六分之二 | ⏱ 03:28:45 | ✅ sub330

芝馬嘅感覺好漫長。本應係發生在疫情之前，輾轉之間等到 2023。中間生活變化很大，情緒起伏都係。跑步訓練亦由一直慣常嘅，轉到新嘅模式同環境。

18 星期嘅賽前訓練，由阿希為我安排。由當初不太熟悉對方，經歷每星期 4 次嘅 training log 交流，彼此變得無所不談 – 嚴格來講，大部分時間只是我單方面放負，所以相比起一個教練，佢更似我心理醫生。感恩一直有阿希支持同陪伴，「相信自己、相信訓練」、 「要多謝一路以來努力訓練嘅自己」…通通成為咗我呢次完走芝馬嘅最強大力量。

一直以來，很多跑友都會問，目標係咩？我往往都答「無呀」，其實是認真的。我純粹想跑出一次比一次進步嘅馬拉松。不論喺時間上、心態上、造型上、危機處理上，我都想一次比一次進步。成日睇住時間跑好辛苦，都好無趣，我唔想咁。能夠證明自己嘅，唔應該只有跑步成績。

比賽日天氣比預期寒冷，但都算係一個理想天氣。經歷 18 週嘅訓練，我知道自己身體應該可以以 4:40-4:50 配速完走，前提係受傷位置冇咩大礙。喺 D 區等待開跑好漫長，都好 L 凍，賽前熱身基本上係零，只做到有限度嘅動態熱身。我哋見到 3:20 同 3:30 嘅 Pacing Team，就攝咗埋去，跑嘅時候希望可以用佢哋嚟做 benchmark。

接近開跑，除雨褸、除衫，就開始了。一開跑條路好大好闊，所有人都好 L 快，可能真係凍得太耐，又可能係 runner’s high 作祟。頭段我計劃先跑上 M pace，好讓身體盡快適應同變暖，而最重要係想避開跑得較慢嘅人群。由於芝加哥好多高樓大廈，GPS 變得異常不可靠，所以頭段只好依賴感覺去跑。每 km 發現快了，下 km 就調整，一轉眼就跑完 5km。

和柏馬比較，芝加哥頭段真係超有愛。人群同打氣聲從無間斷，有 rock band、有 hip hop、有 dancing team、有 marching band，有老有嫩，一句又一句 keep pushing you’re doing great marathoner，已經感覺勁窩心。

「終於追上你」，一轉頭係 Adam。一如以往嘅輕鬆樣，8km 左右佢追上我。平時佢跟偉龍班，所以嚴格嚟講今次係我哋第一次一齊跑。佢嘅 M pace 同我差唔多，大家一直 keep 住 4:40-4:50 嘅舒服狀態。同佢一齊跑，時間過得超快，佢好有趣，成日講野，同埋會搵我擋風 – 明明大隻過我，離譜。

不過都好彩有佢，提我食 gel，果個 check point 我真係幾乎 miss 咗（芝馬係計 mile 為主，但佢啲 mile 又唔係每 mile 都有指示，而 km 都係好間唔中先有，都幾混亂）。唔覺唔覺，我哋一齊跑過埋個半馬位。1:42 內，同我預想一樣，更重要係，我身體感覺依然良好。

到咗 23km 左右，突然變得好靜，Adam 已經脫隊。望望錶，仲喺 M pace range。接近 30km，一樣嘅狀態、一樣嘅心態。但有樣嘢覺得好困擾 – 攝影師呢？一直都見唔到，有見到嘅就掛住吹水無影，想點？我同阿希講過，我最大目標其實係嚟影靚相！好彩一陣過後，一個又一個咁出現，都算係咁，不如就 PB 咗個表情管理先。

35km 後，腳傷嘅感覺終於爆出嚟。其實真係好感恩，35km 都一直保持得好好，之後嘅就係意志力時間。37km-39km 係整場賽事中最靜路段，好少人、好無氣氛，如果頭段係嘉年華，呢段就係圖書館。

一條不見盡頭嘅大直路，一個又一個嘅上斜位，加上一個忍痛作抽筋嘅跑手，所有嘢都變得更加漫長。慶幸聽到 Daft Punk 嘅 One More Time，再提醒自己，捱埋去，好快就衝線。

今次最叻嘅係，負面想法從來無出現過。就算跌速都同自己講，無嘢架、放鬆啲、唔洗急，急就會亂，亂就會抽，抽就真係完。不過呢又唔好跌速太多，keep 住 5 分頭啦，5:10 啦，5:15 啦…相信自己、相信自己，諗吓諗吓又跑多 1km。

40km，食埋包 back-up Amino gel 就錶都唔睇咩都無諗捱落去 。一直諗，唔好俾我見到 330 Pacing Team 就得。尾段大直路，人群終於開始多番，但路牌更加亂同密，又 last mile 又 last 1km 又 800m 又 500m，喂之前又唔見你出得咁密？！去到直路盡頭，90 度彎角，我就知道真係快衝線了。

呢一刻，終於真係敢俾力去盡，抽就抽，遠遠見到 Finish，咬實牙關 9 衝過去！看看錶，總時間 3:28:45，弱弱的 PB 了。

坦白講，內心真係無咩十級興奮，7 級左右 maybe。我知道 100% 嘅自己其實係可以 achieve 到更好。不過，用返阿希語錄，「要接受唔完美嘅自己」、 「欣賞自己多啲」。

芝加哥，將來應該都無咩機會再去。很喜歡妳的 riverside、很喜歡妳的橋架，謝謝妳見證了我的小進步。
下一隻，應該是 NYC 吧？

「芝馬開門」呢個名喺我哋 2019 年抽中芝馬嘅時候就已經諗咗。結果呢一個實體賽由 2020 等到 2023 先可以跑。

無論年紀、體力都唔會再係 2020 嗰陣咁。有時會諗，當初想跑曬 6 大呢個夢仲會唔會實現到？唔知幾時先飛到？又要擔心可唔可以入到境？要跑到幾多歲先會完到？

有時都反問自己：係唔係咁鐘意跑步呀？一星期跑足 3，4 日，中間又去重訓（已經努力咗好多，但比其他同學都係懶嘅）。跑完仲有好多嘢做，家務、放狗、工作 etc…又要早瞓。我哋唔係職業運動員，但又要工作同跑步一齊其實好難，直頭時間管理大師上身先掂。

跑步其實係一個人，但又可以係一班人，途中有唔同嘅人一齊上同一架車。跑跑下有時好似 10 個救火的少年咁啲人落晒車，得自己一個。跑馬呢件事係可以好孤獨，可以好辛苦，但同時又會好熱血。謝謝自己嘅堅持。

好慶幸今次跑馬有一班隊友一齊訓練。
雖然大家有唔同嘅比賽，但都會就到一齊喺同一個 program 度。我哋經過咗黃雨、紅雨、黑雨、酷熱天氣警告，極端酷熱天氣告（除咗…寒冷天氣警告），應該之後無論遇上咩天氣都難唔到我哋。無諗過跑嗰日香港都 9 號風球。

搵返柏林嗰陣我哋叫自己做「柏馬戲團」，但就無畫過任何嘢。今年嘅時間其實仲少，都總算係有限時間畫咗粒芝麻出嚟。芝麻代表我哋踏上紅地毯，跑進任意門通往下一個夢。因為呢道門等咗 1,095 日佢終於開。

第二粒星星 get!!!

跑前已經聽聞芝加哥係 windy city，但無諗過原來咁凍、咁大風。今次遲咗少少飛去適應環境，之前都有諗會唔會 jet lag 好嚴重，結果每日去到 2 點左右就開始眼瞓頭暈，去到差唔多晚飯時仲嚴重，要橕住唔可以瞓。喺比賽前一晚 5 點幾仲頂唔順喺梳化瞓咗 2 個鐘，起身頭暈頭痛，嗰一晚瞓覺仲標冷汗、頭痛。勁驚自己頂唔順會病。

起跑嗰朝凍到人到癲，除咗要等好耐 bag drop，唔好話熱身時間都無，就連廁所時間都無，已經要上線。唯有用 Henry 講嘅企鵝效應，企係人群中間保暖。

愈係接近起步時間就諗：「天啊～呢一日我等咗 3 年幾，終於企咗喺度，要實現夢想。」心底裡都會諗唔知做唔做到，因為經過 jet lag、長途機，身體都唔會係 100% 理想狀態。但我已經努力咗咁耐，要信自己做到。

一起步就除咗件五月天雨褸，之後就開始後悔，好 X 凍，個人起碼跑到 10k 先暖啲，但啲風一吹埋嚟就吹散晒儲低嘅熱。頭 2k 都有聽偉龍教練講要慢慢，之後望住隻錶見到自己個 pacing keep 咗一段時間 5‘28。心諗平時都無可能呢個 pacing 跑到咁長。唔通天氣真係咁大影響；心肺都唔覺攰。去到 25k 左右，對腳肌肉有啲啲反應，就拎咗包抽筋水喺手，未到 30k 前飲咗…之後嘔咗一下勁大聲！我未飲過咁臭咁難飲嘅嘢…

沿途一直都好好氣氛，有人打鼓、marching band，有啲 rock band 唱歌咁，但去到遠啲住宅區就無咩人打氣。中間有諗起 Johnny、Hays、Dick sir 一齊跑過 tempo 嘅時候，幻想你哋係一齊跑帶返啱個 pacing。

跑出去市區有啲大橋，條橋有啲窿窿，一踩落去成個人咖啡杯都企唔穩咁，原來佢另一邊有紅地毯，但只係條橋嘅1/3闊…因為條路係車路，最邊左右會斜向下，而中間有時都有啲坑渠蓋凹凸位，都好易成為作抽筋後嘅難關。一路跑嘅時候要注意。

成個比賽都係 mile 計為主，km 指示唔多，但就當自己跑緊馬場計法。跑多幾多個圈就會完咁。

30K 打後開始作抽筋，就知道自己無得再加速，唯有保持住唔好慢太多，心裡面係咁同自己咁講。21 miles 之後有個站左右兩邊有得噴止痛噴霧，有一刻想過入去，但跑去隔離線真係太遠，唯有向前跑。臨尾  23 miles 左右見到對面寫 24miles，再望向前面係有一條超大直路，心諗頂你，仲有幾耐先轉彎呀！？

直到去到 39k 突然唔得啦，小腿抽筋，一抽筋嗰下行埋咗一邊，想拉返鬆，但其實無可能，之後就諗起當年富士山馬拉松娘娘話抽筋都要跑，咁我就即刻出返去繼續跑。

跑跑下又真係無抽筋，之後開始見到啲人好興奮話仲有 1 mile， 咁我就嘗試加速，點知去到 400m 有個斜路！邊個諗出嚟㗎？內心喊出嚟？望住隻錶都就嚟 56 分，好似 55 分好睇啲，咁上完個斜無諗到就直衝過去。

停錶嗰下係 3:56，不過後來刻名 check 番大會時間係 3:55:55。嗰吓心裡面開心咗。跟住刻名嗰個人問我做咩咁多個 5 字。衝線嗰下好多嘢拎，有熊仔糖、啤酒、生果、donut，但全部都無謂口食，因為成肚 gel 又無加水食，頂住個胃。

謝謝所有有份同過我哋一齊跑長課訓練嘅朋友仔同教練。

因為 Covid 上年完全停咗訓練。數數手指都跑咗好幾個馬拉松，一次比一次認真訓練，用咗好多心機，經過上次德國馬拉松，明白到有時你準備得好好，但始終多變數，未必會如你所願。而今次終於喺凍加大風同無雨情況之下做到，實現咗一個少少嘅夢想，希望下次可以更快。最緊要係抽得中。

P.S: 喺上線前見到好多 50-55、60-65 嘅女人，我希望係唔使去到呢個歲數，就可以 BQ。😂