Saucony Endorphin Pro 3 更推更輕更Pro

1. 開始跑步嘅契機？點解會跑渣馬？
其實每年都會set一個目標俾自己，上年係要玩樂器，今年就係要跑步做運動。

2. 跑完渣馬10k 有乜野感覺？
跑完無諗過有記者，意外地仲做埋訪問。完咗訪問一轉身就見到發哥喇！非常興奮可以同偶像同場。
記者朋友對我好好，仲將我地啲相放埋一齊！

3. 跑渣馬前有冇做特別訓練？
冇，就係咁懵。今次渣馬成績係52分，如果有練就應該 sub50。

4. 除咗跑步，仲有冇做開咩運動？
踢波，年輕時踢沙田青年軍。現在一直有同朋友踢業餘波，一陣訪問完都有一場踢。

5. 現時跑步有咩目標？
4月先有一場10k賽，想跑出sub50成績。之後會係下半年嘅台北馬拉松，全馬賽事，所以都開始跟跑班做訓練。

6. 有冇諗過成為跑步/運動嘅星級代表人物？
無特別諗，只係想鼓勵其他人做運動，跑步好、做Gym都好，總之就係影響到人地做運動！

7. 覺得跑步後有咩改變？
身體同心情都改變咗好多，人開心咗、諗嘢正面咗。
無 job 時會編排自己上午做gym下午跑步，覺得自己做人好有目標同充實。

8. 跑步後對工作日常，好似唱歌咁，有冇咩改變同影響？
的確，唱歌道氣好咗。（筆者按：建議讀者自己聽下〈羅曼蒂克衰亡史〉找答案）

9. 跑步嘅時候，個腦諗緊咩？有冇聽歌？
跑渣馬時有聽，都係聽快歌，我鍾意ONE OK ROCK！
但而家練跑，就算跑12K都唔會再聽歌喇，因為會專心聽到下自己嘅心率、步伐。
而家覺得聽歌反而會影響跑步嘅節奏，而且腦袋亦可以放空一下。

10. 會唔會叫埋Error其他兄弟一齊跑？
唔會啦。Dee又話自己整親腳。193就打籃球，算啦。肥仔唔好啦，跑完食番多啲野，咪重肥囉。
題外話，肥仔問過想食我啲代餐，我都叫佢唔好！佢食咗之後都係話難食，再食番其他野，咁咪食多咗囉！
所以唔好搞佢哋啦。不過都有同其他ViuTV同事一齊跟飛達跑會練跑。

11. 跑步時會有特別配襯嗎？
會呀，好似件Saucony背心咁，好正，物料又舒服，衫褲對於跑步表現都係好重要。

12. 最後，好多人都話跑步可以識到女仔？你認唔認同？
而家冇特別諗拍拖。
不過如果要搵伴侶，一定會搵個做運動嘅，可以係跑步、攀山、踩單車，總之做運動嘅就會自律、健康。亦唔需要每時每刻都要黐埋一齊，可以各自各有目標。就好似跑步，每人完成時間都唔同，一齊努力跑到終點見就好。
如果個女友只係叫我夜蒲飲酒嘅，亦可以唔使喇；而家我起身第一樣會諗係跑步同做運動。

訪問間又講到保錡對Saucony嘅認識，只是喺432Hz中睇到佢有潮鞋。
之前亦無著過碳板鞋，只知道係一款快鞋。

筆者就先解說碳板鞋嘅原理，再介紹Pose Method跑法，希望可以用更efficiency嘅跑步方法嚟發揮Saucony Endorphin Elite嘅功能。

應該係保錡有踢開波、做開運動，當筆者講解Pose Method 中嘅Pose/ Fall/ Pull時，佢都理解得好快；做擺手動作時，講到力距問題，亦好易明白到當中原理。

特別喺做Pull – 拉起腳嘅動作時時，佢亦好快分辦到要用hamstrings拉起腳嘅力；原來佢曾經喺健身室打工，而且而家都keep住做 Gym，所以對肌肉有一定認識。

第一次Fall嘅時候，佢亦竟然夠膽完全Fall 到筆者手上。喺筆者之前所有教學，跑手們第一次做Fall時，都有所顧忌。而保錡卻輕鬆拋下一句「你專業㗎嘛！」完全彰顯出「快吞轟」心態。

去到最後以快跑來感受Endorphin Elite時，雖然只是試跑短距離，見到保錡都懂得使用Fall時候嘅力，用前掌落地，感受利用碳板roll向前嘅加速。

後記：
保錡提到「吸引力法則」。隨著一個人好努力 – 可以係喺事業、運動上 – 想得到嘅就會慢慢得到。好似佢咁，可以同偶像們同框，例如張家輝、發哥（遲啲重有…唔講得住！）都係自己一步一步努力地將機會累積而得到嘅，講真，亦好似跑步一樣。