1. 跑步年資？為什麼開始跑步？
應該就嚟夠十年！
同好多人一樣：為減肥，個時個情況係有人話我似林雪…
咁死得啦！於是開始跟家弟跑下步，同報咗第一場十公里賽，喺沙田跑嘅，有目標逼自已去keep住跑。跟手跑跑下，發覺跑步幾好玩，又減到肥，就鐘意咗。
2. 可用一句說話總結跑步對你的意義嗎？
「跑了便懂」。
生活大部份嘅嘢其實同跑步一樣。只有真正跑咗/做咗，先會知道究竟係咩一回事。只有自己真正跑過嘅路先會認得、自已做過嘅嘢先會明白。
唔好ＦＦ喇！跑啦～做啦～人生苦短～
3. 選擇跑鞋的第一個條件是甚麼？
舒服。
我跑得唔快亦唔鐘意衝圈做時間，反而會跑比較長嘅時間同距離。著住跑超長時間，ＢＡＣＫ ２ ＢＡＣＫ連續跑幾日，對鞋舒服無負擔，無水泡傷患真係最重要嘅。
4. 最喜歡的一對跑鞋。
Brooks Hyperion Tempo，「輕 彈 爽」！
輕 – 對鞋好輕身舒服，腳再攰都可以無負擔一直跑落去；
彈 – 個人偏好著好有回彈力嘅鞋，呢對個底彈得來好舒服；
爽 – 鞋面透氣，包裹感剛好，而且好輕好去，跑長距離好「爽快」！
5. 喜歡跑山還是路跑？原因？
喜歡跑山多點。
因為山上嘅景色真係好靚好有趣，就算係同一座山，每一次跑，喺唔同時間﹑唔同天氣，都完全唔一樣， 每一次都係去緊一次小旅行。
路跑就比賽似禪修，大部分時間條路都好悶，都係同自已對話同自已對決。
6. 香港哪一段山跑路線覺得最具挑戰性？
甚少用挑戰心態上山，因為天氣﹑狀態完全唔係控制之內。
如果講路線辛苦，盛夏走青山圓頭山來回，簡直係身處火地獄。全程都係光頭山、浮沙碎石，好似喺荒漠上走咁，既無樹木亦無補給同退路。如果要去走呢段路，一定要準備充足、有齊食水補給同結伴同行。
7. 你覺得最能影響山賽表現的因素是？訓練／裝備／十卜／天氣？為什麼？
天氣。就算訓練再多，面對天氣、温度等大自然變化，人類真係無咩辦法。
好似曾出戰４屆日本UTMF（ULTRA-TRAIL Mt.FUJI）， 其中有兩屆， 賽事都因為天氣惡劣，暴雨加氣溫急降而需要腰斬。
亦試過係UTMB（Ultra-Trail du Mont-Blanc） 路上遇上大風雪，每一步都要同自已講要行落去，就算幾攰同辛苦都唔好停低，因為停低就隨時凍死，高山上亦無人可以幫你救你。
一直嘅長時間訓練，只係幫你提昇完成嘅機率，同學會堅持嘅心態。但成事最終都在天，要有賴大自然恩賜好天氣。
8. 有遇到過跑步低潮/傷患嗎？怎樣克服過來？
傷患一來，體重便跟住上升，試過越野比賽落級時意外斷手掌骨，有近半年多完全唔上得山同做激烈嘅運動。只可試下做其他嘢，離開跑步嘅環境。嗰時我會去不停行樓梯，又會去踩單車機，保持心態體能，總之唔影響傷患嘅嘢都去試下。
同時又會去四圍亂行，睇下小區嘢、食下地區美食，試唔同嘅嘢，到傷好返，就會好想同好有動力去跑。亦因為呢段經歷發掘出好多香港有趣地方同跑步路線。
9. 跑步跟工作有沒有關係？請介紹一下。
Yes or No。唔係職業運動員，當然沒有直接關係。
但係工作上經常要外勤，跑步累積嘅體能有用，而且運動夠，成個人都會反應快，轉數快好多，對工作有好幫助。
另外我工餘亦有拍下跑山、跑步嘅影片放上 YouTube，當中嘅路線，重有同行嘅跑友… 全部都係跑步帶俾我嘅。
10. 另一半對有跑步嗎？對你跑步有意見嗎？
有呀，短距離十公里內我一定唔夠佢跑，Ha Ha！
因為我鐘意越野跑，有時一個人通山亂走，去試新路線同郊訓練等，始終都有啲擔心我嘅安全。不過佢係200%支持我跑步。過去好多本地同海外長距離山賽（100公里、168公里)， 佢都會做support支持我參賽，同接我「放學」。當想到有個人咁辛苦走來走去支援，同喺終點等你，完賽嘅動力就大好多。
11. 跑步途中會想什麼？
工作以外嘅嘢，跑山好多時候係認路，發掘下周邊有趣嘅景點同新路線等等。
路跑時我就好鍾意亂諗嘢，eg幻想有隻粉紅色嘅大笨象，放咗一個大屁彈上太空，上到太空變咗紫色，再喺月球撞到打緊golf嘅嫦娥…之類！
真係亂諗嘢，放空mode。
