眾所認識，Craft鞋大多都設定為路跑及輕山跑兩用，咁嘅設定當然有好有唔好。好嘅係喺一啲山/路兩食嘅比賽中，輕易轉換腳感，容易跑出優勢，尤其係香港嘅山賽；唔好嘅，當然係有跑者會覺得唔夠專門、唔夠山系，不過呢啲都好睇個人技術及習慣，實際上對於做時間，已愈嚟愈多參賽者著用路跑鞋出戰。從中大概可以睇到個香港山賽trend嘅走向。

講番Craft新鞋，近期推出咗兩款新山鞋，分別係Endurance Trail同CTM Ultra Trail。今次就有啲唔同，係嚟自品牌嘅專門山鞋系列 – Craft Trail Pro，亦即係設定及功能都以針對山跑野徑為主。今次先講Endurance Trail。

睇個名都知，Endurance Trail主要針對中長途賽事，重點在於其Px Foam中底，比EVA嘅Ud Foam輕20%（玩過山都知，裝備梗係愈輕愈著數），同時亦提供高回彈感及長時間緩震功效。

前後差9mm，數據係啱啱好，加上鞋頭上翹角度，提供到適當嘅前推力，同時又唔會喺落樓梯或下斜坡時，出現太前傾嘅危險角度。

今次喺山野路上實測跑時，Px Foam於平路嘅表現係同路跑感好相似，落地感實在、吸震，亦俾到回彈。雖則喺泥沙地或鬆土地上面嘅越野跑訓練或比賽時，你唔會要似路跑咁，拉到隻腳好高，但有回彈都好緊要。因為香港啲山賽，分分鐘要跑好多，閒閒哋4、5k石屎路同引水道呢啲都司空見慣，有時更係決勝關鍵（嗰啲你跑唔到，前面上落山幾快都蝕番出嚟）。

外底分兩段式設計，前段嘅lugs大粒啲，方向亦好一致，提供到實在嘅咬地力，尤其於上落山，前掌著地時安全感大增；後段細粒啲，方向同形狀都有別，於平路快走、健行予以補助抓地力。

試鞋當日剛好係濕濕哋毛毛雨日子，可以試埋外底咬地力。由於前端嘅lugs膠粒係斜向而非箭嘴式，喺偶爾踩到樹根、石面時，Endurance Trail都唔會出現錯足、跣腳現象，夠應付一般輕微雨天時嘅訓練及作賽。

鞋嘅面料採用一體式工程網布，透氣而輕身，表面嘅環迴幼條配合Craft嘅Regular Fit鞋楦，大部分腳型跑者都適合著用；前後（toe/heel part）、鞋內側都加附不同軟硬度膠邊，以補給保護度及穩定性。

單層網布鞋舌，頂端位加附膠邊，偷輕及補強番耐用性及防走位；鞋舌中段亦有彈性布料與內籠相連。同時鞋帶位都有加固膠帶，增強耐用度及貼合度。不過我就覺得鞋帶位膠邊有啲過厚，如果可以減走面嗰層（鋸齒形），相信會令整體感覺更輕量、統一，舒適度亦可再提升。

路跑鞋要型，山鞋更加要型！喺整體外觀設計，Endurance Trail當然延續Craft嘅精銳感風格，配色少見而帶北歐品味（Flex/Desert），功能物料、設計記錄等細節（designed in Sweden…）都印咗喺鞋上。呢個相信亦係好多人鍾意Craft鞋嘅地方。

總體而言，Craft Pro Trail – Endurance Trail係一對易handle嘅入門山鞋，適合中長途訓練或比賽著用。Px Foam中底嘅山跑感受，舒適感同回彈性都唔錯；雖然佢歸類為品牌嘅專屬Trail系列，但同Craft嘅其他鞋品一樣，其實都屬山跑路跑功能兩用之作。