馬拉松與人：Kevin 曼徹斯特馬拉松
記錄一下人生第一次 sub3：
上年知道四月中有隻曼徹斯特馬，平路多可以做時間，一直想去旅行順便跑埋。諗住睇下渣馬跑成點再作決定，點知渣馬前有傷患，練得差跑得差，所以完咗渣馬之後即刻報名希望可以復仇成功：目標鎖定BQ 310內（心目中希望 305-308）。
三月中出發歐洲旅行，除咗plan行程，仲要睇定有冇運動場跑program同埋長課去邊跑；滿以為安排得好好，但係原來每朝7點幾起身，得幾度仲要自己一個人練跑，成件事都幾難捱。
全馬前兩個禮拜報咗雷丁半馬諗住做最後m-pace練習，比預期中跑得好，PB 126，開始幻想隻全馬有啲希望再進取啲。
比賽前隊友們叫我試吓博sub3，但係我起步個wave最快得315 pacer，所以早一晚開始盤算應該要點跑。計劃係：前半開 127-128（比之前比賽放慢少少），21-32km 盡量 keep 4:15 pace，最後10km就算跌到4:30 pace都可以 sub3。
起步大部份人跟315，得十幾個跑喺pacer前面，我當然跟出去。因為前面個wave早 10分鐘起步，所以頭幾k都係得幾個拍住跑。10km大約41:xx，當時覺得尚算輕鬆，諗住keep pace去到半馬。半程127，仍然喺計劃入邊。
但係一過半馬就比預期跌多咗少少，去到30km覺得愈嚟愈攰，好彩臨出門口拎多咗支gel（驚中途跌gel），決定食埋佢，由5km 一支變4km一支，同時希望啲前半buffer夠用。心入面就同自己講，冇理由頂咗30km唔頂埋佢。同埋幻想好多隊友 track緊自己（其實可能冇），一定要頂住。
去到40km，得返10分鐘，即係at least要開4:30 pace，但係已經攰到提唔起腿。諗起好多人講過，馬拉松去到最後唔係靠體力，係靠意志，一定唔可以衰喺最後2k，盡量keep住個form去跑。終於捱到最後400m入直路見到拱門，乜都唔理衝返去，過終點見到隻錶259xx，我即刻大嗌一聲，跟住喊咗出嚟。
曾經覺得sub3對我來講係遙不可及嘅事。我自己覺得好好彩，身邊有好多人鼓勵同埋俾動力我，再加上好天氣好賽道，所有嘢配合得咁好先跑得到。
要好好多謝以下每一個：Running Man文少杰教練、陸作恩教練、黎振雄教練，可以跑好一隻馬拉松唔係一朝一夕嘅事，全靠過去幾年你哋令到我哋每一個都可以好好裝備自己。
隔離跑會嘅余顯華教練，雖然我唔係你學生，不過聽你分享經驗我獲益良多。另外 Elite Team每一個隊友，有你哋我先有動力繼續練、繼續跑。特別係帶我跑過無限次long tempo同長課嘅志華、傑哥、Edward、石仔、Ethan、Jonathan、謙爺、Juno，希望大家嚟緊可以繼續一齊向下一個目標進發。
