死就死啦!咩都唔好諗,跑就對了!

終於見到巨蛋啦!聽到裡面播緊既〈Dancing Queen〉 ,今次真係轉個彎就到!
望到大會個鐘仲係3:29果刻真係由心笑出嚟加鬆咗一口氣,衝過咗終點嘅時候都覺得難以置信同好似發緊夢咁⋯🤣!

後記 – 馬拉松42.195公里裡面每次經歷都唔同,跑一場馬就好似上咗一課咁,而當中嘅甜酸苦辣逆境挑戰同完成後嘅滿足感,可能就係馬拉松吸引之處。跑步唔需要同人鬥,覺得自己有得著有進步就好。共勉之。

馬拉松與人:Carrie 名古屋女子馬拉松

Offical time 3:48:34    Net time 3:47:38

《感受篇》
今次名馬辛苦過渣馬好多,見到我個樣就知道對個時間麻麻地,不過點都好,第一次sub 350🥳!

賽前目標想試下3:355分頭嘅pacing,好多人叫我進取啲試下330,其實由我跑完渣馬之後,已經發覺自己未有330嘅能力。雖然係咁,我上堂一直用4:55-5:00練習,都練得幾好,所以跑5分頭,比練習慢一點,我覺得有機會做到,所以今次想試下。

可能我太少比賽經驗,已經忘記頭1K塞人塞到PK,我最差就係攝位,之後見到啲快腳我跟住佢先可以開路。第2K正常返on target;去到中途愈嚟愈熱、愈嚟愈曬,其實26K開始有跌速跡象。

跑到32K,計咗數最後10K6分披內,都可以3:45左右返到去。點知去到35K更加唔想跑,好想即刻停🥹,呢7K去返到終點真係好漫長~去到40K,更加完全提唔起勁,慢到跌出6分披🥲。最後2K就到終點,完全冇興奮嘅心情,愈跑愈慢🥲。呢條路仲有幾條斜路,我仲以為冇乜斜路😵‍💫,一見到斜路啤一聲😑

跑馬拉松真係好折磨,每一次跑全馬都係跌速跌到一個點,果陣時心諗我真係唔適合跑步,淨係覺得今年個渣馬幾滿意,雖然跑得慢,但起碼平穩無咩跌速,嚟緊應該唔會再比賽住,練好啲體能先。

《老公篇》
報名參加名馬嘅時候,我有問老公跑唔跑半馬?佢話唔想跑想影相,其實我個要求好低🤣,只要一張終點影嘅相有埋大會時間就夠🤣,咁多人跑未必真係可以一眼睇到。見佢前一晚mark定哂影相位置,好認真!

所以我一路跑一路望實旁邊嘅人,跑咗10K都未見到佢;去到唔知幾多K,我跑跑下見到有個職員大叫,好似叫返啲人要企返去行人路,我再轉頭望,原來佢影緊我🥰,個職員係話緊佢🫣

之後又熱又曬,開始跌watt,跑到30幾K又再見到佢,當時我已經跑到暈陀陀。最後比我預期時間遲咗,等咗我差唔多4個鐘。呢4個鐘佢不停係街同地鐵穿梭,辛苦哂👏🏼🥳!

放心,呢隻馬我唔會再跑㗎喇🤣

跑步與人(名馬篇):Bebi、Candy & Cookie

上星期一眾 Zero Running Club 女生已經完成東京馬拉松,Gloria(3:51:08)及 Cynthia(4:36:31)各以 PB 成績完成;晴子(3:57)則以 sub4 完賽。
今個星期日,Zero Running Club 亦有 3 位女生出發到名古屋。因為一個只為女子而設的馬拉松,每一年吸引不少香港女生專誠到訪,不單是為了挑戰自己,最重要當然還有特設待遇及紀念品!

左起:Candy、Cookie、Bebi。

1. 為什麼大家會開始跑步?
Cookie 是當年見到劉心悠穿上 adidas 跑衫宣傳渣打馬拉松,覺得運動女生很吸引,便跟姊妹勾手指尾,約定一齊報渣馬(當年挑戰 10 公里)。Candy 一開始是因為想改善失眠問題而開始跑步,但愈跑愈上癮,現在要跑步先安樂。
Bebi 曾經有段時間住小西灣藍灣半島,睡房的落地玻璃窗向下望便是運動場;每天見有人散步、有人慢跑,也有跑班成群結隊快跑,有老人家有小朋友。夏天烈陽下每天風雨不改亦有一位鋼條身型的伯伯帶著漁夫帽、赤膊自轉跑 1 小時。後來有一天,決定從睡房遙望轉為親歷在其中。第一次跑連續跑了10圈,大約25分鐘,朋友都說「快」,Bebi 也覺得幾容易,便開始跑步。

2. 為什麼跑全馬?
Cookie 開始跑步後加入了一些團跑,結識很多跑友,後來聽到跑友們都說海外馬氣氛很好、天氣很適合,於是就有了想法 – 甚麼時候放大假,就看看哪個地方剛好有馬拉松賽事,順便旅行遊覽,一舉兩得。
疫情期間,Candy 感到跑步的生涯好似暫停了一樣,現在見疫情減退,覺得要「做返啲嘢」,追回失去幾年的時間,因為未知將會遇到什麼大風浪,所以活在當下一息尚存,趁有能力就便盡力而為,突破一下放低了 3 年的全馬成績。
Bebi 開始跑步無耐,已經買了一隻 GPS 手錶,然後去巴黎旅行,每天繼續跑步,有試過沿着塞納河跑,也試過跑去凡爾賽宮。跑完看見 GPS 顯示的地圖和路線,很有成功感,所以便開始想跑全馬。讓路線更長,地圖面積更廣。

3. 以前有參加過其他海外馬嗎?
3 位都不是初哥,疫情前已有一定經驗,Candy 亦已經不止一次參加名古屋馬拉松;Bebi 更用雙腳走遍不同地方,自 2018 年渣馬完成初馬後,之後跑過拉脫維亞的 Riga Marathon、澳洲黃金海岸 Gold Coast Marathon 以及 2019 年日本金澤馬拉松。

4. 為什麼會揀名古屋馬拉松?
Cookie 於 2019年時分別抽中東京馬拉松及名古屋馬拉松,並計劃連馬,可是完成東馬後元氣大傷,最後選擇放棄名馬,隨後疫情爆發,今次趁旅遊放寛再次報名,彌補上次的缺賽。
Candy 認為全女班跑馬拉松好型,而且自己當年初馬都是名馬,想在剛步入不惑之年重拾跑步初心。
Bebi 則主要是想感受一下全女子的馬拉松,當然品牌項鍊也是吸引報名原因。

5. 有什麼特別針對性的訓練嗎?
Cookie 因自身瘦削,肌肉不夠,訓練時容易受傷,希望以不受傷地訓練,余顯華教練知道她們經常會亂練習,所以 program 上不會太辛苦。
Candy 之前試過受 ITB 傷困擾,知道自己不足之處,除了恆常跟教練 program 外,亦有多做慢跑及體能加強肌力。
Bebi 已經有差不多 2 年沒有投入訓練,現在只是重新起步,主要以慢跑為主,讓肌肉重新適應跑步的感覺。

6. 華教練有甚麼出賽提示?
Cookie:「聽自己身體感覺去跑,不要時快時慢,保持均速。」
Candy:「教練成日提醒我不要跑太快,enjoy 比賽,不要亂衝。」
Bebi:「教練提醒要強化肌肉力量和剛性,不能只著重柔軟度、活動幅度而忽略肌力訓練。」

Bebi - 前公務員,已經有不少海外馬經驗,今次名馬沒特別目標,給自己時間再次發掘跑步的樂趣。

7. 會不會一齊衝線? 定各有目標?
Cookie:「我們幾個女仔訓練水平都不太一樣,各人亦有各人的目標時間,只能說『終點見』」。
Candy:「每個人都有自己目標時間,所以未必一齊衝線,但我會在終點等她們  🥰。」
Bebi:「跑步是一班人也是自己一個人的旅程。今次名古屋女子馬拉松有好多朋友一齊參加,但到最後,各人也是自己跑自己的,我沒有要結伴跑步的習慣。不過衝過終點後,仍然會期待可以見到朋友等待我的 😆。」

Candy - 自認是一個貪玩的人,再次挑戰名古屋馬拉松,想重拾初心,目標 3:30 內完成。

8. 會穿什麼跑鞋?
Cookie:「adidas adizero pro 2 或 Nike Zoom Vaporfly 4%(但 4% 可能已經太耐沒著而變硬 🤣)!」
Candy:「Nike ZoomX Vaporfly Next% 2。」
Bebi:「未有決定,但會選擇功能性與外形並重的跑鞋。」

9. 名馬以品牌頸鏈及禮服男為賣點,有什麼期待?
Cookie:「今次完全忘記了有頸鏈同禮服男,3 年沒有去旅行,難得同一班跑步同學一齊去,一齊笑教練已經好期待 🤪!」
Candy:「禮服男名單中有一位香港人呂偉強先生,大家都是香港人講廣東話同聲同氣,會更有親切感,希望到時會遇到他。」
Bebi:「品牌項鍊是吸引報名的原因!」

10. 下一個比賽或海外馬目標是?為什麼?
Cookie:「NYC Marathon(如抽中),希望 BQ 達標。」
Candy:「11 月渣打半馬,在剛剛過去的渣馬也是參加半馬組別,但因天氣關係及準備名馬,所以發揮不太理想,所以想再挑戰多次西隧 🤣。」
Bebi:「名古屋後, 4 月會去倫敦馬拉松及 9 月柏林馬拉松。我的重點比賽會放在柏林馬,因為訓練一個馬拉松最好有 6 個月時間。現在距離 9 月剛好夠練習一個完整週期。」

余顯華教練在訪問最後一樣寄語 3 位學生:加油,好好享受成段旅程。
名古屋馬拉松是為全女生打造的賽事,參加者專享禮服男迎接衝線及品牌項鏈,預祝 3 位香港女跑手在好氣氛、好天氣下將會做出佳績。
隨著生活逐步回復正常,期許大家能繼續跑下去,永遠保持對跑步的熱情。