Hoka Arahi 6

25 5 月, 2022
Posted by 達夫

19 1 月

筆者一向沒有偏平足或高弓足的問題，所以少穿穩定(stability) / 支撐型跑鞋。但自從前陣子外翻拗柴，導致足踝內側的三角韌帶受傷，再引致發炎後，開始在跑長距離時，穿上較高穩定性的跑鞋。而今次試穿的 Hoka Arahi 6，正好就是筆者需要的支撐型跑鞋，而其鞋身重量亦是一個賣點。

Arahi 型號跟 Hoka 最多跑手選用的 Clifton 設定差不多，都是用上CMEVA物料作中底，但加了J-Frame (白色部分)來加強支撐。J-Feame 為硬身 EVA 物料，由足弓伸延到後踭部份，除了減輕足弓受力外，亦增加後踭落地時的穩定。

由於筆者不是扁平足，不需要很強的足弓支撐，J-Frame 的感覺恰到好處，有支撐的同時，又不會有頂著足弓的感覺。所以就算沒有足弓問題，著用Arahi 亦沒有不舒適感。

鞋面是用環保物料製造的網面，始終此鞋不是用於比賽，所以用料較結實能固定腳掌，但基本上透氣度沒問題。

鞋型用了Meta-Rocker 設計，官方宣稱有助傳遞能量向前滾動。但 5mm 足跟差下，推進力度不算太大，這非常符合練習鞋的設定。鞋領位設計包足踝腳感很好，向後凸出部份有助方便穿著。

Arahi 的重量為 264g，上腳不會特別感覺重身，完全不會覺得是支撐型跑鞋。

相比起 New Balance 860 (275g) 、Saucony Guide (298g)、Asics Gel-Kayano Lite (289g) 都要輕身。

筆者著用在跑馬地和海濱路段作多次 Easy run，時間30-80分鐘不等。外底的抓地力在石屎路上非常的好，穩定性很強。特別在 LSD 尾段，開始疲累下放輕腳掌落地，完全感受到Arahi 的支撐性。

很多跑手都不太注重扁平足問題，當然在練習間歇跑時，為追求時間而選擇輕身競速鞋。不過在練習配速相對易應付的 M pace 和 Easy Run，建議選用支撐性跑鞋減輕足弓受力，亦同時減低受傷發炎的機會。

最後，Arahi 的厚底設計，易於配搭時興的服裝。不用作跑步時，當 lifestyle 著用，亦是不錯的選擇。

Newer 碳板鞋的成本

Older Saucony Endorphin Speed

14 11 月

REPORT

Hoka Cielo Road 高回彈「薄底」快鞋

14 11 月, 2023
Posted by Dick@講鞋

賽季返嚟了，不過比起報甚麼比賽之前，更先更重要嘅，可能係入齊裝備應付晒LSD、Tempo、Interval，以至比賽用嘅戰鬥鞋。今次試嘅Hoka，有啲出乎意料唔係最深入民心嘅超厚底型號，而係專為5-10km而設嘅「薄底」快鞋Cielo Road。

雖然係Hoka系譜嘅薄底型號，但前後厚度分別都有28與31mm，不過一試之下，頗有傳統Racing Flat嘅高回彈、反應快嘅感覺。

由於工作與照顧「主子」嘅關係，筆者有三個星期冇正式練習，昨日初試Cielo Road都唔敢太進取，小試牛刀下跑咗2km熱身及8 x 400m Interval。雖然Cielo Road標榜係短途快鞋，但慢跑熱身又未至於十分抗拒，但好明顯feel到Cielo Road係「勒住勒住」，就似夏蘭特畀哥帥下令唔準射門…

去到主菜時間嘅400m Interval，一字記之曰：爽！就似夏蘭特終於解鎖可以放題施射過足癮！

即使Cielo Road嘅鞋底厚度都係厚過昔日嘅Racing Flat，不過每次觸地都會即時、直接、有力地發揮回彈作用，甚至青出於藍，而且比傳統Racing Flat更討好係緩震更強，加上厚度「節制」得宜及只有3mm Heel-Toe Drop，實測時發覺緩震只發生喺觸地嘅微秒之間，隨後就極速轉化為回彈，全掌式PEBA泡棉中底與弧形METAROCKER鞋頭輪廓果然交足貨。

雖然中底冇TPU或碳纖底板，但Cielo Road一早講明作戰距離係10km內，的確毋須靠底板幫用家慳力；反應、輕量化（以男裝US 9為例重約201g）更係重要。

另一個似足Racing Flat嘅地方係鞋楦布局，以單層薄身網面為主，雖然底部貼有支撐骨架，但後者嘅硬度只屬輔度，真正發揮穩定性嘅原因係貼腳剪裁，所以闊掌嘅跑友未必啱用。另一方面，即使鞋領內有薄墊，不過實測發現都係有少少空位，所以綁鞋帶時建議用埋最頂嘅鞋帶窿鎖實足踝。

今次實測另一驚喜，係試埋超輕身嘅CEGERO 5-Panel Running Cap ，正如「七孔流血還七孔流血，死還死」，雖然天氣凉咗但唔代表唔曬，況且呢頂帽表面唔只跣水、透氣，仲有UPF 50+ 防曬系數阻隔紫外線，減少面部曬傷機會，fit晒長課用，尤其是女生。

09 11 月

INTERVIEW

世界級向付召、運豔橋分享備戰「飛越大嶼」

9 11 月, 2023
Posted by RunKid

為迎戰11月10 – 12日的越野跑盛事 Translantau「飛越大嶼」，HOKA 主辦了三課「HOKA x 飛越大嶼 by UTMB 越野大師班」，希望幫助一眾參加者作最好準備。「飛越大嶼」已有十年歷史，賽事分為 25 公里、50 公里、100 公里及140 公里組別，一直深受世界各地的越野跑好手歡迎，今年更有來自45個國家的跑手來港參加盛事。

日前壓軸一課，「HOKA x 飛越大嶼 by UTMB 越野大師班」更請來世界級精英跑手 – 向付召小姐和運豔橋先生，與本地參賽者作現場交流、分享備戰心得。

向付召（付召）、運豔橋（小橋）
Q1：您們對今次Translantau感興趣的原因是什麼？（二人均表示今年是首次參加「飛越大嶼」，十分期待）

付召：之前多次來港比賽，很多路線都是向海，無論日景夜景，都感到很美。而且來港比賽感覺親切，食物口味又很合適。
小橋：特別喜歡香港的奶茶，還有美食，是喜歡來港比賽的原因之一。聽到途人大叫「加油！」也份外親切。之前上網看到不少視頻，然後又能夠有機會實地作賽，十分期待。

Q2：您們如何描述香港與世界其他地方的路線？您們最喜歡和最不喜歡哪條香港路線？為什麼？（之前二人跑得最多是麥理浩徑）

付召：想起跑麥理浩徑，時常見到馬騮，這是獨特的體驗，到其他國家比賽都看不見馬騮。另外還有大蟒蛇，以前好驚，後來見怪不怪，有時牠們會阻擋賽道，唯有跨過「障礙物」。另外還有山上的野豬，都是香港賽道跟世界不同之處。
小橋：談及香港的賽道，立即想起樓梯，不單止量多，而且各種類型都有，有時比賽完成後，就算睡著了，雙腿仍然感到「落緊樓梯」！

（至於有沒有喜歡和不喜歡的路線，二人都沒有特別意見）

Q3：有沒有為今次Translantau作特別準備？或與其他比賽的準備有沒有不同。

付召：主要想早一點適應夜間的天氣
小橋：早兩天來港就是了，現在北京已經開始寒冷，香港還是比較濕熱。

Q4：要突破成績，由準備工夫至經驗累積，才可以越戰越強，知道付召最近四次參加白朗峰UTMB ，比賽成績有明顯突破，與 2018 年和 2023 年的成績相差近7個小時。是什麼驅使/激勵您每年做得更好？

付召：秘訣就是努力訓練，其實也需要四年的時間，才由「港百」的第四變成「第一」。一直都以「冠軍」為目標、激勵自己。

Q5: 小橋您有超過 12 年以上的越野跑經驗，是什麼讓您每天堅持下去？當你想放棄的時候，會怎麼做？有什麼難忘的比賽可以分享嗎？

小橋：一直都不想將「工作、事業」與「興趣」混為一談。對我來說，越野跑就是興趣，這是很清晰的。越野跑對我來說不是運動，是生活一部份，就好像食飯也是生活一部份。所以越野跑（比賽）對我來說沒有任何壓力；除了受傷患病，其他的只有享受。
第一年參加 UTMB 環勃朗峯越級越野耐力跑時，當時阿爾卑斯山上下著雪，大概跑了 70 多公里後，腸胃不適，本來很想退賽。但凌晨兩三點時經過山上的村莊，村子裡的人好像中國過農曆新年一樣興奮，家家戶戶都出來打氣，令我大為感動；村民又送上補給品，舒緩了我腸胃不適，於是才能繼續比賽。自此，我就希望將這種越野跑文化帶到國內。

Q6. 對今次 Translantau 成續有什麼寄望？（二人都參加了 TL140）

付召：目標是 17 小時內。
小橋：觀察賽道後，認為比想像中困難，所以目標是 13 小時左右！

24 10 月

INTERVIEW

跑步與人：Pei Pei

24 10 月, 2023
Posted by Insports Hub 編輯部

1. 跑步年資？為什麼開始跑步？
2018年開始跑步，因為當時想試玩一個障礙賽。

2. 有沒有跟跑會或教練跑？選擇原因？
我而家跟緊Hill & Heal，教練係怪獸。之前一直都係自己操山，完全冇概念原來越野跑要跑得好，都係要練好路跑，跟住有朋友係跟緊怪獸，叫我可以一齊試下。路跑嘅課堂會有運動場衝圈，有時又會hill repeat，呢啲強度係我自己平時push唔到，所以就決定跟怪獸，直到而家。

3. 日常練習地點或路線？原因？
操山我通常都會練麥徑，一來方便，二來需要練嘅路況都足夠。

4. 最喜歡的跑步用品品牌？最喜歡一對跑鞋？
近來最喜歡著Hoka Mafate Speed 4，對鞋好俾到安全感我，令我跑嘅時候好有信心！

5. 未來比賽目標是什麼？
暫時都係以代表香港，出戰世錦賽為目標。

6. 最想到外國哪裏跑馬拉松或者越野跑比賽？你會揀邊比賽？
最想去冰島跑馬拉松。本身自己好鍾意冰島呢個國家，不過我暫時都唔會參加馬拉松，所以呢個目標暫時都定得遠啲，到時會係想以一個輕鬆嘅心情去參加。

7. 有沒試過有跑步傷患？如何處理？
Shin splints。行都痛，所以一定要停止晒所有跑步，之後積極去物理治療、針灸、拉筋按摩。

8. 喜歡跑山還是路跑？路跑跟山跑有什麼不同感受？
喜歡跑山多啲，鍾意有上山落山嘅轉換，同埋跑山可以令我放鬆心情，欣賞上到山頂嘅景色。相反路跑嘅時候，我會好專心要控制好節奏同心率。

9. 跑山有沒有遇到奇怪或者靈異事件？
幸好暫時都沒有，之後都唔希望有（驚）！

10. 有沒有因為跑步而放棄了其他運動？
其實都算有，以前我都鍾意玩wakeboard，近期鍾意玩wakesurf，但係而家驚整親受傷，所以都放棄咗，唔玩住。

11. 你同時作為一個健身教練，有什麼意見給予跑手去增強自己，覺得哪一個部分的訓練最易被忽略？
無論係路跑定越野跑手，我都會建議大家要做重量訓練，除咗大家都知道要訓練核心同下半身肌肉之外，都唔可以忽略上半身嘅鍛鍊。

最後一題，有什麼社交媒體可以找到你？
IG: peipei11_11

21 6 月

MAGAZINE

Hoka 瘋狂減價的前世今生

11 7 月, 2023
Posted by 達夫

Hoka 因為更換代理而開倉大清貨，不少媒體都有報道。當中過程和前因後果，就讓有相似經驗的筆者娓娓道來。

首先為什麼會出現代理商？
因為一些細品牌，沒有資金在一個地區成立一間公司，所以就會找一個代理商，在不同地區來做銷售，當然亦需要負責 marketing 事項。

香港現時有什麼運動品牌是由代理營運呢？Saucony、Altra、Topo、Merrell、Salomon、Norda、Craft、Reebok；另外有不少配件如：Ciele、Garmin 和 Coros 手錶都是由代理商經營。

Adidas、Nike、New Balance 一直都是自己經營，Puma 十多年前是太古（Swire）代理，之後再轉回由品牌自己經營。

在筆者的處理經驗之下，就曾經回收 Saucony、Merrell 和 On。當中都有兩個條款值得討論一下。

第一個是「回收貨品」，品牌為了不希望代理商在代理權完結前，因要盡快清掉貨存而作出大清貨，令品牌形象受損，所以都會有條件地回收一定數量的貨品。

第二個是「寬限期」，品牌可以按照代理商手上貨量，延長代理商的代理時限，亦是令代理商不做大清貨的辦法。筆者在回收 Saucony 時，亦延長了當時代理商允記的賣貨時間3個月。

為什麼今次 Hoka 沒有引用這兩個方法？筆者估計是貨量太多，品牌回收後亦沒辦法散貨。亦由於貨量太多，若果要延長合約，可能需要延長半年甚至乎更長時間，而打亂了品牌的發展部處。

據消息人士透露，Hoka 的代理現時有約三萬對鞋貨存，當中男女裝 Speedgoat 5 就超過 12,000 對。為什麼會超買（overbuy）這樣多貨？

這就要由 Covid 說起。由於全世界封關，香港人未能出外旅行，所以在 2021年春夏突然多了人到郊外旅行。而 Hoka 的 Speedgoat 4 雖然是跑山鞋，但厚中底設計令行山（Hiking）人士都合適著用。所以當時 Hoka Speedgoat 一鞋難求，隨了令其餘型號如 Mafate 的銷量增加外，連帶 Altra、Topo、Merrell …等山系品牌都有一個小陽春。

Hoka 在 SS21 疫情好轉情況之下，所有零售客戶都加單，想在 SS22 將銷售增加（FW21的訂單已在2020年下單）。但同時間，代理商亦收到代理權將被收回的通知，所以來者不拒地瘋狂收單。有行家笑言，只要有 BR （商業登記證）就算是藥房或士多，都可以下訂單！

可怕的事情就要發生，不同的鞋廠因疫情影響而關閉，令到原先22春夏的訂單延遲到秋冬才到貨。而原先22秋冬的訂單就如常發貨，所以導致到 22 年秋冬在香港的 Hoka 貨存開始囤積。

而在復常下，香港人可以自由離港旅行，行山活動因而減少，供應增加但需求減少下，令事情發展成現在市況。

有沒有更好的處理方法？

有的。理論上，代理提交訂單是會經品牌負責人批核。若果當時見到代理的訂單數量忽然急升，應該加以調整，即是 cut 單。

現時貨存可以如何處理？最好可以轉到有大量需求的地區，不外乎中國、美國、印度…一些人口多的國家。

估計當在深水埗找到 $199 一對 Hoka 時，就應該是清貨期完結之時。

02 6 月

INTERVIEW

跑步與人：Keith

2 6 月, 2023
Posted by Insports Hub 編輯部

1. 跑步年資？為什麼開始跑步？
應該是2009開始，因為當時經常工作開夜，自覺對身體很不健康，所以就與同事一起去附近的公園慢跑一下練返道氣，跑咗幾次就愛上！一跑就跑了十幾年！

2. 跑步跟工作有沒有關係？
本身工作係做廣告，完全同工作無關係，但恆常跑步本身可以減壓，所以對舒緩工作壓力都有啲幫助。

3. 日常跑步路線？點解鐘意係呢條路練？
平日跑步路線都係由烏溪沙 –> 馬鞍山海濱 –> 孖橋，來回剛好10K。至於長課就會伸延至大埔海濱來回大約30K，間中會加多段上梅子林。鐘意原因係本身住馬鞍山，跑步路線可以好flexible，如果有時長課想偷懶hea跑嘅話又可以跑落大圍！

4. 那最喜歡的練跑運動場地？原因？
都係馬鞍山海濱！因為落街就跑得，真係好方便！唯一最唔鐘意就係佢嘅地磚都幾滑，落雨跑要小心點。

5. 最喜歡的跑步用品品牌？
試過很多牌子跑鞋，目前使用嘅品牌都係HOKA。因為我有偏平足，好多牌子嘅跑鞋都做到鞋弓位好窄，而HOKA嘅鞋籠比較寬、鞋底物料舒適，佢嘅碳板鞋又有一定推進力。所以而家無論訓練鞋或比賽鞋都著佢。

6. 最喜歡的跑鞋？
Nike Vaporfly 4%同Hoka Carbon X2，兩對都分別令我PB過半馬及全馬。

7. 有沒有試過跑步傷患？如何處理？
有！有一段時間太倚賴碳板鞋做訓練鞋。長時間使用反而令我跑傷咗腳踝筋鍵，用咗好長時間（差不多一年）先完全復原。所以用合適嘅鞋做比賽/訓練好重要，唔好因為過份追時間而用比賽鞋做訓練。

8. 因為你都玩了滑板一段時間，滑板對跑步有幫助嗎？會怕踩板會受傷而影響跑步？
踩板絕對對跑步有幫助！雖然兩者好似都係下肢運動，但其實都屬於全身運動，下肢要靠上肢動作連動配合，先做得正確。而滑板中跳板嘅動作「POP板」需要用到腳腕力量，對跑步中提腳都有啲幫助；當然亦都因踩板「拗柴」而影響跑步，仲要係比賽前夕！所以而家都盡力而為，畢竟受傷而無得運動好痛苦！

9. 現時跑步目標是什麼？
而家全馬成績最快係3:24，想快少少挑戰sub315。

10. 想到外國跑馬拉松嗎？想跑哪個地方？
曾經試過喺溫哥華跑半馬，當時-5度仲落雪，但都PB咗令我好深刻！而家我最想去東京或者大阪跑一次馬拉松，經常聽日人講好容易PB！

11. 喜歡什麼時段跑步（晏跑/晚跑）？為什麼？
疫情前我通常都係放工夜跑，但近幾年WFH模式令我轉咗朝早跑，自我感覺良好，做嘢仲精神咗，同埋朝早跑好似減磅得快啲！

12. 阿女現在有跟屈旨盈學跑步，期望未來同阿女一起跑步嗎？
當然期待啦！同阿女一齊跑步同踩板可以視為親子活動呀！

13. 有什麼社交媒體可以找到你？
IG: keithymh
FB: Keith Yeung

30 12 月

REPORT

一口氣試2對Skechers路跑鞋好跑嗎？

30 12 月, 2022
Posted by 達夫

筆者一次過收到兩對 Skechers 路跑鞋。香港的 Skechers 一向只 target 中低價運動鞋，今次終於改變銷售策略，引入在外國大受好評的 Go Run MAXROAD 5；另一對為 Go Run 系列練習鞋 PULSE。

MAXROAD 5全鞋重點是中底物料 Hyper Burst，非常輕身。不要以為厚就會軟身，其彈力十分不俗。

中底嵌有 H 型碳板，但老實說碳板的推動力一般，可能就是 MAXROAD 被定位為練習鞋而非賽鞋的原因。鞋面為工程網布，楦位亦夠闊。

鞋領位是厚棉設計，亦不算是一般的賽鞋式設計，但保護性算不錯；腳踭位蹺起，感覺是為腳踭落地跑法做滾動而設計。

兩對鞋款都是以 Goodyear 車呔膠作為外底物料，保證耐用度高。

筆者以 MAXROAD 5 用作幾次 9-12k tempo 的練習測試。由於推力不大，所以穩定性不錯，中底的回彈亦有助把腳拉起。

PULSE 的定位是雖然是慢跑鞋，但用料卻不錯。鞋面是網紗，反而很多品牌都會用於賽鞋上。

鞋領和鞋舌是薄身物料設計，不會焗腳而且輕身；腳踭除了有 TPU 支撐外。鞋踭內亦加入厚棉作保護；感覺設計都是為跑者慢跑時，以腳踭觸地而加強穩定性。

兩對鞋的設計和功能都不差，但市場上有太多同類型跑鞋。要如何突圍而出？相信就要依靠 marketing 來提升銷售。

Go Run MAXROAD 5
用途 : 中長距離練習
內旋 : 中性
重量 : 235g（size US9）
足跟差：6 mm（31mm / 37mm）
尺碼：足碼，沒有偏碼，不用買大或細半碼

08 11 月

INTERVIEW

跑步與人：Sammi Leung

8 11 月, 2022
Posted by Insports Hub 編輯部

1. 跑步年資？為什麼開始跑步？
11年。因為跑步係一個人都可以隨時隨地做嘅運動！

2. 見你都有跑山，喜歡跑山還是路跑多？
其實兩樣都鍾意，跑山就要自己專心集中，而跑步就係放空雲遊嘅好時候。有時真係放空放到外太空，連迎面撞到朋友都未必留意到！

3. 會以同一對跑鞋進行山賽及路賽訓練嗎？
當然唔會！

4. 最喜歡的跑步用品品牌？有沒有原因？
跑步通常都係HOKAONEONE + LULULEMON + CIELE帽 + AIRFLY眼鏡。 HOKA嘅跑鞋好適合我嘅腳形，著得好舒服，而CIELE嘅帽亦係近年跑步拍檔，因為透氣舒服，最緊要係掉落洗衣機洗都唔怕變形，另外 AIRFLY係無鼻托設計嘅太陽眼鏡，又有全視線鏡片，日夜戴都無問題。

5. 喜歡一個人跑還是一班人跑步？為什麼？
兩樣都鍾意，一個人跑就放空，一班人跑就吹水、打卡、食嘢！

6. 通常於甚麼途經得到跑步裝備資訊？網上？雜誌？行街？朋友?
網上 & 朋友。

7. 見你跑過香港很多地方，最喜歡的跑步路線是哪？
其實好多路線都鍾意，亦有好多路線想試，但比較跑得多嘅應該係由屋企起步，跑到海洋公園，上南風道，入布力徑，再經中峽道觀景台返香港仔郊野公園。星期六如果無約朋友跑，自己幾經常會去。

8. 跑完步最想吃什麼？
食乜都OK，只要好味！跑完步就可樂，但山跑後就梗係啤酒啦！

9. 現時跑步目標是什麼?
其實跑步係我放空 + 同朋友聚聚嘅時間，近年無實體賽，就盡情享受HEA跑嘅樂趣，只希望自已會繼續KEEP住跑。

10. 跑步時會聽什麼歌？
任何類型，除咗慢歌。

11. 最喜歡一對跑鞋？
HOKAONEONE Carbon X 2。

12. 有什麼社交媒體可以找到你？
Instagram: ge703

25 9 月

REPORT

Xtep 160X 2.0 已達國際品牌造鞋技術？

26 9 月, 2022
Posted by 達夫

東京奧運馬拉松中，3位中國選手董國建、彭建華、楊紹輝在取得奧運資格 Sub 2:11時，都穿上了 Xtep 的跑鞋160X Pro。此鞋在國內一度斷市，在日前才從新推出。

在今年 3月推出 160X Pro 的時候，由於數量有限，只夠供給精英跑手，所以在同一時間推出了 160X 2.0 供大衆跑手購買。筆者有幸從Xtep 得到一對 160X 2.0 作測試，而這亦是繼第一代 160X 後，筆者再試 Xtep 的跑鞋。

160X 2.0 跟第一代最大的分別是加厚了中底，物料都是最頂級的 X-Dynamic Foam PB。前掌厚度由24mm 加到28mm，腳踭由30mm 加到 32mm。雖然是同樣物料，但加厚後的腳感較硬，應該是「一根柴枝跟十條柴枝加在一起」的理論吧。因受傷關係，筆者暫時未試穿 160X 2.0 跑多於 10k 距離，但穿一代時試過跑 26k 長課都無問題，加厚後一定能應付一隻全馬。

應該是預防加厚後落地時的不穩定，160X 2.0 加闊了前後掌來令穩定性增加，但就收窄了中掌來令重量減少。

X2.0足跟差由 160X 原來的 6mm 減到4mm，令向前推的動力減少，只靠中底和碳板的彈力，好處是跑手自行控制向前傾 (姿勢跑法中的 fall) 的角度來決定配速，不易被足跟差影響。

160X 2.0 鞋面跟第一代用了同一物料，都是透明網紗，透氣度很高。由於網紗料比較軟身，第一代部份用猄皮作固定，但160X 2.0 就改熨上軟膠帶作穩定，雨戰時會更輕身。

鞋舌左右兩邊印上不同字句/型號，由於不是跟鞋身相連，所以底層物料用上猄皮，增加磨擦力，易於固定。不過，出了汗或下雨天時會有黏身感覺。

外底用了跟 160X 一樣的 CPU 膠料，官方資料聲稱可用1,000km，而筆者的第一代在200k後的損毀約5%左右，看來耐磨度不錯。

160X 2.0 比第一代重20g，主要原因不難理解，是中底加厚了的重量。不追求輕量而加厚中底，這做法在市場已很普遍。

隨鞋原裝是用中底物料X-Dynamic Foam 鞋墊，輕身、軟熟；若果不喜歡踩屎感的話，可轉用另一個硬身、較重的EVA物料鞋墊。

筆者用160X 2.0來跑過 tempo 10k、6k、5k（配速430-440），亦試過 easy 60 mins。腳感上因為厚底而感覺舒服，觸地時非常穩定。回彈的感覺是有，但推進力要靠跑手主動向前傾（fall）來加速；估計是足跟差只有4mm，即是說 160X 2.0 並不會主動將配速加快，適合中階跑手著用，易於控制配速。當然已跑到 sub 210的中國跑手，只要稍微一個前傾動作，亦可引用碳板的推動力。

由於中國田徑隊跟 Nike 有贊助所有用品的合約，所以 160X 並沒有出現在東京奧運賽場上，但可見Xtep 的做鞋技術跟世界其他品牌已經差不多程度了。

用途 : 比賽鞋/速度長課
內旋 : 中性
重量（size US9）: 220g
足跟差: 4 mm (前掌28.5 mm/後踭 32.5 mm)

21 9 月

REPORT

性價比更高？Asics Magic Speed 2開箱速評

21 9 月, 2022
Posted by Running Susan

新的Magic Speed 2今次是全掌碳板（上一代是半掌），整個silhouette都跟Metaspeed Sky/Edge+十分相似。中底使用FF Blast+，是高階練習鞋都會見到的中底物料，在Nimbus 24和Kayano 29都有使用。

Shoes spec:
height: 31/24（7mm drop）
weight: 8.1oz

比起Metaspeed Sky+，今次使用的FF Blast+中底較軟一些，用來做高速訓練以至threshold pace訓練都很適合。而對於大部份人來說，用作平常10公里到馬拉松比賽都沒有大問題。

鞋楦除了使用厚一點點（真是那一點點）的面料外，形狀及感覺都跟Metaspeed沒分別，同樣地透氣，可以預期將會更為耐用。

鞋舌一樣是厚一點點（真是一點點而已）；然而外底可說是沒有分別。全掌碳纖維板可有效減少動力流失，亦令中底十分穩定。

今次Magic Speed 2的定價只售$990，在好接近的路感下，相對Metaspeed Sky+的$1,690，性價比簡直是瘋狂地高！

隨後將會送上實跑報告，留意！

29 8 月

REPORT

火熱競速！新配色DEVIATE NITRO ELITE Fireglow

30 8 月, 2022
Posted by RunKid

因防疫關係，有大型實體跑賽被取消，將來的能否舉辦也有隱憂；不過「機會永遠留俾有準備嘅人」，跑步亦然。就算未知將來實體賽事情況如何，訓練仍是要繼續。PUMA自推出競速型碳板跑鞋DEVIATE NITRO ELITE Racer以來，備受跑界好評，無疑是PUMA跑鞋發展上的一款重要型號，新近更推出了鮮艷火熱的Fireglow配色；你可能已看過不少介紹DEVIATE NITRO ELITE Racer有幾好的文章，今次不如由真·用家 – 跑步教練小新，及兩位年輕跑手Vincent、細黑，看看他們怎樣以DEVIATE NITRO ELITE Racer來準戰日後比賽？

左起：Vincent、小新教練（卓健新）及細黑（徐鴻璋），均穿上了DEVIATE NITRO ELITE Racer的最新配色Fireglow，有晒隊形，又搶眼！ — 左起：Vincent（林穎璋）、小新教練（卓健新）及細黑（徐鴻璋），均穿上了DEVIATE NITRO ELITE Racer的最新配色Fireglow，有晒隊形，又搶眼！

訪問前，先溫習一下DEVIATE NITRO ELITE Fireglow的重點功能！

擁有雙層NITRO ELITE Foam氮氣中底，提供超卓回彈力及緩震效果。第一層NITRO ELITE提供絕佳回彈力，同時不失輕巧；第二層NITRO ELITE包覆著PWRPLATE，打造卓越的緩震效果，提供靈活回彈，提升跑步效率。

鞋面採用超輕盈單層多孔透氣網布，有效降低跑鞋整體重量，同時創造絕佳貼合度；搭配著 PUMAGRIP LT 輕量防滑橡膠大底，打造優異防滑效果與抓地力；鞋頭的 semi-curved 楦頭設計，為前腳掌提供更大活動空間，也有效增進推進動力。

至於全鞋焦點：全碳纖維動力推進片INNOPLATE，崁入至兩層NITRO ELITE之間，純碳纖結構帶來獨特支撐性與回彈腳感，提升跑步效能及發揮最強推進力予跑者！

小新教練：「唔使用太多時間適應嘅碳板鞋！」

問到小新對於DEVIATE NITRO ELITE Fireglow未著上腳跑的第一印象，與其他人一樣，都是「好輕、軟熟，中底彈性好大！」至於上腳試過真跑後，也完全回應到之前的預設，「其一驚喜係重量雖同一般嘅薄底鞋差唔多（數據：US9為191g左右），中底亦好腍好軟熟，但踩落去會感到實在，亦俾到足夠回彈，好適合出戰比賽或作速度訓練！」

DEVIATE NITRO ELITE Racer被評為「最親民的碳板跑鞋」，原因是容易適應，是想一試「碳住跑」跑手們的最佳入門。

小新當然也試著過其他碳板跑鞋，認為與DEVIATE NITRO ELITE Fireglow的最大分別，是其「親民度」。「佢嘅heel drop位置冇其他碳板鞋設計得咁高，相對地容易run-in同適應，但因為有INNOPLATE碳板，仍不減推進力，一般跑手嘅訓練都可以handle到對鞋；同時對鞋冇咁高身嘅話，過彎位時亦可減少受傷同失控嘅機會。」小新認為設計上顧及到碳板跑鞋的親民度，是今次DEVIATE NITRO ELITE Fireglow予他最有驚喜的地方。

Vincent：「平衡到推進速力同保護性！」

Vincent跑齡19年，主項為田徑1,500米及5,000米賽，亦參加過渣馬10K賽（最近成績32’49”，男子組10名內）。未來如渣馬能成功舉辦，半馬也會是目標之賽事之一。 — Vincent跑齡11年，主項為田徑1,500米及5,000米賽，亦參加過渣馬10K賽（最近成績32’49”，男子組10名內）。未來如渣馬能成功舉辦，半馬也會是目標之賽事之一。

Vincent第一次穿著DEVIATE NITRO ELITE Fireglow試跑10K Easy，表現就如他預期一樣：鞋面貼腳，輕身、回彈力充足，容易推進，跑得舒服節能。

雖然DEVIATE NITRO ELITE Fireglow能令跑者輕鬆推進、跑得省力，令跑手不知不覺間跑快了，但對於Vincent來說，欣賞的反而是它的保護性。「碳板鞋當然會俾到跑手能量上嘅回饋，但因為好輕好彈，愈跑愈快嘅同時，不覺間跑嘅時候會用多咗力，有機會令跑手受咗傷都唔知；但呢對鞋就攞到個平衡點，輕、快，具備推進力嘅同時，亦俾到跑手足夠嘅保護性。」

Vincent認為最有驚喜位是其 PUMAGRIP LT外底，抓地力強、坑紋分佈細致，濕滑地面都不易「甩尾」，令跑手可放膽追速，滿有安全感！同時外底中間位置也可清楚見到INNOPLATE全幅碳纖推進片。

細黑：「好似踩咗落嚿棉花咁！」

細黑，徐鴻璋，5年跑齡。主項亦是1,500米及5,000米賽，於學界田徑賽曾奪冠軍！

細黑選擇跑鞋的首要條件是其舒適度，就算是少少的不適感，長時間積存下來，都會影響心情、速度甚至成績！而他被DEVIATE NITRO ELITE Fireglow第一眼吸引過去的，是其鮮艷奪目的新推配色。以紅/橙/黃漸變為鞋身基調，未上腳都已能感受那股火熱競速的熱血！再來就是其超現透視感的鞋面物料，未著上腳已感受到絕對輕身及透氣！

有相有真相，其monomesh單層多孔透氣網布面料，透到「冇朋友」！令至DEVIATE NITRO ELITE Fireglow「想唔輕都難」！

細黑第一次著上DEVIATE NITRO ELITE Fireglow是用來作14K Tempo run，3:30 pacing，他即時感到「好有驚喜！」「回彈力真係好強！」還有最主要的是，其碳纖板所提供的槓桿推進功效，一點也不「夾硬嚟」！細黑：「都有著過其他牌子嘅碳板鞋，推你向前跑嘅感覺有啲會令你好吃力，但DEVIATE NITRO ELITE就回彈力夠之餘，唔會推到你好吃力！跑到去10K時，回彈力依然充沛，同時個推進力感覺仲係好舒適同順暢。」

雙氮氣中底NITRO ELITE是另一個令細黑驚喜的細節，輕身軟稔之餘，「好似踩咗落嚿棉花咁！」

一句推介DEVIATE NITRO ELITE Fireglow

3位都覺得，下次可加強後踭位置的穩定性，但對現時版本的DEVIATE NITRO ELITE Fireglow都已非常滿意！

最後，如要以一句形容DEVIATE NITRO ELITE Fireglow，3位又會交出甚麼的總結？

小新教練：「係一對想突破自己嘅比賽鞋選擇！」

Vincent：「好Runner-friendly！適合想舒適及pain-free（無傷）去追求速度嘅跑手！」

細黑：「顏色sharp啦！同適合想追求長啲距離跑程同舒適度兼有嘅跑手！」

19 8 月

REPORT

蝴蝶山測試The North Face VECTIV Endruis II

22 8 月, 2022
Posted by Dick@講鞋

雖然筆者很少越野跑，但對The North Face VECTIV Enduris II是一試愛上，點解初相識就會咁夾嘅？

開箱時，已經覺得VECTIV Enduris II與平時跑Track、跑街嘅厚底跑鞋幾相似，例如厚度十足嘅中底（前掌25mm、後掌31mm，heel to toe drop 6mm），加埋前後掌明顯翹起嘅弧形滾軸中底（rocker midsole），而且驟眼睇，外底鞋釘冇想像中咁凸出，到底你係跑on road還是off road？

上星期初，筆者就着上VECTIV Enduris II到蝴蝶山開鞋。事前fact check過，VECTIV有三個鞋款，而Enduris屬於緩震型號（同系嘅Infinite強調保護，Flight就係碳板比賽鞋，本港兩位山界大神曾小強與黃浩聰都係着Flight VECTIV參賽），果然一起步已經感受到cushioning，由山腳到山腰嘅行山徑門口都以石屎路為主，厚厚嘅EVA中底唔只吸震，而且用上雙密度配方，所以仲有唔錯嘅回彈與反應，感覺就似平時平路練tempo。越野跑環境複雜多變，既有硬質嘅石地，又有鬆軟嘅沙礫與泥窞，VECTIV Enduris II嘅中底軟中帶韌，舒適而不忘實戰需要。

由山腰到山頂就以泥路為主，多咗上落坡及彎路，加上實測前下了驟雨，沿途變得濕滑泥濘，但係每一步都唔會有踩屎感，依然keep到提腿反應，原因除咗係上文提到嘅中底特性，亦與中底內藏3D TPU承托板有密切關係，後者不但係全掌式設計，前、後掌都有延伸部分外露出嚟鉗住鞋身，無論前、後掌落地，所到之地是軟或硬，都有腳踏實地嘅穩定效果，而且呢塊TPU並非鐵板一塊，係有若干彈性，又是另一與平路跑鞋相似之處。

至於與平路跑鞋最似，讓筆者可以無縫接軌一試即like嘅設計，就係好似船底形狀嘅rocker midsole，令跑手更順暢完成落地到提腿嘅步伐變化，長途嚟講有慳力作用，而VECTIV Enduris II亦都做到，尤其是喺較平、較硬嘅路面，仲會幫到加速，好爽！

雖然講咗好多VECTIV Enduris II與平路跑鞋相似嘅地方，但係佢未忘初心，本質仍然係一款長途緩震型越野跑鞋。驟眼看，鞋釘唔算好凸，原來都有3.5mm高度，加上選用品牌現時最可靠嘅外底物料SurfaceCTRL製成，有齊抓地、耐磨與防滑三項特性，筆者落山時遇過泥窞與花崗岩交接嘅路段，都無驚無險順利走過。