29 8 月
INTERVIEW

跑步與人：Daniel Wong

1. 跑步年資？為什麼開始跑步？
正式開始跑步係 2022 年 4 月份，大概一年幾，因為 2021 年 9 月尾，打咗第二針疫苗後持續發燒，之後入醫院住咗兩星期，出院後發覺身體好弱好潺，又發覺意志好差，所以迫自己做運動，最終選擇跑步；因為跑步辛苦又悶，但係覺得咁樣先有改變 🤣 。

2. 有沒有跟跑會或教練跑？選擇原因？
最初無嘅，之後 Kolor 主音 Sammy 創立咗「頑張」，咁就加入咗，隨後到阿歹創立咗「無名」就直到現在。因為喺頑張嘅時候感受到阿歹嘅教導方式好適合自己，亦都係好短嘅時間提升咗好多跑步上嘅知識同技術，由其心理質素，阿歹經常提醒 「求快先求慢」，變相唔會單一追求速度。 

3. 承上，頑張經常會有自主活動，是什麼原因令你們會自發參與？
最初活動主要係 Sammy 同阿歹發起，例如星期日係假期，會按排大家跑出運動場，又一齊參加好多唔同嘅跑步 event 例如 Kolor x Carbon brews 中環夜跑、飲跑食醉等等。又因大家都好喜歡 Kolor 又會一齊去睇 show，變相好多唔同嘅活動令大家關係好緊扣，即使係團員自發嘅活動都會好積極參加。

4. 最深刻的一場賽事？原因？
最深刻一定係頑張同 NB 紐約馬 vtriual，因為係我嘅初馬😂，第一次感受到訓練嗰種辛苦到往生嘅感覺，亦都確切感受到跑馬拉松係有幾咁辛苦。

5. 最喜歡的跑步用品品牌？最喜歡一對跑鞋？
最喜歡一定係 New Balance，暫時最喜歡係 SC Elite V3

6. 跑步對人生有沒有幫助/改變？
我覺得跑步之後，面對困難同壓力時變得積極咗，會懂得用開心嘅態度去面對，身體本身好多問題又得到改善，個人會有返自信心。因為跑步接觸多咗朋友，對於社交又會開放咗。

7. 見你也有跑山，喜歡跑山還是路跑？
其實我比較喜歡跑山😂！

8. 路跑跟山跑有什麼不同感受？
路跑全程要 keep 住一穩定嘅 pacing，要留意嘅主要都係自己個狀態，所以比較悶，不過有速度感。
山跑就會冇咁悶，因為山路始終唔平坦，又上又落，要留意嘅野多好多，好多變化，變得好有趣。

9. 跑山有沒有遇到奇怪事件？
暫時未有，只係上年逆之男比賽差啲跌落山😂！

10. 現時跑步目標是什麼？有沒有目標比賽？
目標都係想係馬拉松做到 sub3，賽事都係出年渣馬。

11. 有沒有因為跑步而放棄了其他運動？原因？
沒放棄呀！因為都好耐冇做運動，跑步之後反而想參與其他運動。

12. 有什麼社交媒體可以找到你？
FB: Daniel Wong
IG: dedanielwong 

03 11 月
INTERVIEW

「頑張物語」：由開心跑到挑戰 New Balance紐約虛擬全馬

「頑張」，即「奸爸爹」，加油、唔放棄！跑步最需要嘅DNA。
「頑張跑會」，由Kolor 主音 Sammy（蘇浩才，圖右）同「阿歹」謝覺偉創立，採取自由參與制，逢星期一深水埗運動場見，開心跑一小時！近期「頑張跑會」更獲New Balance支援，參與2022 TCS紐約馬拉松Virtual Run。
究竟「頑張跑會」係點成立？成員又如何備戰NYCM虛擬跑？一齊睇睇由兩位主理人解構「「頑張物語」！

1. 「頑張跑會」最初點成立？
Sammy：由我同「阿歹」開始，我地平時都成日跑，於是傾下傾下，就定咗一個日子，逢星期一喺深水埗運動場，就咁開始咗「頑張跑會」。開頭有10個8個，慢慢愈嚟愈多跑友加入。

2. 創立宗旨？想喺香港跑步圈做到目標嗎？
Sammy：創立宗旨就係，希望唔做開運動嘅朋友，又或者唔想一個人做運動嘅，可以一齊跑，冇咁悶嘛！總括就係想吸引多啲人做運動。
阿歹：目標？冇㗎，暫時都係想聚一班人一齊開心跑1個鐘、一齊比賽。

3. 而家頑張有幾多成員？平時有邊啲訓練或者跑步活動？
Sammy：而家固定成員大概40-50人左右，每次跑步活動又會有新朋友加入，都有近50、60人左右出席；我地逢星期一就會喺深水埗運動場跑步，近排因為練馬紐約馬Virtual Run，就會多咗個星期六嘅長課。

4. 可否介紹下今次同New Balance嘅紐約馬拉松Virtual Run？
Sammy：首先多謝NB今次support「頑張跑會」成員一齊玩。我自己2019年都有去參加實體嘅紐約馬拉松，之後疫情，但Virtual Run都keep住有跑，今次除咗我自己跑，同時就向NB提議下，可唔可以俾多啲人參加呀？咁就變成咗今次「頑張」嘅一個虛擬跑event喇。

5. 今次會有幾多成員參與？日期及路線？
阿歹：今次報咗名嘅，會有20位成員跑，咁有啲自己報咗，又有冇報但齊心支持嘅，都會一齊跑嘅，都唔少人㗎！日期係紐約馬同日11月6日，路線係沙田（濱景花園）同烏溪沙之間來回（一程約12k）。

6. 針對今次VR，有目標時間嗎？點製定訓練課表？
Sammy：大家都有唔同目標嘅，我自己就希望330內，有啲成員都係呢個目標，有啲就sub4、有啲就務求完成。喺同一個路段上面跑大家都可以互相打氣！
阿歹：課表訓練咗兩個月，主要係做咗好幾次長課，加平時嘅速度訓練，同埋做開嘅恆常跑步習慣，應該都幾充足嘅。而且第一次跑全馬嘅成員，我想佢哋唔好咁辛苦，享受咗先，亦唔好追個時間。

7. 訓練嗰時仍係上熱同焗嘅天氣，訓練中有咩特別辛苦或難忘事？
Sammy：開始訓練時都係8 – 10月呢啲時間，仲係非常之熱同焗，最辛若嘅梗係啲日曬雨淋嘅長課啦，我哋都風雨不改嘅；難忘嘅應該係就都係啲好大雨、好熱嘅訓練，但大家都冇放棄，互相鼓勵，咬緊牙關捱埋佢。
阿歹：你話特別辛苦嘅？最辛苦嘅都已經過咗喇！難忘啲嘅反而係我叫啲學員練習嘅時候跑斜路，佢哋會問明明正式係冇斜路，點解要跑斜路？但相信到正式時，就會知道加入呢個訓練係有用。

8. 會以咩戰鞋出戰今次Virtual Run？點解揀佢？
Sammy：今次會著FuelCell SC Elite v3，而且更係紐約馬嘅特別版。不嬲都有著開NB碳板鞋例如RC Elite v2，前兩次全馬都係著佢嘅。我覺得有時其他牌子嘅碳板鞋都會較硬，對肌肉嘅衝擊力都會幾大嘅，但暫時著v3嚟訓練都成100+km，對腳都未有「投訴」！而且推進亦好好，唔使太多力都可以做到比平時快嘅pacing！
今次大部分成員都會著佢，亦有啲會著Rebel v3，主要係有碳同冇碳嘅分別。

阿歹：今次對v3就比v2就再輕巧啲，但同步踩落去又紮實咗，穩定性同舒適度都提升咗，推進力更好；轉彎都好易handle，而且舒適、夠推進力。

10. 現在信心及狀態如何？有信心可以做到目標時間？
Sammy：OK啦，要訓練要做嘅都做晒，信心有嘅，睇天氣同到時嘅發揮啦，希望休息夠，因為近期都忙。不過有信心可以好過舊年嘅！
阿歹：可惜到時我唔能夠陪住成員跑（要外出參加世界山徑越野錦標賽），不過到時都會遙距打氣嘅，成員狀態同信心都好好，最緊要係無傷痛完成，同enjoy跑全馬嘅樂趣！