大眾心目中嘅山賽一般分為兩類，一種係高難度長途大賽，每屆都係大家焦點，例如HK100、V162、Translantau等等100k或以上賽事；另一種係中短途，50k或以下，20k左右起錶，一般跑手可於一日內、入黑前完成；較講求速度同山/路跑經驗嘅結合。好似筆者就啱啱參加完一個25k賽事，實際上攀升唔多（1,400米+），反而對跑手嘅跑步經驗有所要求；無論喺山、路，大部分路段都需要跑，否則完賽時間會拖到好長。
對於呢類比賽，唔同人會有唔同跑鞋部署。為求速度，有啲跑手會索性用路跑鞋出賽；有啲就會選擇路跑感強，或可山/跑兩用嘅跑鞋。之前介紹過Craft嘅Pro Trail – Endurance Trail，今次就介紹嚟自Craft CTM系列嘅Ultra Trail。
CTM – Craft Tailored Motion，即以最高技術及最佳物料打造嘅跑鞋系列，就如品牌較出名嘅Ultra 3及Ultra Race Rebel。Ultra Trail會即時令大家諗起佢嘅路跑鞋/輕山跑鞋兄弟 – Ultra 2或Ultra 3，而以Trail命名，當然係專門針對跑山著用。
外形上，Ultra Trail同Ultra 3一脈相承，基本上一樣，唔同嘅係，加入咗啲專門針對山跑嘅細節功能。首先最大唔同係鞋面物料，Trail採用帶山系質感嘅一體尼龍網布，增強耐用度；大網眼織紋以防沙石入鞋及容易撕裂。鞋頭、內籠都加有TPU保護性膠條，山鞋必備。
另一最大分別係外底膠粒（lug），上山同路跑當然完全唔同。Trail採用兩段正反箭嘴形分布，以增強喺山徑或鬆泥、山石上嘅咬地力，前掌向前式嘅箭嘴形態，仍有助防滑嘅同時，保有一定速度。
中底採用EVA物料Ud Foam，有唔同紋路同硬度提供唔同區域性功能，上層較軟及紋路細緻，提供能量回饋；下層負責吸震及穩定性。協作Ultra Rebound™鞋墊，同時加強能量回饋。
鞋領同鞋舌加入棉布包覆，以增加包覆度、舒適感，及減低長時間著用會引起嘅刮腳危機。鞋舌中段亦有彈性布料與內籠相連，防走位。鞋size偏大半至一碼，筆者著開US10，試鞋後US9，選購時記得試鞋試鞋試鞋！
Trail前後差雖然都係10mm，但後踭高係35mm，比路跑Ultra嘅40mm矮，喺山上跑動始終唔需要太厚中底，只要保持住一個適合嘅滾動力已經足夠。
設計上延續Craft嘅北歐戶外感，型號名、鞋身/中底物料等細節（designed in Sweden…）都印咗喺鞋上。呢個相信亦係好多人鍾意Craft鞋設計嘅地方。特別一提，Ultra Trail鞋身同鞋舌都印有Craft Trail嘅山形outline logo，但Endurance Trail就冇，我覺得個logo好型，對鞋有嘅話，我會加分！
實測當日，走麥徑5段，天陰有微雨，路面、石面、樹根等都係少濕狀態。
先講跑方面，由於係類近於Ultra 3嘅跑鞋設定，對於路跑人，喺山平路上嘅跑感會非常熟悉，提速同著地感都容易適應；前掌呈少許闊身嘅關係，落地感同轉向都好穩定。
外底大膠粒（lug）所產生嘅咬地效能，喺當日嘅濕雨天氣都發揮得好稱職，落梯、樹根、過石等都恰如其分地提供到防滑力，亦冇明顯嘅煞停感。
相比起Endurance Trail，筆者較喜歡Ultra Trail。一來腳形合適，穿得比Endurance Trail舒服，二來是著用時嘅跑感熟悉，上腳冇耐就可以隨心發揮；亦因為咁，Ultra Trail係比較適合啲想由路跑轉玩山跑，又或者針對一啲跑程較多嘅山賽著用。
下個山賽有機會及路況適合，我都會考慮著佢比賽。
